(1) ஆவி ஆவித்தல் = வாய்திறத்தல்; வாய்திறந்து பெருமூச்சு விடுதல், கொட்டாவி விடுதல். ஆவி = வாய்வழிவரும் காற்று, மூச்சு (உயிர்ப்பு), உயிர், ஆன்மா, உயிர்போன்ற தோற்றம். (2) அவ்வு அவ்வு - வவ்வு - கவ்வு. இவை முறையே, ஒளவு, வௌவு, கௌவு என்றும் எழுதப்படும். “அகரத் திம்பர் வகரப் புள்ளியும்
ஒளஎன் நெடுஞ்சினை மெய்பெறத் தோன்றும்.” அவ்வு (ஒளவு)தல் = வாயாற் பற்றுதல். கன்று புல்லை அவ்வி (ஒளவி)த் தின்கிறது என்பது வழக்கு. அவ் - அவ- அவா = வாயினாற் பற்றுதல்போல் மனத்தினாற் பற்றும் ஆசை. அவ - அவவு - அவாவு. அவாவுதல் = ஆசைப்படுதல். அவாவு - ஆவு. ஆவுதல் = ஆசைப்படுதல். ஆவு - ஆவல். ஆர்வத்தோ டணைத்தலை ஆவிசேர்ந்து கட்டுதல் என்பர். வவ்வுதல் = வாய்ப்பற்றுதல்போற் கைப்பற்றுதல், பறித்தல். வவ்வு - வாவு - வாவல் = பெருவிருப்பம். கவ்வுதல் = வாயாற் பற்றுதல். கவ் - கவ - கவர். கவர்தல் = பற்றுதல், விரும்புதல். “கவர்வுவிருப் பாகும்” (தொல். உரி. 64) கவ - கா - காதல். கா - காம் - காமம் - காமர். காம் + உறு = காமுறு. காமம் - காமன். கவ்வுதல் = கவ்வித்தின்னுதல். தின்னுதல். கவ்வு - கப்பு. கப்புதல் = கவளங்கவளமாக விழுங்குதல். கவ்வு - கவளம் = ஒரு முறை கவ்வும் அல்லது தின்னும் அளவான உணவு. கவ்வு - கவியம் - கவிகம் = கறுழ் (bit). |