21. mullai

	viraip pari varun'tiya vIgku celal iLaiyar
	araic ceRi kaccai yAppu azittu acaii,
	vENTu amar n'aTaiyar, menmela varuka!
	tINTA vai muL tINTi n'Am celaRku
5	Emati, valava, tErE! utuk kAN-
	urukkuRu n'aRu n'ey pAl vitirttanna
	arik kural miTaRRa am n'uN pal poRik
	kAmaru takaiya kAnavAraNam
	peyal n'Ir pOkiya viyal n'eTum puRavil
10	pularA Ir maNal malirak keNTi,
	n'AL irai kavara mATTi, tan
	pETai n'Okkiya perun'taku n'ilaiyE!

42. mullai

	maRattaRku aritAl-pAka! pal n'AL
	aRattoTu varun'tiya alku tozil koLIiya
	paza mazai pozin'ta putu n'Ir avala
	n'A n'avil pal kiLai kaRagka, mAN vinai
5	maNi oli kELAL, vANutal; atanAl,
	'Ekumin' enRa iLaiyar vallE
	il pukku aRiyun'arAka, mellena
	maNNAk kUn'tal mAcu aRak kazIi,
	cil pOtu koNTu pal kural azuttiya
10	an' n'ilai pukutalin, mey varuttuRAa
	aviz pU muTiyinaL kavaiiya
	maTa mA arivai makizn'tu ayar n'ilaiyE.

59. mullai

	uTumpu kolIi, vari n'uNal akazn'tu,
	n'eTug kOTTup puRRattu Iyal keNTi,
	ellu muyal eRin'ta vETTuvan cuvala
	pal vERu paNTat toTai maRan'tu, illattu,
5	iru maTaik kaLLin in kaLi cerukkum
	van pulak kATTu n'ATTatuvE-anpu kalan'tu
	n'amvayin purin'ta koLkaiyoTu, n'ejcattu
	uLLinaL uRaivOL UrE; mullai
	n'uN mukai avizn'ta puRavin
10	poRai talai maNan'tanRu; uyavumAr iniyE.

69. mullai

	pal katir maNTilam pakal ceytu ARRi,
	cEy uyar peru varaic cenRu, avaN maRaiya,
	paRavai pArppuvayin aTaiya, puRavil
	mA eruttu iralai maTap piNai tazuva,
5	mullai mukai vAy tiRappa, pal vayin
	tOnRi tOnRupu putal viLakku uRAa,
	matarvai n'al An mAcu il teN maNi,
	koTug kOl kOvalar kuzalOTu onRi,
	aitu van'tu icaikkum aruL il mAlai,
10	ALvinaikku akanROr cenRa n'ATTum
	inaiyavAkit tOnRin,
	vinai valittu amaital ARRalarmannE!

81. mullai

	iru n'ilam kuRaiyak koTTipparin'tinRu
	Ati pOkiya acaivu il n'On tAL,
	mannar matikkum mAN vinaip puravi
	koym mayir eruttil peym maNi Arppa,
5	pUNkatil-pAka!-n'in tErE: pUN tAz
	Aka vana mulaik karaivalam teRippa
	azutanaL uRaiyum am mA arivai
	virun'tu ayar viruppoTu varun'tinaL acaiiya
	muRuval in n'akai kANkam!-
10	uRu pakai taNittanan, uravu vAL vEn'tE.

89. mullai

	koNTal ARRi viNtalaicceRIiyar,
	tiraip pitir kaTuppa mukaTu ukan'tu ERi,
	n'iraittu n'iRai koNTa kamaj cUl mA mazai
	azi tuLi kazippiya vazi peyaR kaTai n'AL,
5	irum panip paruvatta mayirk kAy uzun'tin
	akal ilai akala vIci, akalAtu
	alkalum alaikkum n'alkA vATai,
	paruma yAnai ayA uyirttAagku,
	innum varumE-tOzi!-vArA
10	vankaNALarOTu iyain'ta
	punkaN mAlaiyum pulampum mun'tuRuttE!

97. mullai

	azun'tu paTu vizup puN vazumpu vAypularA
	evva n'ejcattu eHku eRin'tAgku,
	pirivila pulampi n'uvalum kuyilinum,
	tERu n'Ir kezIiya yARu n'ani koTitE;
5	ataninum koTiyaL tAnE, 'matanin
	tuyt talai itaza paig kurukkattiyoTu
	pittikai viravu malar koLLIrO?' ena
	vaNTu cUz vaTTiyaL tiritarum
	taNTalai uzavar tani maTa makaLE.

