279

	கெடுக சிந்தை; கடிது இவள் துணிவே;
	மூதில் மகளிர் ஆதல் தகுமே:
	மேல்நாள் உற்ற செருவிற்கு இவள் தன்னை,
	யானை எறிந்து, களத்து ஒழிந்தனனே;
5	நெருநல் உற்ற செருவிற்கு இவள் கொழுநன்,
	பெரு நிரை விலங்கி, ஆண்டுப் பட்டனனே;
	இன்றும், செருப் பறை கேட்டு, விருப்புற்று, மயங்கி,
	வேல் கைக் கொடுத்து, வெளிது விரித்து உடீஇ,
	பாறு மயிர்க் குடுமி எண்ணெய் நீவி,
10	ஒரு மகன் அல்லது இல்லோள்,
	'செருமுகம் நோக்கிச் செல்க' என விடுமே!