3. tirumAl

	tirumAliTamirun'tu tOnRip paran'ta poruLkaL
	mAayOyE! mAayOyE!
	maRu piRappu aRukkum mAcu il cEvaTi
	maNi tikaz urupin mAayOyE!
	tI vaLi vicumpu n'ilan n'Ir ain'tum,
5	jAyiRum, tigkaLum, aRanum, aivarum,
	titiyin ciRArum, vitiyin makkaLum,
	mAcu il eNmarum, patinoru kapilarum,
	tA mA iruvarum, tarumanum, maTagkalum,
	mU Ez ulakamum, ulakinuL manpatum,
10	mAyOy! n'invayin paran'tavai uraittEm
	mAyA vAymozi uraitara valan'tu:
	'vAymozi OTai malarn'ta
	tAmaraip pUvinuL piRan'tOnum, tAtaiyum,
	n'I' ena moziyumAl, an'taNar aru maRai.
	munivarum tEvarum pATum vakai
15	'Eer, vayagku pUN amararai vauviya amiztin,
	payan'tOL iTukkaN kaLain'ta puLLinai;
	payan'tOL iTukkaN kaLain'ta puLLin
	n'ivan'tu Ogku uyar koTic cEvalOy! n'in
	cEvaTi tozArum uLarO? avaRRuL
20	kIz Ez ulakamum uRRa aTiyinai;
	tI ceg kanaliyum, kURRamum, jamanum,
	mAcu il Ayiram katir jAyiRum, tokUum
	Uzi AzikkaN, iru n'ilam, uru kezu
	kEzalAy maruppin uzutOy' enavum,
25	'mA vicumpu ozuku punal vaRaLa annac
	cEvalAy ciRakarp pularttiyOy' enavum,
	jAlattu uRaiyuL tEvarum vAnattu
	n'Al eN tEvarum n'ayan'tu n'iR pATuvOr
	pATum vakaiyE: em pATaltAm ap
30	pATuvAr pATum vakai.
	vaTivu vERRumaiyum peyar vERRumaiyum
	kUn'tal ennum peyaroTu kUn'tal
	eri cinam konROy! n'in pukaz uruvina, kai;
	n'akai accAka n'al amirtu kalan'ta
	n'aTuvun'ilai tiRampiya n'ayam il oru kai.
35	iru kai mAal!
	muk kai muniva! n'AR kai aNNal!
	aig kaim main'ta! aRu kai n'eTu vEL!
	ezu kaiyALa! eN kai En'tal!
	onpatiRRut taTak kai man pErALa!
40	patiRRuk kai matavali! n'URRuk kai ARRal!
	Ayiram viritta kaim mAya maLLa!
	patinAyiram kai mutumozi mutalva!
	n'URAyiram kai ARu aRi kaTavuL!
	anaittum alla pala aTukkal Ampal
45	inaittu ena eN varampu aRiyA yAkkaiyai!
	n'innaip purai n'inaippin n'I alatu uNartiyO,
	munnai marapin mutumozi mutalva?
	vanappum valiyum
	n'inakku virin'tu akanRa kELvi anaittinum,
	valiyinum, manattinum, uNarvinum, ellAm
50	vanappu varampu aRiyA marapinOyE!
	aNi n'izal vayagku oLi, Ir eN tIm katir,
	piRai vaLar, n'iRai mati uNTi,
	aNi maNip paim pUN, amararkku mutalvan n'I;
	tiNi n'ilam kaTan'takkAl, tirin'tu ayarn'tu, akanRu OTi,
55	n'in ajcik kaTaR pAyn'ta piNi n'ekizpu aviz taN tAr
	annavar paTa, allA avuNarkkum mutalvan n'I;
	atanAl, 'pakaivar ivar; ivar n'aTTOr' ennum
	vakaiyum uNTO, n'in marapu aRivOrkkE?
	Ayira aNar talai aravu vAyk koNTa
60	cEval Urtiyum, 'ceg kaN mAal!
