7. pAlai

	villOn kAlana kazalE; toTiyOL
	mel aTi mElavum cilampE; n'allOr
	yArkol? aLiyartAmE-Ariyar
	kayiRu ATu paRaiyin, kAl porak kalagki,
	vAkai veN n'eRRu olikkum
	vEy payil azuvam munniyOrE.

10. marutam

	yAy AkiyaLE vizavu mutalATTi;
	payaRu pOl iNara pain' tAtu paTIiyar
	uzavar vAgkiya kamaz pU men cinaik
	kAjci Uran koTumai
	karan'tanaL Akalin, n'ANiya varumE.

11. pAlai

	kOTu Ir ilagku vaLai n'ekiza, n'ALum
	pATu ila kalizum kaNNoTu pulampi,
	Igku ivaN uRaitalum uykuvam; AgkE
	ezu, ini-vAzi, en n'ejcE!-munAtu,
	kullaik kaNNi vaTukar munaiyatu
	val vER kaTTi n'al n'ATTu umpar
	mozi peyar tEettar Ayinum,
	vazipaTal cUzn'ticin, avaruTai n'ATTE.

12. pAlai

	eRumpi aLaiyin kuRum pal cunaiya
	ulaikkal anna pARai ERi,
	koTu vil eyinar, pakazi mAykkum
	kavalaittu enpa, avar tEr cenRa ARE;
	atu maRRu avalam koLLAtu,
	n'otumal kazaRum, iv azugkal UrE.

15. pAlai

	paRai paTa, paNilam Arppa, iRaikoLpu
	tol mUtAlattup potiyil tOnRiya
	n'Al Urk kOcar n'al mozi pOla,
	vAy AkinRE-tOzi!-Ay kazal
	cEyilai veL vEl viTalaiyoTu
	tokuvaLai munkai maTan'tai n'aTpE.

16. pAlai

	uLLArkollO-tOzi! kaLvar
	pon punai pakazi ceppam koNmAr,
	ukir n'uti puraTTum Ocai pOla,
	ceg kAR palli tan tuNai payirum
	am kAR kaLLiam kATu iRan'tOrE?

20. pAlai

	aruLum anpum n'Ikki, tuNai tuRan'tu,
	poruLvayiR pirivOr uravOr Ayin,
	uravOr uravOr Aka!
	maTavam Aka, maTan'tai, n'AmE!

22. pAlai

	n'Ir vAr kaNNai n'I ivaN oziya,
	yArO pirikiRpavarE?-cAral
	cilampu aNi koNTa valam curi marAattu
	vEnil am cinai kamazum
	tEm Ur oNNutal!-n'innoTum, celavE.

27. pAlai

	kanRum uNNAtu, kalattinum paTAtu,
	n'al An tIm pAl n'ilattu ukkAagku,
	enakkum AkAtu, ennaikkum utavAtu,
	pacalai uNIiyar vENTum-
	titalai alkul en mAmaik kavinE.

28. pAlai

	muTTuvEnkol? tAkkuvEnkol?
	OrEn, yAnum: Or peRRi mEliTTu,
	'Aa! ol' enak kUvuvEnkol?-
	alamaral acaivaLi alaippa, en
	uyavu n'Oy aRiyAtu, tujcum UrkkE.

30. pAlai

	kETTicin vAzi-tOzi!-alkal,
	poyvalALan mey uRa marIiya
	vAyt takaip poyk kanA maruTTa, ERRu ezun'tu,
	amaLi taivan'tananE; kuvaLai
	vaNTu paTu malarin cAayt'
	tamiyen; manRa aLiyen yAnE!

37. pAlai

	n'acai peritu uTaiyar; n'alkalum n'alkuvar;
	piTi paci kaLaiiya perug kai vEzam
	men cinai yAam poLikkum
	anpina-tOzi!-avar cenRa ARE.

39. pAlai

	'ven' tiRal kaTu vaLi pogkarp pOn'tena,
	n'eRRu viLai uzijcil vaRRal Arkkum
	malaiyuTai, aruj curam' enpa-n'am
	mulaiyiTai munin'ar cenRa ARE.

41. pAlai

	kAtalar uzaiyar Akap peritu uvan'tu,
	cARu koL Urin pukalvEn manRa;
	attam n'aNNiya am kuTic cIRUr
	makkaL pOkiya aNil ATu munRil
	pulappil pOlap pullenRu
	alappen-tOzi!-avar akanRa jAnRE.

