66.talaivi kURRu

	vIgku n'Ir aviz n'Ilam pakarpavar vayaR koNTa
	jAgkar malar cUztan'tu, Ur pukun'ta vari vaNTu,
	Ogku uyar ezil yAnaik kanai kaTAm kamaz n'ARRam
	Agku avai virun'tu ARRa, pakal alki, kagkulAn,
5	vIgku iRai vaTu koLa, vIzun'arp puNarn'tavar
	tEm kamaz katuppinuL arumpu aviz n'aRu mullai
	pAyn'tu Uti, paTar tIrn'tu, paNTu tAm marIiya
	pUm poykai maRan'tu, uLLAp punal aNi n'al Ura!
	aNai men tOL yAm vATa, amar tuNaip puNarn'tu n'I,
10	'maNa manaiyAy' ena van'ta mallalin mANpu anRO
	potuk koNTa kavvaiyin pU aNip polin'ta n'in
	vatuvai am kamaz n'ARRam vaikaRaip peRRatai?
	kanalum n'Oyt talaiyum, 'n'I kanag kuzaiyavaroTu
	punal uLAy' ena van'ta pUcalin peritu anRO
15	tAr koNTAL talaik kOtai taTumARip pUNTa n'in
	IraNi citaiyAtu, em il van'tu n'inRatai?
	taNan'tatan talaiyum, 'n'I taLariyalavaroTu
	tuNagkaiyAy' ena van'ta kavvaiyin kaTappu anRO
	oLi pUtta n'utalArOTu Or aNip polin'ta n'in
20	kaLi taTpa van'ta ik kavin kANa iyain'tatai?
	ena Agku,
	aLi peRREm; emmai n'I aruLinai; viLiyAtu
	vETTOr tiRattu virumpiya n'in pAkanum,
	'n'ITTittAy' enRu, kaTAam, kaTun' tiN tEr;
25	pUTTu viTAa n'iRuttu

67.talaivi kURRu

	kAr muRRi, iNar Uztta kamaz tOTTa malar vEyn'tu,
	cIr muRRi, pulavar vAyc ciRappu eyti, iru n'ilam
	tAr muRRiyatu pOla, takai pUtta vaiyai tan
	n'Ir muRRi, matil porUum pakai allAl, n'ErAtAr
5	pOr muRRu onRu aRiyAta puricai cUz punal Uran
	n'alattakai, ezil uNkaN n'allAr tam kOtaiyAl
	alaitta, puN, vaTu, kATTi, anpu inRi varin ellA!
	pulappen yAn enpEnman? an' n'ilaiyE, avaR kANin,
	kalappen ennum, ik kaiyaRu n'ejcE
10	kOTu ezil akal alkuR koTi annAr mulai mUzki,
	pATu azi cAn'tinan, paNpu inRi varin ellA!
	UTuven enpEnman? an' n'ilaiyE, avaR kANin,
	kUTuven ennum, ik koLkai il n'ejcE
	inip puNarn'ta ezil n'allAr ilagku eyiRu uRAalin,
15	n'anic civan'ta vaTuk kATTi, n'AN inRi varin ellA!
	tunippen yAn enpEnman? an' n'ilaiyE, avaR kANin,
	tanittE tAzum, it tani il n'ejcE
	ena Agku,
	piRai purai Er n'utAl! tAm eNNiyavai ellAm
20	tuRaipOtal ollumO tU AkAtu AgkE
	aRai pOkum n'ejcu uTaiyArkku?

68.kAmakkizatti kURRu

	potu mozi piRarkku inRi muzutu ALum celvarkku
	mati mozi iTal mAlai vinaivar pOl, vallavar
	cetu mozi cItta cevi ceRu Aka,
	mutu mozi n'IrA, pulan n'A uzavar
5	putu mozi kUTTuNNum, puricai cUz, punal Ura!
	'Uran man uran allan, n'amakku' enna, uTan, vALAtu,
	Or Ur tokku irun'ta n'in peNTiruL n'ErAki,
	kaLaiyA n'in kuRi, van'tu em katavam cErn'tu acaitta kai
	vaLaiyinvAy viTal mAlai makaLirai n'OvEmO
10	'kEL alan, n'amakku avan; kuRukanmin' ena, maRRu em
	tOLoTu pakaipaTTu n'inai vATu n'ejcattEm?
	'UTiyAr n'alam tEmpa, oTiyeRin'tu, avarvayin
	mAl tIrkkum avan mArpu' enRu ezun'ta col n'OvEmO
	mukai vAytta mulai pAyak kuzain'ta n'in tAr eLLa,
15	vakai varic ceppinuL vaikiya kOtaiyEm?
	cEriyAl cenRu, n'I cErn'ta il vinAyinan,
	tEroTu tiritarum pAkanaip pazippEmO
	oli koNTa cummaiyAn maNa manai kuRittu, em il,
	'polika' enap pukun'ta n'in pulaiyanaik kaNTa yAm?
20	ena Agku
	n'anavinAn vERAkum vELA muyakkam
	manai varin, peRRu uvan'tu, maRRu em tOL vATa,
	'inaiyar' ena uNarn'tAr enRu EkkaRRu, Agku,
	kanavinAn eytiya celvattu anaiyatE
25	aiya emakku n'in mArpu

69.kAmakkizatti kURRu

	pOtu aviz panip poykai, putuvatu taLaiviTTa
	tAtu cUz tAmarait tani malarp puRam cErpu
	kAtal koL vatuvai n'AL, kaligkattuL oTugkiya
	mAtar koL mAn n'Okkin maTan'tai tan tuNaiyAka,
5	OtuTai an'taNan eri valam ceyvAn pOl,
	Ay tUvi annam tan aNi n'aTaip peTaiyoTu
	mEtakat tiritarUum miku punal n'al Ura!
	teL aric cilampu Arppa, teruvinkaN tAkki, n'in
	uLLam koNTu, ozittALaik kuRai kURik koLa n'inRAy
10	tuNin'tatu piRitAka, 'tuNivilaL ivaL' ena,
	paNin'tAy pOl van'tu, INTup payanila mozivAyO?
	paTTuzi aRiyAtu, pAkanait tEroTum
	viTTu, avaL varal n'Okki, virun'tu ERRukkoLa n'inRAy
	n'ejcatta piRavAka, 'n'iRaiyilaL ivaL' ena,
15	vajcattAn van'tu, Igku vali alaittIvAyO?
	iNar tatai taN kAvin, iyanRa n'in kuRi van'tAL
	puNarvinil pukanRu, AgkE punalATap paNNiyAy
	tarukkiya piRavAka, 'tan ilaL ivaL' ena,
	cerukkinAl van'tu, Igkuc col ukuttIvAyO?
20	ena Agku
	tarukkEm, peruma! n'in n'alkal; viruppuRRut
	tAzn'tAy pOl van'tu, takavila ceyyAtu,
	cUzn'tavai ceytu, maRRu emmaiyum uLLuvAy
	vIzn'tAr viruppu aRRakkAl

70.tOzi kURRu

	maNi n'iRa malarp poykai, makizn'tu ATum annam tan
	aNi miku cEvalai akal aTai maRaittena,
	katumena, kANAtu, kalagki, am maTap peTai
	mati n'izal n'IruL kaNTu, atu ena uvan'tu OTi,
5	tunnat tan etir varUum tuNai kaNTu, mika n'ANi,
	pal malariTaip pukUum pazanam cEr Ura! kEL:
	n'alam n'Ippat tuRan'tu emmai, n'alkAy n'I viTutalin,
	pala n'ALum paTAta kaN, pAyal koNTu, iyaipavAl;
	tuNai malark kOtaiyAr vaikalum pArATTa,
10	maNa manait tatumpum n'in maNa muza van'tu eTuppumE
	akala n'I tuRattalin, azutu OvA uNkaN, em
	putalvanai mey tINTa, porun'tutal iyaipavAl;
	n'inakku otta n'allArai n'eTu n'akart tan'tu, n'in
	tamar pATum tuNagkaiyuL aravam van'tu eTuppumE
15	vArAy n'I tuRattalin, varun'tiya emakku, AgkE
	n'Ir itaz pularAk kaN imai kUmpa iyaipavAl;
	n'Er izai n'allArai n'eTu n'akart tan'tu, n'in
	tEr pUNTa n'eTu n'al mAn teL maNi van'tu eTuppumE
	ena Agku
20	melliyAn cevimutal mElvan'tAn kAlai pOl,
	ellAm tuyilO eTuppuka n'in peNTir
	illin ezIiya yAz tazIi, kallA vAyp
	pANan pukutarAkkAl!

