11

	அரி மயிர்த் திரள் முன்கை,
	வால் இழை, மட மங்கையர்
	வரி மணல் புனை பாவைக்குக்
	குலவுச் சினைப் பூக் கொய்து,
5	தண் பொருநைப் புனல் பாயும்,
	விண் பொரு புகழ், விறல் வஞ்சி,
	பாடல் சான்ற விறல் வேந்தனும்மே,
	வெப்பு உடைய அரண் கடந்து,
	துப்பு உறுவர் புறம் பெற்றிசினே;
10	புறம் பெற்ற வய வேந்தன்
	மறம் பாடிய பாடினியும்மே,
	ஏர் உடைய விழுக் கழஞ்சின்,
	சீர் உடைய இழை பெற்றிசினே;
	இழை பெற்ற பாடினிக்குக்
15	குரல் புணர் சீர்க் கொளை வல் பாண் மகனும்மே,
	என ஆங்கு,
	ஒள் அழல் புரிந்த தாமரை
	வெள்ளி நாரால் பூ பெற்றிசினே.