229

	ஆடு இயல் அழல் குட்டத்து
	ஆர் இருள் அரை இரவில்,
	முடப் பனையத்து வேர் முதலாக்
	கடைக் குளத்துக் கயம் காய,
5	பங்குனி உயர் அழுவத்து,
	தலை நாள்மீன் நிலை திரிய,
	நிலை நாள்மீன் அதன் எதிர் ஏர்தர,
	தொல் நாள்மீன் துறை படிய,
	பாசிச் செல்லாது, ஊசித் துன்னாது,
10	அளக்கர்த் திணை விளக்காகக்
	கனை எரி பரப்ப, கால் எதிர்பு பொங்கி,
	ஒரு மீன் வீழ்ந்தன்றால், விசும்பினானே;
	அது கண்டு, யாமும் பிறரும் பல் வேறு இரவலர்,
	'பறை இசை அருவி நல் நாட்டுப் பொருநன்
15	நோய் இலனாயின் நன்றுமன் தில்' என
	அழிந்த நெஞ்சம் மடிஉளம் பரப்ப,
	அஞ்சினம்; எழு நாள் வந்தன்று, இன்றே;
	மைந்துடை யானை கை வைத்து உறங்கவும்,
	திண் பிணி முரசம் கண் கிழிந்து உருளவும்,
20	காவல் வெண்குடை கால் பரிந்து உலறவும்,
	கால் இயல் கலி மாக் கதி இல வைகவும்,
	மேலோர் உலகம் எய்தினன்; ஆகலின்,
	ஒண் தொடி மகளிர்க்கு உறு துணை ஆகி,
	தன் துணை ஆயம் மறந்தனன்கொல்லோ
25	பகைவர்ப் பிணிக்கும் ஆற்றல், நசைவர்க்கு
	அளந்து கொடை அறியா ஈகை,
	மணி வரை அன்ன மாஅயோனே?