அறுசீர்க் கழிநெடிலடி ஆசிரிய விருத்தம்

2562.

     மாதங்க முகத்தோன்நங் கணபதிதன்
          செங்கமல மலர்த்தாள் போற்றி
     ஏதங்கள் அறுத்தருளுங் குமரகுரு
          பரன்பாத இணைகள் போற்றி
     தாதங்க மலர்க்கொன்றைச் சடையுடைய
          சிவபெருமான் சரணம் போற்றி
     சீதங்கொள் மளர்க்குழலாள் சிவகாம
          சவுந்தரியின் திருத்தாள் போற்றி

உரை:

      யானை முகத்தையுடையனாகிய நமது கணபதியின் சிவந்த தாமரை மலர் போன்ற திருவடிகள் போற்றி; துன்பங்களின் தொடர்பு நீக்கித் திருவருள் புரியும் குமர குருபரனாகிய முருகனுடைய இரண்டாகிய திருவடிகள் போற்றி; வலியுடைய பொன்னிறம் கொண்ட கொன்றை மலர் சூடும் சடையையுடைய சிவபெருமான் திருவடிகள் போற்றி; குளிர்ச்சி பொருந்திய பூக்களை யணிந்த கூந்தலையுடைய தேவியாகிய சிவகாம சுந்தரியின் திருவடிகள் போற்றி. எ.று.

          மாதங்கள் - யானை. செங்கமல மலர் - செந்தாமரைப் பூ. மலர் போலும் தாள் -மலர்த்தாள் என வந்தது. தாள் - திருவடி. ஏதம் - துன்பம். துன்பத்துக்கு ஏதுவாகிய அஞ்ஞானத்தைப் போக்கி இன்பத்துக்கேதுவாகிய ஞானம் நல்குவது பற்றி முருகனை, “ஏதங்கள் அறுத்து அருளும் குருபரன்” என்கின்றார். குருபரன் - மேலாய ஞான ஆசிரியன்; இளமையான ஞானாசிரியன் என்றற்குக் குமரகுருபரன் என்று வழங்குகின்றனர். இளமைப் பருவத்தே சிவனுக்குப் பிரணவ ஞானத்தைச் சொன்ன வரலாற்றை இச் சொற்றோடர் நினைப்பிக்கின்றது. தா - வலி. தங்க மலர் - பொன்னிறம் கொண்டமலர். “பொன் திகழ் கொன்றை மாலை பொருந்திய நெடுந் தண்மார்பர்” (கச்சி யேகம்பம்) எனத் திருநாவுக்கரசர் கூறுவது காண்க. சீதம் - குளிர்ச்சி. சுந்தரி - சவுந்தரியென வந்தது.

          இதனால் கணபதி, முருகன், சிவன், பார்வதியாகிய தெய்வங்கள் போற்றப்பட்டவாறாம்.