:: TVU ::

பாமாலை : பக்தி பாடல்கள்

வேதாந்தப் பாடல்கள்
அறிவே தெய்வம்
கண்ணிகள்
ஆயிரந் தெய்வங்கள் உண்டென்று தேடி அலையும் அறிவிலிகள் -- பால் லாயிரம் வேதம் அறிவொன்றே தெய்வமுண் டாமெனல் கேளீரோ?	1
மாடனைக் காடனை வேடனைப் போற்றி மயங்கும் மதியிலிகாள் -- எத னூடும் நின் றோங்கு மறிவொன்றே தெய்வமென் றோதி யறியீரோ?	2
சுத்த அறிவே சிவமென்று கூறுஞ் சுருதிகள் கேளீரோ? -- பல பித்த மதங்களி லேதடு மாறிப் பெருமை யழிவீரோ?	3
வேடம்பல் கோடியொர் உண்மைக் குளவென்று வேதம் புகன்றிடுமே -- ஆங்கோர் வேடத்தை நீருண்மை யென்றுகொள் வீரென்றவ் வேத மறியாதே.	4
நாமம்பல் கோடியொர் உண்மைக் குளவென்று நான்மறை கூறிடுமே -- ஆங்கோர் நாமத்தை நீருண்மை யென்றுகொள் வீரென்றந் நான்மறை கண்டிலதே.	5
போந்த நிலைகள் பலவும் பராசக்தி பூணு நிலையாமே -- உப சாந்த நிலையே வேதாந்த நிலையென்று சான்றவர் கண்டனரே.	6
கவலை துறந்திங்கு வாழ்வது வீடென்று காட்டும் மறைகளெலாம் -- நீவிர் அவலை நினைந்துமி மெல்லுதல் போலிங்கு அவங்கள் புரிவீரோ?	7
உள்ள தனைத்திலு முள்ளொளி யாகி யொளிர்ந்திடு மான்மாவே -- இங்கு கொள்ளற் கரிய பிரமமென் றேமறை கூவுதல் கேளீரோ?	8
மெள்ளப் பலதெய்வம் கூட்டி வளர்த்து வெறுங்க தைகள்சேர்த்துப் -- பல கள்ள மதங்கள் பரப்புதற் கோர்முறை காட்டவும் வல்லீரோ?	9
ஒன்றுபிரம முளதுண்மை யஃதுன் உணர்வெனும் வேதமெலாம் -- என்றும் ஒன்றுபிரம முளதுண்மை யஃது உணர்வெனக் கொள்வாயே.	10