8. kuRijci

	alku paTar uzan'ta ari matar mazaikkaN,
	pal pUm pakait tazai n'uTagkum alkul,
	tiru maNi puraiyum mEni maTavOL
	yAr makaLkol? ivaL tan'tai vAziyar!
5	tuyaram uRIiyinaL emmE: akalvayal 5
	arivanar arin'tum taruvanarp peRRum
	taN cERu tAay, matanuTai n'On tAL
	kaN pOl n'eytal pOrvil pUkkum
	tiN tErp poRaiyan toNTi-
10	tan tiRam peRuka, ivaL InRa tAyE!

10. pAlai

	aNNAn'tu En'tiya vana mulai taLarinum,
	pon n'Er mEni maNiyin tAzn'ta
	n'al n'eTug kUn'tal n'araiyoTu muTippinum,
	n'Ittal Ompumati-pUk kEz Ura!
5	in kaTug kaLLin izai aNi n'eTun' tErk
	koRRac cOzar kogkarp paNIiyar,
	veN kOTTu yAnaip pOor kizavOn
	pazaiyan vEl vAyttanna n'in
	pizaiyA n'al mozi tERiya ivaTkE.

22. kuRijci

	koTicci kAkkum aTukkaR pain'tinai
	mun'tu viLai perug kural koNTa man'ti
	kallAk kaTuvanoTu n'al varai ERi,
	agkai n'iRaiya jemiTik koNTu, tan
5	tirai aNaR koTug kavuL n'iRaiya mukki,
	vAn peyal n'anain'ta puRatta, n'Onpiyar
	kai UN irukkaiyin tOnRum n'ATan
	van'tanan; vAzi-tOzi!-ulakam
	kayam kaN aRRa paitu aRu kAlai,
10	pILoTu tiragkiya n'elliRku
	n'aLLen yAmattu mazai pozin'tAgkE.

24. pAlai

	'pAr paka vIzn'ta vEruTai vizukkOTTu
	uTumpu aTain'tanna n'eTum pori viLavin,
	ATTu ozi pan'tin, kOTTu mUkku iRupu,
	kampalattanna paim payirt tAam
5	veLLil valci vERRu n'ATTu Ar iTaic
	cERum, n'Am' enac colla-cEyizai!-
	'n'anRu' enap purin'tOy; n'anRu ceytanaiyE;
	ceyalpaTu manattar ceyporuTku
	akalvar, ATavar; atu atan paNpE.

45. n'eytal

	ivaLE, kAnal n'aNNiya kAmar ciRukuTi,
	n'Il n'iRap perug kaTal kalagka uLpukku
	mIn eRi paratavar makaLE; n'IyE,
	n'eTug koTi n'uTagkum n'iyama mUtUrk
5	kaTun' tErc celvan kAtal makanE:
	n'iNac cuRA aRutta uNakkal vENTi,
	inap puL Oppum emakku n'alan evanO?
	pulavu n'ARutum; cela n'inRImO!
	peru n'Ir viLaiyuL em ciRu n'al vAzkkai
10	n'ummoTu puraivatO anRE;
	emmanOril cemmalum uTaittE!

46. pAlai

	vaikaltORum inpamum iLamaiyum
	ey kaNai n'izalin kaziyum, iv ulakattu;
	kANIr enRalO aritE; atu n'ani
	pENIr Akuvir-aiya! en tOzi
5	pUN aNi Akam pulampa, pANar
	ayirppuk koNTanna konRai am tIm kani,
	paRai aRai kaTippin, aRai aRaiyAt tuyalvara,
	vev vaLi vazagkum vEy payil azuvattu,
	evvam mikUum aruj curam iRan'tu,
10	n'an vAy allA vAzkkai
	mannAp poruT piNip piritum yAm enavE.

84. pAlai

	kaNNum, tOLum, taN n'aRugkatuppum,
	titalai alkulum pala pArATTi,
	n'erun'alum ivaNar mannE! inRE,
	peru n'Ir oppin pEey veN tEr
5	maran il n'IL iTai mAn n'acaiyuRUum,
	cuTumaN tacumpin mattam tinRa
	piRavA veNNey uruppu iTan'tanna
	uvar ezu kaLari Omai am kATTu,
	veyil vIRRirun'ta vempu alai aruj curam
10	Ekuvar enpa, tAmE-tamvayin
	iran'tOr mARRal ARRA
	illin vAzkkai vallAtOrE.

