20

	இரு முந்நீர்க் குட்டமும்,
	வியல் ஞாலத்து அகலமும்,
	வளி வழங்கு திசையும்,
	வறிது நிலைஇய காயமும், என்றாங்கு
5	அவை அளந்து அறியினும், அளத்தற்கு அரியை,
	அறிவும், ஈரமும், பெருங் கண்ணோட்டமும்:
	சோறு படுக்கும் தீயோடு
	செஞ் ஞாயிற்றுத் தெறல் அல்லது
	பிறிது தெறல் அறியார், நின் நிழல் வாழ்வோரே;
10	திருவில் அல்லது கொலை வில் அறியார்;
	நாஞ்சில் அல்லது படையும் அறியார்;
	திறன் அறி வயவரொடு தெவ்வர் தேய, அப்
	பிறர் மண் உண்ணும் செம்மல்! நின் நாட்டு
	வயவுறு மகளிர் வேட்டு உணின் அல்லது,
15	பகைவர் உண்ணா அரு மண்ணினையே;
	அம்பு துஞ்சும் கடி அரணால்,
	அறம் துஞ்சும் செங்கோலையே;
	புதுப் புள் வரினும், பழம் புள் போகினும்,
	விதுப்புறவு அறியா ஏமக் காப்பினை;
20	அனையை ஆகல்மாறே,
	மன் உயிர் எல்லாம் நின் அஞ்சும்மே.