99. mullai

	'n'Ir aRa vaRan'ta n'irampA n'IL iTai,
	tukil virittanna veyil avir uruppin,
	ajcuvarap panikkum vej curam iRan'tOr
	tAm varat teLitta paruvam kANvara
5	ituvO?' enRicin-maTan'tai!-mati inRu,
	maRan'tu kaTal mukan'ta kamaj cUl mA mazai
	poRuttalcellAtu iRutta vaN peyal
	kAr enRu ayarn'ta uLLamoTu, tErvu ila-
	piTavamum, konRaiyum kOTalum-
10	maTava Akalin, malarn'tana palavE.

121. mullai

	vitaiyar konRa mutaiyal pUzi,
	iTu muRai n'irappiya Ir ilai varakin
	kavaik katir kaRitta kAmar maTap piNai,
	aralai am kATTu iralaiyoTu, vatiyum
5	puRaviRRu amma, n'I n'ayan'tOL UrE:
	'elli viTTanRu, vEn'tu' enac collupu
	pariyal; vAzka, n'in kaNNi!-kAN vara
	viri uLaip polin'ta vIgku celal kali mA
	vaN pari tayagka ezIi, taN peyaR
10	kAn yARRu ikumaNaR karai piRakku oziya,
	el virun'tu ayarum manaivi
	mel iRaip paNait tOL tuyil amarvOyE!

142. mullai

	vAn ikupu corin'ta vayagku peyaRkaTai n'AL,
	pANi koNTa pal kAl mel uRi
	jeli kOl kalap pai ataLoTu curukki,
	paRip puRattu iTTa pAl n'oTai iTaiyan
5	n'uN pal tuvalai oru tiRam n'anaippa,
	taNTu kAl vaitta oTugku n'ilai maTi viLi
	ciRu talait tozuti EmArttu alkum
	puRavinatuvE-poyyA yANar,
	allil Ayinum virun'tu varin uvakkum,
10	mullai cAnRa kaRpin,
	mel iyaR kuRumakaL uRaivin, UrE.

161. mullai

	iRaiyum, arun' tozil muTittena, poRaiya,
	kaN pOl n'Ilam cunaitoRum malara,
	vI tatar vEgkaiya viyal n'eTum puRavin,
	immen paRavai INTu kiLai iriya,
5	n'eTun' teru anna n'Er koL n'eTu vazi,
	iLaiyar Ekuvanar parippa, vaLai enak
	kAn'taL vaL itaz kavikuLampu aRuppa,
	tOL vali yAppa, INTu n'am varavinaip
	puL aRivuRIiyinakollO-teLLitin
10	kAtal kezumiya n'alattaL, Etil
	putalvaR kATTip poykkum
	titalai alkul tEm moziyATkE?

169. mullai

	'munniyatu muTittanam Ayin, n'annutal!
	varuvam' ennum paruvaral tIra,
	paTumkol, vAzi, n'eTuj cuvarp palli-
	paraR talai pOkiya ciraR talaik kaLLi
5	mImicaik kalitta vI n'aRu mullai
	ATu talait turuvin tOTu talaippeyarkkum
	van kai iTaiyan ellip parIi,
	veN pOz taiiya alagkal am toTalai
	maRukuTan kamazum mAlai,
10	ciRukuTip pAkkattu em peru n'akarAnE.

181. mullai

	uL iRaik kurIik kAr aNaR cEval
	piRa pulat tuNaiyOTu uRai pulattu alki,
	van'tatan cevvi n'Okki, pETai
	n'eRi kiLar Igkaip pUvin anna
5	ciRu pal piLLaiyoTu kuTampai kaTitalin,
	tuvalaiyin n'anain'ta puRattatu ayalatu
	kUral irukkai aruLi, n'eTitu n'inain'tu,
	Ira n'ejcin tan vayin viLippa,
	kaiyaRa van'ta maiyal mAlai
10	irIiya Akalin, in oli izan'ta
	tAr aNi puravi taN payir tumippa
	van'tanRu, peruviRal tErE;
	uyn'tanRAkum, ivaL Ay n'utaR kavinE.

221. mullai

	maNi kaNTanna mA n'iRak karuviLai
	oN pUn' tOnRiyoTu taN putal aNiya,
	pon toTarn'tanna takaiya n'an malark
	konRai oL iNar kOTutoRum tUgka,
5	vampu virittanna cem pulap puRavil,
	n'Ir aNip peru vazi n'IL iTaip pOza,
	celka-pAka!-n'in ceyvinai n'eTun' tEr:
	virun'tu viruppuRUum perun' tOT kuRumakaL,
	min oLir avir izai n'al n'akar viLagka,
10	n'aTai n'AT ceyta n'avilAc cIRaTip
	pUg kaT putalvan uRagkuvayin olki,
	'van'tIka, en'tai!' ennum
	am tIm kiLavi kETkam n'AmE.

