"நூல்களுக்கு   மேலட்டையில்   ஆங்கிலத்திலேயே   பெயர்  முதலிய
புத்தகத்தின்  சகல  செய்திகளும்  குறிக்கப்  படுவதைப்  பல   தடவைகளில்
கண்டித்து  வந்தும்  பிரசுரக்காரர்  அதைக் கவனிக்காமல் ஆங்கிலத்திலேயே
தலைப்புகளை  அச்சிட்டு  வெளியிட்டு  வருவதைக் கண்டு விசனியாமலிருக்க
முடியாது."¹

     வ.உ.சிதம்பரனார், திருக்குறள் முழுவதற்குமே உரை எழுதினார். அதில்,
அறத்துப்பால்  மட்டும்  அவர்  காலத்தில்- அவராலேயே வெளியிடப்பட்டது.
மற்றிரு   பால்களை  வெளியிட  வசதியில்லாமல்  வருந்திய  நிலையிலேயே
மறைந்தார்.   வ.உ.சி.யோடு,   அவர்  எழுதி  வைத்திருந்த  பொருட்பால் -
காமத்துப்பால் உரைகளும் மறைந்து போயினவாம்!

நனவாகாத கனவு

     வ. வே.சு. ஐயர், சங்க  இலக்கியங்களிலே  சிலவற்றை ஆங்கிலத்திலும்,
பிறநாட்டு நல்லறிஞர் சாத்திரங்களிலே-சரித்திரங்களிலே சிலவற்றைத் தமிழிலும்
மொழி  பெயர்த்து  வைத்திருந்தார்.  இன்னும்  பலவற்றை மொழி பெயர்க்கப்
போவதாகவும்   அறிவித்திருந்தார்.  அவை  வெளிவராமற்  போனது  தமிழ்
மொழியின்  தவக்குறைவேயாகும்.  இதுபற்றித் தம்முடைய நண்பரொருவருக்கு
ஐயர் எழுதிய கடிதத்திலுள்ள குறிப்பு வருமாறு:

     "குறுந்தொகையிலும்     கலித்தொகையிலும்     சில     செய்யுள்கள்
தெரிந்தெடுத்து ஆங்கிலத்தில் மொழி பெயர்த்திருக்கிறேன்.