அறுசீர்க் கழிநெடிலடி ஆசிரிய விருத்தம்

5338.

     அன்பாடு திருப்பொதுவில் ஆடுகின்ற
          அரசேநின் அடிமேல் ஆணை
     என்பாடொன் றிலைஎன்னால் துரும்பும்அசைத்
          திடமுடியா திதுகால் தொட்டுப்
     பொன்பாடெவ் விதத்தானும் புரிந்துகொண்டு
          நீதானே புரத்தல் வேண்டும்
     உன்பாடு நான்உரைத்தேன் நீஇனிச்சும்
          மாஇருக்க ஒண்ணா தண்ணா.

உரை:

     அன்பு மிகுகின்ற அழகிய அம்பலத்தில் ஆடுதல் புரிகின்ற அருளரசாகிய சிவனே! நின் திருவடி மேல் ஆணையாகச் சொல்லுகின்றேன்; என்பால் ஒரு குற்றமில்லை; என்னால் ஒரு துரும்பையும் அசைக்க முடியாது; இது தொடங்கி அழகிய செயல்களை எவ்வகையாலேனும் செய்துகொண்டு நீயே என்னை ஆதரித்தருள வேண்டும்; இதனை உன்னிடத்தே சொல்லிக்கொள்கின்றேன்; அண்ணலே நீ இனிச் சும்மா இருக்க முடியாது. எ.று.

     அன்புடைய அன்பர்கள் வந்திருந்து அன்புப் பணி செய்து இன்பம் மிகுகின்றாராதலால் அம்பலத்தை, “அன்பொடு திருப்பொது” என்று பாராட்டுகின்றார். பொன்பாடு - அழகிய செயல்கள். புரத்தல் - ஆதரித்தல். யான் செய்வன யாவையாயினும் அவற்றை ஏற்று என்னை ஆதரித்தருள வேண்டும் என்பாளாய்த் தலைவி, “உன்பாடு நான் உரைத்தேன்” என்று உரைக்கின்றாள்.

     (43)