92. pAlai

	uLLArkollO-tOzi!-tuNaiyoTu
	vEnil Oti pATu n'aTai vazalai
	vari maral n'ukumpin vATi, avaNa
	vaRan porun'tu kunRattu ucci kavAan
5	vETTac cIRUr akan kaN kENip
	paya n'iraikku eTutta maNi n'Irp pattar,
	pun talai maTap piTi kanROTu Ara,
	vil kaTin'tu UTTina peyarum
	kol kaLiRRu oruttal curan iRan'tOrE!

107. pAlai

	uLLutoRum n'akuvEn-tOzi!-vaL ukirp
	piTi piLan'tiTTa n'Ar il veN kOTTuk
	koTiRu pOl kAya vAl iNarp pAlai,
	cel vaLi tUkkalin, ilai tIr n'eRRam
5	kal izi aruviyin ollena olikkum,
	pul ilai Omaiya, puli vazagku attam
	cenRa kAtalarvazi vazippaTTa
	n'ejcE n'alvinaippARRE; INTu ozin'tu,
	AnAk kauvai malain'ta
10	yAnE, tOzi! n'OyppAlEnE.

108. kuRijci

	malai ayaR kalitta mai Ar Enal
	tuNaiyin tIrn'ta kaTugkaN yAnai
	aNaiyak kaNTa am kuTik kuRavar,
	kaNaiyar, kiNaiyar, kai punai kavaNar,
5	viLiyar, puRakkuTi Arkkum n'ATa!
	pazakiya pakaiyum pirivu innAtE;
	mukai Er ilagku eyiRRu in n'akai maTan'tai
	cuTar purai tiru n'utal pacappa,
	toTarpu yAgku viTTanai? n'OkO yAnE!

111. n'eytal

	atta iruppaip pUvin anna
	tuyt talai iRavoTu tokai mIn peRIiyar,
	vari valaip paratavar karu vinaic ciRAar,
	maral mERkoNTu mAn kaNam takaimAr
5	ven' tiRal iLaiyavar vETTu ezun'tAgku,
	timil mERkoNTu, tiraic curam n'In'ti,
	vAL vAyc cuRavoTu vaya mIn keNTi,
	n'iNam pey tONiyar iku maNal izitarum
	perug kazip pAkkam kallena
10	varumE-tOzi!-koNkan tErE.

115. mullai

	malarn'ta poykaip pUk kuRRu azugka
	ayarn'ta Ayam kaN initu paTIiyar,
	annaiyum ciRitu taNin'tu uyirinaL; 'in n'Irt
	taTag kaTal vAyil uNTu, cil n'Ir' ena,
5	mayil aTi ilaiya mAk kural n'occi
	manai n'aTu mauvaloTu Uz mukai aviza,
	kAr etirn'tanRAl, kAlai; kAtalar
	tavac cEy n'ATTar Ayinum, mikap pEr
	anpinar-vAzi, tOzi!-n'an pukaz
10	ulappu inRu peRinum taviralar;
	kETTicin allenO, vicumpin takavE?

125.kuRijci

	'irai tEr eNkin paku vAy ERRai
	koTu varip puRRam vAyppa vAgki,
	n'al arA n'aTugka uraRi, kollan
	Utu ulaik kurukin uL uyirttu, akazum
5	n'aTu n'AL varutal ajcutum yAm' ena,
	varain'tu varal irakkuvam Ayin, n'am malai
	n'al n'AL vatuvai kUTi, n'ITu inRu
	n'ammoTu celvarman-tOzi!-mella
	vEgkaik kaNNiyar erutu eRi kaLamar
10	n'ilam kaNTanna akan kaN pAcaRai,
	men tinai n'eTum pOr purimAr
	tujcu kaLiRu eTuppum tam perug kal n'ATTE.

126. pAlai

	paig kAy n'al iTam orIiya cegkAyk
	karug kaLi In'tin veN puRak kaLari
	iTu n'IRu ATiya kaTu n'aTai oruttal
	AL peRal n'acaii, n'AL curam vilagki,
5	tunaitarum vampalark kANAtu, ac cinam
	panaik kAnRu ARum pAz n'ATTu attam,
	iRan'tu cey poruLum inpam tarum enin,
	iLamaiyin ciRan'ta vaLamaiyum illai;
	iLamai kazin'ta pinRai, vaLamai
10	kAmam tarutalum inRE; atanAl,
	n'illAp poruT piNic cERi;
	vallE-n'ejcam!-vAykka n'in vinaiyE!

