உள்ளத்து நீ பொருந்தி இருத்தலால், எளியேனைப் பிணித்திருந்த ஆணவ வல்லிருள் அனைத்தும், அறிய வொண்ணாதவாறு எங்கோ சென்று ஒளிந்து கொண்டதே.

(68)

எங்கு மென்னை இகலுற வாட்டியே

பங்கஞ் செய்த பழவினை பற்றற்றால்

அங்க ணாவுன் னடியிணை யன்றியே

தங்க வேறிட முண்டோ சகத்திலே.

     (பொ - ள்) எப்பிறப்பிலும் எவ்விடத்திலும் என்னை விடாது தொடர்ந்து கொடிய பகைவரைப் போன்று துன்புறுத்திக் கீழ்மையாக்கிய பழவினையின் தொடர்பு நின்திருவருளால் அறப் பெற்றால், பேரருட்கண் வாய்ந்த பெருமானே! நின் திருவடியிணையல்லாமல் புகலாய்த் தங்கியுறைவதற்கு இவ்வுலகத்தின்கண் வேறிடமுண்டோ? (இல்லையென்றபடி) இவ் வுண்மை வருமாறு :

     மேற்கோள் "இனி இவ்வான்மாத் தன்னை இந்திரியத்தின் வேறாவான் காணவே தமது முதல் சீபாதத்தையணையு மென்றது."

     ஏது: "ஊசல் கயிறற்றால் தாய்தரையேயாந் துணையான்."