cen'tuRaip pATAN pATTu

11.  veRRic celvac ciRappu

varai maruL puNari vAn picir uTaiya,
vaLi pAyn'tu aTTa tuLagku irug kamaj cUl
n'aLi irum parappin mAk kaTal munni,
aNagkuTai avuNar Emam puNarkkum
cUruTai muzu mutal taTin'ta pEr icai,      5
kaTuj cina viRal vEL kaLiRu Urn'tAgku
cev vAy eHkam vilagkun'ar aRuppa,
aru n'iRam tiRan'ta puN umiz kurutiyin,
maNi n'iRa irug kazi n'Ir n'iRam peyarn'tu,
manAlak kalavai pOla, araN konRu,     10
muraN miku ciRappin uyarn'ta Ukkalai;
palar mocin'tu Ompiya tiraL pUg kaTampin
kaTiyuTai muzu mutal tumiya Eey,
venRu eRi muzagku paNai ceyta vel pOr,
n'Ar ari n'aRavin, Ara mArpin,        15
pOr aTu tAnaic cEralAta!
mArpu mali pain' tAr OTaiyoTu viLagkum
valan uyar maruppin pazi tIr yAnaip
polan aNi eruttamEl koNTu polin'ta n'in
palar pukaz celvam initu kaNTikumE       20
kavir tatai cilampil tujcum kavari
paran'tu ilagku aruviyoTu n'aran'tam kanavum,
Ariyar tuvanRiya, pEr icai imayam
ten am kumariyoTu AyiTai
man mIk kURun'ar maRam tapak kaTan'tE.       25

tuRai: cen'tuRaip pATAN pATTu
vaNNam: ozuku vaNNam
tUkku: cen'tUkku
peyar: puN umiz kuruti       (1)

 

12.  venRic ciRappum Olakka vinOtac ciRappum

vayavar vIza vAL aril mayakki,
iTam kavar kaTumpin aracu talai panippa,
kaTampu mutal taTin'ta kaTuj cina vEn'tE!
tAr aNi eruttin vAral vaL ukir
arimAn vazagkum cAral, piRa mAn     5
tOTu koL ina n'irai n'ejcu atirn'tAgku,
muracu muzagku n'eTu n'akar aracu tuyilIyAtu,
mAtiram panikkum maRam vIgku pal pukaz
kETTaRku initu  n'in celvam: kETToRum
kANTal viruppoTu   kamazum kuLavi;   10
vATAp paim mayir, iLaiya ATu n'aTai,
aNNal maza kaLiRu ari jimiRu Oppum
kanRu puNar piTiya; kunRu pala n'In'ti
van'tu avaN iRutta irum pEr okkal
tol paci uzan'ta pazagkaN vIza,     15
eHku pOzn'tu aRutta vAl n'iNak kozug kuRai,
mai Un peyta veNNel veN cORu,
n'anai amai kaLLin tERaloTu mAn'ti;
n'Irp paTu parun'tin iruj ciRaku anna,
n'ilam tin citAar kaLain'ta pinRai,   20
n'UlAk kaligkam vAl araik koLIi;
vaNar irug katuppin, vAgku amai men tOL,
vacai il makaLir vayagkuizai aNiya;
amarpu mey Artta cuRRamoTu
n'ukartaRku initu, n'in perug kali makizvE!   25

ituvum atu
peyar: maRam vIgku pal pukaz     (2)

 

13.  venRic ciRappum tan n'ATu kAttal ciRappum


toRutta vayal Aral piRazn'avum,

ERu poruta ceRu uzAtu vittun'avum,

karumpin pAttip pUtta n'eytal

irug kaN erumai n'irai taTukkun'avum,

kali kezu tuNagkai ATiya marugkin   

5

vaLaitalai mUtA Ampal Arn'avum,

oli tegkin, imiz marutin,

punal vAyil, pUm poykai,

pATal cAnRa payam kezu vaippin,

n'ATu kavin aziya, n'Amam tORRi;    

10

kURRu aTUu n'inRa yAkkai pOla,

n'I civan'tu iRutta n'Irazi pAkkam

viri pUg karumpin kazani pullena,

tiri kAy viTattaroTu kAr uTai pOki,

kavait talaip pEy makaL kazutu Urn'tu iyagka,

15

Uriya n'erujci n'IRu ATu paRan'talai

tAtu eru maRutta kali azi manRattu

uLLam aziya, Ukkun'ar, miTal taputtu,

uLLun'ar panikkum pAz AyinavE.

kATE kaTavuL mEna; puRavE       

20

oL izai makaLiroTu maLLar mEna;

ARE av anaittu: anRiyum, jAlattuk

kUlam pakarn'ar kuTi puRan'tarAa,

kuTi puRan'tarun'ar pAram Ompi,

azal cenRa marugkin veLLi OTAtu   

25

mazai vENTu pulattu mAri n'iRpa,

n'OyoTu paci ikan'tu orIi,

pUttanRu   peruma! n'I kAtta n'ATE!

tuRai: cen'tuRaip pATAN pATTu
vaNNam: ozuku vaNNam
tUkku: cen'tUkkum vajcittUkkum
peyar: pUtta n'eytal (3)

 

14.  mannanuTaiya pala kuNagkaLaiyum ARRalaiyum orugku kURi vAzttutal

n'ilam, n'Ir, vaLi, vicumpu, enRa n'Ankin
aLappu ariyaiyE;
n'AL, kOL, tigkaL, jAyiRu, kanai azal,
ain'tu orugku puNarn'ta viLakkattu anaiyai;
pOr talaimikutta Ir aimpatinmaroTu     5
tupput tuRaipOkiya, tuNivuTai ANmai,
akkuran anaiya kaivaNmaiyaiyE;
amar kaTan'tu malain'ta tumpaip pakaivar
pOr, pITu, azitta cerup pukal munpa!
kURRu vekuNTu varinum, mARRum ARRalaiyE;   10
ezumuTi kezIiya tiru jemar akalattu
n'On purit taTak kaic cAnROr meymmaRai!
vAn uRai makaLir, n'alan, ikal koLLum;
vayagku izai karan'ta, vaNTu paTu katuppin;
oTugku Ir Otik koTugkuzai kaNava!     15
pal kaLiRRut tozutiyoTu velkoTi n'uTagkum
paTai Er uzava! pATini vEn'tE!
ilagkumaNi miTain'ta polag kalat tikirik
kaTalaka varaippin ip pozil muzutu ANTa n'in
mun tiNai mutalvar pOla, n'inRu n'I      20
keTAa n'al icai n'ilaiit
tavAaliyarO, iv ulakamOTu uTanE!

tuRai: cen'tuRaip pATAN pATTu
vaNNam: ozuku vaNNamum coRcIr vaNNamum
tUkku: cen'tUkku
peyar: cAnROr meymmaRai (4)