132. n'eytal

	pEr Ur tujcum; yArum illai;
	tirun'tu vAyc cuRavam n'Ir kAnRu, oyyenap
	perun' teru utirtaru peyaluRu taN vaLi
	pOr amai katavap purai toRum tUva,
5	kUr eyiRRu ekinam n'aTugkum n'al n'akarp
	payilpaTai n'ivan'ta pal pUj cEkkai
	ayalum mAN ciRaiyatuvE; atantalai,
	'kAppuTai vAyil pORRu, O' ennum
	yAmam koLpavar n'eTu n'A oN maNi
10	onRu eRi pANiyin iraTTum;
	inRukol, aLiyEn ponRum n'ALE?

134. kuRijci

	'initin initu talaippaTum' enpatu
	itukol?-vAzi, tOzi!-kAtalar
	varu kuRi ceyta varaiyakac ciRu tinaic
	cev vAyp pAcinam kaTIiyar, 'koTicci!
5	av vAyt taTTaiyoTu avaNai Aka!' ena,
	EyaLman yAyum; n'un'tai, 'vAziyar,
	am mA mEni n'irai toTik kuRumakaL!
	cellAyO; n'in muL eyiRu uNku' ena,
	melliya iniya kURalin, yAn aHtu
10	ollEn pOla uraiyATuvalE!

160. kuRijci

	n'ayanum, n'aNpum, n'ANu n'anku uTaimaiyum,
	payanum, paNpum, pATu aRin'tu ozukalum,
	n'umminum aRikuvenmannE-kammena
	etirtta titti, Er iLa vana mulai
5	vitirttu viTTanna an' n'uN cuNagkin,
	aim pAl vakutta kUn'tal, cem poRi
	tiru n'utal polin'ta tEm pAy Oti,
	mutu n'Ir ilajcip pUtta kuvaLai
	etir malarp piNaiyal anna ivaL
10	ari matar mazaik kaN kANA UgkE.

161. mullai

	iRaiyum, arun' tozil muTittena, poRaiya,
	kaN pOl n'Ilam cunaitoRum malara,
	vI tatar vEgkaiya viyal n'eTum puRavin,
	immen paRavai INTu kiLai iriya,
5	n'eTun' teru anna n'Er koL n'eTu vazi,
	iLaiyar Ekuvanar parippa, vaLai enak
	kAn'taL vaL itaz kavikuLampu aRuppa,
	tOL vali yAppa, INTu n'am varavinaip
	puL aRivuRIiyinakollO-teLLitin
10	kAtal kezumiya n'alattaL, Etil
	putalvaR kATTip poykkum
	titalai alkul tEm moziyATkE?

162. pAlai

	'manai uRai puRavin ceg kAR pETaik
	kAmar tuNaiyoTu cEval cEra,
	pulampinRu ezutaru punkaN mAlait
	taniyE iruttal ARREn' enRu, n'in
5	pani vAr uNkaN paitala kaluza,
	'n'ummoTu varuval' enRi; emmoTu-
	perum peyart tan'tai n'ITu pukaz n'eTu n'akar
	yAyoTu n'ani mika maTavai!-munAatu
	vEnil iRRit tOyA n'eTu vIz,
10	vazi n'Ar Ucalin, kOTai tUkkutoRum,
	tujcu piTi varuTum attam
	vallai Akutal ollumO, n'inakkE?

163. n'eytal

	uyirttanavAkuka, aLiya, n'ALum-
	ayirt tukaL mukan'ta AnA UtaiyoTu
	elliyum iravum ennAtu, kallenak
	kaRagku icai ina maNi kaipuNarn'tu olippa,
5	n'ilavut tavaz maNaR kOTu ERic celavara,
	inRu en n'ejcam pOla, tonRu, n'ani
	varun'tuman; aLiya tAmE: perug kaTal
	n'Il n'iRap punnait tami oN kaitai,
	vAnam mUzkiya vayagku oLi n'eTuj cuTark
10	katir kAyn'tu ezun'tu akam kanali jAyiRRu
	vaikuRu vanappin, tOnRum
	kaitaiam kAnal tuRaivan mAvE!

164. pAlai

	'uRai tuRan'tirun'ta puRavil, tanAtu
	ceg katirc celvan teRutalin, maN paka,
	ulaku mika varun'ti uyAvuRukAlaic
	cenRanar Ayinum, n'anRu ceytanar' enac
5	collin teLippavum, teLital cellAy-
	cegkOl vALik koTu vil ATavar
	vampa mAkkaL uyirt tiRam peyarttena,
	veg kaTaRRu aTai mutal paTu muTai tazIi,
	uRu pacik kuRu n'ari kuRukal cellAtu
10	mARu puRakkoTukkum attam,
	URu ilarAkutal uLLAmARE.

