கவிதை வகைமைகளில் தொன்மையானதாக அறியப்படுவது
மரபுக் கவிதையாகும். தமிழில் உள்ள யாப்பிலக்கண நூல்கள்
மரபுக் கவிதை இயற்றும் முறையை எடுத்துரைக்கத்
தோன்றியனவேயாகும். யாப்பு வடிவத்திற்கு அடிப்படை சந்தமும்
(Rhythm). தொடையும் ( Rhyme) ஆகும். சந்தம் என்பது
அழுத்தமான ஓசையும் அழுத்தமில்லா ஓசையும் சீர்பட அடுக்கி
வருவதைப் பொறுத்தது. அழுத்தமுள்ள ஓசையும் அழுத்தமில்லாத
ஓசையும் மாறி மாறி இடம்பெறுவதால் ஒரு நயமான ஓசை
பிறக்கிறது. மரபுக் கவிதைகள் ஒரு காலத்தில் இசையோடு
பாடப்பட்டிருக்க     வேண்டும்.     பிற்காலத்தில்     இவை
படிக்கப்படுவனவாக மட்டுமே அமைந்து விட்டன. பாக்களின்
ஓசை நயத்துக்குக் காரணமான சொற்களை அளவிட்டுச் சீர் எனக்
குறிப்பிட்டனர்.

     குறில், நெடில், ஒற்று என்னும் எழுத்துகளால் அசையும்,
அசையால் சீரும், சீரால் அடியும், அடியால் பாடலும் முறையே
அமைகின்றன. சீர்களுக்கு இடையிலான ஓசை தளை
எனப்படுகின்றது. சீர், தளை, அடி ஆகியவற்றின் வேறுபாட்டால்
பாவகைகள் அமைகின்றன.

     சீர்களின் முதலெழுத்து ஒற்றுமை - மோனை ; இரண்டாம்
எழுத்து ஒற்றுமை - எதுகை ; இறுதியில் அமையும் ஒலி
ஒற்றுமை - இயைபு; சொல், பொருள் ஆகியவற்றில் காணும்
முரண்பாடு - முரண் ; ஓர் அடியின் எழுத்தோ அசையோ சீரோ
அடுத்த அடியின் முதலாக அமைவது அந்தாதி - எனப்
பாடல்கள் தொடுக்கப்படுவது தொடை எனப்படும். அடுத்த
பாடத்தில் (மரபுக் கவிதை வடிவம்) இவை குறித்து விரிவாக
அறிந்து கொள்ளலாம்.

     சங்க காலம் முதல் இருபதாம் நூற்றாண்டு வரையில்
தமிழிலக்கிய நெடும்பரப்பில் செங்கோல் செலுத்தி வந்த பெருமை,
மரபுக்கவிதைக்கே உரியது.

     மரபுக் கவிதையைப் பாவகைகள், பாவினங்கள் என
இரண்டாகப் பாகுபடுத்துவர்.

     செப்பலோசையை உடைய வெண்பா, அகவலோசையை உடைய ஆசிரியப்பா, துள்ளலோசையை உடைய கலிப்பா, தூங்கலோசையை     உடைய     வஞ்சிப்பா, வெண்பாவும் ஆசிரியப்பாவும் கலந்து வரும் மருட்பா எனப் பாக்கள் ஐவகைப்படும்.

     அவற்றுள்     வெண்பாவும்     ஆசிரியப்பாவும் பெருவழக்குடையனவும் தெரிந்துகொள்ள வேண்டியனவும் ஆகும்.

     ஈற்றடி முச்சீரும் ஏனைய அடி நாற்சீரும் பெற்று வரும்.
மாமுன் நிரை, விளம் முன் நேர், காய் முன் நேர் என்பனவாகிய
வெண்பாத் தளைகளையே பெற்று வரவேண்டும். ஈற்றுச் சீர்
ஓரசையாலோ, ஓரசையுடன் குற்றியலுகரமோ பெற்று முடிதல்
வேண்டும். இவ் வெண்பா குறைந்தது இரண்டு அடிகளைக்
கொண்டது.

     மேற்கண்ட இலக்கணங்கள் பொருந்த இரண்டடிகளில்
வருவது - குறள்வெண்பா ; மூன்றடிகளில் வருவது - சிந்தியல்
வெண்பா ; நான்கடிகளில் வருவது - இன்னிசை வெண்பா ,
நேரிசை வெண்பா ; ஐந்தடி முதல் 12 அடி வரை அமைவது -
பஃறொடை வெண்பா ; 12 அடிகளுக்குமேல் பல அடிகளைப்
பெற்று வருவது - கலிவெண்பா என வகைப்படுத்துவர்.

     அவற்றுள் குறள் வெண்பாவும், நேரிசை வெண்பாவும்
பயிலத்தக்க சிறப்புடையன.

     குறள்வெண்பா யாப்பால் அமைந்து சிறப்புடன்
திகழ்வது திருக்குறள்.

என்னும் குறட்பா எளிய நடையில் திகழ்வதைக் காண்கிறோம்.

