[வெண்ணிலா என்பது இங்குச் சந்திரனுடைய பிரகாசத்தையன்று,
சந்திரனையே குறிப்பது.]

மெல்லிய மேகத் திரைக்குள் மறைந்திடும்
  வெண்ணிலாவே -- உன்றன
மேனி யழகு மிகைப்படக் காணுது
  வெண்ணிலாவே.
நல்லிய லார்யவ னத்தியர் மேனியை
  வெண்ணிலாவே -- மூடு
நற்றிரை மேனி நயமிக்க காட்டிடும்,
  வெண்ணிலாவே.
சொல்லிய வார்த்தையில் நாணுற்றனை போலும்
  வெண்ணிலாவே -- நின்
சோதி வதனம் முழுதும் மறைத்தனை
  வெண்ணிலாவே.
புல்லியன் செய்த பிழைபொறுத் தேயருள்
  வெண்ணிலாவே -- இருள்
போகிடச் செய்து நினதெழில் காட்டுதி,
  வெண்ணிலாவே.