165. kuRijci

	amark kaN AmAn aru n'iRam muLkAtu
	paNaitta pakazip pOkku n'inain'tu, kAnavan,
	'aNagkoTu n'inRatu malai, vAn koLka' enak
	kaTavuL Ogku varai pENmAr, vETTu ezun'tu,
5	kiLaiyoTu makizum kunRa n'ATan
	aTaitarumtORum, arumai tanakku uraippa,
	'n'ap puNarvu illA n'ayan ilOr n'aTpu
	anna Akuka' ennAn;
	olkAtu ozi; mikap palkina tUtE.

166. pAlai

	ponnum maNiyum pOlum, yAza n'in
	n'annar mEniyum n'ARu irug katuppum;
	pOtum paNaiyum pOlum, yAza n'in
	mAtar uNkaNum vanappin tOLum:
5	ivai kANtORum akam malin'tu, yAnum
	aRam n'ilaipeRROr anaiyEn; atantalai,
	polan'toTip putalvanum poytal kaRRanan;
	vinaiyum vERu pulattu ilenE; n'inaiyin,
	yAtanin pirikO?-maTan'tai!-
10	kAtal tAnum kaTalinum peritE!

167. n'eytal

	karug kOTTup punnaik kuTakku vAgku peruj cinai
	virun'tin veN kuruku Arppin, Aay
	vaN makiz n'ALavaip paricil peRRa
	paN amai n'eTun' tErp pANiyin, olikkum
5	taNNam tuRaivan tUtoTum van'ta
	payan teri panuvaR pai tIr pANa!
	n'in vAyp paNi mozi kaLaiyA-pal mAN
	putu vI jAzaloTu punnai tAam
	maNam kamaz kAnal, mAN n'alam izan'ta
10	iRai Er el vaLaik kuRumakaL
	piRai Er tiru n'utal pAaya pacappE.

168. kuRijci

	curumpu uNa virin'ta karug kAl vEgkaip
	peruj cinait toTutta kozug kaN iRAal,
	puLLuRRuk kacin'ta tIm tEn kal aLaik
	kuRak kuRumAkkaL uNTa miccilaip
5	pun talai man'ti van paRaz n'akkum
	n'an malai n'ATa! paNpu enap paTumO-
	n'in n'ayan'tu uRaivi in uyir uLLAy,
	aNagkuTai aravin Ar iruL n'aTu n'AL,
	mai paTu ciRu n'eRi eHku tuNai Aka
10	Aram kamazum mArpinai,
	cAraR ciRukuTi Igku n'I varalE?

169. mullai

	'munniyatu muTittanam Ayin, n'annutal!
	varuvam' ennum paruvaral tIra,
	paTumkol, vAzi, n'eTuj cuvarp palli-
	paraR talai pOkiya ciraR talaik kaLLi
5	mImicaik kalitta vI n'aRu mullai
	ATu talait turuvin tOTu talaippeyarkkum
	van kai iTaiyan ellip parIi,
	veN pOz taiiya alagkal am toTalai
	maRukuTan kamazum mAlai,
10	ciRukuTip pAkkattu em peru n'akarAnE.

170. marutam

	maTak kaN, takarak kUn'tal, paNait tOL,
	vArn'ta vAl eyiRRu, cErn'tu ceRi kuRagkin,
	piNaiyal am tazai taii, tuNaiyilaL
	vizavuk kaLam poliya van'tu n'inRanaLE;
5	ezuminO ezumin, em kozun'aR kAkkam;
	Ariyar tuvanRiya pEr icai muLLUr,
	palar uTan kazitta oL vAL malaiyanatu
	oru vERku OTiyAgku, n'am
	panmaiyatu evanO, ivaL vanmai talaippaTinE?

171. pAlai

	n'Ir n'acaikku Ukkiya uyaval yAnai
	vEniR kunRattu vev varaik kavAan
	n'ilam cela, cellAk kayan' talaik kuzavi
	cEri am peNTir n'ejcattu eRiya
5	Ur AnkanRoTu pukutum n'ATan
	pan malai aruj curam iRappin, n'am viTTu,
	yAgku vallun'a maRRE-jAgka
	vinaip pUN teN maNi vIzn'tana n'ikarppak
	kazutu kAlkoLLum pozutu koL pAnAL,
10	Arva n'ejcamoTu aLaii,
	mArpu uRap paTuttal marIiya kaNNE?