     இழிவறிந்து உண்பான்கண் இன்பம்போல் நிற்கும்
     கழிபே ரிரையான்கண் நோய் (குறள் - 946)

     அடைமொழி இன்றி வெண்பா என்று சொல்லும்
அளவில் நினைவிற்கு வருவது நேரிசை வெண்பாவேயாகும்.
பதினெண் கீழ்க்கணக்கு நூல்கள், பிற்கால நீதி நூல்கள் எனப்
பல்வேறு     நூல்களிலும் பயின்று வழங்கி வந்துள்ள
சிறப்பினையுடையது இது.

வெல்லாத இல்லை திருவள் ளுவன்வாய் விளைத்தவற்றுள்
பொல்லாத தில்லை புரைதீர்ந்த வாழ்வினி லேஅழைத்துச்
செல்லாத தில்லை பொதுமறை யான திருக்குறளில்
இல்லாத தில்லை இணையில்லை முப்பாலுக் கிந்நிலத்தே

(புரை = குற்றம்)

பிழைமூன்று பொறுப்பையாம்
பிழைச்சொல்லோ பெருங்கடல் !
அழைக்காமல் நுழைந்தனை !
பிழைக்காமல் விழுங்கினை !

(பிழை = தவறு ; பிழைக்காமல் = யாரும் உயிர் பிழைக்காமல், தவறாமல்)

1. விளம் மா தேமா - அறுசீர் விருத்தம்

தாயெழில் தமிழை என்றன்
     தமிழரின் கவிதை தன்னை
ஆயிரம் மொழியில் காண
     இப்புவி அவாவிற் றென்றே
தோயுறும் மதுவின் ஆறு
     தொடர்ந்தென்றன் செவியில் வந்து
பாயுநாள் எந்த நாளோ?
     ஆரிதைப் பகர்வார் இங்கே

(மது = தேன் ; பாயுநாள் = பாயும் நாள்)

பாவேந்தரின் பாடல் இது. விளச்சீருக்குப் பதில் மாங்காய்ச் சீரும்
வரலாம்.

2. மா மா காய் வாய்பாடு - அறுசீர் விருத்தம்

இல்லாப் பொருளுக் கேங்காமல்
     இருக்கும் பொருளும் எண்ணாமல்
எல்லாம் வல்ல எம்பெருமான்
     இரங்கி அளக்கும் படிவாங்கி
நல்லார் அறிஞர் நட்பையும்நீ
     நாளும் நாளும் நாடுவையேல்
நில்லா உலகில் நிலைத்தசுகம்
     நீண்டு வளரும் நிச்சயமே

(உமர்கய்யாம் - கவிமணி)

3. விளம் மா விளம் மா, விளம் விளம் மா - எழுசீர்
விருத்தம்.

தந்ததுன் தன்னை ; கொண்டதென் தன்னை ;
     சங்கரா ஆர்கொலோ சதுரர்?
அந்தமொன் றில்லா ஆனந்தம் பெற்றேன் ;
     யாதுநீ பெற்றதொன் றென்பால்?
சிந்தையே கோயில் கொண்டஎம் பெருமான் !
     திருப்பெருந் துறையுறை சிவனே !
எந்தையே ! ஈசா ! உடலிடம் கொண்டாய் !
     யான்இதற்கு இலன்ஓர்கைம் மாறே !

(கோயில் திருப்பதிகம் - 10)

(சங்கரன் = சிவன் ; சதுரர் = திறமையுடையவர் ; அந்தம் =
முடிவு ; கைம்மாறு = பதிலுதவி)

என்பது மாணிக்கவாசகரின் திருவாசகம்.

4.காய் காய் மா தேமா - எண்சீர் விருத்தம்.

ஆவீன மழைபொழிய இல்லம் வீழ
     அகத்தடியாள் மெய்ந்நோவ அடிமை சாவ
மாவீரம் போகுமென்று விதைகொண் டோட
     வழியிலே கடன்காரன் மறித்துக் கொள்ளச்
சாவோலை கொண்டொருவன் எதிரே செல்லத்
     தள்ளவொண்ணா விருந்துவரச் சர்ப்பம் தீண்டக்
கோவேந்தன் உழுதுண்ட கடமை கேட்கக்
     குருக்களோ தட்சணைகள் கொடுவென் றாரே

(ஆவீன = ஆ ஈன, பசுகன்று ஈன ; இல்லம் = வீடு ; மாவீரம்
= பெரிய ஈரம்)

என்பது இராமச்சந்திர கவிராயரின் தனிப்பாடல். காய்ச்சீருக்குப்
பதில் சில இடங்களில் விளச்சீர் வருதலும் உண்டு.

அருமறை முதல்வனை ஆழி மாயனைக்
கருமுகில் வண்ணனைக் கமலக் கண்ணனைத்
திருமகள் கேள்வனைத் தேவ தேவனை
இருபத முளரிகள் இறைஞ்சி ஏத்துவாம்

(முளரி = தாமரை ; பதம் = திருவடி)

என்பது பெண்என எழுச்சியுறும் ;
வன்கலும் புணைஎன மிதக்கலுறும் ;
முன்சுவை மகவினை முதலைதரும் ;
தென்தமிழ்த் திருமுறைச் செயலாலே ;

(என்பது = எலும்பானது ; கலும் = கல்லும் ; சுவை மகவு = விழுங்கிய குழந்தை)

     மரபுக் கவிதை வகைமை குறித்து அறிந்தோம். இனி
இசைப்பா வகைமையைக் காண்போம்.