(க-ரை) பொலிவு மிகுந்த "கொங்குநாடு செழித்தால் இப்புவியிலுள்ள
எந்தநாடும் நல்ல பலனைப் பெற்றுச் சுகம் அடையு" மென்று சொல்கின்ற
பழமொழிக்கு இணங்க மாடுகன்றுகள் விருத்தி கொண்டது கொங்குமண்டலம்
என்பதாம்.                   

                      (மேற்)

                     (ஒரு பழமொழி)

                      எல்லை

     (க-ரை) கிழக்கில் மதிற் (கோட்டைக்) கரையும், தெற்கில் பழநியும்,
மேற்கில் வெள்ளியங்கிரியும், வடக்கில் பெரும்பாலையும் நான்கு திக்கின்
எல்லையாகக் கொண்டு வளப்பம் பொருந்தித் தேவர்களும் தங்கியுள்ளது
கொங்கு மண்டலமென்பதாம்.

                 நாடு - இணை நாடு

     (க-ரை) பலகலைக் கடலையுண்டு சுவையுடைத்தாய்த் தோல்வி
பெறாது பேசவல்ல நாவலர்கள் எந்நாளும் இன்பம் நிறைந்து வாழும்
இருபத்திநான்கு நாடுகளிலும் அவற்றைச் சூழ்ந்த இணைநாடுகளிலும்
முருகவேள் கோயிலும், திருமால் கோயிலும், சிவாலயங்களும்
நிறைந்துள்ளது, கொங்கு மண்டலம் என்பதாம்.

* வடக்குத்தலை மலையாம் என்று பாட பேதமுண்டு வடகொங்குக்குப்
பெரும்பாலையும், மேல் கொங்குக்குத் தலைமலையும் வடக்கெல்லையாக
இருத்தலின் இவ்வித பாடபேதம் ஏற்பட்டிருக்கிறது.