172. n'eytal

	viLaiyATu AyamoTu veN maNal azutti,
	maRan'tanam tuRan'ta kAz muLai akaiya,
	'n'ey pey tIm pAl peytu initu vaLarppa;
	n'umminum ciRan'tatu; n'uvvai Akum' enRu,
5	annai kURinaL, punnaiyatu n'alanE-
	amma! n'ANutum, n'ummoTu n'akaiyE;
	virun'tin pANar viLar icai kaTuppa,
	valampuri vAn kOTu n'aralum ilagku n'Irt
	tuRai kezu koNka!-n'I n'alkin,
10	iRaipaTu n'Izal piRavumAr uLavE.

173. kuRijci

	cunaip pUk kuRRum, toTalai taiiyum,
	malaic ceg kAn'taT kaNNi tan'tum,
	tan vazip paTUum n'am n'ayan'taruLi,
	veRi ena uNarn'ta ariya annaiyai,
5	kaNNinum kanavinum kATTi, 'in' n'Oy
	enninum vArAtu; maNiyin tOnRum
	am malai kizavOn ceytanan itu' enin,
	paTu vaNTu Arkkum pain' tAr mArpin
	n'eTu vETku Etam uTaittO?-
10	toTiyOy! kURumati, vinavuval yAnE.

174. pAlai

	'kaRRai In'tin muRRuk kulai anna
	AL il attat tAL am pOn'taik
	kOLuTai n'eTuj cinai AN kural viLippin,
	puli etir vazagkum vaLi vazagku Ar iTaic
5	cenRa kAtalar van'tu, initu muyagki,
	piriyAtu oru vazi uRaiyinum, peritu azin'tu
	uyagkinai, maTan'tai!' enRi-tOzi!-
	aRRum Akum, aHtu aRiyAtOrkkE;
	vIzAk koLkai vIzn'ta koNTi
10	mallal mArpu maTuttanan
	pullu maRRu evanO anpu ilagkaTaiyE?

175. n'eytal

	n'eTug kaTal alaitta koTun' timiR paratavar
	kozu mIn koLLai azi maNal kuvaii,
	mIn n'ey aTTik kiLijcil pottiya
	ciRu tI viLakkil tujcum, n'aRu malarp
5	punnai Ogkiya, tuRaivanoTu annai
	tAn aRin'tanRO ilaLE; pAnAL
	cEriam peNTir ciRu col n'ampi,
	cuTuvAn pOla n'Okkum,
	aTu pAl anna en pacalai meyyE.

176. kuRijci

	em n'ayan'tu uRaivi Ayin, yAm n'ayan'tu
	n'alkinam viTTatu en? n'alattOn av vayin
	cAlpin aLittal aRiyAtu, 'avaTku avaL
	kAtalaL ennumO?' uraitticin-tOzi!-
5	n'iraitta yAnai mukattu vari kaTuppap
	pOtu poti uTain'ta oN ceg kAn'taL
	vAzai am cilampin vampu paTak kuvaii,
	yAz Orttanna in kural ina vaNTu,
	aruvi muzavin pAToTu orAgku,
10	menmela icaikkum cAral,
	kunRa vElit tam uRaivin UrE.

177. pAlai

	paran'tu paTu kUr eri kAnam n'aippa,
	maram tIyuRRa makiz talaiam kATTu
	otukku arum vej curam iRan'tanar maRRavar;
	kuRippin kaNTicin yAnE; n'eRip paTa,
5	vElum ilagku ilai tuTaippa; palakaiyum
	pIli cUTTi maNi aNipavvE;
	paNTinum n'ani pala aLippa; iniyE
	van'tanRu pOlum-tOzi!-n'on'tu n'on'tu,
	ezutu ezil uNkaN pAvai
10	azitaru veLLam n'In'tum n'ALE.

178. n'eytal

	ATu amai Akkam aitu picain'tanna
	tOTu amai tUvit taTan' tAL n'Arai
	n'alan uNappaTTa n'alkUr pETai
	kazi peyar marugkil ciRu mIn uNNAtu,
5	kaitai am paTu cinaip pulampoTu vatiyum
	taNNam tuRaivan tErE kaNNin
	kANavum iyain'tanRu mannE; n'ANi
	n'aLLen yAmattum kaN paTai peREen;
	puL oli maNi cettu Orppa,
10	viLin'tanRumAtu, avart teLin'ta en n'ejcE.

