93. இது சேரின் இது பயன்படாது

அழலுக்குளே விட்ட நெய்யும், பெருக்கான
     ஆற்றில் கரைத்தபுளியும்,
  அரிதான கமரில் கவிழ்த்திட்ட பாலும்வரும்
     அலகைகட்கு இடுபூசையும்,
சுழல்பெருங் காற்றினில் வெடித்தபஞ்சும், மணல்
     சொரிநறும் பனிநீரும்,நீள்
  சொல்அரிய காட்டுக்கு எரித்த நிலவும்கடல்
     சுழிக்குளே விடுகப்பலும்,
விழலுக்கு இறைத்திட்ட தண்ணீரும், முகம்மாய
     வேசைக்கு அளித்தபொருளும்,
  வீணருக்கே செய்த நன்றியும் பலன்இல்லை
     விருதா இது என்பர்கண்டாய்
மழலைப் பசுங்கிள்ளை முன்கை, மலைமங்கைதரு
     வண்ணக் குழந்தைமுருகா!
  மயில்ஏறி விளையாடு குகனேபுல் வயல்நீடு
     மலைமேவு குமரேசனே!