71.kAmakkizatti kURRu

	viri katir maNTilam viyal vicumpu Urtara,
	puri talai taLai avizn'ta pU agkaN puNarn'tu ATi,
	vari vaNTu vAy cUzum vaLam kezu poykaiyuL
	tuni ciRan'tu izitarum kaNNin n'Ir aRal vAra,
5	initu amar kAtalan iRaijcit tan aTi cErpu,
	n'ani virain'tu aLittalin, n'akupavaL mukam pOla
	pani oru tiRam vAra, pAcaTait tAmarait
	tani malar taLai viTUum taN tuRai n'al Ura!
	'oru n'I piRar illai, avan peNTir' ena uraittu,
10	tEroTum tERRiya pAkan van'tIyAnkol
	Or il tAn koNarn'tu uyttAr pulaviyuL poRitta puN
	pArittup puNarn'ta n'in parattaimai kANiya?
	'maTuttu avan pukuvazi maRaiyEn' enRu yAzoTum
	eTuttuc cUL pala uRRa pANan van'tIyAnkol
15	aTuttut tan poy uNTArp puNarn'ta n'in eruttinkaN
	eTuttukkoLvatu pOlum toTi vaTuk kANiya?
	'taNan'tanai' enak kETTu, tavaRu OrAtu, emakku n'in
	kuNagkaLaip pArATTum tOzan van'tIyAnkol
	kaNagkuzai n'allavar katuppu aRal aNait tujci,
20	aNagku pOl kamazum n'in alar mArpu kANiya?
	enRu, n'in
	tIrA muyakkam peRun'arp pulappavar
	yAr? n'I varu n'AL pOl amaikuvam yAm; pukkImO!
	mArikku avAvuRRup pIL vATum n'elliRku, Agku,
25	ArAt tuvalai aLittatu pOlum, n'I
	Or yATTu oru kAl varavu

72.kAmakkizatti kURRu

	iNaipaTa n'ivan'ta n'Ila men cEkkaiyuL,
	tuNai puNar annattin tUvi mel aNai acaii,
	cETu iyal vaLLattup peyta pAl cila kATTi,
	UTum men ciRu kiLi uNarppavaL mukam pOla,
5	putu n'Ira putal, oRRap puNar tiraip pitir malka,
	mati n'Okki alar vItta Ampal vAl malar n'aNNi,
	kaTi kayat tAmaraik kamaz mukai, karai mAvin
	vaTi tINTa, vAy viTUum vayal aNi n'al Ura!
	kaNNi, n'I kaTi koNTArk kanaitoRum, yAm aza,
10	paNNinAl kaLippikkum pANan kATTu enRAnO
	'pENAn' enRu uTanRavar ukir ceyta vaTuvinAn,
	mEl n'AL, n'in tOL cErn'tAr n'akai cErn'ta itazinai?
	n'ATi n'in tUtu ATi, tuRai cellAL, Uravar
	ATai koNTu, olikkum, n'in pulaitti kATTu enRALO
15	kUTiyAr punal ATap puNai Aya mArpinil,
	UTiyAr eRitara, oLi viTTa arakkinai?
	veRitu n'in pukazkaLai vENTAr il eTuttu Ettum
	aRivuTai an'taNan avaLaik kATTu enRAnO
	kaLi paTTAr kamaz kOtai kayampaTTa uruvinmEl
20	kuRi peRRAr kuraR kUn'taR kOTu uLarn'ta tukaLinai?
	ena Agku
	ceRivuRREm, emmai n'I ceRiya; aRivuRRu,
	azin'tu uku n'ejcattEm; allal uzappa;
	kazin'tavai uLLAtu, kaNTa iTattE,
25	azin'tu n'iR pENik koLalin izin'tatO
	in' n'Oy uzattal emakku?

73.talaivi kURRu

	akan tuRai aNi peRa, putaloTu tAzn'ta
	pakanRaip pU uRa n'INTa pAcaTait tAmarai,
	kaN pora oLi viTTa veLLiya vaLLattAn,
	taN kamaz n'aRun' tERal uNpavaL mukam pOla,
5	vaN piNi taLai viTUum vayal aNi n'al Ura!
	'n'OtakkAy' ena n'innai n'on'tIvAr ilvazi,
	'tItu ilEn yAn' enat tERRiya varutiman
	jekiz toTi iLaiyavar iTai mulait tAtu cOrn'tu,
	itaz vanappu izan'ta n'in kaNNi van'tu uraiyAkkAl?
10	kanaRRi n'I ceyvatu kaTin'tIvAr ilvazi,
	'manattil tItu ilan' ena mayakkiya varutiman
	alamaral uNkaNNAr Ay kOtai kuzaitta n'in
	malar mArpin maRuppaTTa cAn'tam van'tu uraiyAkkAl?
	ennai n'I ceyyinum, uraittIvAr ilvazi,
15	mun aTip paNin'tu, emmai uNarttiya varutiman
	n'irai toTi n'allavar tuNagkaiyuL talaik koLLa,
	karaiyiTaik kizin'ta n'in kAzakam van'tu uraiyAkkAl?
	ena Agku
	maNTu n'Ir ArA mali kaTal pOlum n'in
20	taNTAp parattai talaikkoLLa, n'ALum
	pulat takaip peNTirait tERRi; maRRu yAm enin,
	tOlAmO, n'in poy maruNTu?

74.kAmakkizatti kURRu

	poykaip pUp putitu uNTa vari vaNTu kazip pUtta
	n'eytal tAtu amarn'tu ATi, pAcaTaic cEppinuL
	ceytu iyaRRiyatu pOla vayal pUtta tAmarai,
	mai tapu, kiLar koTTai mAN patip paTartarUum,
5	koy kuzai akai kAjcit tuRai aNi n'al Ura!
	'anpu ilan, aRan ilan, enappaTAn' ena Etti,
	n'in pukaz pala pATum pANanum EmuRRAn
	n'ajcu uyir cekuttalum aRin'tu uNTAgku, aLi inmai
	kaNTum, n'in mozi tERum peNTirum EmuRRAr
10	munpakal talaikkUTi, n'anpakal avaL n'Ittu,
	pinpakal piRart tErum n'ejcamum EmuRRAy
	ena Agku
	'kiNkiNi maNit tArOTu olittu Arppa, oN toTip
	pEr amark kaNNArkkum paTu valai itu' ena,
15	Uravar uTan n'akat tiritarum
	tEr EmuRRanRu, n'inninum peritE

75.talaivi kURRu

	'n'Ir Ar ceRuvil n'eytaloTu n'ITiya
	n'Er itaz Ampal n'irai itaz koNmAr,
	cIr Ar cEyizai olippa, OTum
	Orai makaLir Otai verIi ezun'tu,
5	Aral Arkai am ciRait tozuti
	uyarn'ta pogkar uyar maram ERi,
	amark kaN makaLir alappiya an' n'Oy
	tamarkku uraippana pOl, pal kural payiRRum
	uyarn'ta pOrin oli n'al Uran
10	putuvOrp puNartal veyyan Ayin,
	vatuvai n'ALAl vaikalum, aHtu yAn
	n'OvEn, tOzi! n'OvAy, n'I' ena
	eR pArttu uRuvOy! kEL, init teRRena:
	'ellinai varuti; evan kuRittanai?' enac
15	collAtiruppEnAyin, ollena,
	viriuLaik kali mAn tEroTu van'ta
	virun'tu etirkOTalin, maRappal, enRum
	'vATiya pUvoTu vAral, em manai?' ena
	UTiyiruppEnAyin, n'ITAtu,
20	accu ARAka uNariya varupavan
	poyc cUL ajcip pulavEn Akuval
	'pakal ANTu alkinai, paratta!' enRu yAn
	ikaliyiruppEnAyin, tAn tan
	mutalvan perum peyar muRaiyuLip peRRa
25	putalvaR pullip poyt tuyil tujcum
	Agka
	virun'tu etir koLLavum, poyc cUL ajcavum,
	arum peRal putalvanai muyagkak kANavum,
	Agku avin'tu oziyum, en pulavi tAgkAtu,
30	av av iTattAn avaiavai kANa
	pUg kaN makaLir punai n'alam citaikkum
	mAya makizn'an parattaimai
	n'Oven, tOzi! kaTan n'amakku enavE

76.talaivi kURRu

	'punaiizai n'Okkiyum, punal ATap puRam cUzn'tum,
	aNi vari taiiyum, n'am il van'tu vaNagkiyum,
	n'inaiyupu varun'tum in' n'eTun'takai tiRattu, iv Ur
	inaiyaL enRu eTuttu OtaRku anaiyaiyO n'I?' ena
5	vinavutiyAyin, viLagkizAy! kEL, ini:
	'cev viral civappu Urac cEN cenRAy' enRu, avan
	pauva n'Irc cAyk kozutip pAvai tan'tanaittaRkO
	'kauvai n'Oy uRRavar kANAtu kaTutta col
	ovvA' enRu uNarAy, n'I oru n'ilaiyE uraittatai?
10	oTugki, yAm pukal ollEm peyartara, avan kaNTu,
	n'eTug kaya malar vAgki, n'eRittut tan'tanaittaRkO
	viTun'tavar viraku inRi eTutta col poyyAkak
	kaTin'tatum ilaiyAy, n'I kazaRiya van'tatai?
	'vari tERRAy, n'I' ena, vaNagku iRai avan paRRi,
15	teri vEyt tOL karumpu ezutit toyyil ceytanaittaRkO
	puripu n'am AyattAr poyyAka eTutta col
	uritu ena uNarAy, n'I ulaman'tAy pOnRatai
	ena Agku,
	aritu ini, AyizAy! atu tERRal; puripu orugku,
20	anRu n'am vatuvaiyuL n'amar ceyvatu inRu, IgkE,
	tAn n'ayan'tu irun'tatu ivvUr Ayin, evankolO
	n'Am ceyaRpAlatu, ini?