179. pAlai

	il ezu vayalai IRRu A tinRena,
	pan'tu n'ilattu eRin'tu, pAvai n'Ikki,
	av vayiRu alaitta en cey vinaik kuRumakaL
	mAn amarppanna maiyal n'OkkamoTu,
5	yAnum tAyum maTuppa, tEnoTu
	tIm pAl uNNAL vIgkuvanaL vimmi,
	n'erun'alum anaiyaLmannE; inRE,
	mai aNaR kALai poy pukalAka,
	aruj curam iRan'tanaL enpa-tan
10	murun'tu Er veN pal mukiz n'akai tiRan'tE.

180. marutam

	pazanap pAkal muyiRu mUcu kuTampai
	kazani n'Arai uraittalin, cen'n'el
	viravu veLLariciyin tAam Uran
	palarp peRal n'acaii, n'am il vAralanE;
5	mAyOL, n'alattai n'ampi viTal ollALE
	anniyum periyan; avaninum vizumiya
	iru peru vEn'tar, poru kaLattu ozitta
	punnai vizumam pOla,
	ennoTu kaziyum-iv iruvaratu ikalE.

181. mullai

	uL iRaik kurIik kAr aNaR cEval
	piRa pulat tuNaiyOTu uRai pulattu alki,
	van'tatan cevvi n'Okki, pETai
	n'eRi kiLar Igkaip pUvin anna
5	ciRu pal piLLaiyoTu kuTampai kaTitalin,
	tuvalaiyin n'anain'ta puRattatu ayalatu
	kUral irukkai aruLi, n'eTitu n'inain'tu,
	Ira n'ejcin tan vayin viLippa,
	kaiyaRa van'ta maiyal mAlai
10	irIiya Akalin, in oli izan'ta
	tAr aNi puravi taN payir tumippa
	van'tanRu, peruviRal tErE;
	uyn'tanRAkum, ivaL Ay n'utaR kavinE.

182. kuRijci

	n'ilavum maRain'tanRu; iruLum paTTanRu;
	Ovattu anna iTanuTai varaippin,
	pAvai anna n'iR puRagkAkkum
	ciRan'ta celvattu annaiyum tujcinaL;
5	keTuttuppaTu n'an kalam eTuttuk koNTAgku,
	n'an mArpu aTaiya muyagki, menmela,
	kaNTanam varukam cenmO?-tOzi!-
	kIzum mElum kAppOr n'Itta
	vaRun' talaip perug kaLiRu pOla,
10	tamiyan van'tOn, paniyalai n'IyE!

183. n'eytal

	tam n'ATTu viLain'ta veNNel tan'tu,
	piRa n'ATTu uppin koLLai cARRi,
	n'eTu n'eRi ozukai n'ilavu maNal n'In'ti,
	avaN uRai munin'ta okkaloTu pulam peyarn'tu,
5	umaNar pOkalum innAtAkum-
	maTavai manRa-koNka!-vayintORu
	innAtu alaikkum UtaiyoTu Orum
	n'um il pulampin mAlaiyum uTaittE;
	ina mIn Arn'ta veN kuruku mititta
10	vaRu n'Ir n'eytal pOla,
	vAzAL Atal cUzAtOyE.

184. pAlai

	oru makaL uTaiyEn mannE; avaLum
	ceru miku moympin kUrvER kALaiyoTu
	peru malai aruj curam n'erun'al cenRanaL;
	'iniyE, tAgku n'in avalam' enRir; atu maRRu
5	yAgganam ollumO? aRivuTaiyIrE!
	uLLin uLLam vEmE-uNkaN
	maNi vAz pAvai n'aTai kaRRanna en
	aNi iyaR kuRumakaL ATiya
	maNi Er n'occiyum teRRiyum kaNTE.

185. kuRijci

	AnA n'OyOTu azi paTark kalagki,
	kAmam kaimmika, kaiyaRu tuyaram
	kANavum n'alkAy Ayin-pANar
	paricil peRRa viri uLai n'al mAn
5	kavi kuLampu poruta kal micaic ciRu n'eRi,
	iravalar meliyAtu ERum, poRaiyan
	urai cAl uyar varaik kollik kuTavayin,
	akal ilaik kAn'taL alagku kulaip pAyn'tu,
	paRavai izaitta pal kaN iRAal
10	tEnuTai n'eTu varai, teyvam ezutiya
	vinai mAN pAvai annOL
	kolai cUzn'tanaLAl-n'OkO yAnE.