43. pAlai

	'celvAr allar' enRu yAn ikazn'tananE;
	'olvAL allaL' enRu avar ikazn'tanarE:
	AyiTai, iru pEr ANmai ceyta pUcal,
	n'al arAk katuviyAgku, en
	allal n'ejcam alamalakkuRumE.

44. pAlai

	kAlE pari tappinavE; kaNNE
	n'Okki n'Okki vAL izan'tanavE;
	akal iru vicumpin mIninum
	palarE manRa, iv ulakattup piRarE.

48. pAlai

	'tAtin ceyta taN panip pAvai
	kAlai varun'tum kaiyARu Ompu' ena,
	Orai Ayam kURak kETTum,
	inna paNpin inai peritu uzakkum
	n'annutal pacalai n'Igka, anna
	n'acai Aku paNpin oru col
	icaiyAtukollO, kAtalar tamakkE?

56. pAlai

	vETTac cen'n'Ay kiLaittUN miccil
	kuLavi moytta azukaR cil n'Ir
	vaLaiyuTaik kaiyaL, emmoTu uNIiyar,
	varukatil amma, tAnE;
	aLiyaLO aLiyaL, en n'ejcu amarn'tOLE!

59. pAlai

	patalaip pANip paricilar kOmAn
	atalaik kunRattu akal vAyk kuNTu cunaik
	kuvaLaiyoTu potin'ta kuLavi n'ARu n'aRu n'utal
	tavvena maRapparO-maRRE; muyalavum,
	curam pala vilagkiya arum poruL
	n'irampA Akalin, n'ITalO inRE.

63. pAlai

	'Italum tuyttalum illOrkku il' enac
	cey vinai kaimmika eNNuti; av vinaikku
	am mA arivaiyum varumO?
	emmai uyttiyO? uraitticin- n'ejcE!

67. pAlai

	uLLArkollO-tOzi!-kiLLai
	vaLai vAyk koNTa vEppa oN pazam
	putu n'AN n'uzaippAn n'uti mAN vaL ukirp
	polag kala oru kAcu Eykkum
	n'ilam kari kaLLiam kATu iRan'tOrE?

71. pAlai

	marun'tu enin marun'tE; vaippu enin vaippE-
	arumpiya cuNagkin am pakaTTu iLa mulai,
	perun' tOL, n'uNukiya n'ucuppin,
	kal kezu kAnavar n'alkuRu makaLE.

77. pAlai

	amma vAzi, tOzi!-yAvatum,
	tavaRu enin, tavaRO ilavE-vej curattu
	ulan'ta vampalar uval iTu patukkai
	n'eTu n'al yAnaikku iTu n'izal Akum
	ariya kAnam cenROrkku
	eLiya Akiya taTa men tOLE.

79. pAlai

	kAna yAnai tOl n'ayan'tu uNTa
	poritAL Omai vaLi poru n'eTuj cinai
	alagkal ulavai ERi, oyyenap
	pulampu taru kurala puRavup peTai payirum
	attam n'aNNiya am kuTic cIRUrc
	cErn'tanarkollO tAmE-yAm tamakku
	ollEm enRa tappaRkuc
	collAtu Ekal valluvOrE.

84. pAlai

	peyarttanen muyagka, 'yAn viyarttanen' enRanaL;
	ini aRin'tEn, atu tuni AkutalE-
	kazaltoTi Aay mazai tavaz potiyil
	vEgkaiyum kAn'taLum n'ARi,
	Ampal malarinum tAn taNNiyaLE.

104. pAlai

	amma vAzi, tOzi! kAtalar,
	n'Ul aRu muttin taN citar uRaippa,
	tALit taN pavar n'AL A mEyum
	pani paTu n'ALE, pirin'tanar;
	piriyum n'ALum pala AkupavE!

124. pAlai

	umaNar cErn'tu kazin'ta marugkin, akan talai,
	Ur pAzttanna Omaiam perug kATu
	innA enRir Ayin,
	iniyavO-peruma!-tamiyOrkku manaiyE?

130. pAlai

	n'ilam toTTup pukAar; vAnam ERAr;
	vilagku iru mun'n'Ir kAlin cellAr;
	n'ATTinn'ATTin Urin Urin
	kuTimuRai kuTimuRai tErin,
	keTun'arum uLarO?-n'am kAtalOrE.