77.talaivi kURRu

	iNai iraNTu iyain'tu otta mukai n'AppaN, piRitu yAtum
	tuNai inRit taLai viTTa, tAmarait tani malar;
	tirumukam iRaijcinaL, vIzpavaRku, inaipavaL
	ari matar mazaik kaN n'Ir alarmulaimEl teRippapOl,
5	takai malarp pazanatta puL oRRa, ocin'tu olki,
	mika n'ani cErn'ta am mukaimicai am malar
	aka itazt taN pani uRaittarum Ura! kEL:
	taN taLirt takai pUtta tAtu ezil n'alam celak
	koNTu, n'I mARiya kavin peRal vENTEnman
10	uNTAtal cAlA en uyir cAtal uNarn'tu, 'n'in
	peNTu' enap piRar kURum pazi mARap peRukaRpin?
	pon enap pacan'ta, kaN pOtu ezil n'alam cela;
	tol n'alam izan'ta kaN tuyil peRal vENTEnman
	n'in aNagku uRRavar n'I ceyyum koTumaikaL
15	ennuzai van'tu, n'on'tu uraiyAmai peRukaRpin?
	mAcu aRa maN uRRa maNi Ecum irug kUn'tal
	vI cErn'tu vaNTu Arkkum kavin peRal vENTEnman
	n'Oy cErn'ta tiRam paNNi, n'in pANan, em manai
	n'I cErn'ta il vinAy vArAmai peRukaRpin?
20	Agka
	'kaTaiiya n'in mArpu tOyalam' ennum,
	iTaiyum, n'iRaiyum eLitO n'iR kANin,
	kaTavupu, kaittagkA, n'ejcu ennum tammOTu
	uTan vAz pakai uTaiyArkku?

78.kAmakkizatti kURRu

	pal malarp pazanatta pAcaTait tAmarai
	in malar imirpu Utum tuNai puNar irun' tumpi,
	uNtuRai uTain'ta pUp punal cAyppa, pulan'tu, UTi
	paNpuTai n'al n'ATTup pakai talai van'tena,
5	atu kaiviTTu akanRu orIi, kAkkiRpAn kuTai n'IzaR
	pati paTarn'tu, iRaikoLLum kuTi pOla piRitum oru
	poykai tErn'tu alamarum pozutinAn, moy tapa
	iRai pakai taNippa ak kuTi patip peyarn'tAgku,
	n'iRai punal n'Igka van'tu, at tumpi am malarp
10	paRai tavirpu acaiviTUum pAy punal n'al Ura!
	'n'IgkugkAl n'iRam cAyn'tu, puNarugkAl pukaz pUttu,
	n'Am koNTa kuRippu, ivaL n'alam' ennum takaiyOtAn
	eri itaz cOrn'tu uka EtilArp puNarn'tamai
	kari kURum kaNNiyai, Igku em il varuvatai?
15	'cuTar n'Okki malarn'tu, AgkE paTin kUmpum malar pOl, en
	toTar n'Ippin, tokum, ivaL n'alam' ennum takaiyOtAn
	alar n'ANik karan'ta n'Oy kaimmika, piRar kUn'tal
	malar n'ARum mArpinai, Igku em il varuvatai?
	'peyin n'an'ti, vaRappin cAm, pulattiRkup peyal pOl, yAn
20	celin n'an'ti, ceRin cAmpum, ivaL' ennum takaiyOtAn
	muTi uRRa kOtai pOl yAm vATa, EtilAr
	toTi uRRa vaTuk kATTi, Igku em il varuvatai?
	Agka
	aiya amain'tanRu; anaittAkap pukkImO,
25	veyyArum vIzvArum vERAka; kaiyin
	mukai malarn'tanna muyakkil takai inRE,
	taN pani vaikal emakku?

79.talaivi kURRu

	puL imiz akal vayal oli cen'n'el iTaip pUtta
	muL arait tAmarai muzu mutal cAyttu, atan
	vaL itaz uRa n'ITi, vayagkiya oru katir,
	avai pukaz aragkinmEl ATuvAL aNi n'utal
5	vakai peRac cerIiya vayan'takam pOl, tOnRum
	takai peRu kazani am taN tuRai Ura! kEL:
	aNiyoTu van'tu Igku em putalvanaik koLLAti;
	maNi purai cev vAy n'in mArpu akalam n'anaippatAl;
	'tOyn'tArai aRikuvEn, yAn' ena, kamazum n'in
10	cAn'tinAl kuRi koNTAL cAykuvaL allaLO?
	pullal em putalvanai; pukal akal n'in mArpil
	pal kAz muttu aNi Aram paRRinan parivAnAl;
	mAN izai maTa n'allAr muyakkattai n'in mArpil
	pUNinAl kuRi koNTAL pulakkuvaL allaLO?
15	kaNTE em putalvanaik koLLAti; n'in cenni
	vaNTu imir vakai iNar vAgkinan parivAnAl;
	'n'aNNiyArk kATTuvatu itu' ena, kamazum n'in
	kaNNiyAl kuRi koNTAL kAykuvaL allaLO?
	ena Agku
20	pUg kaN putalvanaip poy pala pArATTi,
	n'IgkAy ikavAy n'eTug kaTai n'illAti;
	AgkE avar vayin cenRI aNi citaippAn
	Igku em putalvanait tan'tu

80.talaivi kURRu

	n'ayam talai mARuvAr mARuka; mARA,
	kayan' talai minnum katir viTu muk kAz,
	payan'ta em kaN Ara yAm kANa n'alki
	tikaz oLi muttu agku arumpAkat taiip
5	pavazam punain'ta paruti cumappa,
	kavazam aRiyA n'in kai punai vEzam
	puri punai pUg kayiRRin paipaya vAgki,
	ari punai puTTilin AgkaN Irttu, IgkE
	varuka! em pAka makan!
10	kiLar maNi Arppa Arppac cAayc cAayc cellum
	taLar n'aTai kANTal initu; maRRu, innAtE,
	'uLam' ennA n'un'taimATTu evvam uzappAr
	vaLai n'ekizpu yAm kANugkAl
	aiya! kAmaru n'Okkinai, 'attattA' ennum n'in
15	tE mozi kETTal initu; maRRu, innAtE,
	uyvu inRi n'un'tai n'alan uNac cAayc cAaymAr
	evva n'Oy yAm kANugkAl
	aiya! 'tigkaT kuzavi, varuka!' ena, yAn n'innai
	ampuli kATTal initu; maRRu, innAtE,
20	n'alkAtu n'un'tai puRam mARappaTTavar
	alkul vari yAm kANugkAl
	aiya! em kAtil kanag kuzai vAgki, peyartoRum,
	pOtu il vaRug kUn'tal, koLvatai, n'innai yAm
	EtilAr kaN cAya n'un'tai viyal mArpil
25	tAtu tEr vaNTin kiLai paTa, taiiya
	kOtai paripu ATa; kANkum

