9. pAlai

	azivilar muyalum Arva mAkkaL
	vazipaTu teyvam kaN kaNTAagku,
	alamaral varuttam tIra, yAza n'in
	n'ala men paNait tOL eytinam; Akalin,
5	porip pUm punkin azaR takai oN muRi
	cuNagku aNi vana mulai aNagku koLat timiri,
	n'izal kANtORum n'eTiya vaiki,
	maNal kANtORum vaNTal taii,
	varun'tAtu Ekumati-vAl eyiRROyE!
10	mA n'anai kozuti makiz kuyil Alum
	n'aRun' taN pozila, kAnam;
	kuRum pal Ura, yAm cellum ARE.

48. pAlai

	anRai anaiya Aki, inRum, em
	kaN uLapOlac cuzalummAtO-
	pul itazk kOgkin mel itazk kuTaip pU
	vaikuRu mInin n'inaiyat tOnRi,
5	puRavu aNi koNTa pU n'ARu kaTattiTai,
	kiTin ena iTikkum kOl toTi maRavar
	vaTi n'avil ampin vinaiyar ajcAtu
	amariTai uRutara, n'Ikki, n'Ir
	emariTai uRutara oLitta kATE.

118. pAlai

	aTaikarai mAattu alagku cinai poliyat
	taLir kavin eytiya taN n'aRum potumpil,
	cEvaloTu kezIiya ceg kaN irug kuyil
	pukanRu etir Alum pU mali kAlaiyum,
5	'akanROrmanRa n'am maRan'ticinOr' ena,
	iNar uRupu, uTaivatantalaiyum puNarvinai
	Ova mAkkaL oL arakku UTTiya
	tukilikai anna, tuyt talaip pAtiri
	vAl itaz alari vaNTu paTa En'ti,
10	putu malar teruvutoRu n'uvalum
	n'otumalATTikku n'Om, en n'ejcE!

202. pAlai

	puli porac civan'ta pulAl am ceg kOTTu
	oli pal muttam Arppa, vali ciRan'tu,
	van cuval parArai murukki, kanRoTu
	maTap piTi tazIiya taTak kai vEzam,
5	tEn cey perug kiLai iriya, vEgkaip
	pon purai kavaLam puRan'tarupu UTTum
	mA malai viTarakam kavaii, kANvara,
	kaNTicin-vAziyO, kuRumakaL!-n'un'tai,
	aRumIn payan'ta aRam cey tigkaL
10	cel cuTar n'eTug koTi pOla,
	pal pUg kOgkam aNin'ta kATE.

224. pAlai

	anpinar, mannum periyar; atantalai,
	'pinpani amaiyam varum' ena, munpanik
	kozun'tu mun'tuRIik kuravu arumpinavE;
	'puNarn'tIr puNarminO' enna, iNarmicaic
5	ceg kaN irug kuyil etir kural payiRRum
	inpa vEnilum van'tanRu; n'amvayin
	'piriyalam' enRu, teLittOr tEettu,
	ini evan mozikO, yAnE-kayan aRak
	kaN azin'tu ulaRiya pal mara n'eTu n'eRi
10	vil mUcu kavalai vilagkiya
	vem munai aruj curam munniyOrkkE?

256. pAlai

	n'IyE, pATal cAnRa pazi tapu cIRaTi,
	alku peru n'alattu, amartta kaNNai;
	kATE, n'izal kavin izan'ta azal kavar maratta,
	pulampu vIRRirun'tu n'alam citain'tanavE;
5	in' n'ilai tavirn'tanam celavE: vain' n'utik
	kaLavuTan kamaza, piTavut taLai aviza,
	kAr peyal ceyta kAmar kAlai,
	maTap piNai tazIiya mA eruttu iralai
	kAz koL vElattu Az cinai payan'ta
10	kaN kavar vari n'izal vatiyum
	taN paTu kAnamum tavirn'tanam celavE.

318. pAlai

	n'inaittalum n'inaitirO-aiya! anRu n'Am
	paNait tAL Omaip paTu cinai payan'ta
	porun'tAp pukar n'izal irun'tanemAka,
	n'aTukkam ceyyAtu, n'aNNuvazit tOnRi,
5	oTittu micaik koNTa Ogku maruppu yAnai
	poRi paTu taTakkai curukki, piRitu Or
	ARu iTaiyiTTa aLavaikku, vERu uNarn'tu,
	enRUz viTar akam cilampa,
	pun talai maTap piTi pulampiya kuralE?

337. pAlai

	ulakam paTaitta kAlai-talaiva!-
	maRan'tanarkollO ciRan'ticinOrE-
	mutirA vEnil etiriya atiral,
	parAraip pAtirik kuRu mayir mA malar,
5	n'aRu mOrOTamoTu, uTan eRin'tu aTaicciya
	ceppu iTan'tanna n'ARRam tokku uTan,
	aNi n'iRam koNTa maNi maruL aim pAl
	tAz n'aRug katuppil paiyena muLkum
	arum peRal perum payam koLLAtu,
10	pirin'tu uRai marapina poruL paTaittOrE.

384. pAlai

	paim puRap puRavin ceg kAR cEval
	kaLari Ogkiya kavai muTak kaLLi
	muLari am kuTampai InRu, iLaippaTTa
	uyavu n'aTaip pETai uNIiya, mannar
5	munai kavar mutu pAz uku n'eR peRUum
	araN il cEy n'ATTu atar iTai, malarn'ta
	n'al n'AL vEgkaip pon maruL putup pUp
	paran'tana n'aTakka, yAm kaNTanam mAtO:
	kAN ini vAzi-en n'ejcE!-n'AN viTTu
10	arun' tuyar uzan'ta kAlai
	marun'tu enappaTUum maTavOLaiyE.

391. pAlai

	Azal, maTan'tai! azugkuvar celavE-
	pulip poRi anna puLLi am potumpin
	panip pavar mEyn'ta mA iru maruppin
	malar talaik kArAn akaRRiya taN n'aTai
5	oN toTi makaLir izai aNik kUTTum,
	pon paTu, koNkAna n'annan n'al n'ATTu
	EziRkunRam peRinum, poruLvayin
	yArO pirikiRpavarE-kuvaLai
	n'Ir vAr n'ikar malar anna, n'in
10	pEr amar mazaik kaN teN pani koLavE?