 

15.  venRic ciRappum tan n'ATu kAttal ciRappum

yANTu talaippeyara, vENTu pulattu iRuttu,
munai eri parappiya tun aruj cIRRamoTu
mazai tavazpu talaiiya matil maram murukki,
n'irai kaLiRu ozukiya n'iraiya veLLam
paran'tu ATu kazagku azi man marugku aRuppa   5
koTi viTu kurUup pukai picira, kAl pora,
azal kavar marugkin uru aRak keTuttu,
tol kavin azin'ta kaN akan vaippin,
veN pU vELaiyoTu paij curai kalittu,
pIr ivarpu paran'ta n'Ir aRu n'iRaimutal,     10
civan'ta kAn'taL mutal citai, mUtil,
pulavu vil uzavin pullAL vazagkum
pul ilai vaippin, pulam citai arampin,
aRiyAmaiyAn maRan'tu, tuppu etirn'ta n'in
pakaivar n'ATum kaNTu van'ticinE:      15
kaTalavum, kallavum, yARRavum, piRavum,
vaLam pala n'ikaztaru n'anan' talai n'al n'ATTu,
vizavu aRupu aRiyA muzavu imiz mUtUr,
koTi n'ilaR paTTa ponnuTai n'iyamattu,
cIr peRu kali makiz iyampum muracin     20
vayavar vEn'tE! paricilar veRukkai!
tAr aNin'tu eziliya, toTi citai maruppin,
pOr val yAnaic cEralAta!
'n'I vAziyar, iv ulakattOrkku' ena,
uNTu urai mARiya, mazalai n'Avin,    25
men cola kalappaiyar tirun'tu toTai vAztta,
veytuRavu aRiyAtu n'an'tiya vAzkkai,
ceyta mEval amarn'ta cuRRamOTu,
onRumozin'tu aTagkiya koLkai, enRum
pati pizaippu aRiyAtu, tuyttal eyti,    30
n'iraiyam orIiya vETkaip puraiyOr
mEyinar uRaiyum, palar pukaz paNpin,
n'I puRan'tarutalin n'Oy ikan'tu orIiya
yANar n'al n'ATum kaNTu, mati maruNTanen
maNNuTai jAlattu man uyirkku ejcAtu  35
Ittuk kai taNTAk kai kaTun' tuppin,
puraivayin puraivayin periya n'alki,
Emam Akiya, cIr kezu vizavin,
n'eTiyOn anna n'al icai,
oTiyA main'ta! n'in paNpu pala n'ayan'tE.    40

tuRai: cen'tuRaip pATAN pATTu
vaNNam: ozuku vaNNam
tUkku: cen'tUkku
peyar: n'iraiya veLLam (5)

 

16. aracanatu venRic ciRappum kulamakaLOTu n'ikazn'ta inpac ciRappum

kOTu uRazn'tu eTutta koTug kaN ijci,
n'ATu kaNTanna kaNai tujcu vilagkal,
tujcumarak kuzAam tuvanRi, puniRRu makaL
pUNA aiyavi tUkkiya matila
n'al ezil n'eTum putavu murukkik kollupu,    5
Enam Akiya n'unai muri maruppin,
kaTAam vArn'tu, kaTuj cinam potti,
maram kol maza kaLiRu vazagkum pAcaRai,
n'ITinai Akalin, kANku van'ticinE:
ARiya kaRpin, aTagkiya cAyal,     10
UTinum iniya kURum in n'akai,
amirtu poti tuvar vAy, amartta n'Okkin,
cuTar n'utal, acain'aTai uLLalum uriyaL;
pAyal uyyumO   tOnRal! tA inRu
tiru maNi poruta tikaz viTu pacum pon    15
vayagku katir vayiramOTu uRazn'tu, pUN cuTarvara,
ezumuTi kezIiya tiru jemar akalattu,
puraiyOr uNkaN tuyil in pAyal
pAlum, koLAlum vallOy! n'in
cAyal mArpu n'ani alaittanRE?    20

ituvum atu
peyar: tuyilin pAyal  (6)

 

17.  poRaiyuTaimaiyOTu paTuttu mannanin
venRic ciRappuk kURutal

puraivatu n'inaippin puraivatO inRE
periya tappun'ar Ayinum, pakaivar
paNin'tu tiRai pakarak koLLun'ai Atalin
tuLagku picir uTaiya, mAk kaTal n'Ikki,
kaTampu aRuttu iyaRRiya valampaTu viyan paNai,    5
ATun'ar peyarn'tu van'tu, arum pali tUuy,
kaTippuk kaN uRUum toTit tOL iyavar,
'araNam kANAtu, mAtiram tuzaiiya
n'anan' talaip paij jilam varuka, in' n'izal' ena,
jAyiRu pukanRa, tItu tIr ciRappin,    10
amiztu tikaz karuviya kaNa mazai talaii,
kaTug kAl koTkum n'an perum parappin,
vicumpu tOy veNkuTai n'uvalum
pacum pUN mArpa! pATini vEn'tE!

ituvum atu
peyar: valampaTu viyan paNai (7)

21. n'ATu kAttaR ciRappuk kURi, mannanai vAzttutala


col, peyar, n'ATTam, kELvi, n'ejcam, enRu

ain'tuTan pORRi avai tuNaiyAka,

evvam cUzAtu viLagkiya koLkai,

kAlai anna cIr cAl vAymozi,

uru kezu marapin kaTavuL pENiyar, 

5

koNTa tIyin cuTar ezutORum

virumpu mey paran'ta peru peyar Avuti;

varun'ar varaiyAr vAra vENTi,

virun'tu kaNmARAtu uNIiya, pAcavar

Unattu azitta vAl n'iNak kozug kuRai   

10

kuy iTutORum AnAtu Arppa,

kaTal oli koNTu, cezu n'akar varaippin

n'aTuvaN ezun'ta aTu n'ey Avuti;

iraNTuTan kamazum n'ARRamoTu, vAnattu

n'ilaipeRu kaTavuLum vizaitakap pENi,   

15

Ar vaLam pazuniya aiyam tIr ciRappin,

mAriam kaLLin, pOr val yAnai,

pOrppu uRu muracam kaRagka, Arppuc ciRan'tu,

n'an kalam tarUum maN paTu mArpa!

mullaik kaNNip pal An kOvalar   

20

pulluTai viyan pulam pal A parappi,

kal uyar kaTattiTaik katir maNi peRUum,

miti al ceruppin pUziyar kOvE!

kuviyal kaNNi mazavar meymmaRai!

pal payam tazIiya, payam kezu n'eTug kOTTu,  

25

n'Ir aRal marugku vazippaTA, pAkuTip

pArval kokkin parivETpu ajcA,

cIruTait tEetta munaikeTa vilagkiya,

n'Er uyar n'eTu varai ayiraip porun'a!

