mullai

21. mullai
vaNTu paTat tatain'ta koTi iNar iTaiyiTupu,
pon cey punai izai kaTTiya makaLir
katuppin tOnRum putup pUg konRaik
kAnam, 'kAr' enak kURinum,
yAnO tEREn; avar poy vazagkalarE.

paruvam varun'tuNaiyum ARRuvitta tOzi, 'avar varal kuRitta paruva varavin kaN ini ARRuvikkumARu evvARu?' enRu tannuLLE kavanRATku, avaLatu kuRippu aRin'ta talai

24. mullai
karug kAl vEmpin oN pU yANar
ennai inRiyum kazivatukollO?
ARRu ayal ezun'ta veN kOTTu atavattu
ezu kuLiRu mititta oru pazam pOlak
kuzaiya, koTiyOr n'AvE,
kAtalar akala, kallenRavvE.

paruvag kaNTu ARRALAkiya kizatti uraittatu. - paraNar

64. mullai
pal A n'eTu n'eRikku akanRu van'tena,
pun talai manRam n'Okki, mAlai
maTak kaN kuzavi alamvan'tanna
n'OyEm Akutal aRin'tum,
cEyar-tOzi!-cEy n'ATTOrE.

piriviTai ARRAmai kaNTu, 'varuvar' enac colliya tOzikkuk kizatti uraittatu. - karuvUrk katappiLLai

65. mullai
van paraR teL aRal parukiya iralai tan
inpuRu tuNaiyoTu maRuvan'tu ukaLa,
tAn van'tanRE, taLi taru taN kAr-
vArAtu uRaiyun'ar varal n'acaii
varun'ti n'on'tu uRaiya irun'tirO enavE.

paruvag kaNTu azin'ta talaimakaL tOzikku uraittatu. - kOvUr kizAr

66. mullai
maTavamanRa, taTavu n'ilaik konRai-
kal piRagku attam cenROr kURiya
paruvam vArAaLavai, n'eritarak
kompu cEr koTi iNar Uztta,
vampa mAriyaik kAr ena matittE.

paruvag kaNTu azin'ta talaimakaLait tOzi, 'paruvam anRu' enRu vaRpuRIiyatu - kOvarttanAr

98. mullai
'innaL AyinaL n'annutal' enRu, avart
tunnac cenRu ceppun'arp peRinE,
n'anRuman vAzi-tOzi!-n'am paTappai
n'Ir vAr paim putaR kalitta
mArip pIrattu alar cila koNTE.

paruvag kaNTu azin'ta talaimakaL tOzikku uraittatu. - kOkkuLamuRRan

99. mullai
uLLinen allenO yAnE? uLLi,
n'inain'tanen allenO peritE n'inain'tu,
maruNTanen allenO, ulakattup paNpE?
n'ITiya marAatta kOTu tOy malir n'iRai
iRaittu uNac cenRu aRRAgku,
anaip perug kAmam INTu kaTaikkoLavE.

poruL muRRip pukun'ta talaimakan. 'emmai n'inaittum aRitirO?' enRa tOzikkuc colliyatu. - auvaiyAr

108. mullai
mazai viLaiyATum kunRu cEr ciRukuTik
kaRavai kanRuvayin paTara, puRavil
pAcilai mullai Acu il vAn pUc
cev vAn cevvi koNTanRu;
uyyEn pOlval-tOzi!-yAnE.

paruvag kaNTu azin'ta talaimakaL tOzikkuk kURiyatu. - vAyilAn tEvan

110. mullai
vArAr Ayinum, varinum, avar n'amakku
yAr AkiyarO-tOzi!-n'Ira
n'Ilap paim pOtu uLari, putala
pIli oN poRik karuviLai ATTi,
n'uN muL Igkaic cev arumpu Uztta
vaNNat tuym malar utira, taNNenRu
innAtu eRitarum vATaiyoTu
en AyinaLkol ennAtOrE?

paruvag kaNTu azin'ta talaimakaL tOzikku uraittatu; talaimakanaik koTumai kURit talaimakaLait tOzi vaRpuRIiyatUum Am. - kiLLimagkalag kizAr

126. mullai
'iLamai pArAr vaLam n'acaiic cenROr
ivaNum vArAr; evaNarO?' ena,
peyal puRan'tan'ta pUg koTi mullait
toku mukai ilagku eyiRu Aka
n'akumE-tOzi!-n'aRun' taN kArE.

