10. இவருக்கு இன்னது இல்லை

வேசைக்கு நிசம்இல்லை திருடனுக்கு உறவுஇல்லை
    வேந்தர்க்கு நன்றிஇல்லை
  மிடியர்க்கு விலைமாதர்மீது வங்கணம்இலை
    மிலேச்சற்கு நிறையதுஇல்லை
ஆசைக்கு வெட்கம்இலை ஞானிஆனவனுக்குள்
    அகம்இல்லை மூர்க்கன்தனக்கு
  அன்பில்லை காமிக்கு முறைஇல்லை குணம்இலோர்க்கு
    அழகில்லை சித்தசுத்தன்
பூசைக்கு நவில் அங்க சுத்திஇலை யாவும்உணர்
    புலவனுக்கு அயலோர்இலை
  புல்லனுக்கு என்றுமுசிதான் உசிதம் இல்லைவரு
    புலையற்கு இரக்கமில்லை
மாசைத் தவிர்த்த மதிமுக தெய்வயானையொடு
    வள்ளிக்கு இகிசைந்த அழகா
  மயில்ஏறி விளையாடு குகனே! புல்வயல்நீடு
    மலைமேவு குமரேசனே.