186. pAlai

	kal URRu INTala kayan aRa, vAgki,
	irum piNart taTak kai n'ITTi, n'Ir n'oNTu,
	perug kai yAnai piTi etir OTum
	kAnam vempiya vaRam kUr kaTattiTai,
5	vEnil Oti n'iRam peyar mutu pOttu,
	pAN yAz kaTaiya, vAgki, pAgkar
	n'eTu n'ilai yAam ERum tozila-
	piRarkku ena muyalum pEr aruL n'ejcamoTu
	kAmar poruT piNi pOkiya
10	n'Am veg kAtalar cenRa ARE.

188. kuRijci

	paTu n'Irc cilampil kalitta vAzaik
	koTu maTal InRa kUr vAyk kuvi mukai,
	oL izai makaLir ilagku vaLait toTUum
	mel viral mOcai pOla, kAn'taL
5	vaL itaz tOyum vAn tOy veRpa!
	'n'anRi viLaivum tItoTu varum' ena,
	anRu n'aRku aRin'tanaL Ayin, kunRattut
	tEm mutir cilampil taTaiiya
	vEy maruL paNait tOL aziyalaLmannE.

189. pAlai

	tam alatu illA n'am n'ayan'tu aruLi
	innum vArAr; Ayinum, cenniyar,
	teRal arug kaTavuL munnar, cIRiyAz
	n'arampu icaittanna in kuraR kurukin
5	kagkai vagkam pOkuvarkollO-
	ev vinai ceyvarkol tAmE?-vev vinaik
	kolai val vETTuvan valai parin'tu pOkiya
	kAnap puRavin cEval vAy n'Ul
	cilampi am cinai verUum,
10	alagkal ulavai am kATu iRan'tOrE?

190. kuRijci

	n'O, ini; vAziya-n'ejcE! mEvAr
	Ar araN kaTan'ta mAri vaN makizt
	titalai eHkin cEn'tan tan'tai,
	tEm kamaz viri tAr iyal tEr azici,
5	vaNTu mUcu n'eytal n'elliTai malarum
	ariyal am kazani ArkkATu anna
	kAmar paNait tOL n'alam vIRu eytiya,
	valai mAn mazaik kaN, kuRumakaL
	cil mozit tuvar vAy n'akaikku makizn'tOyE!

192. kuRijci

	'kuruti vETkai uru kezu vaya mAn
	vali miku munpin maza kaLiRu pArkkum
	maram payil cOlai maliya, pUziyar
	uruvat turuvin, n'AL mEyal Arum
5	mAri eNkin malaic cura n'IL iTai,
	n'I n'ayan'tu varutal evan?' enap pala pulan'tu,
	azutanai uRaiyum am mA arivai!
	payam kezu palavin kollik kuTa varaip
	pUtam puNartta putitu iyal pAvai
10	viri katir iLa veyil tOnRi anna, n'in
	Ay n'alam uLLi varin, emakku
	Emam Akum, malaimutal ARE.

193. pAlai

	aTTarakku uruvin vaTTu mukai Igkait
	tuyt talaip putu malart tuLi talaik kalAva,
	n'iRai n'Irp puniRRup pulam tuzaii, AnAy,
	irum puRam tazUum perun' taN vATai!
5	n'inakkut tItu aRin'tanRO ilamE;
	paNait tOL el vaLai jekiztta em kAtalar
	aruj ceyal poruT piNip pirin'tanarAka,
	yArum il oru ciRai irun'tu,
	pEr ajar uRuviyai varuttAtImE!

195. n'eytal

	aruLAyAkalO, koTitE!-irug kazik
	kuruLai n'Irn'Ay kozu mIn mAn'ti,
	tillaiam potumpil paLLi koLLum
	mellam pulampa! yAn kaNTicinE-
5	kallen puLLin kAnal am toNTi,
	n'el ari tozuvar kUr vAL uRRena,
	pal itaz tayagkiya kUmpA n'eytal
	n'Ir alait tORRam pOla,
	Iriya kaluzum, n'I n'ayan'tOL kaNNE.

207. n'eytal

	kaNTal vElik kazi cUz paTappai
	muNTakam vEyn'ta kuRiyiRaik kurampaik
	kozu mIn koLpavar pAkkam kallena,
	n'eTun' tEr paNNi varal AnAtE;
5	kunRattu anna kuvavu maNal n'In'ti
	van'tanar, peyarvarkol tAmE? alkal,
	iLaiyarum mutiyarum kiLaiyuTan kuzIi,
	kOT cuRA eRin'tena, curugkiya n'arampin
	muTi mutir paratavar maTa mozik kuRumakaL,
10	valaiyum tUNTilum paRRi, perug kAl
	tirai ezu pauvam munniya
	kolai vej ciRAar pARpaTTanaLE.