	O! 'enak kiLakkum kAla mutalvanai;
	Ee ina kiLattalin inaimai n'aRku aRin'tanam:
	cAma vEtam kURutalin teLin'ta poruL
	tIyinuL teRal n'I; pUvinuL n'ARRam n'I;
	kallinuL maNiyum n'I; collinuL vAymai n'I;
65	aRattinuL anpu n'I; maRattinuL main'tu n'I;
	vEtattu maRai n'I; pUtattu mutalum n'I;
	vej cuTar oLiyum n'I; tigkaLuL aLiyum n'I;
	anaittum n'I; anaittin uTporuLum n'I; Atalin,
	uRaivum uRaivatum ilaiyE; uNmaiyum
70	maRaviyil ciRappin mAyamAr anaiyai;
	mutalmuRai, iTaimuRai, kaTaimuRai, tozilil
	piRavAp piRappu ilai; piRappittOr ilaiyE:
	n'Alvakai yukagkaLilum ArAyappaTum ciRappu
	paRavAp pUvaip pUvinOyE!
	aruL kuTaiyAka, aRam kOlAka,
75	iru n'izal paTAmai mU Ez ulakamum
	oru n'izal Akkiya Emattai mAtO;
	pAz ena, kAl ena, pAku ena, onRu ena,
	iraNTu ena, mUnRu ena, n'Anku ena, ain'tu ena,
	ARu ena, Ezu ena, eTTu ena, toNTu ena,
80	n'Alvakai Uzi eN n'aviRRum ciRappinai:
	n'Al vakai viyUkam
	ceg kaT kAri! karug kaN veLLai!
	pon kaT paccai! paig kaN mAal!
	pala tiRap peyariyalpukaL
	iTa vala! kuTa vala! kOvala! kAvala!
	kANA marapa! n'IyA n'inaiva!
85	mAyA manna! ulaku AL mannava!
	tol iyal pulava! n'al yAzp pANa!
	mAlaic celva! tOlAk kOTTa!
	polam puri ATai! valampuri vaNNa!
	paruti valava! poru tiRal malla!
90	tiruvin kaNava! peru viRal maLLa!
	mA n'ilam iyalA mutalmuRai amaiyattu,
	n'Ama veLLattu n'aTuvaN tOnRiya
	vAymozi makanoTu malarn'ta
	tAmaraip pokuTTu n'in n'Emi n'izalE!

4. tirumAl

	pukaztalai oziyOm
	ain'tu iruL aRa n'Ikki, n'AnkinuL tuTaittu, tam
	onRu ARRuppaTutta n'in Arvalar tozutu Etti,
	n'in pukaz virittanar: kiLakkugkAl, avai n'inakku
	iRumpUtu anmai n'aRku aRin'tEm Ayinum,
5	n'akutalum takuti, Igku Ugku n'iR kiLappa:
	tirumaNi, tiraipATu avin'ta mun'n'Ir,
	varu mazai iruj cUl mUnRum puraiyum mA mey;
	mAa meyyoTu muraNiya uTukkaiyai;
	n'OnAr uyiroTu muraNiya n'Emiyai:
	iraNiyanait taTin'tamai
10	ceyir tIr ceg kaT celva! n'iR pukaza
	pukain'ta n'ejcin, pularn'ta cAn'tin
	pirugkalAtan palapala piNi paTa
	valan'tuzi, malarn'ta n'Oy kUr kUmpiya n'aTukkattu
	alarn'ta pukazOn, tAtai Akalin
15	ikazvOn, ikazA n'ejcinanAka, n'I ikazA
	n'anRA n'aTTa avan n'an mArpu muyagki,
	onRA n'aTTavan uRu varai mArpin
	paTimatam cAmpa otugki,
	innal innaroTu iTi muracu iyampa,
20	veTi paTA oTi tUN taTiyoTu,
	taTi taTi pala paTa vakir vAytta ukirinai;
	puruvattuk karu val kan'tattAl
	tAgki, iv ulakam tan'tu aTippaTuttatai n'aTuvaN
	Ogkiya palar pukaz kunRinOTu okkum:
	ulaka uyirkaLin tORRamum, n'ilaipERum, oTukkamum
25	n'in vemmaiyum viLakkamum jAyiRRu uLa;
	n'in taNmaiyum cAyalum tigkaL uLa;
	n'in curattalum vaNmaiyum mAri uLa;
	n'in purattalum n'Onmaiyum jAlattu uLa;
	n'in n'ARRamum oNmaiyum pUvai uLa;
30	n'in tORRamum akalamum n'Irin uLa;
	n'in uruvamum oliyum AkAyattu uLa;
	n'in varutalum oTukkamum maruttin uLa;
	atanAl, ivvum, uvvum, avvum, piRavum,
	Emam Arn'ta n'iR pirin'tu,
35	mEval cAnRana, ellAm.