yANTu pizaippu aRiyAtu, paya mazai curan'tu   

30

n'Oy il mAn'tarkku Uzi Aka!

maNNA vAyin maNam kamaz koNTu,

kAr malar kamazum tAz irug kUn'tal,

orIiyina pOla iravu malar n'inRu

tirumukattu alamarum peru matar mazaikkaN,   

35

alagkiya kAn'taL ilagku n'Ir azuvattu

vEy uRaz paNait tOL, ivaLOTu

Ayiram veLLam vAziya palavE!


tuRai: cen'tuRaip pATAN pATTu

vaNNam: ozuku vaNNam

tUkku: cen'tUkku
peyar: aTu n'ey Avuti   (1)

 

27.  venRic ciRappu


citain'tatu manRa, n'I civan'tanai n'Okkalin

toTarn'ta kuvaLait tU n'eRi aTaicci,

alarn'ta Ampal aka maTivaiyar,

curiyal am cennip pUj cey kaNNi

ariyal Arkaiyar, initu kUTu iyavar,   

5

tuRai n'aNi marutam ERi, teRumAr,

el vaLai makaLir teL viLi icaippin,

pazanak kAvil pacu mayil Alum;

poykai vAyil punal poru putavin,

n'eytal marapin, n'irai kaL, ceRuvin   

10

val vAy uruLi katumena maNTa,

aLLal paTTu, tuLLupu turappa,

n'al erutu muyalum aLaRu pOku vizumattuc

cAkATTALar kampalai allatu,

pUcal aRiyA n'al n'ATTu    

15

yANar aRAak kAmaru kavinE!


tuRai: cen'tuRaip pATAN pATTu

vaNNam: ozuku vaNNam

tUkku: cen'tUkku

peyar: toTarn'ta kuvaLai    (7)

31.  mannaRku uriya mATcimaiyellAm eTuttu orugkE pukaztal

kunRu talaimaNan'tu, kuzUuk kaTal uTutta
maN kezu jAlattu, mAn'tar orAgkuk
kai cuman'tu alaRum pUcal, mAtirattu
n'Al vERu n'anan' talai, orugku ezun'tu olippa,
teL uyar vaTi maNi eRiyun'ar kallena,    5
uNNAp paijjilam panit tuRai maNNi,
vaNTu Utu poli tAr, tiru jemar akalattu,
kaN poru tikiri, kamaz kural tuzAay
alagkal, celvan cEvaTi paravi,
n'ejcu mali uvakaiyar tujcu patip peyara     10
maNi n'iRa mai iruL akala, n'ilA viripu,
kOTu kUTu matiyam iyaluRRAgku,
tuLagku kuTi vizut tiNai tirutti, muracu koNTu,
AN kaTan iRutta n'in pUN kiLar viyal mArpu,
karuvi vAnam taN taLi talaiiya,     15
vaTa teRku vilagki, vilaku talaittu eziliya,
pani vAr viNTu viRal varaiyaRRE;
kaTavuL ajci vAnattu izaitta
tUgku eyil katavam kAval koNTa
ezUu n'ivan'tanna, parEr eRuz muzavut tOL;    20
veN tirai mun'n'Ir vaLaiiya ulakattu,
vaN pukaz n'iRutta vakai cAl celvattu
vaNTan anaiyaiman n'IyE; vaNTu paTa
olin'ta kUn'tal, aRam cAl kaRpin,
kuzaikku viLakku Akiya oL n'utal, ponnin    25
izaikku viLakku Akiya av vAgku un'ti,
vicumpu vazagku makaLiruLLum ciRan'ta
cemmIn anaiyaL, n'in tol n'akarc celvi;
n'ilan atirpu iragkala Aki, valan Erpu,
viyan paNai muzagkum vEl mUcu azuvattu,    30
aTagkiya puTaiyal, polag kazal n'On tAL,
oTugkAt tevvar Ukku aRak kaTaii,
puRakkoTai eRiyAr, n'in maRap paTai koLLun'ar;
n'akaivarkku araNam Aki, pakaivarkkuc
cUr n'ikazn'taRRu, n'in tAnai;     35
pOr miku kurucil! n'I mANTanai palavE.


tuRai: cen'tuRaip pATANpATTu

vaNNam: ozuku vaNNam

tUkku: cen'tUkku

peyar: kamaz kural tuzAy    (1)

 

32.  mannanin pala kuNagkaLaiyum uTan eNNi, avaRRuL poRaiyuTaimaiyai mikuttup pukaztal

mANTanai palavE, pOr miku kurucil! n'I
mAtiram viLakkum cAlpum, cemmaiyum;
muttuTai maruppin maza kaLiRu piLiRa,
mikku ezu kaTun' tAr tuyttalaic cenRu,
tupput tuvar pOka, perug kiLai uvappa,    5
Ittu AnRu AnA iTanuTai vaLanum;
tuLagku kuTi tiruttiya valampaTu venRiyum;
ellAm eNNin, iTu kazagku tapun'a.
kon onRu maruNTanen, aTu pOrk koRRava!
n'eTumiTal cAya, koTu miTal tumiya,     10
peru malai yAnaiyoTu pulam keTa iRuttu,
taTan' tAL n'Arai paTin'tu irai kavarum,
muTan'tai n'ellin kazai amal, kazani,
pizaiyA viLaiyuL n'ATu akappaTuttu,
vaiyA mAlaiyar vacaiyun'ark kaRutta    15
pakaivar tEettu Ayinum
cinavAy Akutal iRumpUtAl peritE!

ituvum atu
peyar: kazai amal kazani   (2)

 

37. mannan kuNagkaLaip pukazn'tu, avanaiyum avan celvattaiyum vAzttutal

vAzka, n'in vaLanE n'innuTai vAzkkai,
vAymozi vAyar n'in pukaz Etta!
pakaivar Arap pazagkaN aruLi,
n'akaivar Ara n'an kalam citaRi,
AnRu, avin'tu, aTagkiya, ceyir tIr, cemmAl! 5
vAn tOy n'al icai ulakamoTu uyirppa,
tuLagku kuTi tiruttiya valam paTu venRiyum;
mA irum puTaiyal, mAk kazal, punain'tu,
man eyil eRin'tu maRavart tarIi,
tol n'ilaic ciRappin n'in n'izal vAzn'arkkuk 10
kOTu aRa vaitta kOTAk koLkaiyum;
n'anRu peritu uTaiyaiyAl n'IyE,
ven'tiRal vEn'tE!  iv ulakattOrkkE.

tuRai: cen'tuRaip pATAN pATTu
vaNNamum tUkkum: atu
peyar: valam paTu venRi   (7)

 

