தமிழரின் அடையாளம் – பொருநை

உலகின் பல பகுதிகளில் அகழாய்வு நடைபெறுகிறது. அகழாய்வின் மூலம், மனிதன் வாழ்ந்த காலத்தையும் அவனது பண்பாட்டையும் அறிந்துகொள்ள முடிகிறது. இன்றைய தொழில்நுட்பத்தின் உதவியுடன் அகழாய்வில் கிடைக்கப்பெறும் பொருள்களைக்கொண்டு, அவற்றின் தொன்மை நிறுவப்படுகிறது. அவ்வகையில், ‘தமிழ்ப் பண்பாட்டின் தொட்டில்‘ என்று சிறப்பிக்கப்படும் ‘பொருநை‘ ஆற்றங்கரையில் நடைபெற்ற அகழாய்வு தமிழரின் தொன்மை, பண்பாட்டுக்கூறுகள் முதலியவற்றை வெளிப்படுத்தியுள்ளது.

இன்று தாமிரபரணி ஆறு என அழைக்கப்படும் பொருநை ஆற்றின் சிறப்பினைத் தமிழ் இலக்கியங்களில் காணலாம். ‘பொருநை‘, ‘பொருநல்‘, ‘பொருந்தம்‘, ‘தண்பொருநை‘, என இலக்கியங்களிலும் ‘தண்பொருந்தம்‘, ‘தாம்பபண்ணி‘ எனக் கல்வெட்டுகளிலும் பல பெயர்களில் இந்த ஆறு குறிக்கப்பட்டுள்ளது.

‘காவிரி, தென்பெண்ணை, பாலாறு - தமிழ்
கண்டதோர் வையை, பொருநை நதி

எனத் தமிழ்நாட்டின் வளம் பெருக உதவிய ஆறுகளுள் பொருநையையும் பாரதியார் குறிப்பிட்டுள்ளார்.

இந்தியாவில் முதல் அகழாய்வு, பொருநை ஆற்றங்கரை இடங்களில் ஒன்றான ஆதிச்சநல்லூரில் நடத்தப்பட்டது. இந்த ஊர், பொருநை ஆற்றின் தென்கரையில் அமைந்துள்ளது. ஜெர்மனியைச் சேர்ந்த முனைவர் ஜாகோர் என்பவர், 1876ஆம் ஆண்டு ஆதிச்சநல்லூர் பறம்பில் ஆய்வு செய்துள்ளார். இரண்டாவது அகழாய்வினை அலெக்சாண்டர் ரீ என்பவர் 1903ஆம் ஆண்டில் மேற்கொண்டார். அவர் அகழ்ந்து எடுத்த தொல்பொருள்களைச் சென்னை அரசு அருங்காட்சியகத்தில் இப்போதும் காணலாம்.

கழிவுநீர் செல்வதற்காகக் கிடைமட்டத்தில் அமைக்கப்பட்ட சுடுமண் குழாய்கள் கண்டுபிடிக்கப்பட்டன. மொத்தம் 847 தொல்பொருள்கள் இங்குக் கிடைத்துள்ளன. இத்தொல்பொருள்கள் பல ஆண்டுகளுக்குமுன் இங்கு வாழ்ந்த மக்களின் வாழ்க்கைமுறை, தொழில், பழக்கவழக்கங்கள் முதலியவற்றை உலகறியச் செய்துள்ளன.

கொற்கை அகழாய்வில் சங்கு வளையல்கள், வெள்ளி முத்திரைக் காசுகள், மெருகூட்டப்பட்ட கருமை நிறப் பானைகள் முதலியன கிடைத்தன. சங்கு வளையல்கள் அதிக அளவில் கிடைத்துள்ளதால், இங்குச் சங்கு வளையல் தயாரிக்கும் தொழில் நடைபெற்றிருக்கலாம் என அறியமுடிகிறது.

சதுர வடிவிலான செங்கல் கட்டுமானம் ஒன்றும் இங்குக் கிடைத்துள்ளது. இச்செங்கற்கள், சங்க காலத்தைச் சேர்ந்தவை என அடையாளம் காணப்பட்டுள்ளன. இக்கட்டுமானத்திற்கு அருகில் துளைகளுடன் கூடிய ஒன்பது அடுக்கு கொண்ட வடிகட்டும் குழாய் உள்ளது. இதன் அருகே மேற்கத்திய நாட்டுப் பானை ஓடுகளும் கிடைத்துள்ளன. இச்சான்றுகள், நெடுங்காலமாகத் தமிழ்நாடு பிறநாடுகளுடன் வாணிகத் தொடர்பு கொண்டிருந்தது என்பதைத் தெரிவிக்கின்றன.

ஆதிச்சநல்லூர், சிவகளை, கொற்கை ஆகிய ஊர்களைப் பெற்றுள்ள பொருநை ஆற்றங்கரை நாகரிகம் 3000 ஆண்டுகளுக்கு முற்பட்டது என்பதை அகழாய்வின் மூலம் அறிந்துகொள்ள முடிகிறது. இங்குக் கிடைக்கப்பெற்ற வெண்கலம் முதலான பொருள்கள் தமிழர்களின் வளமான பொருளாதாரத்திற்கும் சமூக வாழ்க்கை நிலைக்கும் சான்றுகளாய் உள்ளன.

பொருள் அறிவோம்