அறுசீர்க் கழிநெடிலடி ஆசிரிய விருத்தம்

5443.

     என்உடலும் என்உயிரும் என்பொருளும்
          நின்னஎன இசைந்தஞ் ஞான்றே
     உன்னிடைநான் கொடுத்தனன்மற் றென்னிடைவே
          றொன்றும்இலை உடையாய் இங்கே
     புன்னிகரேன் குற்றம்எலாம் பொறுத்ததுவும்
          போதாமல் புணர்ந்து கொண்டே
     தன்னிகர்என் றெனவைத்தாய் இஞ்ஞான்றென்
          கொடுப்பேன்நின் தன்மைக் கந்தோ.

உரை:

     என் உடம்பையும் உயிரையும் என் பொருட்களையும் உன்னுடையவை; அப்பொழுது என்னை ஆண்டு கொண்ட பொழுதே உன்னிடத்தே மனமுவந்து கொடுத்துவிட்டேன்; அதனால் என்னிடத்தில் ஒன்றுமில்லை; நீ எல்லாம் உடையவன்; இவ்வுலகில் புல்லைப்போன்ற எளியவனாகிய என் குற்றமெல்லாம் பொறுத்துக்கொண்டது போதாமல் என்னுட் கலந்து கொண்டு தனக்கு நிகர் என்று வைத்து விட்டாயாதலால் இப்பொழுது உன்னுடைய தன்மையை வியந்து யான் யாது கொடுப்பேன். எ.று.

     நின்ன - உன்னுடையவை. என்னை நீ ஆட்கொண்ட போதே என்னுடைய உடல் உயிர் பொருள் யாவையும் உன்னுடையவை என்று கொடுத்து விட்டேனாதலால் இவற்றின் வேறாக என்னிடம் ஒன்றுமில்லை என்பது கருத்து; அங்ஙனமிருக்க என்னுடைய குற்றங்களைப் பொறுத்து என்னுட் கலந்து கொண்டு என்னையும் தனக்கு நிகராக வைத்தருளினாய்; நினது பெருந்தன்மைக்கு யான் யாது கொடுப்பேன் என்பாராய், “இஞ்ஞான்று என்கொடுப்பேன் நின் தன்மைக்கு” என்று உரைத்தருளுகின்றார்.

     (148)