:: TVU ::

பக்கம் : 189

25. கிழார்திறம் அறிந்த காதை

நிலக்கிழார் பூங்கொடியை வேண்டல்

பழியும் சிறையும் நீங்கிய பாவையை
வழியெதிர் நின்று வரவுரை கூறிக்
கழிபே ருவகைக் களிப்பொடு நிலக்கிழார்
தம்முயர் மாமனைக் கம்மகள் தன்னையும்

உடன்கொண் டேகி `என்றுமென் னகத்தில்

இடனுண் டாதலின் ஈண்டுநீ உறைக!'
என்னுங் கனிமொழிக் கியைந்தன ளாகி
மின்னும் பிறைநிகர் நன்னுதல் அரிவை,

பூங்கொடி நன்றிமொழி

`ஐயநின் னன்புக்கு யாதுகைம் மாறு

செய்வதென் றறியேன், திகைப்புறு கின்றேன்;

முனம்நினை யறியேன் எனினும் உன்பால்
இனம்அறி யாவணம் எழுந்ததோ ரன்பு
தழைத்ததென் னுளத்தே; தந்தையின் உறவை
விளைத்ததித் தொடர்பு வீய்ந்தஎன் றந்தை

இல்லாக் குறையை இல்லா தொழித்தனை;

நில்லாப் பழியால் நெடுஞ்சிறை புக்குப்
பொல்லாத் துயராற் பொன்றுங் காலை
நடுக்குற்ற நின்மனம் நன்குயான் அறிகுவல்;
இடுக்கண் களைய எடுத்தநன் முயற்சியும்

தெற்றென உணர்குவென்; சிறுமகள் எனக்குநீ

உற்றுழி உதவிய ஒருபெருங் கருணைக்கு
நாளும் நாளும் நன்றியறி வுடையேன்;
வாழும் பொழுதெலாம் வணங்குத லன்றி
ஏழை யாதுநான் இயம்புவல் ஐய!'

---------------------------------------------------------------

பொன்றுங்காலை - அழியும்போது, தெற்றென - தெளிவாக.