81.talaivan kURRu

	putalvanai n'Okkit talaivi kURutal
	mai aRa viLagkiya maNi maruL av vAy tan
	mey peRA mazalaiyin viLagku pUN n'anaittara,
	polam piRaiyuL tAzn'ta punai vinai uruL kalan,
	n'alam peRu kamaz cenni, n'akaiyoTu tuyalvara,
5	uru ejcAtu iTai kATTum uTai kazal am tukil
	ari poli kiNkiNi Arppu OvA aTi taTpa,
	pAlOTu alarn'ta mulai maRan'tu, muRRattuk
	kAl val tEr kaiyin iyakki, n'aTai payiRRA,
	Al amar celvan aNi cAl peru viRal
10	pOla, varum en uyir!
	peruma! virun'toTu kaitUvA emmaiyum uLLAy,
	perun' teruvil koNTATi jAyar payiRRa,
	tirun'tupu n'I kaRRa coRkaL yAm kETpa,
	marun'tu OvA n'ejciRku amiztam ayinRaRRA,
15	perun'takAy! kURu, cila
	tOziyai n'Okkit talaivi kURiya ceyti
	ellizAy! cEy n'inRu n'Am koNarn'ta pANan citain'tu, AgkE
	vAy OTi, 'EnAtippATiyam' enRaRRA,
	'n'Oy n'Am taNikkum marun'tu' enap pArATTa,
	OvAtu aTuttu aTuttu, 'attattA!' enpAn mANa
20	vEy men tOL vEyttiRam cErttalum, maRRu, ivan
	vAyuLLin pOkAn arO
	talaivan kETpa, tOziyai n'Okkit talaivi uraittal
	uLLi uzaiyE orugku paTai viTak
	kaLLar paTartan'tatu pOla, tAm emmai
	eLLumAr van'tArE, Igku
	talaivan
25	EtappATu eNNi, puricai viyal uLLOr
	kaLvaraik kANAtu, 'kaNTEm' enpAr pOla,
	cEy n'inRu, ceyyAta collic cinaval; n'in
	ANai kaTakkiRpAr yAr?
	talaivi
	atirvu il paTiRu erukki, van'tu en makanmEl,
30	mutir pUN mulai poruta EtilAL mucci
	utir tukaL ukka n'in ATai olippa
	etir vaLi n'inRAy; n'I cel
	talaivan
	ini, 'ellA! yAm tItilEm' enRu teLippavum, kain'n'Ivi
	yAtonRum emkaN maRuttaravu illAyin,
35	mEtakka en'tai peyaranai yAm koLvEm,
	tAvA viruppoTu kanRu yAttuzic cellum
	A pOl paTar taka, n'Am

82.talaivi kURRu

	talaivi
	jAlam vaRam tIrap peyya, kuNakku Erpu,
	kAlattil tOnRiya koNmUp pOl, em mulai
	pAloTu vIgkat tava n'eTitAyinai;
	puttELir kOTTam valam ceytu ivanoTu
5	pukka vazi ellAm kURu
	tOzi
	kURuvEn; mEyAyE pOla vinavi, vazimuRaik
	kAyAmai vENTuval, yAn
	talaivi
	kAyEm.
	tOzi kURRum, talaivi putalvanaik kaTitalum
10	maTak kuRu mAkkaLOTu Orai ayarum
	aTakkam il pOztinkaN, tan'tai kAmuRRa
	toTakkattut tAyuzaip pukkARku, avaLum
	maruppup pUN kaiyuRaiyAka aNin'tu,
	'perumAn, n'akaimukam kATTu!' enpAL kaNNIr
15	cori muttam kAz cOrva pOnRana; maRRum,
	vazimuRait tAyuzaip pukkARku, avaLum
	mayagku n'Oy tAgki, makan etir van'tu,
	muyagkinaL muttinaL n'Okki, n'inain'tE,
	'n'inakku yAm yArEm Akutum?' enRu,
20	vanappu uRak koLvana n'ATi aNin'tanaL,
	AgkE, 'ari matar uNkaN pacappa n'Oy ceyyum
	perumAn parattaimai ovvAti' enRAL;
	avaTku initAki viTuttanan pOkit
	talaik koNTu n'ammoTu kAyum maRRu Itu Or
25	pulat takaip puttEL il pukkAn alaikku oru
	kOl tA; n'inakku avaL yAr Akum? ellA!
	varun'ti yAm n'Oy kUra, n'un'taiyai enRum
	parun'tu eRin'taRRAkak koLLum; koNTAgkE,
	toTiyum ukirum paTaiyAka n'un'tai
30	kaTiyuTai mArpin ciRu kaNNum uTkAL,
	vaTuvum kuRittAgkE ceyyum. viTu, ini;
	anna piRavum, perumAn avaLvayin
	tunnutal Ompi, tiRavatu il munni, n'I
	aiyam illAtavar il oziya, em pOlak
35	kaiyARu uTaiyavar il allAl cellal;
	amain'tatu, ini n'in tozil

83.talaivi kURRu

	talaivi tan putalvanuTan cenRa tOzi n'ITTittu van'tamai paRRi vinAvutal
	perun' tiru n'ilaiiya vIgku cORRu akal manai,
	porun'tu n'On katavu oRRip pulampi yAm ulamara,
	iLaiyavar tazUu ATum ekkar vAy viyan teruvin
	viLaiyATTikkoNTu varaRku enac cenRAy,
5	uLaivu ilai; UTTalen tIm pAl perukum aLavellAm
	n'ITTitta kAraNam en?
	tOziyin maRumozi
	kETTI
	peru maTaR peNNaip piNart tOTTup paig kurumpaik
	kuTa vAyk koTip pinnal vAgki, taLarum
10	peru maNit tiN tErk kuRumakkaL n'AppaN,
	akal n'akar mILtaruvAnAka, puri jekizpu
	n'Ila n'iraip pOtu uRu kARku ulaivana pOl,
	cAlakattu olkiya kaNNar, 'uyar cIrtti
	Al amar celvan aNi cAl makan vizAk
15	kAlkOL' enRu Ukki, katumena n'Okki,
	tirun'tuaTi n'Upuram Arppa iyali, viruppinAl,
	'kaNNum, n'utalum, kavuLum, kavaviyArkku
	oNmai etiriya am kaiyum, taN enac
	ceyvana ciRappin ciRappuc ceytu, iv irA
20	emmoTu cErn'tu cenRIvAyAl; cemmAl!
	n'alam putitu uNTu uLLA n'ANili ceyta
	pulampu elAm tIrkkuvEm man' enRu iragkupu,
	vERRu AnAt tAyar etirkoLLa, mARRAta
	kaLvanAl tagkiyatu allAl, katiyAti,
25	oLLizAy! yAn tItu ilEn
	talaivi tan putalvanaik kaTin'tum, appozutu agkuvan'ta talaivanoTu pulan'tum kURutal
	eLLalAn, am men paNait tOL n'umar vEyn'ta kaNNiyOTu
	em il varutiyO? ellA! n'I tan meykkaN
	am tIm col n'allAr aNin'ta kalam kATTi,
	mun'tai irun'tu makan ceyta n'Oyttalai
30	ven'ta puN vEl eRin'taRRAl, vaTuvoTu
	tan'taiyum van'tu n'ilai

84.talaivi kURRu

	talaivi tOziyai vinAvutal
	uRu vaLi tUkkum uyar cinai mAvin
	n'aRu vaTi Ar iRRavai pOl aziya,
	karan'tu yAn arakkavum, kai n'illA vIgkic
	curan'ta en mel mulaip pAl pazutAka n'I
5	n'al vAyil pOttan'ta pozutinAn, 'ellA!
	kaTavuT kaTi n'akartORum ivanai
	valam koLIi vA' ena, cenRAy vilagkinai
	Iram ilAta ivan tan'tai peNTiruL
	yAr il tavirn'tanai? kURu
	tOzi kURiya ceyti uNarn'tu, talaivi n'ejcoTu kiLattal
10	n'IruL aTai maRai Ay itazp pOtupOl koNTa
	kuTain'izal tOnRum n'in cemmalaik kANUu,
	'ivan manRa yAn n'Ova uLLam koNTu, uLLA
	makan allAn peRRa makan' enRu akaln'akar
	vAyil varai iRan'tu pOttan'tu, tAyar
15	teruvil tavirppat tavirn'tanan; maRRu, avar
	tamtam kalagkaLuL, 'kaiyuRai' enRu ivaRku,
	ottavai ArAyn'tu, aNin'tAr 'piRan peNTir
	Ittavai koLvAnAm, iHtu ottan; cIttai,
	ceRu takkAn manRa peritu'
	talaivi putalvanoTu pulan'tu uraittal
20	ciRu paTTi; EtilAr kai, emmai eLLupu n'I toTTa,
	mOtiram yAvO? yAm kANku
	avaRRuL n'aRA itaz kaNTanna cev viraRku ERpac
	cuRA ERu ezutiya mOtiram toTTAL
	kuRi aRin'tEn; 'kAman koTi ezuti, enRum
25	ceRiyAp parattai ivan tan'tai mArpil
	poRi oRRikkoNTu ALval' enpatu tannai
	aRIiya ceyta vinai
	annaiyO? iHtu onRu
	mun'taiya kaNTum, ezukallAta en munnar,
30	ven'ta puN vEl eRin'taRRA, iHtu onRu
	tan'tai iRait toTi maRRu ivan tan kaikkaN
	tan'tAr yAr, ellAa! itu?
	'iHtu onRu en ottuk kANka, piRarum ivaRku' ennum
	tan n'alam pATuvi, tan'tALA n'innai,
35	'itu toTuka' enRavar yAr
	talaivi tan n'ejcu azin'tu kURutal
	ajcAti; n'Iyum tavaRilai; n'in kai itu tan'ta
	pU ezil uNkaN avaLum tavaRilaL;
	vEniR punal anna n'un'taiyai n'OvAr yAr?
	mEl n'inRum eLLi, itu ivan kait tan'tAL
40	tAn yArO? enRu vinaviya n'OyppAlEn
	yAnE tavaRuTaiyEn!

