கொடியதோர் உள்ளத்தைக் கொலை செய்; இதோவாள்!
கயமையைக் கைதுசெய்; கடுந்தண்டனை கொடு
‘எல்லாம் எனக்கே’ என்ப தினிமேல்
எத்தர் ஏய்ப்புரை; இழிசினர் வழக்கு
....... ..... ..... ...... ...... ...... ...... ......
முதலாளித்துவ முதுகெலும் பைமுறி!
பாடுபடு வோர்க்கே பாரெனப் பாடு
சமத்துவச் சங்கொலி செய்து
சமைத்திடு தம்பி புதியதோர் தரணியே”

என்கிறார்.

சமுதாயத்தில் ஏற்றமும் தாழ்வும் - ஏணியும் கேணியும் - மேடும்
பள்ளமும் இருப்பின் அதைத் தகர்த்தெறி; புறப்படு என்ற
உணர்ச்சியை எழுப்பும் இக் கவித்துளியை எப்படி மறப்பது?

போதும். இனிமை காண இருதுளிகள் போதும்.

இப்போது, உங்களைக் கேட்கிறேன்?

இவ்வெள்ளம் கங்கைப் பெருக்கா? காவிரி வெள்ளமா?

பூவிரி பொருநையின் புதுப் புனல் நீரா? நீங்களே சொல்லுங்கள்!

தங்கள்
நா.இலக்குமணப்பெருமாள்