131.pAlai

	ATu amai puraiyum vanappin paNait tOL
	pEr amark kaNNi irun'ta UrE
	n'eTuj cEN Ar iTaiyatuvE; n'ejcE,
	Iram paTTa cevvip paim punattu
	Or Er uzavan pOla,
	peru vituppu uRRanRAl; n'OkO yAnE,

135. pAlai

	'vinaiyE ATavarkku uyirE; vAL n'utal
	manai uRai makaLirkku ATavar uyir' ena,
	n'amakku uraittOrum tAmE,
	azAal-tOzi!-azugkuvar celavE.

137. pAlai

	mel iyal arivai! n'in n'al akam pulampa,
	n'iR tuRan'tu amaikuven Ayin-eR tuRan'tu
	iravalar vArA vaikal
	pala Akuka!-yAn celavuRu takavE.

140. pAlai

	vEtina verin'in Oti mutu pOttu,
	ARu cel mAkkaL puL koLa, porun'tum
	curanE cenRanar, kAtalar; uran azin'tu,
	Igku yAn azugkiya evvam
	yAgku aRin'tanRu-iv azugkal UrE?

144. pAlai

	kaziya kAvi kuRRum, kaTala
	veN talaip puNari ATiyum, n'anRE
	pirivu il Ayam uriyatu onRu ayara,
	iv vazip paTutalum ollAL-av vazip
	paralpAR paTuppac cenRanaL mAtO-
	cel mazai tavazum cenni
	viN uyar piRagkal vilagku malai n'ATTE!

147. pAlai

	vEniR pAtirik kUn malar anna
	mayir Erpu ozukiya am kaluz mAmai,
	n'uN pUN, maTan'taiyait tan'tOy pOla,
	in tuyil eTupputi-kanavE!-
	eLLAr amma, tuNaip pirin'tOrE.

149. pAlai

	aLitO tAnE-n'ANE n'ammoTu
	n'ani n'ITu uzan'tanRu mannE; iniyE,
	vAn pUg karumpin Ogku maNaR ciRu ciRai
	tIm punal n'eritara vIn'tu ukkAagku,
	tAgkum aLavait tAgki,
	kAmam n'eritarak kain' n'illAtE.

151. pAlai

	vagkAk kaTan'ta ceg kAl pETai
	ezAl uRa vIzn'tena, kaNavaR kANAtu,
	kuzal icaik kurala kuRum pala akavum
	kunRu uRu ciRu n'eRi ariya ennAtu,
	'maRappu arug kAtali oziya
	iRappal' enpatu, INTu iLamaikku muTivE.

154. pAlai

	yAgku aRin'tanarkol- tOzi! - pAmpin
	uri n'imirn'tanna uruppu avir amaiyattu,
	irai vETTu ezun'ta cEval uLLi,
	poRi mayir eruttin kuRu n'aTaip pETai
	porikAR kaLLi virikAy am kavaTTut
	tayagka irun'tu, pulampak kUum
	aruj cura vaippin kAnam
	pirin'tu, cEN uRaital valluvOrE?

168. pAlai

	mArip pittikattu n'Ir vAr kozu mukai
	irum panam pacug kuTai palavuTan potin'tu
	perum peyal viTiyal virittu viTTanna
	n'aRun' taNNiyaLE, n'al mA mEni;
	punaR puNai anna cAy iRaip paNait tOL
	maNattalum taNattalum ilamE;
	piriyin vAztal ataninum ilamE.

174. pAlai

	peyal mazai tuRan'ta pulampu uRu kaTattuk
	kavai muTak kaLLik kAy viTu kaTu n'oTi
	tutai men tUvit tuNaip puRavu irikkum
	attam ariya ennAr, n'attuRan'tu,
	poruLvayiR pirivAr Ayin, iv ulakattup
	poruLE manRa poruLE;
	aruLE manRa Arum illatuvE.

180. pAlai

	pazUup pal anna paru ukirp pA aTi
	irug kaLiRRu ina n'irai En'tal varin, mAyn'tu,
	aRai maTi karumpin kaN iTai anna
	paital oru kazai n'ITiya curan iRan'tu,
	eytinar kollO poruLE-alkul
	av vari vATat tuRan'tOr
	vanpar Akat tAm cenRa n'ATTE?