	karuTak koTi
	cEval Ogku uyar koTiyOyE!
	cEval Ogku uyar koTi
	n'in onRu uyar koTi panai;
	n'in onRu uyar koTi n'Ajcil;
40	n'in onRu uyar koTi yAnai;
	n'in onRA uyar koTi onRu inRu:
	viTamuTai aravin uTal uyir urugku uvaNam;
	avan muTimEl valan'tatu pAmpu;
	pAmpu toTi; pAmpu muTimElana;
45	pAmpu pUN; pAmpu talaimElatu;
	pAmpu ciRai talaiyana;
	pAmpu paTi matam cAyttOy! pacum pUNavai
	koTimEl irun'tavan tAkku iraiyatu pAmpu;
	pakaiyum n'aTpum inmai
	kaTu n'avai aNagkum kaTuppum, n'alkalum,
50	koTumaiyum cemmaiyum, vemmaiyum taNmaiyum
	uLvazi uTaiyai; ilvazi ilaiyE:
	pORRAr uyirinum, pORRun'ar uyirinum,
	mARRu EmARRal ilaiyE: 'n'inakku
	mARROrum ilar; kELirum ilar' enum
55	vERRumai inRu, atu pORRun'arp peRinE:
	aru maRaip poruLAkiya iyalpukaL
	manakkOL n'inakku ena vaTivu vERu ilaiyE;
	kOL iruL irukkai Ay maNi mEni,
	n'akku alar tuzAay n'ARu iNark kaNNiyai:
	ponnin tOnRiya punai maRu mArpa!
60	n'innil tOnRiya n'irai itazt tAmarai
	anna n'ATTattu aLappariyavai;
	n'innin ciRan'ta n'in tAL iNaiyavai;
	n'innil ciRan'ta n'iRai kaTavuLavai;
	annOr allA vERum uLa: avai
65	n'in Or an Or an'taNar aru maRai.
	palvERu tirup peyar koNTa oru poruL
	azal purai kuzai kozu n'izal tarum pala cinai
	Alamum, kaTampum, n'al yARRu n'aTuvum,
	kAl vazakku aRu n'ilaik kunRamum, piRavum,
	avvavai mEviya vERu vERu peyarOy!
70	ev vayinOyum n'IyE; n'in Arvalar
	tozuta kai amaitiyin amarn'tOyum n'IyE;
	avaravar EvalALanum n'IyE;
	avaravar ceyporuTku araNamum n'IyE.

5. cevvEL

	aRumukap perumAnin veRRic ceyalkaL
	pAy irum panik kaTal pAr tukaL paTap pukku,
	cEy uyar piNimukam Urn'tu, amar uzakki,
	tI azal tuvaippat tiriya viTTeRin'tu,
	n'OyuTai n'uTagku cUr mA mutal taTin'tu,
5	venRiyin makkaLuL orumaiyoTu peyariya
	konRu uNal ajcAk koTu vinaik kol takai
	mAya avuNar marugku aRat taputta vEl,
	n'Aval am taN pozil vaTa pozil AyiTai,
	kurukoTu peyar peRRa mAl varai uTaittu,
10	malai ARRup paTutta mU iru kayan'talai!
	vElanatu veRippATTu
	'mU iru kayan'talai, mun' n'Anku muzavut tOL,
	jAyiRRu Er n'iRat takai! n'aLinattup piRaviyai!
	kAay kaTavuT cEey! cevvEL!