85.talaivi kURRu

	kAlavai, cuTu pon vaLaiiya Ir amai cuRRoTu
	poTi azaR puRam tan'ta ceyvuRu kiNkiNi
	uTuttavai, kaivinaip polin'ta kAcu amai polg kAz; mEl
	mai il cen' tukirk kOvai; avaRRin mEl
5	taiiya, pUn' tukil, aitu kazal oru tirai
	kaiyatai, alavan kaN peRa aTagkac cuRRiya
	pala uRu kaNNuL cila kOl avir toTi
	pUNTavai, eRiyA vALum eRRA mazuvum
	ceRiyak kaTTi, Ir iTait tAzn'ta,
10	pey pula mUtAyp pukar n'iRat tukirin
	mai aRa viLagkiya An ERRu avir pUN
	cUTina, irug kaTal muttamum, pal maNi, piRavum, Agku
	orugku uTan kOtta uruL amai muk kAz; mEl
	curumpu Ar kaNNikkuc cUz n'UlAka,
15	arumpu aviz n'Ilattu Ay itaz n'ANa,
	curumpu ARRuppaTutta maNi maruL mAlai
	Agka avvum piRavum aNikku aNiyAka, n'in
	celvu uRu tiN tErk koTuj cinaik kaippaRRip
	paipayat tUgkum n'in mel viraR cIRaTi
20	n'Otalum uNTu; Igku en kai van'tI,
	cemmAl! n'in pAl uNNiya
	poy pOrttup pAN talai iTTa pala val pulaiyanait
	tUNTilA viTTut tuTakki, tAn vENTiyAr
	n'ejcam piNittal tozilAt tiritarum
25	n'un'taipAl uNTi, cila
	n'un'tai vAy mAyac cUL tERi, mayagku n'Oy kaimika,
	pU ezil uNkaN pani parappa, kaN paTA
	jAyarpAl uNTi, cila
	annaiyO! yAm em makanaip pArATTa, katumenat
30	tAm van'tAr, tam pAlavarOTu; tammai
	varuka enRAr, yArkolO, Igku?
	en pAl al pArATTu uvan'tOy! kuTi; uNTIttai; en
	pArATTaippAlO cila
	ceruk kuRittArai uvakaik kUttATTum
35	varicaip perum pATToTu ellAm parukIttai
	taNTuven jAyar mATTaip pAl

86.talaivi kURRu

	mai paTu cenni maza kaLiRRu OTai pOl,
	kai punai mukkAz kayan' talait tAza,
	polam cey mazuvoTu vAL aNi koNTa
	n'alam kiLar oN pUN n'anaittarum av vAy
5	kalan'tu kaN n'Okku Ara, kANpu in tukirmEl
	polam punai cempAkam pOr koNTu imaippa,
	kaTi araNam pAyA n'in kai punai vEzam,
	toTiyOr maNalin uzakki, aTi Arn'ta
	tErai vAyk kiNkiNi Arppa, iyalum en
10	pOr yAnai, van'tIka, Igku!
	cemmAl! vanappu elAm n'un'taiyai oppinum, n'un'tai
	n'ilaip pAluL otta kuRi en vAyk kETTu otti;
	kanRiya tevvark kaTan'tu kaLam koLLum
	venRimATTu otti, peruma! maRRu ovvAti,
15	'onRinEm yAm' enRu uNarn'tArai, n'un'tai pOl,
	men tOL n'ekiza viTal
	pAl koLal inRi, pakal pOl, muRaikku olkAk
	kOl cemmai otti, peruma! maRRu ovvAti,
	kAl poru pUvin kavin vATa, n'un'taipOl,
20	cAlpu Ayn'tAr cAya viTal
	vItal aRiyA vizup poruL n'acciyArkku
	ItalmATTu otti, peruma! maRRu ovvAti,
	mAtar men n'Okkin makaLirai, n'un'taipOl,
	n'Oy kUra n'OkkAy viTal
	pinnE maRaiya n'inRa talaivanait talaivi kaNTamai
25	Agka
	tiRan alla yAm kazaRa, yArai n'akum, im
	makan allAn peRRa makan?
	maRai n'inRu, tAm manRa van'tIttanar
	talaivan uraiyum, appozutu talaivan mArpil pAyn'ta putalvan ceyal kaNTu, talaivi uraittalum
	'AyizAy! tAvAta eRkut tavaRu uNTO? kAvAtu Igku
30	Ittai, ivanai yAm kOTaRku' cIttai; yAm
	kanRi atanaik kaTiyavum, kai n'Ivi,
	kunRa iRu varaik kONmA ivarn'tAgku,
	tan'tai viyal mArpil pAyn'tAn aRan illA
	anpili peRRa makan

87.talaivi kURRu

	talaivi
	orUu n'I; em kUn'tal koLLal yAm n'innai
	verUutum, kANugkaTai
	talaivan
	teriyizAy! cey tavaRu ilvazi, yAgkuc cinavuvAy,
	mey pirin'tu, annavarmATTu?
	talaivi
5	ETA! n'inakkut tavaRu uNTO? n'I vITu peRRAy;
	imaippin itaz maRaipu AgkE keTuti;
	n'ilaip pAl aRiyinum, n'in n'on'tu n'innaip
	pulappAr uTaiyar, tavaRu
	talaivan
	aNait tOLAy! tIyAraip pOla, tiRan inRu uTaRRuti;
10	kAyum tavaRu ilEn yAn
	tOzi
	mAn n'Okki! n'I aza n'Ittavan AnAtu
	n'ANilan Ayin, n'alitan'tu avanvayin
	UTutal ennO, ini?
	talaivi n'ejcoTu kURal
	'ini yAtum mIkkURRam yAm ilam' ennum
15	takaiyatu kANTaippAy, n'ejcE! pani AnAp
	pATu il kaN pAyal koLa

88.talaivi kURRu

	talaivi
	orUu; koTi iyal n'allAr kural n'ARRattu uRRa
	muTi utir pUn' tAtu moympina Aka,
	toTiya, emakku n'I yArai? periyArkku
	aTiyarO ARRAtavar?
	talaivan
5	kaTiyar tamakku yAr collat takkAr mARRu?
	talaivi
	vinaikkeTTu, vAy allA veNmai uraiyAtu. kURu n'in
	mAyam, maruLvArakattu
	talaivan
	AyizAy! n'in kaN peRin allAl, in uyir vAzkallA
	enkaN evanO, tavaRu?
	talaivi
10	iHtu ottan! puLLik kaLavan punal cEr potukkam pOl,
	vaL ukir pOzn'tanavum, vAL eyiRu uRRanavum,
	oL itaz cOrn'ta n'in kaNNiyum, n'allAr
	ciraRupu cIRac civan'ta n'in mArpum,
	tavaRAtal cAlAvO? kURu
	talaivan
15	'atu takkatu; vERRumai enkaNNO OrAti; tItu inmai
	tERRak kaNTIyAy; teLikku
	talaivi
	init tERREm yAm
	tEr mayagki van'ta teri kOtai am n'allAr
	tAr mayagki van'ta tavaRu ajci, pOr mayagki,
20	n'I uRum poyc cUL aNagku Akin, maRRu ini
	yAr mEl? viLiyumO? kURu

89.talaivi UTal tIrtal

	talaivi
	yAr ivan? em kUn'tal koLvAn? ituvum Or
	UrANmaikku otta paTiRu uTaittu; em manai
	vAral; n'I van'tAgkE mARu
	talaivan
	en ivai, Or uyirp puLLin iru talaiyuL onRu
5	pOr etirn'taRRAp pulaval? n'I kURin, en
	Ar uyir n'iRkum ARu yAtu?
	talaivi
	Ee! teLin'tEm yAm; kAyAti ellAm val ellA!
	perug kATTuk koRRikkup pEy n'oTittAgku,
	varun'tal n'in vajcam uraittu
	talaivan
10	marun'tu inRu mannavan cIRin, tavaRu uNTO? n'I n'ayan'ta,
	innakai! tItO ilEn
	talaivi
	mANa maRan'tu uLLA n'ANilikku ip pOr
	puRam cAyn'tu kANTaippAy n'ejcE! uRazn'tu ivanaip
	poyppa viTEem ena n'erugkin, tappinEn
15	enRu aTi cErtalum uNTu!