189. pAlai

	inRE cenRu varutum; n'ALaik
	kunRu izi aruviyin veN tEr muTuka,
	iLam piRai anna viLagku cuTar n'Emi
	vicumpu vIz koLLiyin paim payir tumippa,
	kAl iyal celavin, mAlai eyti,
	cil n'irai vAl vaLaik kuRumakaL
	pal mAN Akam maNan'tu uvakkuvamE.

192. pAlai

	'IgkE varuvar, inaiyal, avar' ena,
	azAaRkO iniyE?-n'Oy n'on'tu uRaivi!-
	minnin tUvi irug kuyil, ponnin
	urai tikaz kaTTaLai kaTuppa, mAc cinai
	n'aRun' tAtu kozutum pozutum,
	vaRug kuraR kUn'tal taivaruvEnE.

207. pAlai

	'ceppinam celinE celavu aritu Akum' enRu,
	atta Omai am kavaTTu irun'ta
	inam tIr parun'tin pulampu koL teL viLi
	curam cel mAkkaTku uyavut tuNai Akum
	kal varai ayalatu tol vazagku ciRu n'eRi,
	n'al aTi poRippat tAayc
	cenRenak kETTa n'am Arvalar palarE.

209. pAlai

	curan'talaippaTTa n'elliam pacug kAy
	maRap pulik kuruLai kOL iTam karakkum
	iRappu arug kunRam iRan'ta yAmE,
	kuRu n'aTaip puL uLLalamE, n'eRimutal
	kaTaRRil kalitta muTac cinai veTcit
	taLai aviz pal pOtu kamazum
	mai irug kUn'tal maTan'tai n'aTpE.

211. pAlai

	am cil Oti Ay vaLai n'ekiza
	n'on'tum, n'am aruLAr n'IttOrkku ajcal
	ejcinam vAzi-tOzi!-ejcAtu
	tIyn'ta marAattu Ogkal vej cinai
	vEnil Or iNar tEnOTu Uti,
	ArAtu peyarum tumpi
	n'Ir il vaippin curan iRan'tOrE.

213. pAlai

	n'acai n'anku uTaiyar-tOzi!-jerErenak
	kavait talai mutu kalai kAlin oRRip
	pacip piNikku iRaijciya parUup perun' tataral
	oziyin uNTu, azivu il n'ejcin
	teRittu n'aTai marapin tan maRikku n'izal Aki,
	n'inRu veyil kazikkum enpa-n'am
	in tuyil munin'ar cenRa ARE.

215. pAlai

	paTarum paipayap peyarum; cuTarum
	enRUz mA malai maRaiyum; inRu avar
	varuvarkol, vAzi-tOzi!-n'Ir il
	vaRug kayam tuzaiiya ilagku maruppu yAnai
	kuRum poRai marugkin amar tuNai tazIik
	koTu vari irum puli kAkkum
	n'eTu varai marugkin curan iRan'tOrE.

216. pAlai

	avarE, kETu il vizupporuL tarumAr, pAcilai
	vATA vaLLiam kATu iRan'tOrE;
	yAnE, tOTu Ar el vaLai jekiza, n'ALum
	pATu amai cEkkaiyil, paTar kUrn'ticinE;
	'annaL aLiyaL' ennAtu, mA mazai
	innum peyyum; muzagki
	minnum-tOzi!-en in uyir kuRittE

218.pAlai

	viTar mukai aTukkattu viRal kezu cUlikkuk
	kaTanum pUNAm; kain' n'Ul yAvAm;
	puLLum OrAm; viricciyum n'illAm;
	uLLalum uLLAm anRE-tOzi!-
	uyirkku uyir annar Akalin, tam inRu
	imaippu varai amaiyA n'am vayin
	maRan'tu ANTu amaital valliyOrmATTE.

224. pAlai

	kavalai yAtta avala n'IL iTaic
	cenROr koTumai eRRi, tujcA
	n'Oyinum n'Oy AkinRE-kUvaR
	kurAl An paTu tuyar irAvil kaNTa
	uyartiNai Uman pOlat
	tuyar poRukkallEn, tOzi n'OykkE.

229. pAlai

	ivan ivaL aimpAl paRRavum, ivaL ivan
	pun talai Ori vAgkun'aL pariyavum,
	kAtaR ceviliyar tavirppavum tavirAtu,
	Etil ciRu ceru uRupamannO!
	n'allai manRamma pAlE-mel iyal
	tuNai malarp piNaiyal anna ivar
	maNam makiz iyaRkai kATTiyOyE.

