(பொ - ள்.) இறவாத இன்ப அன்பினைப்பெருக்கி, அடியேனின் ஆருயிரைக் காத்தருளவந்த பேரின்பப் பெருக்கே, பேராத்தலைவனே; இறை-தலைவன்.

(14)

வானமெல் லாங்கொண்ட மௌனமணிப் பெட்டகத்துக்

கானபணி யான அணியே பராபரமே.

     (பொ - ள்.) அறிவு வெளிமுற்றும் தன்னுள்ளே வைத்தருளிய மவுன நிலைசேர் அழகிய பேழையினிடத்து வைக்கத் தகுந்த சிறந்த அணிகலமே! பெட்டகம்-பேழை. பணி-அணிகலம்; நகை.

(15)

ஓடும் இருநிதியும் ஒன்றாகக் கண்டவர்கள்

நாடும் பொருளான நட்பே பராபரமே.

     (பொ - ள்.) உடைந்த மண்ணோடும் வீட்டினைமூடும் வியன் ஓடும் பெரும்பொருளும் (வேண்டத்தக்க மாயா காரியப் பொருள்களே, பயன்தரு முறையினை நோக்கின் மயலாற்கொள்ளும் உயர்வு தணிவு கூறுதற்கில்லை) ஒப்ப நோக்கிப் பயன்கொள்ளும் விறலினராகிய மெய்யுணர்ந்தார் நாடத்தகுந்த நற்பொருளாகிய நட்பே!

(16)

சித்த நினைவுஞ் செயுஞ்செயலும் நீயெனவாழ்

உத்தமர்கட் கான உறவே பராபரமே.

     (பொ - ள்.) மனத்தின்கண் தோன்றும் நினைவும் அதன் வழியாகச் செய்யப்படும் செயலும் (தேவரீர் திருவாணையின்றி நிகழாமையின் அவையும்) நின் கட்டளையே என்று நின்னை மறவா நினைவுடன் வாழும் தலையானவர்களுக்குத் தகுதியான சுற்றமே!

(17)

போதாந்தப் புண்ணியர்கள் போற்றிசய போற்றியெனும்

வேதாந்த வீட்டில் விளக்கே பராபரமே.

     (பொ - ள்.) மெய்யுணர்வுக்கொழுந்தாக விளங்கும் சிவபுண்ணியப் பேற்றினர் செந்தமிழ் மறையாம் போற்றி வெல்க போற்றியென்று பூத்தூவி வழிபடும் இடம் மறை முடிவாம் நிலைக்களமாகும்; அந் நிலைக்களமான வீட்டினுக்கு ஏற்றிவைத்த திருவருள் விளக்கே!

(18)

முத்தாந்த வீதி முளரிதொழும் அன்பருக்கே

சித்தாந்த வீதிவருந் தேவே பராபரமே.

     (பொ - ள்.) வீடுபேற்றின்ப வீதிவளாகத்தினுள் தேவரீர் திருவடித் தாமரையினைத் தொழுகின்ற மெய்யன்பர்களின் பொருட்டுச் செம்பொருட்டுணிவாம் சித்தாந்த வீதியினில் திருவுலாக்கொள்ளும் முழுமுதற்றெய்வமே!

(19)

ஈனந் தருமுடலம் என்னதுயான் என்பதற

ஆனந்தம் வேண்டி அலந்தேன் பராபரமே.

     (பொ - ள்.) இழிவினையுண்டாக்கும் இவ்வுடம்பு என்னதென்றும் யானென்றும் சொல்லி இறுமாக்கும் இருவகைச் செருக்கும் அற்றொழியும்படி