38.  koTaic ciRappu

ulakattOrE palarman celvar;
ellAruLLum n'in n'al icai mikumE
vaLam talaimayagkiya paitiram tiruttiya
kaLagkAyk kaNNi n'Ar muTic cEral!
eyil mukam citaiyat tOTTi Evalin,    5
tOTTi tan'ta toTi maruppu yAnai,
cev uLaik kalimA, Ikai vAn kazal,
ceyal amai kaNNic cEralar vEn'tE!
paricilar veRukkai! pANar n'AL avai!
vANutal kaNava! maLLar ERE!     10
mai aRa viLagkiya, vaTu vAz mArpin,
vacai il celva! vAnavarampa!
'iniyavai peRinE tanittani n'ukarkEm,
taruka' ena vizaiyAt tA il n'ejcattu,
pakuttUN tokutta ANmai,    15
piRarkku ena vAzti n'I AkanmARE.

ituvum atu
peyar: paricilar veRukkai    (8)

 

42.  koTaic ciRappum venRic ciRappum

irum panampuTaiyal, Ikai vAn kazal,
mIn tEr koTpin panik kayam mUzkic
ciral peyarn'tanna n'eTu veL Uci
n'eTu vaci paran'ta vaTu vAz mArpin,
ampu cEr uTampinarc cErn'tOr allatu    5
tumpai cUTAtu malain'ta mATci,
annOr peruma! n'annutal kaNava!
aNNal yAnai aTupOrk kuTTuva!
main'tuTai n'al amark kaTan'tu, valam tarIi;
ijci vI virAya pain' tAr pUTTi,     10
cAn'tu puRattu eRin'ta tacumpu tuLagkuirukkai,
tIm cERu viLain'ta maNi n'iRa maTTam
OmpA Ikaiyin vaN makiz curan'tu;
kOTiyar perug kiLai vAza, ATu iyal
uLai avir kalimAp pozin'tavai eNNin     15
manpatai maruLa, aracu paTak kaTan'tu,
mun'tu vinai etir varap peRutal kANiyar,
oLiRu n'ilai uyar maruppu En'tiya kaLiRu Urn'tu
mAna main'taroTu mannar Etta, n'in
tEroTu cuRRam ulaku uTan mUya,     20
mA irun' teN kaTal mali tiraip pauvattu,
veN talaik kurUup picir uTaiya,
taN pala varUum puNariyin palavE.

tuRai: cen'tuRaip pATAN pATTu
vaNNamum tUkkum: atu
peyar: tacumpu tuLagku irukkai    (2)

 

44. mannanai 'n'eTug kAlam vAzka' ena vAzttutal

n'ilam puTaippanna ArppoTu, vicumpu tuTaiyU,
vAn tOy vel koTi tEr micai n'uTagka,
periya Ayinum amar kaTan'tu peRRa
ariya ennAtu OmpAtu vIci,
kalam celac curattal allatu, kanavinum,    5
'kaLaika' ena aRiyAk kacaTu il n'ejcattu,
ATu n'aTai aNNal! n'in pATu makaL kANiyar
kANiliyarO  n'iR pukazn'ta yAkkai
muzu vali tujcum n'Oy tapu n'On toTai:
n'uN koTi uzijai vel pOr aRukai    10
cENan Ayinum, 'kEL' ena mozin'tu,
pulam peyarn'tu oLitta kaLaiyAp pUcaRku,
araNkaL tAvuRIi, aNagku n'ikazn'tanna
mOkUr mannan muracam koNTu,
n'eTumozi paNittu, avan vEmpu mutal taTin'tu,    15
muracu ceya muracci, kaLiRu pala pUTTi,
ozukai uyttOy! kozu il pain' tuNi
vaittalai maRan'ta tuyt talaik kUkai
kavalai kavaRRum kurAl am paRan'talai,
muracuTait tAyattu aracu pala OTTi,    20
tuLagku n'Ir viyalakam ANTu, initu kazin'ta
mannar maRaitta tAzi,
vanni manRattu viLagkiya kATE.

tuRai: cen'tuRaip pATAN pATTu
vaNNamum tUkkum: atu
peyar: n'Oy tapu n'On toTai    (4)

 

45.  venRic ciRappu

polam pUn' tumpai, poRi kiLar tUNi,
puRRu aTagku aravin oTugkiya ampin,
ocivuTai villin, ociyA n'ejcin,
kaLiRu eRin'tu murin'ta katuvAy eHkin,
vizumiyOr tuvanRiya akal kaN n'ATpin,    5
ezumuTi mArpin eytiya cEral!
kuNTu kaN akaziya matil pala kaTan'tu,
paNTum paNTum tAm uL azittu uNTa
n'ATu kezu tAyattu n'anan' talai aruppattuk
katavam kAkkum kaNai ezu anna,    10
n'ilam peRu tiNi tOL uyara Occi,
piNam piRagku azuvattu, tuNagkai ATi,
cORu vERu ennA Un tuvai aTicil
OTAp pITar uL vazi iRuttu,
muL iTupu aRiyA ENi, tevvar    15
cilai vicai aTakkiya mUri veN tOl,
anaiya paNpin tAnai mannar
ini yAr uLarO, munnum illai
mazai koLak kuRaiyAtu, punal puka n'iRaiyAtu,
vilagku vaLi kaTavum tuLagku irug kamaj cUl,    20
vayagku maNi imaippin vEl iTupu,
muzagku tiraip panik kaTal maRutticinOrE?

ituvum atu
peyar: Un tuvai aTicil   (5)

 

46.  koTaic ciRappu

izaiyar, kuzaiyar, n'aRun' taN mAlaiyar,
cuTar n'imir avir toTi ceRitta munkai,
tiRal viTu tirumaNi ilagku mArpin
vaNTu paTu kUn'tal muTi punai makaLir
toTai paTu pEriyAz pAlai paNNi,    5
paNiyA marapin uzijai pATa,
initu puRan'tan'tu, avarkku in makiz curattalin
curam pala kaTavum karai vAyp paruti
Ur pATTu eN il pain' talai tumiya,
pal ceruk kaTan'ta kol kaLiRRu yAnai,    10
kOTu n'aral pauvam kalagka vEl iTTu
uTai tiraip parappin paTu kaTal OTTiya
vel pukazk kuTTuvan kaNTOr
celkuvam ennAr, pATupu peyarn'tE.

ituvum atu
peyar: karai vAyp paruti  (6)

 

47.  koTaiyinaiyum ak koTaikku varuvAyAkiya pakaivaraik kORalaiyum uTan kURutal

aTTu AnAnE kuTTuvan; aTutoRum,
peRRu AnArE, paricilar kaLiRE;
varai micai izitarum aruviyin, mATattu
vaLi munai avirvarum koTi n'uTagku teruvil,
cori curai kavarum n'ey vazipu urAlin,    5
pANTil viLakkup parUuc cuTar azala,
n'al n'utal viRaliyar ATum
tol n'akar varaippin avan urai AnAvE.