232. pAlai

	uLLArkollO?-tOzi!-uLLiyum,
	vAyp puNarvu inmaiyin vArArkollO?-
	maraRpukA arun'tiya mA eruttu iralai,
	uraRkAl yAnai oTittu uNTu ejciya
	yAa vari n'izal, tujcum
	mA iruj cOlai malai iRan'tOrE.

235. pAlai

	Ompumati; vAziyO-vATai!-pAmpin
	tUgku tOl kaTukkum tU veL aruvik
	kal uyar n'aNNiyatuvE-n'elli
	maraiyinam Arum munRil
	pul vEy kurampai n'allOL UrE.

237. pAlai

	ajcuvatu aRiyAtu, amar tuNai tazIi,
	n'ejcu n'appirin'tanRu; Ayinum, ejciya
	kai piNi n'ekizin aHtu evanO? n'anRum
	cEya amma, iruvAm iTaiyE;
	mAk kaTal tiraiyin muzagki, valan Erpu,
	kOT puli vazagkum cOlai
	enaittu enRu eNNukO-muyakkiTai malaivE?

250. pAlai

	paral avaR paTu n'Ir mAn'ti, tuNaiyOTu,
	iralai n'al mAn n'eRimutal ukaLum
	mAlai vArA aLavai, kAl iyal
	kaTu mAk kaTavumati-pAka!-n'eTu n'Irp
	poru kayal muraNiya uNkaN
	teri tIm kiLavi terumaral uyavE.

253.pAlai

	kELAr Akuvar-tOzi!-kETpin,
	vizumitu kazivatuAyinum, n'ekizn'Ul
	pUc cEr aNaiyin perug kavin tolain'ta n'in
	n'AL tuyar keTap pin n'ITalarmAtO-
	oli kazai n'ivan'ta Ogku malaic cAral,
	puli pukA uRutta pulavu n'ARu kal aLai
	ARu cel mAkkaL cEkkum
	kOTu uyar piRagkal malai iRan'tOrE.

254. pAlai

	ilai il am cinai ina vaNTu Arppa,
	mulai Er men mukai avizn'ta kOgkin
	talai alar van'tana; vArA-tOzi!-
	tuyil in kagkul tuyil avar maRan'tanar;
	payil n'aRug katuppin pAyalum uLLAr-
	'ceyporuL taral n'acaiic cenROr
	eytinarAl' ena, varUum tUtE.

255. pAlai

	pottu il kAza atta yAattup
	pori arai muzumutal uruva kutti,
	maRam kezu taTak kaiyin vAgki, uyagku n'aTaic
	ciRu kaT peru n'irai uRu paci tIrkkum
	taTa maruppu yAnai kaNTanar-tOzi!-
	tam kaTan iRIiyar eNNi, iTamtoRum
	kAmar poruTpiNip pOkiya
	n'Am veg kAtalar cenRa ARE.

256. pAlai

	'maNi vArn'tanna mAk koTi aRukaip
	piNagku aril men kompu piNaiyoTu mAn'ti,
	mAn ERu ukaLum kAnam piRpaTa,
	vinai n'alam paTIi, varutum; av varait
	tAgkal ollumO, pUgkuzaiyOy?' enac
	collAmunnar, n'illA Aki,
	n'Ir vilagku azutal AnA,
	tEr vilagkinavAl, terivai kaNNE.

260. pAlai

	kurukum iru vicumpu ivarum; putalum
	vari vaNTu Uta vAy n'ekizn'tanavE;
	curivaLaip polin'ta tOLum ceRRum;
	varuvarkol vAzi-tOzi!-poruvAr
	maN eTuttu uNNum aNNal yAnai
	vaN tErt toNTaiyar vazai amal aTukkattu,
	kanRu il Or A vilagkiya
	pun tAL Omaiya curan iRan'tOrE.

262. pAlai

	Uur alar eza, cEri kallena,
	AnAtu alaikkum aRan il annai
	tAnE irukka, tan manai; yAnE,
	n'elli tinRa muL eyiRu tayagka
	uNal Ayn'ticinAl, avaroTu-cEy n'ATTu,
	viN toTa n'ivan'ta vilagku malaik kavAan,
	karumpu n'aTu pAtti anna,
	perug kaLiRRu aTivazi n'ilaiiya n'IrE.