paruvam kaNTu azin'ta talaimakaL tOzikkuc colliyatu. - okkUr mAcAtti

148. mullai
celvac ciRAar cIRaTip polin'ta
tavaLai vAaya polam cey kiNkiNik
kAcin anna pOtu In konRai
kurun'toTu alamvarum perun' taN kAlaiyum,
'kAr anRu' enRiAyin,
kanavO maRRu itu? vinavuval yAnE.

paruvam kaNTu azin'ta talaimakaLait tOzi, 'paruvam anRu' enRu vaRpuRutta, talaimakaL colliyatu. - iLagkIran'taiyAr.

162. mullai
kAr puRan'tan'ta n'IruTai viyan pulattup
pal A pukutarUum pullen mAlai-
mullai! vAziyO, mullai!-n'I n'in
ciRu veN mukaiyin muRuval koNTanai;
n'akuvai pOlak kATTal
takumO, maRRu-itu tamiyOrmATTE?

vinai muRRi mILum talaimakan mullaikku uraippAnAy uraittatu.- karuvUrp pavuttiran.

167. mullai
muLi tayir picain'ta kAn'taL mel viral,
kazuvuRu kaligkam, kazAatu, uTIi,
kuvaLai uNkaN kuyppukai kazumat
tAn tuzan'tu aTTa tIm puLip pAkar
'initu' enak kaNavan uNTalin,
n'uNNitin makizn'tanRu oNNutal mukanE.

kaTin'akar cenRa cevilittAy, n'aRRAykku uraittatu. - kUTalUr kizAr

183. mullai
cenRa n'ATTa konRaiam pacu vI
n'am pOl pacakkum kAlai, tam pOl
ciRu talaip piNaiyin tIrn'ta n'eRi kOTTu
iralai mAnaiyum kANparkol, n'amarE?-
pullen kAyAp pUk kezu peruj cinai
men mayil eruttin tOnRum
pun pula vaippiR kAnattAnE.

paruva varavinkaN, 'ARRAL' enak kavanRa tOzikkuk kizatti uraittatu.- auvaiyAr

186. mullai
Arkali ERRoTu kAr talaimaNan'ta
kollaip punatta mullai men koTi
eyiRu ena mukaiyum n'ATaRkut
tuyil tuRan'tanavAl-tOzi!-em kaNNE,

paruva varavin, 'ARRAL' enak kavanRa tOzikkuk kizatti uraittatu.- okkUr mAcAtti.

188. mullai
mukai muRRinavE mullai; mullaiyoTu
takai muRRinavE, taN kAr viyan punam-
vAl izai n'ekizttOr vArAr-
mAlai van'tanRu, en mAN n'alam kuRittE.

paruvag kaNTu azin'ta kizatti tOzikku uraittatu. - maturai aLakkar jAzAr makanAr maLLanAr

190. mullai
n'eRi irug katuppoTu perun' tOL n'Ivi,
ceRivaLai n'ekiza, ceyporuTku akanROr
aRivarkol vAzi-tOzi!-poRi vari
vej cina aravin pain' talai tumiya
n'arai urum uraRum arai iruL n'aTun'AL,
n'al ERu iyagkutoRu iyampum
pal An tozuvattu oru maNik kuralE?

piriviTai ARRALAkiya talaimakaL tOzikkuc colliyatu. - pUtampullan.

191. mullai
utukkAN atuvE: itu ena mozikO?-
n'On cinai irun'ta irun' tOTTup puLLinam
tAm puNarn'tamaiyin, pirin'tOr uLLat
tIm kural akavak kETTum, n'Igkiya
EtilALar ivaN varin, 'pOtin
pommal Otiyum punaiyal;
emmum toTAal' enkuvemmannE.

piriviTai 'ARRAL' enak kavanRa tOzikkuk kizatti uraittatu.