ituvum atu
peyar: n'al n'utal viRaliyar  (7)

 

53.  aTain'tavarkku aruLaloTu paTuttu, mannavana
venRic ciRappuk  kURutal

venRu kalam tarIiyar vENTu pulattu iRuttu, avar
vATA yANar n'ATu tiRai koTuppa,
'n'alkinai Akumati, em' enRu; aruLi,
kal piRagku vaippin kaTaRu arai yAtta n'in
tol pukaz mUtUrc celkuvai Ayin,    5
cempoRic cilampoTu aNit tazai tUgkum
en'tirat takaippin ampuTai vAyil,
kOL val mutalaiya kuNTu kaN akazi,
vAn uRa Ogkiya vaLain'tu cey puricai,
onnAt tevvar munai keTa vilagki,    10
n'innin tan'ta man eyil allatu,
munnum pinnum n'in munnOr Ompiya
eyil mukappaTuttal yAvatu? vaLaiyinum,
piRitu ARu cenmati, cinam kezu kurucil!-
ezUup puRan'tarIi, pon piNip palakaik    15
kuzUu n'ilaip putavin katavu mey kANin,
tEm pAy kaTAttoTu kAz kai n'Ivi,
vEgkai venRa poRi kiLar pukar n'utal
En'tu kai curuTTi, tOTTi n'Ivi,
mEmpaTu vel koTi n'uTagka,    20
tAgkal AkA, Agku n'in kaLiRE.

tuRai: cen'tuRaip pATAN pATTu
vaNNamum tUkkum: atu
peyar: kuNTu kaN akazi   (3)

 

55.  mannavan ulaku purattalum tan kuRaiyum kURi, vAzttutal

AnROL kaNava! cAnROr puravala!
n'in n'ayan'tu van'tanan, aTu pOrk koRRava!
in icaip puNari iragkum pauvattu,
n'an kala veRukkai tujcum pan'tar,
kamazum tAzaik kAnal am perun' tuRai,    5
taN kaTal paTappai n'al n'ATTup porun'a!
cev Un tOnRA, veN tuvai mutirai,
vAl Un valci mazavar meymmaRai!
kuTavar kOvE! koTit tEr aNNal!
vArAr Ayinum iravalar, vENTi,     10
tErin tan'tu, avarkku Ar patan n'alkum
n'acai cAl vAymozi icai cAl tOnRal!-
vENTuva aLavaiyuL yANTu pala kaziya,
peytu puRan'tan'tu, pogkal ATi,
viNTuc cErn'ta veN mazai pOlac     15
cenRAliyarO peruma alkalum
n'anan' talai vEn'tar tAr azin'tu alaRa,
n'ITu varai aTukkatta n'ATu kaikkoNTu,
porutu cinam taNin'ta cerup pukal ANmai,
tAgkun'art takaitta oL vAL,     20
Ogkal uLLattuk kurucil! n'in n'ALE.

tuRai: cen'tuRaip pATAN pATTu
vaNNamum tUkkum: atu
peyar: tujcum pan'tar   (5)

 

58.  mannavan n'ATTuc celvamum ataRkERRa avanatu koTaiyum kURutal

ATuka, viRaliyar! pATuka, paricilar!-
veN tOTTu acaitta oN pUg kuvaLaiyar,
vAL mukam poRitta mAN vari yAkkaiyar,
cel uRaz maRavar tam kolpaTait tarIiyar,
'inRu initu n'ukarn'tanam Ayin, n'ALai    5
maN punai ijci matil kaTan'tallatu
uNkuvam allEm, pukA' enak kURi,
kaNNi kaNNiya vayavar perumakan;
poy paTupu aRiyA vayagku cen' n'Avin,
eyil eRi val vil, E viLagku taTak kai,    10
En'tu ezil Akattuc cAnROr meymmaRai;
vAnavarampan enpa- kAnattuk
kaRagku icaic citaTi pori araip porun'tiya
ciRiyilai vElam periya tOnRum
punpulam vittum van kai vinaijar     15
cIruTaip pal pakaTu olippap pUTTi,
n'Ajcil ATiya kozu vazi marugkin
alagku katirt tiru maNi peRUum,
akan kaN vaippin n'ATu kizavOnE.

tuRai: cen'tuRaip pATAN pATTu
vaNNamum tUkkum: atu
peyar: E viLagku taTakkai    (8)

 

59.  venRic ciRappu

pakal n'ITu AkAtu, iravuppozutu peruki,
mAci n'inRa mA kUr tigkaL,
panic curam paTarum pANmakan uvappa,
pul iruL viTiya, pulampu cEN akala,
pAy iruL n'Igka, pal katir parappi,    5
jAyiRu kuNamutal tOnRiyAagku,
iraval mAkkaL ciRukuTi peruka,
ulakam tAgkiya mEmpaTu kaRpin
villOr meymmaRai! vIRRu irug koRRattuc
celvar celva! cErn'tOrkku araNam!-    10
aRiyAtu etirn'tu, tuppil kuRaiyuRRu,
paNin'tu tiRai tarupa, n'in pakaivar, Ayin;
cinam celat taNiyumO? vAzka, n'in kaNNi!-
pal vERu vakaiya n'anan' talai INTiya
malaiyavum kaTalavum paNNiyam pakukkum    15
ARu muTTuRAatu, aRam purin'tu ozukum
n'ATal cAnRa tuppin paNait tOL,
pATu cAl n'an kalam tarUum
n'ATu puRan'tarutal n'inakkumAr kaTanE.

ituvum atu
peyar: mA kUr tigkaL (9)

 

62.  venRic ciRappu

izai aNin'tu ezutarum pal kaLiRRut tozutiyoTu,
mazai ena maruLum mA irum pal tOl,
eHku paTai aRutta koy cuval puraviyoTu
main'tuTai Ar eyil puTai paTa vaLaii,
van'tu, puRattu iRukkum   pacum picir oL azal    5
jAyiRu palkiya mAyamoTu cuTar tikazpu,
ollA mayaloTu pATu imizpu uzitarum
maTagkal vaNNam koNTa kaTun' tiRal,
tupput tuRai pOkiya koRRa vEn'tE!
punal poru kiTagkin, varaipOl ijci,    10
aNagkuTait taTak kaiyar tOTTi ceppi,
paNin'tu tiRai tarupa, n'in pakaivar, Ayin,
pulluTai viyan pulam pal A parappi,
vaLanuTaic ceRuvin viLain'tavai utirn'ta
kaLan aRu kuppai kAjcic cErtti,     15
ariyal Arkai van kai vinain'ar,
aruvi Ampal malain'ta cenniyar,
ATu ciRai vari vaNTu Oppum
pATal cAnRa, avar akan talai n'ATE.