266. pAlai

	n'amakku onRu uraiyAr Ayinum, tamakku onRu
	innA iravin in tuNai Akiya
	paTappai vEgkaikku maRan'tanar kollO-
	maRappu arum paNait tOL marIit
	tuRattal valliyOr puLvAyt tUtE?-

267. pAlai

	irug kaN jAlattu INTu payap peru vaLam
	orugkuTan iyaivatuAyinum, karumpin
	kAl eRi kaTikaik kaN ayinRanna
	vAl eyiRu URiya vacai il tIm n'Irk
	kOl amai kuRun' toTik kuRumakaL oziya,
	ALvinai marugkil piriyAr - n'ALum
	uRal muRai marapin kURRattu
	aRan il kOL n'anku aRin'ticinOrE.

273. pAlai

	alkuRu pozutil tAtu mukai tayagkap
	perug kATu uLarum acaivaLi pOla,
	taNNiya kamazum oNNutalOyE!
	n'on'tanaAyin, kaNTatu mozival;
	perun' tEn kaNpaTu varaiyil mutu mAlpu
	aRiyAtu ERiya maTavOn pOla,
	EmAn'tanRu, iv ulakam;
	n'Am uLEm Akap piriyalan teLimE.

274. pAlai

	puRavup puRattanna pun kAl ukAattu
	iRavuc cinai anna n'aLi kani utira,
	viTu kaNai villoTu paRRi, kOTu ivarpu,
	varun'arp pArkkum vankaN ATavar
	n'Ir n'acai vETkaiyin n'Ar menRu taNiyum
	innAk kAnamum, iniya-ponnoTu
	maNi miTai alkul maTan'tai
	aNi mulai Akam muyagkinam celinE.

277. pAlai

	Acu il teruvin Acu il viyan kaTai,
	cen'n'el amalai veNmai veL izutu
	Or il piccai Ara mAn'ti,
	aRcira veyya veppat taNNIr
	cEmac ceppil peRIiyarO, n'IyE-
	'minniTai n'aTugkum kaTaip peyal vATai,
	ek kAl varuvatu?' enRi;
	ak kAl varuvar, em kAtalOrE.

278. pAlai

	uRu vaLi uLariya am taLir mAattu
	muRi kaNTanna mellen cIRaTic
	ciRu pacum pAvaiyum, emmum, uLLAr
	koTiyar vAzi-tOzi!-kaTuvan
	UzuRu tIm kani utirppa, kIz irun'tu,
	ErppanaErppana uNNum
	pArppuTai man'tiya malai iRan'tOrE.

281. pAlai

	veN maNaR potuLiya
	paig kAl karukkin
	kommaip pOn'taik kuTumi veN tOTTu,
	atta vEmpin amalai vAn pUc
	curi Ar uLait talai poliyac cUTi,
	kunRu talaimaNan'ta kAnam
	cenRanarkollO-cEyizai!-n'amarE?

282. pAlai

	cevvi koL varakin cej cuvaR kalitta
	kavvai n'ARRin kAr iruL Or ilai
	n'avvi n'ALmaRi kavvik kaTan kazikkum
	kAr etir taN punam kANin, kaivaLai,
	n'Ir tikaz cilampin OrAgku virin'ta
	veN kUtALattu am tUmpu putu malar
	Ar kazalpu ukuva pOla,
	cOrkuvaalla enparkol-n'amarE?

283. pAlai

	'uLLatu citaippOr' uLar enappaTAar;
	illOr vAzkkai iravinum iLivu' enac
	colliya vanmai teLiyak kATTic
	cenRanar vAzi-tOzi-enRum
	kURRattanna kolai vEl maRavar
	ARRu irun'tu alki, vazagkun'arc cekutta
	paTu muTaip parun'tu pArttirukkum
	n'eTu mUtiTaiya n'Ir il ARE.

285. pAlai

	vaikA vaikal vaikavum vArAr;
	ellA ellai ellavum tOnRAr;
	yANTu uLarkollO?-tOzi!-INTu ivar
	colliya paruvamO ituvE; pal Uz
	pun puRap peTaiyoTu payiri, in puRavu
	imaikkaN Etu AkinRO!-jemait talai
	Un n'acaiip parun'tu irun'tu ukakkum
	vAn uyar piRagkal malai iRan'tOrE.