193. mullai
maTTam peyta maNik kalattanna
iTTu vAyc cunaiya pakuvAyt tErai,
taTTaip paRaiyin, kaRagkum n'ATan
tollait tigkaL n'eTu veNNilavin
maNan'tananman em tOLE;
inRum, mullai mukai n'ARummE.

tOzi kaTin'akar pukku, 'n'alam tolaiyAmE n'anku ARRinAy!' enRATkuk kizatti uraittatu - aricil kizAr

194. mullai
en enappaTugkol-tOzi! minnu vara
vAn Erpu iragkum onRO? atan etir
kAna majjai kaTiya Egkum;
Etila kalan'ta iraNTaRku en
pEtai n'ejcam peru malakkuRumE?

paruva varavinkaN, 'ARRALAm', enak kavanRa tOzikkuk kizatti uraittatu.- kOvarttanAr.

200. n'eytal
peyta kunRattup pU n'ARu taN kaluz
mImicait tAay, vIcum vaLi kalan'tu,
izitarum punalum; vArAr-tOzi!-
maRan'tOr manRa; maRavAm n'AmE-
kAla mAri mAlai mA malai
in icai uruminam muralum
mun varal Emam ceytu akanROrE.

paruva varavinkaN ARRALAkiya talaimakaTkut tOzi, 'paruvam anRu; vampu'enRa vazi, talaimakaL colliyatu. - auvaiyAr.

210. mullai
tiN tEr n'aLLi kAnattu aNTar
pal A payan'ta n'eyyin, toNTi
muzutuTan viLain'ta veNNel vej cORu
ezu kalattu En'tinum ciRitu-en tOzi
perun' tOL n'ekiztta cellaRku
virun'tu varak karain'ta kAkkaiyatu paliyE.

pirin'tu van'ta talaimakan, 'n'anku ARRuvittAy!' enRARkut tOzi uraittatu - kAkkai pATiniyAr n'acceLLaiyAr.

220. mullai
paza mazaik kalitta putup puna varakin
iralai mEyn'ta kuRaittalaip pAvai
iruvi cEr marugkil pUtta mullai,
veruku cirittanna, pacu vI men piNik
kuRu mukai avizn'ta n'aRu malarp puRavin
vaNTu cUz mAlaiyum, vArAr;
kaNTicin-tOzi!-poruT pirin'tOrE.

paruva varavinkaN kizatti tOzikku uraittatu. - okkUr mAcAtti

221. mullai
avarO vArAr-mullaiyum pUttana;
paRiyuTaik kaiyar maRiyinattu oziya,
pAloTu van'tu kUzoTu peyarum
ATuTai iTaimakan cennic
cUTiya ellAm ciRu pacu mukaiyE.

piriviTaip paruva varavinkaN vaRpuRuttum tOzikkuk kizatti uraittatu - uraiyUr mutu koRRan

233. mullai
kavalai keNTiya kalvAyc ciRu kuzi
konRai oL vI tAay, celvar
pon pey pEzai mUy tiRan'tanna
kAr etir puRavinatuvE-uyarn'tOrkku
n'IroTu corin'ta miccil, yAvarkkum
varaikOL aRiyAc conRi,
n'irai kOR kuRun'toTi tan'tai UrE.

paTTa pinRai varaiyAtu cenRu, vinai muRRi mILum talaimakan tErppAkaRkuc colliyatu. - pEyan

234. mullai
cuTar cel vAnam cEppa, paTar kUrn'tu,
elluRu pozutin mullai malarum
mAlai enmanAr, mayagkiyOrE:
kuTumik kOzi n'eTu n'akar iyampum
perum pular viTiyalum mAlai;
pakalum mAlai-tuNai ilOrkkE.

paruva varavinkaN tOzikkuk kizatti uraittatu. - miLaipperug kan'tan

240. mullai
panip putal ivarn'ta paig koTi avaraik
kiLi vAy oppin oLi viTu pal malar
verukkup pal uruvin mullaiyoTu kajali,
vATai van'tatan talaiyum, n'Oy pora,
kaNTicin vAzi-tOzi!-teN tiraik
kaTal Az kalattin tOnRi,
mAlai maRaiyum, avar maNi n'eTug kunRE.

varaiviTai, 'ARRAL' enak kavanRa tOzikkuk kizatti uraittal kollan azici.

