தமிழில் காலந்தோறும் இலக்கியங்கள் வளர்ந்து கொண்டே வருகின்றன. அவ்வகையில் சங்க இலக்கியம், நீதி இலக்கியம், பக்தி இலக்கியம், தத்துவ இலக்கியம், இக்கால இலக்கியம் என்னும் வரிசையில் சித்தர் இலக்கியம் என்பதும் சிறப்பாக இடம்பெற     வேண்டியதாகும். இவ்விலக்கியம், காலந்தோறும் தோன்றிய     தவஞானியர்களின்     (சித்தர்களின்) சிந்தனைச் செல்வங்களும்,     கருத்து வளங்களும் , எண்ணற்ற எண்ண விரிவுகளும் கொண்டு செம்மை பெற்றதாகும். சித்தர் இலக்கியம், அரிய தத்துவக் கருத்துகளும் அரிய சொல்லாட்சிகளும் கொண்டது; எளிய மொழியாலும், நடையாலும், பாடல் வடிவத்திலும் அவற்றைப் புரிய வைக்கக் கூடியது; இது நாட்டுப்புற இலக்கியத்தின் செல்வாக்குப் பெற்ற இலக்கியமாகும். இவ்விலக்கியத்தினைப் படைத்தவர்கள் எல்லாக் கலைகளையும் உணர்ந்தவர்களாகவும், இறையருளால் ஓதாது உணர்ந்தவர்களாகவும் திகழ்கின்றவர்கள். இவர்களின் சிந்தனை சமய, சமுதாயம் பற்றியதாக மட்டுமில்லாமல், உலகளாவிய நிலையிலும் உலகப் பொது நோக்கும் கொண்டதாக அமையும்.