அருணகிரிநாதரின் தனிச் சிற்றிலக்கியங்களில் ஐந்தாவதாகிய வேல் விருத்தம் பன்னிருசீர்க் கழிநெடிலடி ஆசிரியவிருத்தங்கள் 10 கொண்டு அமைகிறது.

முருகனின் கை வேலின் புகழ் கூறுவது இந்நூல், ஆறாவதாகிய மயில் விருத்தம் விநாயகர் காப்பு ஒன்றும், 11 ஆசிரிய விருத்தங்களும் கொண்டுள்ளது. முருகன் ஏறிவரும் மயிலின் அழகும் ஆற்றலும் கூறுவன இந்நூல் பாடல்கள். ஏழாவது சேவல் விருத்தம். இதிலும் விநாயகர் காப்பு ஒன்றும் 11 ஆசிரிய விருத்தங்களும் இடம் பெற்றுள்ளன. முருகன் கொடியில் இடம் பெற்றிருக்கும் சேவலின் முன்னை வரலாறு கந்தபுராணத்துள்ளும் விரித்துரைக்கப்பட்டுள்ளது. சேவலின் திறம் உரைப்பது இச்சிறு நூல். நிறைவாக திரு ஏரகம் எனப்படும் சுவாமிமலைத் தலத்து முருகனைப் போற்றுவது ‘திரு வெழு கூற்றிருக்கை’ என்ற எண் அலங்காரப் பாடல். இப்பாடல் ஒன்றை மட்டும் பாராயணம் செய்தால் ஏனைய திருப்புகழ்ப் பாக்கள் அனைத்தையும் பாராயணம் செய்த பலன் கிட்டும் என்பது முருகன் அடியவர்கள் நம்பிக்கை.