238. mullai

	vaRam kola vIn'ta kAnattu, kuRum pUg
	kOtai makaLir kuzUu n'irai kaTuppa,
	vaNTu vAy tiRappa viNTa piTavam,
	mAlai an'ti, mAl atar n'aNNiya
5	paruvam ceyta karuvi mA mazai!
	'avar n'ilai aRiyumO, Igku' ena varutal
	cAnROrp puraivatO anRE; mAnRu uTan
	ura urum uraRum n'Irin, paran'ta
	pAmpu pai mazugkal anRiyum, mANTa
10	kaniyA n'ejcattAnum,
	iniya alla, n'in iTi n'avil kuralE.

239. n'eytal

	jAnRa jAyiRu kuTamalai maRaiya,
	mAnRa mAlai makizn'ta paratavar
	initu peRu peru mIn eLitinin mARi,
	alavan ATiya pulavu maNal munRil
5	kAmar ciRukuTic celn'eRi vaziyin,
	Ay maNi poti avizn'tAgku, n'eytal
	pul itaz potin'ta pUt tapa mitikkum
	mallal irug kazi mali n'Irc cErppaRku
	amain'tu tozil kETTanRO ilamE; 'munkai
10	vAr kOl el vaLai uTaiya vAgki,
	muyagku' enak kaluzn'ta iv Ur
	eRRu Avatukol, yAm maRRonRu ceyinE?

242. mullai

	ilai ila piTavam Ir malar arumpa,
	putal ivar taLavam pUg koTi aviza,
	pon enak konRai malara, maNi enap
	pal malar kAyAg kuRuj cinai kajala,
5	kAr toTagkinRE kAlai; val virain'tu
	celka-pAka!-n'in tErE: uvakkAN-
	kazip peyar kaLaril pOkiya maTa mAn
	vizik kaT pEtaiyoTu inan irin'tu OTa,
	kAmar n'ejcamoTu akalA,
10	tETUu n'inRa iralai ERE.

248. mullai

	'ciRu vI mullait tEm kamaz pacu vI,
	poRi vari n'al mAn pukar mukam kaTuppa,
	taN putal aNipeRa malara, vaN peyal
	kAr varu paruvam' enRanarman-ini,
5	pEr ajar uLLam n'aTugkal kANiyar,
	anpu inmaiyin paNpu ila payiRRum
	poy iTi atir kural vAy cettu Alum
	ina mayil maTak kaNam pOla,
	n'inai maruLvEnO? vAziyar, mazaiyE!

266. mullai

	kollaik kOvalar kuRumpunam cErn'ta
	kuRug kAR kuravin kuvi iNar vAn pU
	ATuTai iTaimakan cUTap pUkkum
	akaluL AgkaN cIRUrEmE;
5	atuvE cAlum kAmam; anRiyum,
	em viTTu akaRir Ayin, kon onRu
	kURuval-vAziyar, aiya!-vERupaTTu
	irIiya kAlai iriyin,
	periya allavO, periyavar n'ilaiyE?

289. mullai

	amma vAzi, tOzi!-kAtalar,
	n'ilam puTaipeyarvatAyinum, kURiya
	col puTaipeyartalO ilarE; vAnam
	n'aLi kaTal mukan'tu, ceRitaka iruLi,
5	kanai peyal pozin'tu, kaTug kural payiRRi,
	kAr ceytu, en uzaiyatuvE; AyiTai,
	kollaik kOvalar elli mATTiya
	peru mara oTiyal pOla,
	aruL ilEn amma; aLiyEn yAnE.

321. mullai

	cen' n'ilap puRavin pun mayirp puruvai
	pATu in teL maNit tOTu talaippeyara,
	kAna mullaik kaya vAy alari
	pArppana makaLir cAraR puRattu aNiya,
5	kal cuTar cErum katir mAy mAlai,
	pullen vaRu manai n'Okki, mella
	varun'tumkollO, tirun'tuizai arivai?
	vallaik kaTavumati tErE; cenRika,
	kurun'tu aviz kuRumpoRai payiRRa,
10	perug kali mUtUr maram tOnRummE.

361. mullai

	ciRu vI mullaip peritu kamaz alari
	tAnum cUTinan; iLaijarum malain'tanar;
	vicumpu kaTappanna polam paTaik kali mA,
	paTu mazai pozin'ta taN n'aRum puRavil,
5	n'eTu n'A oN maNi pATu ciRan'tu icaippa,
	mAlai mAnRa maNam mali viyal n'akart
	tan'tana n'eTun'takai tErE; enRum
	arum paTar akala n'Ikki,
	virun'tu ayar viruppinaL, tirun'tuizaiyOLE.