tuRai: cen'tuRaip pATAN pATTu
vaNNamum tUkkum: atu
peyar: varaipOl ijci    (2)

 

63.  mannavanatu pala kuNagkaLaiyum orugku kURi vAzttutal

pArppArkku allatu paNipu aRiyalaiyE;
paNiyA uLLamoTu aNi varak kezIi,
n'aTTOrkku allatu kaN ajcalaiyE,
vaNagku cilai poruta n'in maNam kamaz akalam
makaLirkku allatu malarppu aRiyalaiyE;    5
n'ilam tiRam peyarum kAlaiAyinum,
kiLan'ta col n'I poyppu aRiyalaiyE;
ciRiyilai uzijait teriyal cUTi,
koNTi mikaipaTat taN tamiz ceRittu,
kunRu n'ilai taLarkkum urumin cIRi,    10
oru muRRu iruvar OTTiya oL vAL
ceru miku tAnai vel pOrOyE;
ATu peRRu azin'ta maLLar mARi,
'n'I kaNTanaiyEm' enRanar: n'Iyum
n'um n'ukam koNTu inum venROy: atanAl,    15
celvak kOvE! cEralar maruka!
kAl tirai eTutta muzagku kural vEli
n'anan' talai ulakam ceyta n'anRu uNTu enin,
aTai aTuppu aRiyA aruvi Ampal
Ayira veLLa Uzi   20
vAzi, Ata! vAziya, palavE!

ituvum atu
peyar: aruvi Ampal   (3)

 

66.  venRic ciRappuTan paTuttu, koTaic ciRappuk kURutal

vAgku iru maruppin tIm toTai pazuniya
iTanuTaip pEriyAz pAlai paNNi,
paTarn'tanai cellum mutuvAy iravala!
'iTi icai muracamoTu onRumozin'tu, onnAr
vEluTaik kuzUuc camam tataiya n'URi,    5
konRu puRam peRRa piNam payil azuvattu,
tonRu tiRai tan'ta kaLiRRoTu, n'ellin
ampaNa aLavai virin'tu uRai pOkiya
Ar patam n'alkum' enpa   kaRuttOr
uRu muraN tAgkiya tAr arun' takaippin,    10
n'AL mazaik kuzUuc cimai kaTukkum tOnRal
tOl micaittu ezutarum virin'tu ilagku eHkin,
tAr purin'tanna vALuTai vizavin,
pOr paTu maLLar pOn'toTu toTutta
kaTavuL vAkait tuy vI Eyppa,     15
pUtta mullaip putal cUz paRavai
kaTattiTaip piTavin toTaik kulaic cEkkum,
vAn paLigku viraiiya, cem paral murampin,
ilagku katirt tiru maNi peRUum
akan kaN vaippin n'ATu kizavOnE.    20

tuRai: cen'tuRaip pATAN pATTu
vaNNamum tUkkum: atu
peyar: putal cUz paRavai   (6)

 

68. kAma vETkaiyin OTAta mannavan venRi vETkaic ciRappu

kAl kaTippu Akak kaTal olittAgku,
vERu pulattu iRutta kaTTUr n'AppaN,
kaTuj cilai kaTavum tazagku kural muracam
akal iru vicumpin Akattu atira,
vev vari n'ilaiiya eyil eRin'tu allatu    5
uNNAtu aTukkiya pozutu pala kaziya,
n'ejcu pukal Ukkattar, mey tayagku uyakkattu
innAr uRaiyuL tAm peRin allatu,
vEn'tu Ur yAnai veN kOTu koNTu,
kaL koTi n'uTagkum AvaNam pukku uTan,    10
arug kaL n'oTaimai tIrn'ta pin, makiz ciRan'tu,
n'Amam aRiyA Ema vAzkkai
vaTa pula vAzn'arin peritu amarn'tu, alkalum
in n'akai mEya pal uRai peRupakol
pAyal inmaiyin pAcizai jekiza,    15
n'eTu maN ijci n'IL n'akar varaippin,
Ovu uRaz n'eTuj cuvar n'AL pala ezutic
cev viral civan'ta av varik kuTaiccUl,
aNagku ezil arivaiyarp piNikkum
maNam kamaz mArpa! n'in tAL n'izalOrE?    20

tuRai: cen'tuRaip pATAN pATTu
vaNNamum tUkkum: atu
peyar: Ema vAzkkai   (8)

 

70.  venRic ciRappoTu piRa ciRappukkaLaiyum kURi, vAzttutal

kaLiRu kaTaiiya tAL,
mA uTaRRiya vaTimpu,
camam tatain'ta vEl,
kal alaitta tOL,
vil alaitta n'al valattu,   5
vaNTu icai kaTAvAt taN panam pOn'taik
kuvi mukiz Uci veN tOTu koNTu,
tIm cunai n'Ir malar malain'tu, matam cerukki,
uTai n'ilai n'al amar kaTan'tu, maRam keTuttu,
kaTuj cina vEn'tar cemmal tolaitta    10
valam paTu vAn kazal vayavar peruma!
n'akaiyinum poyyA vAymai, pakaivar
puRajcol kELAp purai tIr oNmai,
peNmai cAnRu peru maTam n'ilaiik,
kaRpu iRai koNTa kamazum cuTar n'utal    15
puraiyOL kaNava! pUN kiLar mArpa!
tolaiyAk koLkaic cuRRam cuRRa,
vELviyil kaTavuL aruttinai; kELvi
uyarn'ilai ulakattu aiyar inpuRuttinai;
vaNagkiya cAyal, vaNagkA ANmai,    20
iLan' tuNaip putalvarin mutiyarp pENi,
tol kaTan iRutta vel pOr aNNal!
mATOr uRaiyum ulakamum kETpa
izumena izitarum paRaik kural aruvi
muzumutal micaiya kOTutoRum tuvanRum    25
ayirai n'eTu varai pOla,
tolaiyAtAka, n'I vAzum n'ALE!

tuRai: cen'tuRaip pATAN pATTu
vaNNam: ozuku vaNNam
tUkku: cen'tUkkum vajcittUkkum
peyar: paRaik kural aruvi    (10)

71.  venRic ciRappuk kURi, mannanukkup pakaivarmEl aruL piRappittal


aRAa yANar akan kaN ceRuvin

aruvi Ampal n'eytaloTu arin'tu,

ceRu vinai makaLir malin'ta vekkai,

parUup pakaTu utirtta men cen'n'ellin

ampaNa aLavai uRai kuvittAgku,   

5

kaTun' tERu uRu kiLai mocin'tana tujcum

cezug kUTu kiLaitta iLan'tuNai makAarin,

alan'tanar, peruma! n'in uTaRRiyOrE:

Ur eri kavara, uruttu ezun'tu uraii,

 10

pOr cuTu, kamaz pukai mAtiram maRaippa,   

matilvAyt tOnRal IyAtu tam pazi Ukkun'ar

kuNTu kaN akaziya kuRun' tAL jAyil

Ar eyil tOTTi vauvinai; ERoTu

kanRuTai Ayam tarIip pukal ciRan'tu,

pulavu vil iLaiyar agkai viTuppa,   

15

mattuk kayiRu ATA vaikal pozutu n'inaiyUu,

An payam vAzn'ar kazuvuL talaimaTagka,

pati pAzAka vERu pulam paTarn'tu,

virun'tin vAzkkaiyoTu perun' tiru aRRena,

aruj camattu aru n'ilai tAgkiya pukar n'utal   

20

perug kaLiRRu yAnaiyoTu arug kalam tarAar,

mey pani kUrA, aNagku enap parAvalin,

pali koNTu peyarum pAcam pOla,

tiRai koNTu peyarti; vAzka, n'in Uzi!

uravarum maTavarum aRivu terin'tu eNNi,    25

aRin'tanai aruLAy Ayin,

yAr ivaN, n'eTun' takai! vAzumOrE?


tuRai: cen'tuRaip pATAN pATTu

vaNNam: ozuku vaNNamum coRcIr vaNNamum

tUkku: cen'tUkku

peyar: kuRun' tAL jAyil    (1)

 

72.  mannavanatu cUzcciyuTaimaiyum venRic ciRappum


ikal perumaiyin paTai kOL ajcAr,

cUzAtu tuNital allatu, vaRitu uTan

kAval etirAr, kaRuttOr, n'ATu; n'in

mun tiNai mutalvarkku Ompinar uRain'tu,

manpatai kAppa aRivu valiyuRuttum   

5

n'anRu aRi uLLattuc cAnROr anna, n'in

paNpu n'anku aRiyAr, maTam perumaiyin;

tujcal uRUum pakal puku mAlai,

n'ilam poRai orAa n'Ir jemara van'tu INTi,

uravut tirai kaTukiya uruttu ezu veLLam   

10

varaiyA mAtirattu iruL cErpu paran'tu,

jAyiRu paTTa akanRu varu kUTTattu

am cARu puraiyum n'in tozil ozittu,

pogku picir n'uTakkiya cej cuTar n'ikazvin

maTagkal tIyin anaiyai,  

15

cinam kezu kurucil! n'in uTaRRicinOrkkE.


tuRai: cen'tuRaip pATAN pATTu

vaNNam: ozuku vaNNam

tUkku: cen'tUkku

peyar: uruttu ezu veLLam    (2)

 

73.  venRic ciRappu


uravOr eNNinum, maTavOr eNNinum,

piRarkku n'I vAyin allatu, n'inakkup

piRar uvamam AkA oru peru vEn'tE!

.... kUn'tal oL n'utal polin'ta

n'iRam tikaz pAcizai uyartiNai makaLirum   

5

teyvam tarUu n'ejcattu AnROr

.... .... .... .... ...  ... ...

marutam cAnRa malartalai viLai vayal

ceyyuL n'Arai oyyum makaLir

iravum pakalum pAcizai kaLaiyAr,   

10

kuRum pal yANark kuravai ayarum

kAviri maNTiya cEy viri vanappin

pukAarc celva! pUziyar meymmaRai!

kazai virin'tu ezutaru mazai tavaz n'eTug kOTTuk

kollip porun'a! koTit tErp poRaiya! 'n'in   

15

vaLanum ANmaiyum kaivaNmaiyum

mAn'tar aLavu iRan'tana' enap pal n'AL

yAn cenRu uraippavum tERAr; 'piRarum

cAnROr uraippat teLikuvarkol?' ena,

Agkum mati maruLak kANkuval;    

20

'yAgku uraippEn?' ena varun'tuval, yAnE.


ituvum atu
peyar: n'iRam tikaz pAcizai    (3)

 

74.  n'allozukkamum ataRku ERRa n'allaRivuTaimaiyum eTuttuk kURutal


kELvi kETTup paTivam oTiyAtu,

vELvi vETTanai, uyarn'tOr uvappa;

cAy aRal kaTukkum tAz irug kUn'tal,

vERu paTu tiruvin n'in vazi vAziyar,

koTumaNam paTTa vinai mAN arug kalam,   

5

pan'tarp payan'ta palar pukaz muttam,

varaiyakam n'aNNi, kuRumpoRai n'ATi,

teriyun'ar koNTa ciraRuTaip paim poRi,

kavai maram kaTukkum kavalaiya maruppin,

puLLi iralait tOl Un utirttut   

10

tItu kaLain'tu ejciya tikaz viTu pANTil

paruti pOkiya puTai kiLai kaTTi,

eHkuTai irumpin uL amaittu, vallOn

cUTu n'ilai uRRuc cuTar viTu tORRam

vicumpu ATu marapin parun'tu URu aLappa,   

15

n'alam peRu tiru maNi kUTTum n'al tOL,

oTugku Ir Oti, oNNutal karuvil

eN iyal muRRi, Ir aRivu purin'tu,

cAlpum cemmaiyum uLappaTap piRavum

kAvaRku amain'ta aracu tuRai pOkiya   

20

vIRu cAl putalvan peRRanai, ivaNarkku

arug kaTan iRutta cerup pukal munpa!

annavai maruNTanen allEn; n'in vayin

muzutu uNarn'tu ozukkum n'arai mUtALanai,

'vaNmaiyum, mANpum, vaLanum, eccamum,   

25

teyvamum, yAvatum, tavam uTaiyOrkku' ena,

vERu paTu n'anan' talaip peyarak

kURinai, peruma! n'in paTimaiyAnE.


ituvum atu

peyar: n'alam peRu tirumaNi    (4)

 

75.  venRic ciRappu


irum puli konRu, perug kaLiRu aTUum,

arum poRi vaya mAn anaiyai  pal vEl,

polan' tAr yAnai, iyal tErp poRaiya!

vEn'tarum vELirum piRarum kIzp paNin'tu,

n'in vazip paTAar Ayin, n'el mikku,   

5

aRai uRu karumpin tIm cERRu yANar,

varun'ar varaiyA vaLam vIgku irukkai,

van pulam tazIi menpAl tORum

arum paRai vinaijar pul ikal paTuttu,

kaLLuTai n'iyamattu oL vilai koTukkum   

10

veL varaku uzuta koLLuTaik karampaic

cen'n'el valci aRiyAr, tamtam

pATal cAnRa vaippin

n'ATu uTan ALtal yAvaNatu, avarkkE?


ituvum atu

peyar: tIm cERRu yANar    (5)

 

76.  venRic ciRappum koTaic ciRappum


kaLiRuTaip peruj camam tataiya, eHku uyarttu,

oLiRu vAL mannar tutai n'ilai konRu,

muracu kaTippu aTaiya arun' tuRai pOki,

perug kaTal n'In'tiya maram valiyuRukkum

paNNiya vilaijar pOla, puN orIi,   

5

perug kait tozutiyin van tuyar kazippi,

iran'tOr vAza n'alki, irappOrkku

Ital taNTA mA citaRu irukkai

kaNTanen celku van'tanen  kAlkoNTu,

karuvi vAnam taN taLi corin'tena,   

10

pal vitai uzavin cil ErALar

panit tuRaip pakanRaip pAgkuTait teriyal,

kazuvuRu kaligkam kaTuppa, cUTi,

ilagku katirt tirumaNi peRUum

akan kaN vaippin n'ATu kizavOyE!   

