நிலத்தில் வைத்திருந்த கமண்டலத்தைக் கவிழ்த்தனர். உள்ளடங்கியிருந்த
காவேரி நதி நிலத்திற்பட்டுப் பெருக்கெடுத்துச் சீகாழி வழிச்சென்றது.

                        (மேற்)

        ஆனைமுகனைத் தொழுவோர் குட்டிக்கொள்ளல்

     (க-ரை) விநாயகக் கடவுளை வணங்குவோர், தலையிற்
குட்டிக்கொள்ளுங் கொள்கையானது, முதலில் உண்டான இடமான
கொங்கு மண்டலம் என்பதாம்.

     வரலாறு :- காவிரி நீர் அடங்கிய கரகத்தைக் கவிழ்த்து ஓடிய
காக்கை, சிறுவனாக நிற்கக்கண்டு, புடைத்தற்காக, அகத்தியர் பின்தொடர்ந்து,
பின் விநாயகர் எனத்தெரிந்தனர். அறியாது குட்டுதற்காக அடிகளைத்
தொடர்ந்த என் பிழையைப் பொறுத்தருளல் வேண்டும். அக்குட்டு எனக்கே
ஆகுக என இருகைகளையும் சேர்த்து அகத்தியர் குட்டிக்கொண்டனர்.
இதுபோலக் குட்டிக்கொண்டு பணிவோர் வணக்கத்திற்குப் பெரிதும்
மகிழ்ந்தருளல் வேண்டுமெனத் துதித்தனர். அவ்வாறே அருள்புரிகின்றனம்
என்ற வரத்தை விநாயகக்கடவுள் கொடுத்தனர். ஆனதால் குட்டிக் கொண்டு
வணங்கும் வழக்கம் முதலில் கொங்கு நாட்டில் நிகழ்ந்தது.