	cAlva! talaiva!' enap pEe vizavinuL,
15	vElan Ettum veRiyum uLavE:
	avai vAyum alla, poyyum alla,
	n'IyE varampiRRu iv ulakam Atalin:
	ciRappOy ciRappu inRip peyarkuvai;
	ciRappinuL uyarvu Akalum,
20	piRappinuL izipu Akalum,
	EnOr n'in valattinatE:
	murukap pirAnin piRappu
	Ati an'taNan aRin'tu pari koLuva,
	vEta mA pUN vaiyat tEr Urn'tu,
	n'Akam n'ANA, malai villAka,
25	mUvakai Ar eyil Or azal ampin muLiya,
	mAtiram azala, eytu amarar vELvip
	pAkam uNTa paig kaT pArppAn
	umaiyoTu puNarn'tu, kAma vatuvaiyuL,
	amaiyAp puNarcci amaiya, n'eRRi
30	imaiyA n'ATTattu oru varam koNTu,
	'vilagku' ena, viNNOr vELvi mutalvan
	viri katir maNip pUNavaRkut tAn Ittatu
	aritu ena mARRAn, vAymaiyan Atalin,
	eri kananRu AnAk kuTAri koNTu avan uruvu
35	tirittiTTOn, iv ulaku Ezum maruLa:
	karup peRRuk koNTOr, kazin'ta cEy yAkkai
	n'ocippin, Ez uRu munivar, n'ani uNarn'tu,
	vacittataik kaNTam Aka mAtavar,
	'manaiviyar, n'iRaivayin, vaci taTi camaippin,
40	cAlAr; tAnE tarikka' ena, avar avi
	uTan peytOrE, azal vETTu: av avit
	taTavu n'imir mut tIp pENiya man eccil,
	vaTavayin, viLagku Al, uRai ezu makaLiruL
	kaTavuL oru mIn cAlini oziya,
45	aRuvar maRRaiyOrum an' n'ilai ayinRanar:
	maRu aRu kaRpin mAtavar manaiviyar
	n'iRaivayin vazAatu n'iR cUlinarE;
	n'ivan'tu Ogku imayattu n'Ilap paij cunaip
	payan'tOr enpa, patumattu pAyal:
50	perum peyar muruka! n'iR payan'ta jAnRE,
	aritu amar ciRappin amararcelvan,
	eri umiz vacciram koNTu, ikan'tu van'tu, eRin'tena,
	aRu vERu tuNiyum aRuvar Aki,
	oruvanai; vAzi, Ogku viRal cEey!
	tEvar cEnaikkut talaivanAtal
55	ArA uTampin n'I amarn'tu viLaiyATiya
	pOrAl vaRug kaikkup puran'taran uTaiya,
	allal il analan tan meyyin pirittu,
	celva vAraNam koTuttOn; vAnattu
	vaLam kezu celvan tan meyyin pirittu,
60	tikaz poRip pIli aNi mayil koTuttOn;
	tirun'tu kOl jaman tan meyyin pirivittu,
	irug kaN veL yATTu ezil maRi koTuttOn;
	Aagku avarum piRarum amarn'tu paTai aLitta
	maRiyum, majjaiyum, vAraNac cEvalum,
65	poRi varic cApamum, maranum, vALum,
	ceRi ilai ITTiyum, kuTAriyum, kaNicciyum,
	teRu katirk kanaliyum, mAlaiyum, maNiyum,
	vERu vERu uruvin iv ARu iru kaik koNTu,
	maRu il tuRakkattu amararcelvantan
70	poRi varik koTTaiyoTu pukaz varampu ikan'tOy.
	murukan tiruvaTi aTaivOrum aTaiyAtOrum
	n'in kuNam etirkoNTOr aRam koNTOr allatai,
	man kuNam uTaiyOr mAtavar vaNagkiyOr allatai
	ceRu tI n'ejcattuc cinam n'ITinOrum,
	cErA aRattuc cIr ilOrum,
75	azi tavap paTivattu ayariyOrum,
	maRu piRappu il enum maTavOrum, cErAr
	n'in n'izal:
	murukap perumAniTam vENTutal
	annOr allatu innOr
	cErvAr Atalin, yAam irappavai
80	poruLum ponnum pOkamum alla; n'inpAl
	aruLum, anpum, aRanum, mUnRum
	uruL iNark kaTampin oli tArOyE!