அலெக்ஸாண்டரின் அறிவுக்கூர்மை

பேரரசர் ஃபிலிப், புதிதாக வாங்கப்பட்ட குதிரைகளைப் பார்வையிட்டார். அவற்றுள் ஒரு குதிரை மட்டும் முரட்டுத்தனமாக நடந்துகொண்டது. அக்குதிரை யாரையும் அருகில் நெருங்கவிடவில்லை. அதனை அடக்கமுடியாமல் அனைவரும் திணறினர். அப்போது, இதனைப் பார்த்துக்கொண்டிருந்த இளவரசர் அலெக்ஸாண்டர், தாம் குதிரையை அடக்குவதாகத் தெரிவித்தார். பேரரசரும் ஏற்றுக்கொண்டார். அலெக்ஸாண்டர், அக்குதிரையை வேறு இடத்திற்குக் கொண்டு சென்றார். இப்போது, அதன்மீது அவர் ஏறி அமர்ந்தபோதும் குதிரை ஒன்றும் செய்யவில்லை. பார்த்துக் கொண்டிருந்த எல்லாரும் கைகளைத் தட்டி மகிழ்ச்சியைத் தெரிவித்தனர். குதிரை எப்படி இவ்வளவு அமைதியாக நடந்துகொண்டது எனப் பேரரசருக்கும் வியப்பு ஏற்பட்டது. அதுபற்றி அலெக்ஸாண்டரிடம் கேட்டார். குதிரை தன் நிழலைப் பார்த்துத் தானே மிரண்டது. அதனை வேறு இடத்தில் நிற்க வைத்ததும் அதன் முரட்டுதனம் அகன்றது என அலெக்ஸாண்டர் கூறினார். பேரரசர் ஃபிலிப், அலெக்ஸாண்டரின் அறிவுக்கூர்மையைக் கண்டு வியந்தார். அவருக்குக் குதிரையைப் பரிசாக அளித்து மகிழ்ந்தார்.

வினாக்கள்

1. குதிரைகளைப் பார்வையிட்ட பேரரசர் யார்? 2. குதிரை ஏன் முரட்டுத்தனமாக நடந்துகொண்டது? 3. முரட்டுத்தனமாக நடந்துகொண்ட குதிரையை அடக்கியவர் யார்? 4.முரட்டுத்தனமாக நடந்துகொண்ட குதிரையை இளவரசர் எவ்வாறு அடக்கினார்? 5.குதிரையைப் புரிந்துகொண்டதற்காக இளவரசர் பெற்ற பரிசு யாது?

சுவைச்செய்தி