உள்ளத்தி னுள்ளே ஒளித்திருந்தென் கள்ளமெல்லாம்

வள்ளல்அறிந் தால்எனக்கு வாயுமுண்டோ பைங்கிளியே.

     (பொ - ள்) அடியேனுடைய நெஞ்சகத்தே மெய்ப்புணர்ப்பாய்க் கலந்திருந்தும், எளியேன் காணாவாறு ஒளித்திருந்து யான் செய்யும் வஞ்சனைகள் அனைத்தையும்¹ வள்ளலாகிய என் தலைவன் அறிந்தருளினன். அதனால் ஏழையேன் ஒன்றை மறைத்துக் கூற அடியேனுக்கு வாயுமுண்டோ?

(55)

ஆகத்தை நீக்குமுன்னே ஆவித் துணைவரைநான்

தாகத்தின் வண்ணந் தழுவனோ பைங்கிளியே.

     (பொ - ள்) அடியேன் இவ் வுடம்பினின்று நீங்குமுன்னே என் ஆருயிர்க்குத் துணையாகிய தலைவரை எளியேன் காதல் விருப்பத்தின்படி தழுவுவேனோ? ஆகம் - உடம்பு.

(56)

தானே சுபாவந் தலைப்படநின் றான்ஞான

வானோ னவரும் வருவாரோ பைங்கிளியே.

     (பொ - ள்) (ஒன்றேயுளது என்னும் ஏகான்மவாத வுணர்வாகிய தற்போத முனைப்பால்) தானே இயல்பென்னும் தன்மை தலைப்பட்டு நின்றால் திருச்சிற்றம்பலம் எனப்படும் சிதாகாய வடிவினனான இறைவன் எளியேன்பால் வந்தருள்வனோ? (வாரான் என்பதாம்.)

(57)

கள்ளத் தலைவரவர் கைகாட்டிப் பேசாமல்

உள்ளத்தில் வந்த உபாயமென்னோ பைங்கிளியே.

     (பொ - ள்) அடியேனிடத்துள்ள மறைப்பாற்றலாகிய திரோதான சத்தியால் மறைக்கப்பட்ட கள்ளத் தலைவராகிய என் நாயகர் அறிவடையாளக்கை (சின் முத்திரை) காட்டி உரையாடாது எளியேனுள்ளத்தில் வந்தருளிய விரகு என்னோ? விரகு - உபாயம்.

(58)

45. எந்நாட்கண்ணி

1. தெய்வ வணக்கம்

நீர்பூத்த வேணி நிலவெறிப்ப மன்றாடுங்

கார்பூத்த கண்டனையான் காணுநாள் எந்நாளோ.

     (பொ - ள்) வான்புனலாகிய கங்கை தங்கியுள்ள திருச்சடையின் மேல் ஆருயிரின் அடையாளமாகிய பிறை திகழத் தில்லைத் திருச்சிற்றம்பலத்தின்கண் ஐந்தொழிலருட் பெருங்கூத்தை இயற்றியருளும் திருநீலகண்டப் பெருமானாம் அம்மையம்பலவாணனைத் திருவருளால் அடியேன் கண்டு வழிபடும் நாள் எந்நாளோ?

(1)

1.	'கள்ளனேன்'. 4. 75 - 3.
"	'ஏகமாய் நின்றே', சிவஞான போதம் 11. 1 - 2.