229. pAlai

	'cERum, cERum' enRalin, pala pulan'tu,
	'cenmin' enRal yAn ajcuvalE;
	'cellAtIm' enac ceppin, pallOr
	n'iRattu eRi pun colintiRattu ajcuvalE;
5	atanAl, cenmin; cenRu vinai muTimin; cenRAgku,
	avaN n'ITAtal Ompumin; yAmattu,
	izai aNi Akam vaTuk koLa muyagki,
	uzaiyIrAkavum panippOL tamiyE
	kuzaivAn, kaNNiTattu INTit taNNena,
10	ATiya iLa mazaip pinRai,
	vATaiyum kaNTirO, van'tu n'inRatuvE?

234. kuRijci

	cAnROr varun'tiya varuttamum n'umatu
	vAn tOyvu anna kuTimaiyum n'Okkit
	tiru maNi varanRum kunRam koNTu ivaL
	varu mulai Akam vazagkinO n'anRE
5	aHtu AnRu
	aTai poruL karutuvir Ayin kuTaiyoTu
	kazumalam tan'ta n'al tErc cempiyan
	pagkuni vizavin uRan'taiyoTu
	uLLi vizavin vajciyum ciRitE.

235. n'eytal

	uravut tirai poruta piNar paTu taTavu mutal,
	aravu vAL vAya muL ilait tAzai
	pon n'Er tAtin punnaiyoTu kamazum
	pal pUg kAnal pakaRkuRi van'tu, n'am
5	mey kavin citaiyap peyarn'tananAyinum,
	kunRin tOnRum kuvavu maNal ERi,
	kaNTanam varukam cenmO-tOzi!-
	taN tAr akalam vaNTu imirpu Uta,
	paTu maNik kali mAk kaTaii,
10	n'eTu n'Irc cErppan varUum ARE.

271. pAlai

	irum puniRRu erumaip peruj cevik kuzavi
	pain' tAtu eruvin vaiku tuyil maTiyum
	cezun' taN manaiyOTu em ivaN oziya,
	cel perug kALai poym maruNTu, cEy n'ATTuc
5	cuvaik kAy n'ellip pOkku arum pogkar
	vIz kaTait tiraL kAy orugkuTan tinRu,
	vI cunaic ciRu n'Ir kuTiyinaL, kazin'ta
	kuvaLai uNkaN en makaL Oranna,
	cey pOz veTTiya poytal Ayam,
10	mAlai viri n'ilavil peyarpu puRagkANTaRku,
	mA irun' tAzi kavippa,
	tA inRu kazika, eR koLLAk kURRE.

355. kuRijci

	putalvan InRa pUg kaN maTan'tai
	mulai vAy uRukkum kai pOl, kAn'taT
	kulaivAy tOyum kozu maTal vAzai
	am maTal paTTa aruvit tIm n'Ir
5	cem muka man'ti Arum n'ATa!
	mun'tai irun'tu n'aTTOr koTuppin,
	n'ajcum uNpar n'ani n'Akarikar;
	am cil Oti en tOzi tOT tuyil
	n'ejcin inpuRAy Ayinum, atu n'I
10	en kaN OTi aLimati-
	n'in kaN allatu piRitu yAtum ilaLE!

385. n'eytal

	ellai cenRapin, malarum kUmpina;
	pulavu n'Ir aTaikarai yAmaip pArppOTu
	alavanum aLaivayiR ceRin'tana; koTug kazi
	irai n'acai varuttam vITa, maramicaip
5	puLLum piLLaiyoTu vatin'tana; atanAl,
	pozutanRuAtalin, tamiyai varuti:

396. kuRijci

	peytu pOku ezili vaiku malai cEra,
	tEn tUgku uyar varai aruvi Arppa,
	vEgkai tan'ta veRpu aNi n'al n'AL,
	ponnin anna pUj cinai tuzaii,
5	kamaz tAtu ATiya kavin peRu tOkai
	pAcaRai mImicaik kaNam koLpu, jAyiRRu
	uRu katir iLa veyil uNNum n'ATan!
	n'in mArpu aNagkiya cellal aru n'Oy
	yArkku n'on'tu uraikkO yAnE-pal n'AL
10	kAmar n'ani col colli,
	Emam enRu aruLAy, n'I mayagkinaiyE?