307. pAlai

	vaLai uTaittanaiyatu Aki, palar toza,
	cev vAy vAnattu aiyenat tOnRi,
	innAp piRan'tanRu, piRaiyE; annO,
	maRan'tanarkollO tAmE-kaLiRu tan
	uyagkun'aTai maTappiTi varuttam n'OnAtu,
	n'ilai uyar yAam tolaiyak kutti,
	veN n'Ar koNTu, kai cuvaittu, aNNAn'tu,
	azugkal n'ejcamoTu muzagkum
	atta n'IL iTai azap pirin'tOrE?

329. pAlai

	kAna iruppai vEnil veN pU
	vaLi poru n'eTuj cinai ujaRRalin, Ar kazalpu,
	kaLiRu vazagku ciRu n'eRi putaiyat tAam
	piRagkumalai aruj curam iRan'tavarp paTarn'tu,
	payil iruL n'aTun'AL tuyil aritu Aki,
	teL n'Ir n'ikarmalar puraiyum
	n'al malar mazaikkaNiRku eLiyavAl, paniyE.

331. pAlai

	n'eTug kazai tiragkiya n'Ir il Ar iTai,
	ARu cel vampalar tolaiya, mARu n'inRu,
	koTuj cilai maRavar kaTaRu kUTTuNNum
	kaTugkaN yAnaik kAnam n'In'ti,
	iRapparkol vAzi-tOzi!-n'aRuvaTip
	paig kAl mAattu am taLir anna
	n'al mA mEni pacappa,
	n'amminum ciRan'ta arum poruL taraRkE.

332. kuRijci

	van'ta vATaic cil peyaR kaTain'AL,
	n'Oy n'In'tu arum paTar tIra n'I n'ayan'tu
	kURin evanO-tOzi!-n'ARu uyir
	maTap piTi tazIit taTak kai yAnai
	kunRakac ciRukuTi izitarum
	manRam n'aNNiya malaikizavORkE?

338. kuRijci

	tirimaruppu iralai aNNal n'al ERu
	ari maTap piNaiyOTu alku n'izal acaii,
	vI tatai viyal aril tujci, pozutu cela,
	cezum payaRu kaRikkum punkaN mAlai,
	pin panik kaTain'AL, taN pani aRciram
	van'tanRu, peruviRaR tErE-paNait tOL
	viLagku n'akar aTagkiya kaRpin
	n'alam kEz arivai pulampu acAviTavE.

343. pAlai

	n'inaiyAy vAzi-tOzi!-n'anai kavuL
	aNNal yAnai aNi mukam pAyn'tena-
	miku vali iru pulip pakuvAy ERRai-
	veN kOTu cem maRuk koLIiya, viTar mukaik
	kOTai oRRiya karug kAl vEgkai
	vATu pUj cinaiyin, kiTakkum
	uyar varai n'ATanoTu peyarumARE.

347. pAlai

	malku cunai ularn'ta n'alkUr curamutal
	kumari vAkaik kOluTai n'aRu vI
	maTa mAt tOkaik kuTumiyin tOnRum
	kAna n'IL iTai, tAnum n'ammoTu
	onRu maNam ceytanaL ivaL enin,
	n'anRE-n'ejcam!-n'ayan'ta n'in tuNivE.

348. pAlai

	tAmE celpaAyin, kAnattup
	pulam tEr yAnaik kOTTiTai ozin'ta
	ciRu vI mullaik kompin tAay,
	itaz azin'tu URum kaNpani, matar ezil
	pUN aka van mulai n'anaittalum
	kANArkollO-mANizai!-n'amarE?

350. pAlai

	amma vAzi-tOzi!-mun n'inRu,
	'panik kaTugkuraiyam; cellAtIm' enac
	collinam Ayin, celvarkollO-
	ARRu ayal irun'ta irug kOTTu am ciRai
	n'eTug kAR kaNan'tuL AL aRivuRIi,
	ARu cel vampalar paTai talaipeyarkkum
	malaiyuTaik kAnam n'In'ti,
	n'ilaiyAp poruT piNip pirin'ticinOrE?

352. pAlai

	n'eTu n'Ir Ampal aTaip puRattanna
	koTu men ciRaiya kUr ukirp paRavai
	akal ilaip palavin cAral munni,
	pakal uRai mutu maram pulampap pOkum
	ciRu pun mAlai uNmai
	aRivEn-tOzi-! avark kANA UgkE.