364. mullai

	colliya paruvam kazin'tanRu; ellaiyum
	mayagku iruL n'aTu n'AL magkulOTu onRi,
	Ar kali vAnam n'Ir potin'tu iyagka,
	paniyin vATaiyoTu munivu van'tu iRuppa,
5	inna cil n'AL kaziyin, pal n'AL
	vAzalen vAzi-tOzi!-Uzin
	urum icai aRiyAc ciRu cen' n'Avin
	Ir maNi in kural Ur n'aNi iyampa,
	pal A tan'ta kallAk kOvalar
10	konRaiam tIm kuzal manRutORu iyampa,
	uyir celat tunaitarum mAlai,
	ceyir tIr mAriyoTu orugku talaivarinE.

367. mullai

	koTug kaN kAkkaik kUr vAyp pETai
	n'aTugku ciRaip piLLai tazIi, kiLai payirn'tu,
	karug kaN karunaic cen'n'el veN cORu
	cUruTaip paliyoTu kavariya, kuRug kAl
5	kUzuTai n'al manaik kuzuvina irukkum
	mUtil aruman pEr icaic ciRukuTi
	mel iyal arivai! n'in pal irug katuppin
	kuvaLaiyoTu toTutta n'aRu vI mullait
	taLai aviz alarit taN n'aRug kOtai
10	iLaiyarum cUTi van'tanar: n'amarum
	viri uLai n'an mAk kaTaii,
	pariyAtu varuvar, ip pani paTu n'ALE.

371. mullai

	kAyAg kunRattuk konRai pOla,
	mA malai viTar akam viLagka minni,
	mAyOL irun'ta tEem n'Okki,
	viyal iru vicumpu akam putaiyap pAay,
5	peyal toTagkinavE, peyyA vAnam:
	n'izal tikaz cuTart toTi jekiza Egki,
	azal toTagkinaLE Ayizai; atan etir,
	kuzal toTagkinarE kOvalar-
	tazagku kural urumin kagkulAnE.

374. mullai

	murampu talai maNan'ta n'irampA iyavin
	Ogkit tOnRum umaN poli ciRukuTik
	kaLarip puLiyin kAy paci peyarppa,
	uccik koNTa Ogku kuTai vampalIr!
5	muRRaiyum uTaiyamO maRRE-piRRai
	vIz mA maNiya punai n'eTug kUn'tal,
	n'Ir vAr puLLi Akam n'anaippa,
	virun'tu ayar viruppinaL varun'tum
	tirun'tuizai, arivait tEmozi n'ilaiyE?

381. mullai

	'arun' tuyar uzattalin uNmai cAnm' enap
	perumpiRitu inmaiyin ilEnum allEn;
	karai porutu izitarum kAn yARRu ikukarai
	vEr kiLar marAattu am taLir pOla,
5	n'aTugkal AnA n'ejcamoTu, iTumpai
	yAgkanam tAgkuven maRRE?-Ogku celal
	kaTum pakaTTu yAnai n'eTu mAn ajci,
	Ira n'ejcamOTu icai cEN viLagka,
	tEr vIcu irukkai pOla,
10	mAri irIi mAnRanRAl mazaiyE.

384. pAlai

	paim puRap puRavin ceg kAR cEval
	kaLari Ogkiya kavai muTak kaLLi
	muLari am kuTampai InRu, iLaippaTTa
	uyavu n'aTaip pETai uNIiya, mannar
5	munai kavar mutu pAz uku n'eR peRUum
	araN il cEy n'ATTu atar iTai, malarn'ta
	n'al n'AL vEgkaip pon maruL putup pUp
	paran'tana n'aTakka, yAm kaNTanam mAtO:
	kAN ini vAzi-en n'ejcE!-n'AN viTTu
10	arun' tuyar uzan'ta kAlai
	marun'tu enappaTUum maTavOLaiyE.

394. mullai

	maran'talai maNan'ta n'anan' talaik kAnattu,
	alan'talai jemaiyattu irun'ta kuTijai,
	pon cey kollanin, iniya teLirppa,
	peym maNi Arkkum izai kiLar n'eTun' tEr,
5	van paral murampin, n'Emi atira,
	cenRicin vAziyO, panik kaTu n'ALE;
	iTaic curattu ezili uRaittena, mArpin
	kuRum poRik koNTa cAn'tamoTu
	n'aRun' taNNiyankol; n'OkO yAnE?