61. kuRijci

	kELAy, ella tOzi! alkal
	vENavA n'aliya, veyya uyirA,
	E mAn piNaiyin varun'tinenAka,
	tuyar marugku aRin'tanaL pOla, annai,
5	'tujcAyO, en kuRumakaL?' enRalin,
	col veLippaTAmai mella en n'ejcil,
	'paTu mazai pozin'ta pARai marugkil
	ciral vAy uRRa taLavin, paral aval,
	kAn kezu n'ATaR paTarn'tOrkkuk
10	kaNNum paTumO?' enRicin, yAnE.

62. pAlai

	vEr piNi vetirattuk kAl poru n'aral icai
	kan'tu piNi yAnai ayar uyirttanna
	enRUz n'ITiya vEy payil azuvattu,
	kunRu Ur matiyam n'Okki, n'inRu, n'inain'tu,
5	uLLinen allenO yAnE-'muL eyiRRu,
	tilakam taiiya tEm kamaz tiru n'utal,
	ematum uNTu, Or matin'AT tigkaL,
	uraRu kural vev vaLi eTuppa, n'izal tapa
	ulavai Akiya maratta
10	kal piRagku uyar malai umparaHtu' enavE?

63. n'eytal

	uravuk kaTal uzan'ta peru valaipparatavar
	miku mIn uNakkiya putu maNal AgkaN,
	kallen cErip pulavaR punnai
	vizavu n'ARu viLagku iNar avizn'tu uTan kamazum
5	azugkal UrO aRan inRu; atanAl,
	aRan il annai arug kaTip paTuppa,
	pacalai Aki viLivatukollO-
	puL uRa ocin'ta pU mayagku aLLal
	kazic curam n'ivakkum iruj ciRai ivuLi
10	tirai taru puNariyin kazUum
	mali tiraic cErppanoTu amain'ta n'am toTarpE?

64. kuRijci

	ennar Ayinum ini n'inaivu ozika!
	annavAka inaiyal-tOzi!-yAm
	innamAka n'at tuRan'tOr n'aTpu evan?
	maral n'Ar uTukkai malai uRai kuRavar
5	aRiyAtu aRutta ciRiyilaic cAn'tam
	vaRanuRRu Ara murukki, paiyena
	maram vaRitAkac cOrn'tu ukkAgku, en
	aRivum uLLamum avar vayin cenRena,
	vaRitAl, ikuLai! en yAkkai; ini avar
10	varinum, n'Oy marun'tu allar; vArAtu
	avaNar Akuka, kAtalar! ivaN n'am
	kAmam paTar aTa varun'tiya
	n'Oy mali varuttam kANanmAr emarE!

65. kuRijci

	amutam uNka, n'am ayal ilATTi!-
	kiTagkil anna iTTuk karaik kAn yARRuk
	kalagkum pAci n'Ir alaik kalAva,
	oLiRu veL aruvi oN tuRai maTuttu,
5	puliyoTu poruta puN kUr yAnai
	n'aR kOTu n'ayan'ta anpu il kAnavar
	viR cuzippaTTa n'Amap pUcal
	urumiTaik kaTi iTi karaiyum
	peru malai n'ATanai 'varUum' enROLE.

66. pAlai

	miLaku peytanaiya cuvaiya pun kAy
	ulaRu talai ukAayc citar citarn'tu uNTa
	pulampu koL n'eTuj cinai ERi, n'inain'tu, tan
	poRi kiLar eruttam veRi paTa maRuki,
5	pun puRA uyavum ven' tukaL iyavin,
	n'ayan'ta kAtalaR puNarn'tanaL Ayinum,
	civan'tu oLi mazugki amarttanakollO-
	kOtai mayagkinum, kuRun' toTi n'ekizinum,
	kAz peyal alkul kAcu muRai tiriyinum,
10	mAN n'alam kaiyaRak kaluzum en
	mAyak kuRumakaL malar Er kaNNE?

67. n'eytal

	cEy vicumpu ivarn'ta cezug katir maNTilam
	mAl varai maRaiya, tuRai pulampinRE;
	iRavu arun'ti ezun'ta karug kAl veN kuruku
	veN kOTTu aruj ciRait tAay, karaiya
5	karug kOTTup punnai iRaikoNTanavE;
	kaNaik kAl mA malar karappa, malku kazit
	tuNaic cuRA vazagkalum vazagkum; AyiTai,
	el imiz panik kaTal, malku cuTark koLIi,
	emarum vETTam pukkanar; atanAl,
10	tagkin evanOteyya-pogku picir
	muzavu icaip puNari ezutarum
	uTai kaTaR paTappai em uRaivin UrkkE?

68. kuRijci

	'viLaiyATu AyamoTu Orai ATAtu,
	iLaiyOr illiTattu iRceRin'tiruttal
	aRanum anRE; Akkamum tEym' ena-
	kuRu n'urai cuman'tu, n'aRu malar un'ti,
5	pogki varu putu n'Ir n'ejcu uNa ATukam,
	vallitin vaNagkic collun'arp peRinE;
	'celka' ena viTun'aLmankollO? el umizn'tu,
	uravu urum uraRum arai iruL n'aTu n'AL,
	koTi n'uTagku ilagkina minni,
10	ATu mazai iRuttanRu, avar kOTu uyar kunRE.

69. mullai

	pal katir maNTilam pakal ceytu ARRi,
	cEy uyar peru varaic cenRu, avaN maRaiya,
	paRavai pArppuvayin aTaiya, puRavil
	mA eruttu iralai maTap piNai tazuva,
5	mullai mukai vAy tiRappa, pal vayin
	tOnRi tOnRupu putal viLakku uRAa,
	matarvai n'al An mAcu il teN maNi,
	koTug kOl kOvalar kuzalOTu onRi,
	aitu van'tu icaikkum aruL il mAlai,
10	ALvinaikku akanROr cenRa n'ATTum
	inaiyavAkit tOnRin,
	vinai valittu amaital ARRalarmannE!

70. marutam

	ciRu veLLAgkurukE! ciRu veLLAgkurukE!
	tuRai pOku aRuvait tU maTi anna
	n'iRam kiLar tUvic ciRu veLLAgkurukE!
	em Ur van'tu, em uNtuRait tuzaii,
5	cinaik keLiRRu Arkaiyai avar Urp peyarti,
	anaiya anpinaiyO, peru maRaviyaiyO-
	AgkaN tIm punal IgkaN parakkum
	kazani n'al Ur makizn'arkku en
	izai n'ekiz paruvaral ceppAtOyE!