367

	நாகத்து அன்ன பாகு ஆர் மண்டிலம்
	தமவேஆயினும் தம்மொடு செல்லா;
	வேற்றோர்ஆயினும் நோற்றோர்க்கு ஒழியும்;
	ஏற்ற பார்ப்பார்க்கு ஈர்ங் கை நிறையப்
5	பூவும் பொன்னும் புனல் படச் சொரிந்து,
	பாசிழை மகளிர் பொலங் கலத்து ஏந்திய
	நார் அரி தேறல் மாந்தி, மகிழ் சிறந்து,
	இரவலர்க்கு அருங் கலம் அருகாது வீசி,
	வாழ்தல் வேண்டும், இவண் வரைந்த வைகல்;
10	வாழச் செய்த நல்வினை அல்லது
	ஆழுங் காலைப் புணை பிறிது இல்லை;
	ஒன்று புரிந்து அடங்கிய இருபிறப்பாளர்
	முத்தீப் புரையக் காண்தக இருந்த
	கொற்ற வெண் குடைக் கொடித் தேர் வேந்திர்!
15	யான் அறி அளவையோ இதுவே: வானத்து
	வயங்கித் தோன்றும் மீனினும், இம்மெனப்
	பரந்து இயங்கு மா மழை உறையினும்,
	உயர்ந்து மேந் தோன்றிப் பொலிக, நும் நாளே!