15


ituvum atu

peyar: mA citaRu irukkai   (6)

 

79.  mannavanatu pala kuNagkaLaiyum orugku pukazn'tu, vAzttutal


uyir pORRalaiyE, ceruvattAnE;

koTai pORRalaiyE, iravalar n'aTuvaN;

periyOrp pENi, ciRiyOrai aLitti;

n'invayin pirin'ta n'al icai kanavinum

piRar n'acai aRiyA  vayagku cen' n'Avin,   

5

paTiyOrt tEytta ANmai, toTiyOr

tOLiTaik kuzain'ta kOtai mArpa!

anaiya aLappu arugkuraiyai: atanAl,

n'innoTu vArAr tam n'ilattu ozin'tu,

kol kaLiRRu yAnai eruttam pullena,   

10

vil kulai aRuttu, kOlin vArA

vel pOr vEn'tar muracu kaN pOzn'tu, avar

aracu uvA azaippak kOTu aRuttu iyaRRiya

aNagku uTai marapin kaTTilmEl irun'tu,

tumpai cAnRa mey tayagku uyakkattu,   

15

n'iRam paTu kuruti puRampaTin allatu,

maTai etirkoLLA ajcuvaru marapin

kaTavuL ayiraiyin n'ilaii,

kETu ilavAka, peruma! n'in pukazE!


tuRai: cen'tuRaip pATAN pATTu

vaNNamum tUkkum: atu

peyar: n'iRam paTu kuruti   (9)

 

85.  munnOruTaiya koTaic ciRappoTu paTuttu, venRic ciRappuk kURutal


n'al maram tuvanRiya n'ATu pala tarIi,

'pon avir punaiceyal ilagkum perum pUN,

onnAp pUTkaic cenniyar perumAn'

iTTa veL vEl'muttait tam' ena,

mun tiNai mutalvar pOla n'inRu,   

5

tIm cunai n'ilaiiya tiru mA marugkin

kOTu pala virin'ta n'ATu kAN n'eTu varai,

cUTA n'aRavin n'AL makiz irukkai,

aracavai paNiya, aRam purin'tu vayagkiya

maRam puri koLkai, vayagku cen' n'Avin,   

10

uvalai kUrAk kavalai il n'ejcin,

n'anavil pATiya n'al icaik

kapilan peRRa Urinum palavE.


tuRai: cen'tuRaip pATAN pATTu

vaNNamum tUkkum: atu

peyar: n'ATu kAN n'eTu varai    (5)

 

86.  mannavanatu vanmai menmaic ciRappuk kURutal


'uRal uRu kurutic cerukkaLam pulavak

konRu, amark kaTan'ta ven' tiRal taTak kai

ven vEl poRaiyan' enRalin, veruvara,

veppuTai ATUuc cettanen, man yAn:

n'al icai n'ilaiiya, n'anan' talai ulakattu,   

5

illOr punkaN tIra n'alkum

n'ATal cAnRa n'ayanuTai n'ejcin,

pATun'ar puravalan, ATu n'aTai aNNal,

kazai n'ilai peRAak kuTTattuAyinum,

punal pAy makaLir ATa, ozin'ta   

10

pon cey pUg kuzai mImicait tOnRum

cAn'tu varu vAni n'Irinum,

tIm taN cAyalan manRa, tAnE.


ituvum atu

peyar: ven' tiRal taTakkai    (6)

 

88.  koTaic ciRappum kAma inpac ciRappum uTan kURi, vAzttutal


vaiyakam malarn'ta tozil muRai oziyAtu,

kaTavuL peyariya kAnamoTu kal uyarn'tu,

teN kaTal vaLaiiya malar talai ulakattu,

tam peyar pOkiya onnAr tEya,

tuLagku irug kuTTam tolaiya, vEl iTTu;   

5

aNagkuTaik kaTampin muzumutal taTin'tu;

poru muraN eytiya kazuvuL puRam peRRu;

n'Ama mannar tuNiya n'URi,

kAl val puravi aNTar OTTi,

cuTar vI vAkai n'annaR tEyttu,    

10

kuruti vitirtta kuvavuc cORRuk kunROTu

uru kezu marapin ayirai paraii,

vEn'tarum vELirum pinvan'tu paNiya,

koRRam eytiya periyOr maruka!

viyal uLai arimAn maRam kezu kurucil!   

15

viravup paNai muzagkum, n'irai tOl varaippin,

uravuk kaLiRRu vel koTi n'uTagkum pAcaRai,

Ar eyil alaitta kal kAl kavaNai

n'Ar ari n'aRavin kogkar kOvE!

uTalun'art taputta polan' tErk kurucil!   

20

vaLaikaTal muzavin toNTiyOr porun'a!

n'I n'ITu vAziya, peruma! n'invayin

tuvaitta tumpai n'anavuRRu vinavum

mARRu arun' teyvattuk kUTTam munniya

punal mali pEriyARu izitan'tAgku,   

25

varun'ar varaiyAc cezum pal tAram

koLak koLak kuRaiyAtu talaittalaic ciRappa,

Ovattu anna uru kezu n'eTu n'akar,

pAvai anna makaLir n'AppaN,

pukanRa mAN poRip polin'ta cAn'tamoTu   

30

taN kamaz kOtai cUTi, pUN cuman'tu,

tiruvil kulaiit tirumaNi puraiyum

uru kezu karuviya peru mazai cErn'tu,

vEgkai virin'tu, vicumpuRu cETcimai,

aruvi aru varai anna mArpin   

35

cEN n'ARu n'al icaic cEyizai kaNava!

mAkam cuTara mA vicumpu ukakkum

jAyiRu pOla viLagkuti, pal n'AL!

Igkuk kANku van'tanen, yAnE

uRu kAl eTutta Ogku varal puNari   

40

n'uN maNal aTai karai uTaitarum

taN kaTal paTappai n'ATu kizavOyE!


tuRai: cen'tuRaip pATAN pATTu

vaNNamum tUkkum: atu

peyar: kal kAl kavaNai   (8)