வீ.ப.கா.சுந்தரனாரின் வாழ்க்கை

வீ.ப.கா.சுந்தரம் அவர்கள் இராஜபாளையம் அருகிலுள்ள கோம்பை என்னும் கிராமத்தில் மறவர் குடியில் தோன்றியவர். இவர் 1915 செப்டம்பர் 5 ஆம் நாள் பிறந்தார். இவர் 15 வது வயதிலிருந்தே குறட்பா எழுதுவதில் ஆர்வம் கொண்டவர். மேலும் இவர் வெண்பாக்கள், கவிதைகள் போன்றவற்றை எழுதுவதில் திறமை மிக்கவராகத் திகழ்ந்தார். இவர் இளமையிலேயே தமிழில் ஆர்வம் கொண்டவர். சுந்தரம் என்ற தம் பெயருக்கு முன்னால் தம் தந்தை வழிப்பாட்டனார், தாய் ஆகியோர்களின் பெயர்களை வைத்துக்கொண்டார்.

இவர் மறவர் குடியில் பிறந்தாலும் தமது தந்தையாரின் விருப்பத்துக்கிணங்கி கிறிஸ்தவ மதத்துக்கு மதம் மாறினார். அவ்வினத்தில் பிறந்த ‘கிரேஸி’ என்னும் இல்ல நல்லாளை மணம் முடித்துக்கொண்டார். இவருக்கு நான்கு மக்கள். அனைவருமே ஆடவர்கள்.

வீ.ப.கா.சுந்தரனார் “புரட்சிக்கவி பாரதிதாசன்” போன்ற தோற்றத்தை உடையவர். உடல் உருவத்தால் மட்டுமின்றி கருத்துக்களாலும் புரட்சிச் சிந்தனை படைத்தவர். இவர் எங்கும் தமிழிசை, எதிலும் தமிழிசை வளர வேண்டுமெனப் பாடுபட்டார். அயராத உழைப்பும் எட்டுத்தொகை பத்துப்பாட்டு ஆய்வும், குறிப்பாக தொல்காப்பியம், சிலப்பதிகாரம் குறித்து நெடிய ஆய்வு செய்தவர்.

இவர் தமிழிசைக்காகப் பல்வேறு இடங்களுக்குச் சென்று சொற்பொழிவுகள் செய்து தமிழிசையை வளர்த்தவர். சங்ககால நூல்கள் மற்றும் பழம்பெரும் நூல்களையும் ஆய்ந்து பல நூல்களை இவ்வுலகத்திற்கு அளித்தவர்.

இவர் தம் தொடக்கக் கல்வியைப் பசுமையில் உள்ள அரசினர் பள்ளியில் தொடங்கினார். இவர் தமிழ், ஆங்கிலம், பிரெஞ்சு, சமஸ்கிருதம் போன்ற மொழிகளில் புலமை பெற்றவராகத் திகழ்ந்தார். இவருக்கு அவ்வப்போது தமிழ்ப்பற்றை ஊட்டி இசை வல்லுனராகத் திகழ வைத்த பெருமை நாவலர் ச.சோம சுந்தர பாரதியைச் சாரும். மேலும் இவருக்குச் சமயகுருவாக அருள் பெருந்தொண்டர் எல்.எல்.லார்பீர் அவர்களும் நல்லாசானாக விளங்கினார். சென்னைப் பல்கலைக்கழகத்தில் வித்வான் பட்டமும். முதுகலைஞர் பட்டமும் பெற்றவர். மதுரைப் பல்கலைக்கழகத்தில் எஸ்.இராமநாதன் அவர்களை வழிகாட்டியாகக் கொண்டு “பழந்தமிழ் இலக்கியத்தில் இசையியல்” என்ற ஆய்வு ஏட்டினை உருவாக்கி முனைவர் பட்டம் பெற்றவர். இவர் இசையில் இருபத்தி நான்கு நூற்களைப் படைத்துள்ளார்.

வீ.ப.கா.சுந்தனாரின் இசைக்கல்வியும், வழங்கப்பட்ட பட்டங்களும் :

இவர் சேதுபதி மன்னரின் அவைக்களப் புலவர் மேன்மை மிகு “சங்கர சிவம்” அய்யா அவர்களிடம் சுமார் பத்தாண்டுகளாக இசையின் காலக் கணக்குகள் பற்றியும் முழவு முழக்கியங்கள் பற்றியும் பாடம் கேட்டார். அவற்றின் பயனாகவே சுந்தரனார். “மத்தள முழக்கியல்” (The Art of Drumming) என்ற பெரும் நூலுக்கு உரை எழுதியுள்ளார். மேலும் இவரிடமே தாள சொற்கட்டுக்களையும், மிருதங்கம் கஞ்சிரா போன்ற கருவிகளை வாசிக்கவும் கற்றுக்கொண்டார். மத்தளத்தையும், கஞ்சிராவையும் மாமேதையான மதுரை கிருஷ்ண அய்யங்காரிடம் பயிற்சி பெற்றவர்.