என்னை அறிய எனக்கறிவாய் நின்றருள்நின்

தன்னைஅறிந் தின்பநலஞ் சாரவைத்தால் ஆகாதோ.

     (பொ - ள்) (அடியேன்) ஆன்மாவாகிய என்னை அதன் உண்மைத் தன்மையினை யறிய எளியேனுக்கு அறிவாய் விளங்கிநின் றருளிய உன்னை யறிந்து பேரின்ப நலத்தினை எளியேன்பால் சேரவைத்தால் ஆகாதோ?

(2)

பொய்ம்மயமே யான புரைதீர எந்தைஇன்ப

மெய்ம்மயம்வந் தென்னை விழுங்கவைத்தால் ஆகாதோ.

     (பொ - ள்) வடிவம் வந்து எளியேனை விழுங்கி உன்னுள் ஒடுக்கிக் கொள்ளச் செய்தால் ஆகாதோ? புரை - குற்றம். விழுங்கல் - ஆட்கொள்ளல்.

(3)

மட்டில்லாச் சிற்சுகமாம் வாழ்வேநின் இன்பமயஞ்

சிட்டர்போல் யானருந்தித் தேக்கவைத்தால் ஆகாதோ.

     (பொ - ள்) அளவிடப்படாத மூதறிவுப் பேரின்பப் பெருவாழ்வே, நின்னுடைய திருவடிப் பேரின்ப இயல்பினை நின்மெய்யடியார்களைப் போன்று அடியேனும் நுகர்ந்து நிறையும்படி வைத்தருளினால் ஆகாதோ?

(4)

அத்தாநின் பொற்றா ளடிக்கே அனுதினமும்

பித்தாகி இன்பம் பெருகவைத்தால் ஆகாதோ.

     (பொ - ள்) ஐயனே! நின்னுடைய பொன்போலுந் திருவடிக்கீழ் எந்நாளும் அடியேனுக்கு மூதறிவுப் பித்துப்பெருகும்படி நின்திருவடிப் பேரின்பத்தினைப் பெருகவைத் தருளினால் ஆகாதோ?

(5)

மெல்லியலார் மோக விழற்கிறைப்பேன் ஐயாநின்

எல்லையில்ஆ னந்தநலம் இச்சித்தால் ஆகாதோ.

     (பொ - ள்) மென்மைத் தன்மை வாய்ந்த பெண்களுடைய பெருவேட்கையென்னும் விழற்புல்லினை வளர்த்தற்பொருட்டு அறிவாகிய நீரினை இறைக்கின்றவனாகிய யான் ஐயனே நின்னுடைய அளவில்லாத பேரின்பத்தினை விரும்பினால் ஆகாதோ? விழல் - ஒருவகைப்புல்.

(6)

சுட்டழகா யெண்ணுமனஞ் சூறையிட்டா னந்தமயக்

கட்டழகா நின்னைக் கலக்கவைத்தால் ஆகாதோ.

     (பொ - ள்) சுட்டியுணரப்படும் உலகியற் பொருள்களில் நன்றாக விரும்பும் விருப்பத்தைக் கொள்ளையடித்துப் பேரின்பப் பெருவடிவாய்த் திகழும் கட்டழகனே நின்திருவடியிற் கலந்து இன்புறுமாறு வைத்தால் ஆகாதோ?

(7)