90.kAmakkizatti kURRu

	talaivi
	kaNTEn, n'in mAyam kaLavu Atal; poyn' n'akA,
	maNTAta collit toTAal; toTIiya n'in
	peNTir uLarmannO, Igku?
	talaivan
	oNtoTi! n'I kaNTatu evanO tavaRu?
	talaivi
5	kaNTatu n'Oyum vaTuvum karan'tu, makiz cerukki,
	pATu peyal n'inRa pAnAL iravil
	toTi poli tOLum, mulaiyum, katuppum,
	vaTivu Ar kuzaiyum, izaiyum, poRaiyA
	oTivatu pOlum n'ucuppOTu, aTi taLarA,
10	ArAk kavavin orutti van'tu alkal tan
	cIr Ar jekizam cilampa, civan'tu, n'in
	pOr Ar katavam mitittatu amaiyumO?
	Ayizai Arkkum oli kELA, av etir
	tAzAtu ezun'tu n'I cenRatu amaiyumO?
15	mARAL cinaii, avaL AgkE, n'in mArpil
	n'ARu iNarp pain' tAr parin'tatu amaiyumO?
	'tERu n'I; tIyEn alEn' enRu maRRu avaL
	cIRaTi tOyA iRuttatu amaiyumO?
	kURu ini; kAyEmO, yAm?
	talaivan
20	tERin, piRavum tavaRu ilEn yAn;
	alkal kanavukol n'I kaNTatu?
	talaivi
	'kanai peyal taN tuLi vIcum pozutil kuRi van'tAL
	kaNTa kanavu' ena, 'kANAtu, mARu uRRu
	paNTaiya alla, n'in poyc cUL, n'inakku; ellA!
25	n'inRAy; n'in pukkil pala'
	talaivan
	men tOLAy! n'alku, n'in n'al ezil; uNku
	talaivi
	ETA! kuRai uRRu n'I em uraiyal! n'in tImai
	poRai ARREm enRal peRutumO, yAza
30	n'iRai ARRA n'ejcu uTaiyEm?

91.kAmakkizatti kURRu

	talaivi
	ari n'Ir aviz n'Ilam, alli, aniccam,
	puri n'ekiz mullai, n'aRavOTu, amain'ta
	teri malark kaNNiyum tArum n'ayan'tAr
	poru muraN cIRac citain'tu, n'erun'aiyin
5	inRu n'anRu, ennai aNi
	talaivan
	aNai men tOLAy! ceyyAta collic cinavuvatu Igkuevan,
	aiyattAl? ennaik katiyAti; tItu inmai
	teyvattAn kaNTI teLikku
	talaivi
	maRRatu, aRival, yAn n'in cUL; anaittAka n'allAr
10	ceRi toTi uRRa vaTuvum, kuRi poyttAr
	kUr ukir cATiya mArpum, kuzain'ta n'in
	tArum, tatar paTTa cAn'tamum, cEri
	ari matar uN kaNNAr ArAk kavavin,
	paricu azin'tu yAza n'in mEni kaNTu, yAnum
15	ceru ozin'tEn; cenRI, ini
	talaivan
	teriyizAy! tERRAy civan'tanai kANpAy, n'I tItu inmai
	ARRin n'iRuppal paNin'tu
	talaivi
	annatEl, ARRal kAN:
	vERupaTTAgkE kaluzti; akappaTin,
20	mARupaTTAgkE mayagkuti; yAtu onRum
	kURi uNarttalum vENTAtu; maRRu n'I
	mANA ceyinum, maRuttu, AgkE n'invayin
	kANin n'ekizum en n'ejcu Ayin, en uRRAy,
	pENAy n'I peTpac ceyal?

92.talaivan kURRu

	talaivan
	puna vaLar pUg koTi annAy! kaziyak
	kanavu enappaTTatu Or kArikai n'IrttE:
	muyagkiya n'allAr mulai iTai mUzki,
	mayagki, maRRu ANTu ANTuc cERalum cellAtu,
5	uyagki irun'tArkku uyarn'ta poruLum;
	aritin aRam ceyyA, AnROr, ulakum,
	uritin orutalai eytalum vIzvArp
	piritalum AgkE puNartalum tammil
	tarutal takaiyAtAl maRRu
10	n'anavinAl pOlum, n'aRun'utAl! alkal
	kanavinAl cenREn kali kezu kUTal
	varai uRaz n'IL matil vAy cUzn'ta vaiyaik
	karai aNi kAvinakattu
	talaivi
	urai, ini taNTAt tIm cAyal n'eTun'takAy! av vazik
15	kaNTatu evan maRRu n'I?
	talaivan
	kaNTatu uTan amar AyamoTu av vicumpu Ayum
	maTa n'aTai mA inam, an'ti amaiyattu,
	iTan viTTu iyagkA imaiyattu oru pAl,
	iRai koNTu irun'tanna n'allAraik kaNTEn,
20	tuRai koNTu uyar maNalmEl onRi n'iRaivatai,
	talaivi
	Orttatu icaikkum paRai pOl, n'in n'ejcattu
	vETTatE kaNTAy, kanA
	'muRRum kETTu vekuL' EnRa talaivanukkut talaivi 'urai' enna avan uraittal
	'kETTai viraiyal n'I; maRRu vekuLvAy!' 'urai' 'ANTu
	ituvAkum, in n'akai n'allAy! potuvAka
25	tAm koTi anna takaiyAr ezun'tatu Or
	pUg koTi vAgki, iNar koyya, AgkE
	cinai alar vEmpin poruppan poruta
	munai araN pOla uTain'tanRu, ak kAvil
	tunai vari vaNTin inam
30	maRRu AgkE n'Er iNar mUciya vaNTu ellAm av vazik
	kArikai n'allAr n'alam kavarn'tu uNpa pOl OrAgku mUca,
	avaruL,
	orutti, ceyal amai kOtai n'akai;
	orutti, iyal Ar ceruvil toTiyoTu taTpa;
35	orutti, teri muttam, cErn'ta, tilakam;
	orutti, ari mAN avir kuzai Ay kAtu vAgka,
	orutti, vari Ar akal alkul kAzakam;
	orutti, ari Ar jekizattu aNi cuRAt taTpa:
	orutti, pulaviyAl pullAtirun'tAL, alavuRRu
40	vaNTinam Arppa, iTai viTTuk kAtalan
	taN tAr akalam pukum
	orutti, aTi tAz kaligkam tazIi, oru kai
	muTi tAz irug kUn'tal paRRi, pU vEyn'ta
	kaTi kayam pAyum, alan'tu
45	orutti, kaNam koNTu avai mUca, kai ARRAL, pUNTa
	maNam kamaz kOtai paripu koNTu, Occi,
	vaNagku kAz vagkam pukum
	orutti, iRan'ta kaLiyAn itaz maRain'ta kaNNaL,
	paRan'tavai mUcak kaTivAL, kaTiyum
50	iTam tERRAL cOrn'tanaL, kai
	Agka, kaTi kAvil kAl oRRa, olki ociyAk
	koTi koTi tammil piNagkiyavai pOl,
	teriyizai Arppa mayagki irivuRRAr, vaNTiRku
	vaNTalavar; kaNTEn, yAn'
	talaivi
55	n'innai n'in peNTir pulan'tanavum, n'I avar
	mun aTi olki uNarttinavum, pal mAN
	kanavin talaiyiTTu uraiyal; cinaii yAn
	ceyvatu il enpatO? kURu
	talaivan
	poy kUREn anna vakaiyAl yAn kaNTa kanavu tAn
60	n'al vAyAk kANTai n'aRun'utAl! 'pal mANum
	kUTip puNarn'tIr! piriyanmin; n'ITip
	pirin'tIr! puNar tammin' enpana pOla,
	arumpu aviz pUj cinaitORum irug kuyil
	AnAtu akavum pozutinAn, mEvara,
65	n'AnmATakkUTal makaLirum main'tarum
	tEn imir kAvil puNarn'tirun'tu ATumAr,
	AnA viruppOTu aNi ayarpa, kAmaRku
	vEnil virun'tu etirkoNTu

