இதெல்லாம் சிவன்செயலென்று சந்தோஷங்கொண்டு முன்போலவே கோவிலை
வலம்வந்து தன்னுடன்வந்த பதினொரு பேர்களுடன் ஆதனூர் வந்து சேர்ந்தார்.

இத்தன்மை யீசர்மகிழ் பதிபலவுஞ் சென்றிறைஞ்சி
மெய்த்திருத் தொண்டுசெய்து விரவுவார் மிக்கெழுந்த
சித்தமொடுந் திருத்தில்லைத் திருமன்று சென்றிறைஞ்ச
உய்த்தபெருங் காதலுணர் வொழியாது வந்துதிப்ப.

ராகம் - புன்னாகவராளி; தாளம்-மிச்ர ஏகம்.

பேணிச்-சாருந்தொழின்முறை யாரும்புகல்
திருப்புன்கூர்ச் சென்றரனைக்-கண்டு-சேவித்திசைபாடி-பாவித்தபின்
தில்லைச்சிதம்பரத்தைக் கண்டு-சேவிக்கவேண்டுமென் றாவலுடன்
நாளைப்போவே னென்றாராம்.

நந்தனார் திருப்புன்கூர் சிவலோகநாதனைத் தரிசனம் செய்து ஆதனூர்
வந்தநாள்முதல் ஊணுறக்கமுதலானதும் விட்டார்; தில்லையம்பலம் திருச்சிற்றம்பலமென்று
சொல்லத் தலைப்பட்டார்; சேரியிலுள்ள பெரியோர்களைக் கூப்பிட்டார்; வணங்கிக்
கும்பிட்டுச் சொல்லுவார்:-

ராகம்-பியாக்; தாளம்-ஆதி.

சிதம்பரம் போவேநான்-நாளைச் சிதம்பரம் போவேநான்