126.tOzi kURRu

	pon malai cuTar cEra, pulampiya iTan n'Okki,
	tan malain'tu ulaku Etta, takai mati Ertara,
	cekkar koL pozutinAn oli n'Ivi, ina n'Arai
	mukkOl koL an'taNar mutu mozi n'inaivAr pOl,
5	ekkar mEl iRaikoLLum, ilagku n'Irt taN cErppa!
	aNic ciRai inak kuruku olikkugkAl, n'in tiN tEr
	maNik kural ena ivaL matikkumman; matittAgkE,
	uL AnRa oliyavAy iruppak kaNTu, avai kAnaR
	puL ena uNarn'tu, pin pulampu koNTu, inaiyumE
10	n'Ir n'Ivik kajanRa pUk kamazugkAl, n'in mArpil
	tAr n'ARRam ena ivaL matikkumman; matittAgkE,
	alar patattu acaivaLi van'tu olka, kazi pUtta
	malar ena uNarn'tu, pin mammar koNTu, inaiyumE
	n'IL n'akar n'iRai ARRAL, n'inaiyun'aL vatin'takkAl,
15	tOL mElAy ena n'innai matikkumman; matittAgkE,
	n'anavu enap pullugkAl, kANALAy, kaNTatu
	kanavu ena uNarn'tu, pin kaiyaRRu, kalagkumE
	ena Agku,
	pala n'inain'tu, inaiyum paital n'ejcin,
20	alamaral n'OyuL uzakkum en tOzi
	mati maruL vAL mukam viLagka,
	putu n'alam Ertara, pUNka, n'in tErE!

127.tOzi kURRu

	teri iNar jAzalum, tEm kamaz punnaiyum,
	puri aviz pUvina kaitaiyum, cerun'tiyum,
	vari jimiRu imirn'tu Arppa, irun' tumpi iyaipu Uta
	ceru miku n'EmiyAn tAr pOla, perug kaTal
5	vari maNalvAy cUzum vayagku n'Irt taN cErppa!
	koTug kazi vaLaiiya kunRu pOl, vAl ekkar,
	n'aTugku n'Oy tIra, n'in kuRi vAyttAL enpatO
	kaTum pani aRal iku kayal Er kaN pani malka,
	iTumpaiyOTu inaipu Egka, ivaLai n'I tuRan'tatai?
10	kuRi inRip pal n'AL, n'in kaTun' tiN tEr varu patam kaNTu,
	eRi tirai imiz kAnal, etirkoNTAL enpatO
	aRivu ajar uzan'tu Egki, Ay n'alam vaRitAka,
	ceRi vaLai tOL Ura, ivaLai n'I tuRan'tatai?
	kAN vara iyanRa ik kavin peRu panit tuRai,
15	yAmattu van'tu, n'in kuRi vAyttAL enpatO
	vEy n'alam izan'ta tOL viLagkuizai poRai ARRAL,
	vAL n'utal pacappu Ura, ivaLai n'I tuRan'tatai?
	atanAl,
	iRai vaLai n'ekizn'ta evva n'Oy ivaL tIra,
20	'uravuk katir teRum' ena Ogku tirai viraipu, tan
	karai amal aTumpu aLittAagku
	uravu n'Irc cErppa! aruLinai aLimE

