192

	யாதும் ஊரே; யாவரும் கேளிர்;
	தீதும் நன்றும் பிறர் தர வாரா;
	நோதலும் தணிதலும் அவற்றோரன்ன;
	சாதலும் புதுவது அன்றே; வாழ்தல்
5	இனிது என மகிழ்ந்தன்றும் இலமே; முனிவின்,
	இன்னாது என்றலும் இலமே; 'மின்னொடு
	வானம் தண் துளி தலை இ, ஆனாது
	கல் பொருது இரங்கும் மல்லல் பேர் யாற்று
	நீர் வழிப்படூஉம் புணை போல், ஆர் உயிர்
10	முறை வழிப்படூஉம்' என்பது திறவோர்
	காட்சியின் தெளிந்தனம் ஆகலின், மாட்சியின்
	பெரியோரை வியத்தலும் இலமே;
	சிறியோரை இகழ்தல் அதனினும் இலமே.