நிலம் `தரம்' வாரியாகப் பிரிக்கப்பட்டது. அவை 12 வரை
இருந்தன. தரம் இல்லாத நிலங்கள் `தரமிலி' எனக் குறிக்கப்பட்டு
வரி இல்லாமல் ஆக்கப்பட்டன. சில காரணங்களால் சில
காலங்களில் நிலத்தின் தரம் கூட்டப்பட்டது; அல்லது
குறைக்கப்பட்டது. பயிர் பார்த்து பயிர் நின்ற நிலத்திற்கு மட்டுமே
வரி வசூலிக்கப்பட்டது. வெள்ளத்தாலும், வறட்சியாலும்
பாதிக்கப்பட்ட நிலங்கட்கு வரி குறைக்கப்பட்டது. `வெள்ளச்சாவி,
வறட்சிச்சாவிக்கு இறை இல்லை' எனப்பட்டது. வரி நெல்லாகவும்,
பணமாகவும் வசூலிக்கப்பட்டது. `விதைத்துப்பாழ், நாற்றுப்பாழ்,
நட்டுப்பாழ்' ஆனால் நெல்லோ பணமோ வரியாக வசூலிக்கக்
கூடாது என்று கூறப்பட்டது. நந்தவனம், கன்றுமேய் பாழ்,
உவர்நிலம், காடு, மானிய பூமிகள் இவைகட்கு வரியில்லை.

    புது ஊர் ஏற்படுத்தி உழவர்களைக் குடியேற்றினால் முதல்
நான்காண்டுக்கு நிலவரி இல்லை; பின்னர் மூன்று ஆண்டுகட்கு
மூன்றில் ஒரு பகுதிமட்டுமே நிலவரி வசூலிக்கப்பட்டது. தானாக
நீர் பாய்ந்த நிலத்திற்கு ஒரு மாவுக்கு 12 கலம் நெல்லும், ஏற்றம்
இறைத்துப் பயிர்செய்த நிலத்திற்கு ஒரு மாவுக்கு 6 கலம் நெல்லும்
வரியாகப் பெறப்பட்டதாக ஒரு கல்வெட்டுக் கூறுகிறது.

    பயிர் செய்யத் தகுதியற்ற நிலங்களைப் பயிர்நிலமாக மாற்றும்
முயற்சிகள் பல நடைபெற்றுள்ளன.

    `பிரம்ம தேசத்துப் புறக்காலில் காடுவெட்டிப் பயிர் செய்ய
ஒண்ணாது நின்ற நிலத்தைக் காடுவெட்டிக் கட்டை பறித்து மேடும்
தாழ்வும் ஒக்க இட்டு ஆறும் அடைத்து பயிர்நிலமாகத் திருத்தி'
அவ்வூரில் நிலம் பயிர்செய்யத் தகுதி ஆக்கியதைக் கல்வெட்டு
ஒன்று விளக்குகிறது.

    (ஒண்ணாது -இயலாது, ஒக்க -சமமாக).

    வெள்ளப் பெருக்கால் அழிந்த நிலங்களையும் சரி
செய்துள்ளனர்.

    `ஆற்றுப் படுகையில் ஆறு உடைந்து மணலிட்டு
மணல்மேடாய்க் கிடந்த நிலம்'

    `காவேரி உடைந்து மடுவாய் நீர்நிலை ஆன நிலம்'
ஆகியவைகளைத் திருத்தி வளோண்மைக்கு உரிய நிலங்கள்
ஆக்கினர்.

    (மடு - பள்ளம்).