128.talaivi kURRu

	'tOL tuRan'tu, aruLAtavar pOl n'inRu,
	vATai tUkka, vaNagkiya tAzai
	ATu kOTTu irun'ta acai n'aTai n'Arai,
	n'aLi irug kagkul, n'am tuyar aRiyAtu,
5	aLi inRu, piNi inRu, viLiyAtu, n'aralum
	kAnal am cErppanaik kaNTAy pOla,
	putuvatu kavininai' enRiyAyin,
	n'anavin vArA n'ayanilALanaik
	kanavil kaNTu, yAn ceytatu kEL, ini:
10	'alan'tAgku amaiyalen' enRAnaip paRRi, 'en
	n'alam tArAyO?' ena, toTuppEn pOlavum,
	kalan'tu AgkE en kavin peRa muyagki,
	'pulampal Ompu' ena, aLippAn pOlavum
	'mulaiyiTait tuyilum maRan'tIttOy' ena,
15	n'ilai azi n'ejcattEn azuvEn pOlavum,
	'valai uRu mayilin varun'tinai, peritu' ena,
	talaiyuRa mun aTip paNivAn pOlavum
	kOtai kOlA, iRaijci n'inRa
	Utaiam cErppanai, alaippEn pOlavum,
20	'yAtu en pizaippu?' ena n'aTugki, AgkE,
	'pEtaiyaip peritu' enat teLippAn pOlavum
	Agku
	kanavinAl kaNTEn tOzi! 'kAN takak
	kanavin van'ta kAnal am cErppan
25	n'anavin varutalum uNTu' ena
	anai varai n'inRatu, en arum peRal uyirE

129.tOzi kURRu

	tol Uzi taTumARi, tokal vENTum paruvattAl,
	pal vayin uyir ellAm paTaittAnkaN peyarppAn pOl,
	el uRu teRu katir maTagki, tan katir mAya;
	n'al aRa n'eRi n'iRIi ulaku ANTa aracan pin,
5	allatu malain'tirun'tu aRa n'eRi n'iRukkallA
	melliyAn paruvam pOl, mayagku iruL talai vara;
	ellaikku varampu Aya, iTumpai kUr, maruL mAlai
	pAy tiraip pATu OvAp parappu n'Irp panik kaTal!
	'tU aRat tuRan'tanan tuRaivan' enRu, avan tiRam
10	n'Oy teRa uzappArkaN imiztiyO? em pOlak
	kAtal ceytu akanRArai uTaiyaiyO? n'I
	manRu irum peNNai maTal cEr anRil!
	'n'anRu aRai konRanar, avar' enak kalagkiya
	en tuyar aRin'tanai n'araRiyO? em pOla
15	in tuNaip pirin'tArai uTaiyaiyO? n'I
	pani iruL cUztara paital am ciRu kuzal!
	'ini varin, uyarumman pazi' enak kalagkiya
	taniyavar iTumpai kaNTu inaitiyO? em pOla
	iniya ceytu akanRArai uTaiyaiyO? n'I
20	ena Agku,
	azin'tu, ayal aRin'ta evvam mERpaTa,
	perum pEtuRutal kaLaimati, peruma!
	varun'tiya cellal tIrtta tiRan aRi oruvan
	marun'tu aRaikOTalin koTitE, yAza n'in
25	arun'tiyOr n'ejcam azin'tu uka viTinE

130.vAyilkaL kURRu

	'n'ayanum, vAymaiyum, n'annar n'aTuvum,
	ivanin tOnRiya, ivai' ena iragka,
	purai tava n'ATi, poy taputtu, initu ANTa
	araicanOTu uTan mAyn'ta n'al Uzic celvam pOl,
5	n'irai katirk kanali pAToTu pakal cela,
	kallAtu mutirn'tavan kaN illA n'ejcam pOl,
	pal iruL parattarUum pulampu koL maruL mAlai
	im mAlai,
	aiyar avir azal eTuppa, arO, en
10	kaiyaRu n'ejcam kananRu tI maTukkum!
	im mAlai,
	irug kazi mA malar kUmpa, arO, en
	arum paTar n'ejcam azivoTu kUmpum!
	im mAlai,
15	kOvalar tIm kuzal inaiya, arO, en
	pU ezil uNkaN pulampu koNTu inaiyum!
	ena Agku,
	paTu cuTar mAlaiyoTu paital n'Oy uzappALai,
	kuTi puRagkAttu Ompum cegkOlAn viyan tAnai
20	viTuvazi viTuvazic cenRAgku, avar
	toTuvazit toTuvazi n'IgkinRAl pacappE