242. mullai
kAnagkOzik kavar kuraR cEval
oN poRi eruttil taN citar uRaippap
putal n'Ir vArum pU n'ARu puRavil
cIRUrOLE, maTan'tai; vERu Ur
vEn'tu viTu toziloTu celinum,
cEn'tu varal aRiyAtu, cemmal tErE.

kaRpuk kAlattuk kaTin'akar cenRa cevilittAy n'aRRAykkuc colliyatu.- kuzaRRattan

251. mullai
maTava vAzi-majjai mA inam
kAla mAri peytena, atan etir
Alalum Alina; piTavum pUttana;
kAr anRu-ikuLai!-tIrka, n'in paTarE!
kazin'ta mArikku ozin'ta paza n'Ir,
putu n'Ir koLIiya, ukuttarum
n'otumal vAnattu muzagku kural kETTE.

piriviTait tOzi. 'paruvam anRu; paTTatu vampu' enRu vaRpuRuttiyatu.- iTaik kATan.

270. mullai
tAz iruL tumiya minni, taNNena
vIz uRai iniya citaRi, Uzin
kaTippu iku muracin muzagki, iTittu iTittup
peyka, ini; vAziyO, peru vAn!-yAmE,
ceyvinai muTitta cemmal uLLamoTu
ivaLin mEvinam Aki, kuvaLaik
kuRun' tAL n'ALmalar n'ARum
n'aRu men kUn'tal mel aNaiyEmE.

vinaimuRRip pukun'ta talaimakan kizattiyOTu uTanirun'tu kURiyatu.- pANTiyan pannATu tan'tAn.

275. mullai
mullai Urn'ta kal uyarpu ERik
kaNTanam varukam; cenmO-tOzi!-
el Urc cErtarum ERuTai inattup
pul Ar n'al An pUN maNikollO?
ceyvinai muTitta cemmal uLLamoTu
val vil iLaiyar pakkam pORRa,
Ir maNaR kATTARu varUum
tEr maNikol?-ANTu iyampiya uLavE.

paruva varavinkaN varavu n'imittam tOnRa, tOzi talaimakaTku uraittatu.- okkUr mAcAtti

279. mullai
tirimaruppu erumai iruL n'iRa mai An
varumiTaRu yAtta pakuvAyt teN maNi,
pulampu koL yAmattu, iyagkutoRu icaikkum
itu pozutu Akavum vArArkollO-
mazai kazUu maRan'ta mA irun' tuRukal
tukaL cUz yAnaiyin poliyat tOnRum
irum pal kunRam pOki,
tirun'tu iRaip paNait tOL uLLAtOrE?

vaRpuRuttum tOzikkuk kizatti uraittatu. - maturai marutan iLan'AkanAr

287. mullai
amma vAzi-tOzi-kAtalar
innE kaNTum tuRakkuvar kollO-
mun'n'Al tigkaL n'iRai poRuttu acaii
otugkal cellAp pacum puLi vETkaik
kaTujcUl makaLir pOla n'Ir koNTu,
vicumpu ivarkallAtu tAgkupu puNari,
cezum pal kunRam n'Okki,
perug kali vAnam Ertarum pozutE?

piriviTai vERupaTTa kizatti, 'n'ammait tuRan'tu vArAr' enRu kavanRATku,paruvag kATTi, tOzi, 'varuvar' enac colliyatu, - kaccippETTu n'annAkaiyAr.

289. mullai
vaLarpiRai pOla vazivazip peruki,
iRai vaLai n'ekiztta evva n'OyoTu
kuzai picain'tanaiyEm Aki cAay,
uzaiyar anmaiyin uzappatu anRiyum,
mazaiyum-tOzi!-mAnRupaTTanRE;
paTTa mAri paTAakkaNNum,
avar tiRattu iragkum n'amminum,
n'am tiRattu iragkum, iv azugkal UrE.

'kAlam kaNTu vERupaTTAL' enak kavanRa tOzikku, 'kAlattu van'tilar enRu vERupaTTEnallen; avaraip puRattAr, 'koTiyar' enRu kURakkETTu vERupaTTEn'enRu, talaimakaL

314. mullai
cEyuyar vicumpin n'Ir uRu kamajcUl
taNkural ezili oN cuTar imaippa,
peyal tAzpu iruLiya pulampu koL mAlaiyum,
vArAr vAzi!-tOzi!-varUum
in uRal iLa mulai jemugka-
innA vaippin curan iRan'tOrE.