93.talaiviyin pulavi

	talaivi
	vaNTu Utu cAn'tam vaTuk koLa n'Iviya,
	taNTAt tIm cAyaR parattai, viyal mArpa!
	paNTu, innai allaiman; Igku elli van'tIya,
	kaNTatu evan? maRRu urai
	talaivan
5	n'anRum taTaiiya men tOLAy! kETTIvAyAyin
	uTan uRai vAzkkaikku utavi uRaiyum
	kaTavuLarkaN tagkinEn
	talaivi
	cOlai malar vEyn'ta mAn piNai annAr palar, n'I
	kaTavuNmai koNTu ozukuvAr
10	avaruL, ek kaTavuL? maRRu ak kaTavuLaic ceppIman
	talaivan kURRum talaiviyin mARRamum
	'muttu Er muRuvalAy! n'Am maNam pukkakkAl,
	"ip pOztu pOztu" enRu atu vAyppak kURiya
	ak kaTavuL, maRRu ak kaTavuL ' 'atu okkum
	n'A uL azun'tu talai cAyttu n'I kURum
15	mAyamO; kaippaTukkappaTTAy n'I; kaNTArai
	vAyAka yAm kURa vETTIvAy! kEL, ini:
	peRal n'acai vETkaiyin n'in kuRi vAyppa,
	paRi muRai n'Ern'ta n'akArAka, kaNTArkku
	iRu muRai ceyyum uruvoTu, n'um il,
20	ceRi muRai van'ta kaTavuLaik kaNTAyO?
	n'aRun' taN takaramum n'Anamum n'ARum
	n'eRin'ta kuraR kUn'tal n'AL aNikku oppa,
	n'Okkin piNi koLLum kaNNoTu, mEl n'AL, n'I
	pUp pali viTTa kaTavuLaik kaNTAyO?
25	Ir aNikku ERRa oTiyAp paTivattuc
	cUr konRa cevvElAR pATi, pala n'ALum,
	ArAk kanai kAmam kunRattu n'innoTu
	mAri iRutta kaTavuLaik kaNTAyO?
	kaNTa kaTavuLartammuLum, n'innai
30	veRi koL viyal mArpu vERAkac ceytu,
	kuRi koLac ceytAr yAr? ceppu: maRRu yArum
	ciRu varait tagkin vekuLvar; ceRu takkAy!
	tERinEn; cenRI n'I cellA viTuvAyEl,
	n'al tAr akalattukku Or cAra mEviya
35	n'eTTirug kUn'taR kaTavuLar ellArkkum
	muTTuppATu Akalum uNTu'

94.kuRaLum kUnum uRazn'tu kURal

	kuRaLan
	en n'ORRanaikollO
	n'IruL n'izal pOl n'uTagkiya men cAyal
	Igku uruc curugki
	iyaluvAy! n'innOTu ucAvuvEn; n'inRIttai
	kUni
5	annaiyO! kAN takai illAk kuRaL n'Azip pOztinAn,
	ANtalaikku InRa paRaz makanE n'I! emmai,
	'vENTuval' enRu vilakkinai; n'in pOlvAr
	tINTap peRupavO maRRu?
	kuRaLan
	mANTa eRitta paTai pOl muTagki maTagki,
10	n'eRittuviTTanna n'iRai ErAl ennaip
	poRukkallA n'Oy ceytAy; poRIi n'iRukkallEn;
	n'I n'alkin uNTu, en uyir
	kUni
	kuRippuk kAN vallup palakai eTuttu n'iRuttanna
	kallAk kuRaLa! kaTum pakal van'tu emmai,
15	'illattu vA' ena, mey koLIi, ellA! n'in
	peNTir uLarmannO? kURu
	kuRaLan
	n'allAy! kEL: ukkattu mElum n'aTu uyarn'tu vAL vAya
	kokku urittanna koTu maTAy! n'innai yAn
	pukku akalam pullin, n'ejcu UnRum; puRam pullin,
20	akkuLuttu; pullalum ARREn; aruLImO,
	pakkattup pullac ciRitu
	kUni kuRaLanai ikazn'tu cellutalum, avaL celavu n'Okkik kuRaLan tan n'ejciRku uraittalum
	'pO, cIttai! makkaL muriyE! n'I mARu, ini; tokka
	marak kOTTam cErn'tu ezun'ta pUg koTi pOla,
	n'irappam il yAkkai tazIiyinar, emmaip
25	purappEm enpArum palarAl; parattai en
	pakkattup pullIyAy ennumAl; tokka
	uzun'tinum tuvvA, kuRu vaTTA! n'innin
	izin'tatO, kUnin piRappu?' 'kazin'tu AgkE,
	"yAm vIztum" enRu tan pin celavum, uRRIyAk
30	kUni kuzaiyum kuzaivu kAN'
	'kAmanAr n'aTakkum n'aTaikAN' enRa kUniyinmun, kuRaLan n'aTan'tu kATTutal
	'yAmai eTuttu n'iRuttaRRAl, tOL iraNTum vIci,
	yAm vENTEm enRu vilakkavum, em vIzum
	kAmar n'aTakkum n'aTai kAN' 'kavar kaNaic
	cAmanAr tammun celavu kAN'
	kuRaLanin cULurai
35	Oo! kAN, n'ammuL n'akutal toTIiyar, n'ammuL n'Am
	ucAvuvam; kOn aTi toTTEn
	kUni kuRaLanai virumpi mozital
	Agku Aka! cAyal in mArpa! aTagkinEn; 'Ee!
	pEyum pEyum tuLLal uRum' enak
	kOyiluL kaNTAr n'akAmai vENTuval;
40	taNTAt takaTu uruva! vERAkak kAvin kIzp
	pOtar; akaTu Arap pulli muyagkuvEm
	tukaL tapu kATci avaiyattAr Olai
	mukaTu kAppu yAttuviTTAgku

95.talaivi kURRu

	talaivi
	n'il, Agku; n'il, Agku; ivartaral ellA! n'I
	n'ARu irug kUn'talAr il celvAy, iv vazi,
	ARu mayagkinai pORi! n'I van'tAgkE
	mARu, ini, n'in AgkE, n'in cEvaTi civappa
	talaivan
5	ceRin'tu oLir veN pallAy! yAm vERu iyain'ta
	kuRumpUzp pOr kaNTEm; anaittallatu, yAtum
	aRin'tatO illai, n'I vERu Orppatu
	talaivi
	kuRumpUzp pOr kaNTamai kETTEn, n'I enRum;
	putuvana Ikai vaLam pATi, kAlin
10	piriyAk kavi kaip pulaiyan tan yAzin
	ikutta cevi cAyttu, ini inip paTTana
	Ikaip pOr kaNTAyum pORi; mey eNNin,
	taputta pularvil puN
	Uravar kavvai uLain'tIyAy, alkal n'in
15	tArinvAyk koNTu muyagki, piTi mANTu,
	pOr vAyppak kANinum pOkAtu koNTu, ATum
	pArvaip pOr kaNTAyum pORi; n'in tOL mElAm
	IramAyviTTana puN
	koTiRRup puN ceyyAtu, meym muzutum kaiyin
20	tuTaittu, n'I vENTinum vellAtu koNTu, ATum
	oTTiya pOr kaNTAyum pORi; mukamtAnE
	koTTik koTukkum kuRippu
	talaivan
	Ayin, AyizAy! annavai yAn Agku aRiyAmai
	pORRiya, n'in mey toTuku
	talaiviyin ikazcciyum talaimakan mARRamum
25	'annaiyO!' 'meyyaip poy enRu mayagkiya, kai onRu
	aRikallAy pORikAN, n'I
	n'allAy! poy ellAm ERRi, tavaRu talaippeytu,
	kaiyoTu kaNTAy; pizaittEn; aruL, ini'
	'aruL' enRa talaivanukkut talaivi
	aruLukam yAm; yArEm, ellA! teruLa?
30	aLittu, n'I paNNiya pUz ellAm innum
	viLittu, n'in pANanOTu ATi aLitti
	viTalai n'I n'Ittalin, n'Oy peritu Eykkum;
	n'aTalaippaTTu, ellAm n'in pUz

96.talaivi kURRu

	talaivi, 'yAgkuc cenRu van'tAy' ena, talaivan uraitta patil
	'En'tu ezil mArpa! etir alla, n'in vAyc col;
	pAyn'tu Ayn'ta tAnaip parin'tu AnA main'tinai;
	cAn'tu azi vErai; cuval tAzn'ta kaNNiyai;
	yAgkuc cenRu, Igku van'tIttan'tAy?' 'kEL ini:
5	En'ti etir itaz n'Ilam piNain'tanna kaNNAy!
	kutirai vazagki varuval'
	talaivi
	aRin'tEn, kutiraitAn;
	pAl piriyA aigkUn'taR pal mayirk koy cuval,
	mEl virittu yAtta cikazikaic cev uLai,
10	n'Ila maNik kaTikai vallikai, yAppin kIz
	jAl iyal men kAtin pullikaic cAmarai,
	mattikaik kaNNuRaiyAkak kavin peRRa
	utti oru kAz, n'Ul uttariyat tiN piTi,
	n'Er maNi n'Er mukkAzp palpala kaNTikai,
15	tAr maNi pUNTa tamaniya mEkalai,
	n'Upurap puTTil, aTiyoTu amaittu yAtta
	vAr polam kiNkiNi, Arppa iyaRRi, n'I
	kAtalittu Urn'ta n'in kAmak kutiraiyai,
	Ay cutai mATattu aNi n'ilA muRRattuL,
20	Atik koLIi, acaiyinai Akuvai,
	vAtuvan; vAziya, n'I!
	cEkA! katir viri vaikalil, kai vArUuk koNTa
	maturaip peru muRRam pOla, n'in meykkaN
	kutiraiyO, vIRiyatu?
25	kUr ukir mANTa kuLampinatu; n'anRE
	kOramE vAzi! kutirai
	vetir uzakku n'AziyAl cEtikaik kuttik
	kutirai uTal aNi pOla, n'in meykkaN
	kutiraiyO, kavviyatu?
30	cIttai! payam inRi Igkuk kaTittatu; n'anRE
	viyamamE vAzi! kutirai
	mika n'anRu, ini aRin'tEn, inRu n'I Urn'ta kutirai;
	peru maNam paNNi, aRattinil koNTa
	parumak kutiraiyO anRu; peruma! n'in
35	Etil perum pANan tUtu ATa, AgkE Or
	vAtattAn van'ta vaLik kutirai; Ati
	uru azikkum, ak kutirai; Ural, n'I; Urin, parattai
	pariyAka, vAtuvanAy, enRum maRRu ac cArt
	tiri; kutirai ERiya cel