356. pAlai

	n'izal AnRu avin'ta n'Ir il Ar iTaik
	kazalOn kAppap kaTukupu pOki,
	aRucunai marugkin maRukupu ven'ta
	vev veg kaluzi tavvenak kuTikkiya
	yAgku vallun'aLkol tAnE-En'tiya
	cem poR punai kalattu am porik kalan'ta
	pAlum pala ena uNNAL,
	kOl amai kuRun' toTit taLir annOLE?

363. marutam

	kaNNi maruppin aNNal n'al ERu,
	ceg kAR patavin vAr kural kaRikkum
	maTak kaN maraiyA n'Okki, veytuRRu,
	pul arai ukAay vari n'izal vatiyum
	innA aruj curam iRattal
	initO-peruma!-in tuNaip pirin'tE?

369. pAlai

	atta vAkai amalai vAl n'eRRu,
	ari Ar cilampin, arici Arppak
	kOTai tUkkum kAnam
	celvAm-tOzi!-n'alkinar n'amarE.

378. pAlai

	jAyiRu kANAta mAN n'izaR paTIiya,
	malaimutal ciRu n'eRi maNal mikat tAay,
	taN mazai talaiyavAkuka-n'am n'Ittuc
	cuTar vAy n'eTu vER kALaiyoTu
	maTa mA arivai pOkiya curanE!

380. pAlai

	vicumpu kaN putaiyap pAay, vEn'tar
	venRu eRi muracin n'an pala muzagki,
	peyal AnAtE, vAnam; kAtalar
	n'ani cEy n'ATTar; n'am unnalarE;
	yAgkuc ceyvAmkol-tOzi!-Igkaiya
	vaNNat tuymalar utira
	munnart tOnRum panik kaTu n'ALE!

383. pAlai

	n'I uTampaTutalin, yAn tara, van'tu,
	kuRi n'inRananE, kunRa n'ATan;
	'inRai aLavaic cenRaikka enRi;
	kaiyum kAlum Oyvana oTugkat
	tI uRu taLirin n'aTugki,
	yAvatum, ilai, yAn ceyaRku uriyatuvE.

388. kuRijci

	n'Ir kAlyAtta n'irai itazk kuvaLai
	kOTai oRRinum vATAtAkum;
	kavaNai anna pUTTup porutu acAa
	umaN eruttu ozukait tOTu n'iraittanna
	muLi cinai piLakkum munpu inmaiyin,
	yAnai kaimmaTittu uyavum
	kAnamum iniya Am, n'ummoTu varinE.

390. pAlai

	ellum ellinRu; pATum kELAy-
	cellAtImO, ciRupiTi tuNaiyE!-
	vERRu munai vemmaiyin, cAttu van'tu iRuttena,
	vaLai aNi n'eTu vEl En'ti,
	miLai van'tu peyarum taNNumaik kuralE.

395. pAlai

	n'ejcE n'irai ollAtE; avarE,
	anpu inmaiyin, aruL poruL ennAr;
	vankaN koNTu valittu vallun'arE;
	aravu n'ugku matiyiRku ivaNOr pOlak
	kaLaiyAr Ayinum, kaN initu paTIiyar;
	ajcal enmarum illai; an'til
	aLitOtAnE n'ANE-
	Agku avar vativayin n'IgkappaTinE!

396. n'eytal

	pAlum uNNAL, pan'tuTan mEvAL,
	viLaiyATu AyamoTu ayarvOL iniyE,
	eLitu ena uNarn'tanaLkollO-muLi cinai
	Omaik kuttiya uyar kOTTu oruttal
	vEniR kunRattu vev aRaik kavAan
	mazai muzagku kaTug kural Orkkum
	kazai tiragku Ar iTai, avanoTu celavE?

398. pAlai

	tERRAm anRE-tOzi! taNNenat
	tURRum tivalait tuyar kUr kAlai,
	kayal Er uNkaN kanag kuzai makaLir
	kaiyuRai Aka n'ey peytu mATTiya
	cuTar tuyar eTuppum punkaN mAlai,
	arum peRaR kAtalar van'tena, virun'tu ayarpu,
	meym mali uvakaiyin ezutaru
	kaN kaliz ukupani arakkuvOrE.