piriviTai vERupaTTa kizatti, vaRpuRuttun' tOzikkup paruvag kATTi, azin'tu kURiyatu. - pEricAttan

319. mullai
mAn ERu maTap piNai tazIi, maruL kUrn'tu,
kAnam n'aNNiya putal maRain'tu oTugkavum,
kaiyuTai n'al mAp piTiyoTu porun'ti,
mai aNi marugkin malaiyakam cEravum,
mAlai van'tanRu, mAri mA mazai;
pon Er mEni n'al n'alam citaittOr
innum vArAr Ayin,
en Am, tOzi n'am in uyirn'ilaiyE

paruva varavinkaN vERupaTTa kizatti vanpuRai etir azin'tu coRRatu.- tAyag kaNNan

323. mullai
ellAm evanO? pataTi vaikal-
pANar paTumalai paNNiya ezAlin
vAnattu ajcuvara n'al icai vIza,
peyta pulattup pUtta mullaip
pacu mukait tAtu n'ARum n'aRu n'utal
arivai tOL-aNait tujcik
kazin'ta n'AL ivaN vAzum n'ALE,

vinaimuRRinAn pAkaRku uraittatu. - pataTi vaikalAr

344. mullai
n'ORROr manRa-tOzi!-taNNenat
tURRum tuvalaip panik kaTun' tigkaL
pulam payir arun'ta aNNal ERRoTu
n'ilam tUgku aNala vIgku mulai ceruttal
pAl vArpu, kuzavi uLLi, n'irai iRan'tu,
Urvayin peyarum punkaN mAlai,
arum peRal poruT piNip pOkip
pirin'tu uRai kAtalar vara, kANpOrE.

piriviTai vaRpuRuttum tOzikkut talaimakaL kURiyatu. - kuRugkuTi marutan

358. marutam
vIgkuizai n'ekiza, vimmi, IgkE
eRikaN pEtuRal; 'AykOTu iTTuc
cuvarvAy paRRum n'in paTar cEN n'Igka
varuvEm' enRa paruvam utukkAN:
taniyOr iragkum pani kUr mAlaip
pal An kOvalar kaNNic
collupa anna, mullai veN mukaiyE.

talaimakan piriviTaik kizattiyait tOzi vaRpuRuttiyatu. - koRRan

382. mullai
taN tuLikku ERRa paig
koTi mullai
mukai talaitiRan'ta n'ARRam putalmicaip
pU amal taLavamoTu, tEm kamazpu kajala,
vampup peyyumAl mazaiyE; vampu anRu,
kAr itu paruvam Ayin,
vArArO, n'am kAtalOrE?

paruva varavinkaN vERupaTTa talaimakaLait tOzi, 'paruvam anRu; vampu' enRu vaRpuRIiyatu. - kuRugkIran

387. mullai
ellai kaziya, mullai malara,
katir cinam taNin'ta kaiyaRu mAlai,
uyir varampAka n'In'tinam Ayin,
evankol vAzi?-tOzi!-
kagkul veLLam kaTalinum peritE!

piriviTai vaRpuRuttum tOzikkuk kizatti vanpuRai etir azin'tu kURiyatu.- kagkul veLLattAr

391. mullai
uvari oruttal uzAatu maTiyap
pukari puzugkiya puyal n'Igku puRavil,
kaTitu iTi urumin pAmpu pai aviya,
iTiyoTu mayagki initu vIzn'tanRE;
vIzn'ta mA mazai tazIip pirin'tOr
kaiyaRa van'ta paiyuL mAlai,
pUj cinai irun'ta pOzkaN majjai
tAamn'Ir n'anan'talai pulampak
kUum-tOzi!-perum pEtaiyavE!

piriviTai, 'paruva varavinkaN ARRAL' enak kavanRa tOzikkuk kizatti azin'tu colliyatu. - ponmaNiyAr

400. mullai
'cEyARu celvAm Ayin, iTar inRu,
kaLaikalam kAmam, perun'tOTku' enRu,
n'anRu purin'tu eNNiya manattai Aki,
murampu kaN uTaiya Eki, karampaip
putu vazip paTutta matiyuTai valavOy!
inRu tan'tanai tErO-
n'Oy uzan'tu uRaiviyai n'alkalAnE?

vinai muRRi van'ta talaimakan tErppAkanait talaiyaLittatu. - pEyanAr