97.talaivi kURRu

	talaivi
	annai: kaTuj col aRiyAtAy pOla, n'I
	ennaip pulappatu oRukkuvenman yAn
	ciRukAlai iR kaTai van'tu, kuRi ceyta
	av vazi enRum yAn kANEn tiritara,
5	'ev vazip paTTAy?' camanAka iv eLLal
	talaivan
	muttu Er muRuvalAy! n'am valaip paTTatu Or
	puttiyAnai van'tatu; kANpAn yAn tagkinEn
	'putiya yAnai kANat tagkinEn' enRa talaivanukkut talaivi
	okkum
	av yAnai vanappu uTaittAkalum kETTEn:
10	av yAnai tAn cuNNa n'IRu ATi, n'aRu n'aRA n'Ir uNTu
	oL n'utal yAtta tilaka avir OTai,
	toyyil poRitta vana mulai vAn kOTTu,
	toyyakat tOTTi, kuzai tAz vaTi maNi,
	utti poRitta punai pUN parumattu
15	muttu Eykkum veN pal n'akai tiRan'tu,
	n'al n'akar vAyil katava veLil cArn'tu,
	tan n'alam kATTi, takaiyinAl, kAl taTTi vIzkkum,
	toTar toTarAka valan'tu; paTar ceyyum
	men tOL taTak kaiyin vAgki, taR kaNTAr
20	n'alam kavaLam koLLum; n'akai muka vEzattai
	inRu kaNTAy pOl evan emmaip poyppatu, n'I?
	ellA! kezIi, toTi ceRitta tOL iNai, tattit
	tazIik koNTu, Urn'tAyum n'I
	kuzIi avAvinAl, tEmpuvAr iR kaTai ARA,
25	uvA aNi Urn'tAyum n'I
	mikAatu cIrppaTa uNTa ciRu kaLi Er uNkaN
	n'Irkku viTTu, Urn'tAyum n'I
	cArccAr n'eRi tAz irug kUn'tal n'in peNTir ellAm
	ciRu pAkarAkac ciraRRAtu, mella,
30	viTAatu n'I em il van'tAy; av yAnai
	kaTAam paTum; iTattu Ompu

98.talaivi kURRu

	talaivi
	yArai n'I em il pukutarvAy? Orum
	putuva malar tErum vaNTE pOl yAza
	vatuvai vizavu aNi vaikalum kATTinaiyAy
	mATTu mATTu OTi, makaLirt tarattara,
5	pUTTu mAn tiN tEr puTaitta maRuku ellAm
	pATTu Atal cAnRa n'in mAyap parattaimai
	kATTiya van'tamai kaippaTuttEn paNTu elAm
	kETTum aRivEnman, yAn
	talaivan
	teri kOtai am n'allAy! tERIyal vENTum
10	poru karai vAy cUzn'ta pU mali vaiyai
	varu punal ATat tavirn'tEn; peritu ennaic
	ceyyA mozivatu evan?
	talaivi
	Oo! punal ATinAy enavum kETTEn; punal AgkE
	n'IL n'Ir n'eRi katuppu vArum aRal Aka,
15	mAN ezil uN kaN piRazum kayal Aka,
	kAr malar vEyn'ta kamaz pUm parappu Akam,
	n'ANuc ciRai azittu n'anpakal van'ta av
	yANarp putup punal ATinAy, mun mAlai,
	pANan puNaiyAkap pukku
20	AnAtu aLittu amar kAtalOTu ap punal ATi,
	veLippaTu kavvaiyai yAn aRital ajci,
	kuLittu ozukinAy enavum kETTEn; kuLittAgkE
	pOrtta cinattAn puruvat tirai iTA,
	Arkkum jekizattAn n'al n'Ir n'aTai taTpac
25	cIrt taka van'ta putup punal n'innaik koNTu,
	Irttu uyppak kaNTAr uLar
	Irttatu urai cAl ciRappin n'in n'Ir uLLam vAgka,
	purai tIr putup punal veLLattin innum
	karai kaNTatUum ilai
	talaivan
30	n'iraitoTIi! poyyA vAT tAnai, punai kazaR kAl, tennavan
	vaiyaip putup punal ATat tavirn'tatait
	teyvattin tERRit teLippEn; peritu ennaic
	ceyyA mozivatu evan?
	talaivi
	meyyatai malku malar vEyn'ta mAyap putup punal
35	pal kAlum ATiya celvuzi, olkik
	kaLaijarum il vazi, kAl Azn'tu tErOTu
	iLa maNaluL paTal Ompu muLai n'Er
	muRuvalArkku Or n'akai ceytu

99.cAnROr kURRu

	n'aRavinai varain'tArkkum varaiyArkkum, avai eTuttu,
	aRa vinai inpuRUum an'taNar iruvarum
	tiRam vERu ceytiyin n'Ul n'eRi pizaiyAtu,
	kuzaviyaip pArttu uRUum tAy pOl, ulakattu
5	mazai curan'tu aLittu Ompum n'al Uzi yAvarkkum
	pizaiyAtu varutal n'in cemmaiyin tara, vAyn'ta
	izai aNi koTit tiN tEr, ina maNi yAnaiyAy!
	aRan n'izal enak koNTAy, Ay kuTai; ak kuTaip
	puRa n'izaRkIzp paTTALO, ivaL? ivaN kANTikA
10	piRai n'utal pacappu Urap peru vituppu uRRALai!
	poyyAmai n'uvalum, n'in cegkOl; ac cegkOlin
	cey tozil kIzp paTTALO, ivaL? ivaN kANTikA
	kAma n'Oy kaTaikkUTTa vAzum n'AL munin'tALai!
	Emam enRu iragkum, n'in eRi muracam; am muracin
15	Emattu ikan'tALO, ivaL? ivaN kANTikA
	vEy n'alam izan'ta tOL kavin vATa izappALai!
	Agku
	n'eTitu cEN ikan'tavai kANinum, tAn uRRa
	vaTuk kATTa, kaN kANAtaRRAka, en tOzi
20	toTi koTpa n'Itta koTumaiyaik
	kaTitu ena uNarAmai kaTin'tatO, n'inakkE?

100.cAnROr kURRu

	INTu, n'Irmicait tOnRi iruL cIkkum cuTarE pOl,
	vENTAtAr n'ejcu uTka, veru van'ta koTumaiyum,
	n'INTu tOnRu uyar kuTai n'izal enac cErn'tArkkuk
	kAN taku mati ennak katir viTu taNmaiyum,
5	mANTa n'in ozukkattAn, maRu inRi, viyan jAlattu
	yANTOrum tozutu Ettum iragku icai muracinAy!
	'aiyam tIrn'tu yArkaNNum arun' tava mutalvan pOl
	poy kURAy' ena n'innaip pukazvatu keTAtOtAn
	n'alki n'I teLitta col n'acai enat tERiyAL
10	pal itaz malar uNkaN pani malkak kANugkAl?
	'curan'ta vAn pozin'taRRA, cUza n'inRu yAvarkkum
	iran'tatu n'acai vATTAy' enpatu keTAtOtAn
	kalagku ajar uRRu, n'in kamaz mArpu n'acaiiyAL
	ilagku kOl avir toTi iRai Urak kANugkAl?
15	'uRai varai n'iRutta kOl, uyir tiRam peyarppAn pOl,
	muRai ceyti' ena n'innai mozivatu keTAtOtAn
	azi paTar varutta, n'in aLi vENTik kalagkiyAL
	pazi tapu vAL mukam pacappu Urak kANugkAl?
	Agku
20	tol n'alam izan'tOL, n'I tuNai enap puNarn'tavaL;
	in uRal viyan mArpa! 'inaiyaiyAl; koTitu' ena,
	n'innai yAn kazaRutal vENTumO,
	ennOrkaL iTumpaiyum kaLain'tIvAy n'inakkE?