2.tOzi kURRu

	toTagkaRkaN tOnRiya mutiyavan mutalAka,
	aTagkAtAr miTal cAya, amarar van'tu irattalin,
	maTagkal pOl, cinaii, mAyam cey avuNaraik
	kaTan'tu aTu munpoTu, mukkaNNAn mUeyilum
5	uTanRakkAl, mukam pOla oN katir teRutalin,
	cIRu arug kaNicciyOn cinavalin av eyil
	ERu peRRu utirvana pOl, varai piLan'tu, iyagkun'ar
	ARu keTa vilagkiya azal avir Ar iTai
	maRappu arug kAtal ivaL INTu oziya,
10	iRappat tuNin'tanir, kENmin maRRu aiiya!
	tolaivu Aki, iran'tOrkku onRu IyAmai izivu ena,
	malai iRan'tu ceyal cUzn'ta poruL poruL AkumO
	n'ilaiiya kaRpinAL, n'I n'Ippin vAzAtAL,
	mulai Akam piriyAmai poruLAyin allatai?
15	il ena, iran'tOrkku onRu IyAmai izivu ena,
	kal iRan'tu ceyal cUzn'ta poruL poruL AkumO
	tol iyal vazAamait tuNai enap puNarn'tavaL
	pul Akam piriyAmai poruLAyin allatai?
	iTan inRi, iran'tOrkku onRu IyAmai izivu ena,
20	kaTan iRan'tu ceyal cUzn'ta poruL poruL AkumO
	vaTamIn pOl tozutu Etta vayagkiya kaRpinAL
	taTa men tOL piriyAmai poruLAyin allatai?
	ena, ivaL
	pun kaN koNTu inaiyavum, poruLvayin akaRal
25	anpu anRu, enRu yAn kURa, anpuRRu,
	kAz varai n'illAk kaTug kaLiRRu oruttal
	yAz varait tagkiyAgku, tAzpu, n'in
	tol kavin tolaital ajci, en
	col varait tagkinar, kAtalOrE

3.tOzi kURRu

	aRan inRi ayal tURRum ampalai n'ANiyum,
	vaRan n'In'ti n'I cellum n'IL iTai n'inaippavum
	iRai n'illA vaLai OTa, itaz cOrpu pani malka,
	poRai n'illA n'OyOTu pullenRa n'utal ivaL
5	viRal n'alan izappavum, vinai vETTAy! kEeL, ini:
	uTai ivaL uyir vAzAL, n'I n'Ippin ena, pala
	iTaikoNTu yAm irappavum, ema koLLAy Ayinai;
	kaTaiiya ARRiTai, n'Ir n'Itta vaRuj cunai,
	aTaiyoTu vATiya aNi malar takaippana
10	vallai n'I tuRappAyEl, vakai vATum ivaL ena,
	ol Agku yAm irappavum, uNarn'tIyAy Ayinai;
	cellu n'IL ARRiTai, cErn'tu ezun'ta maram vATa,
	pullu viTTu iRaijciya pUgkoTi takaippana
	piNipu n'I viTal cUzin, piRaztarum ivaL ena,
15	paNipu van'tu irappavum, pala cUzvAy Ayinai;
	tuNipu n'I celak kaNTa ARRiTai, am marattu
	aNi cela, vATiya am taLir takaippana
	ena Agku
	yAm n'iR kURavum ema koLLAy Ayinai;
20	AnAtu ivaLpOl aruL van'tavai kATTi,
	mEl n'inRu mey kURum kELir pOl, n'I cellum
	kAnam takaippa, celavu

4.tOzi kURRu

	vali munpin, vallenRa yAkkai, puli n'Okkin
	cuRRamai villar, curi vaLar pittaiyar,
	aRRam pArttu alkum kaTugkaN maRavar tAm
	koLLum poruL ilar Ayinum, vampalar
5	tuLLun'ark kANmAr toTarn'tu, uyir vauvalin,
	puLLum vazagkAp pulampu koL Ar iTai,
	veL vEl valattir poruL taral vETkaiyin,
	uLLinir enpatu aRin'tanaL, en tOzi
	kAz viri kavai Aram mI varum iLa mulai
10	pOztu iTaippaTAamal muyagkiyum amaiyAr, en
	tAz katuppu aNikuvar, kAtalar; maRRu, avar
	cUzvatai evankol? aRiyEn! ennum
	muL uRaz muLai eyiRRu amiztu URum tI n'Iraik
	kaLLinum makizceyum ena uraittum amaiyAr, en
15	oL izai tiruttuvar, kAtalar; maRRu, avar
	uLLuvatu evankol? aRiyEn! ennum
	n'uN ezil mAmaic cuNagku aNi Akam tam
	kaNNoTu toTuttena n'Okkiyum amaiyAr, en
	oL n'utal n'Ivuvar, kAtalar; maRRu, avar
20	eNNuvatu evankol? aRiyEn! ennum
	ena Agku,
	kazi peru n'alkal onRu uTaittu ena, en tOzi
	azivoTu kalagkiya evvattaL; oru n'AL, n'Ir,
	pozutu iTaippaTa n'Ippin, vAzvALO?
25	ozika ini, peruma! n'in poruT piNic celavE

5.tOzi kURRu

	pAal am cevip paNait tAL mA n'irai
	mAal yAnaiyoTu maRavar mayagkit
	tURu atarpaTTa ARu mayagku aruj curam
	iRan'tu, n'Ir ceyyum poruLinum, yAm n'umakkuc
5	ciRan'tanam Atal aRin'tanir Ayin,
	n'IL iru mun'n'Ir vaLi kalan vauvalin
	ALvinaikku azin'tOr pORal allatai,
	kEL perun' takaiyOTu evan pala mozikuvam?
	n'ALum kOL mIn takaittalum takaimE
10	kallenak kavin peRRa vizavu ARRuppaTutta pin,
	pullenRa kaLam pOlap pulampu koNTu, amaivALO?
	ALpavar kalakkuRa alaipeRRa n'ATu pOl,
	pAzpaTTa mukattOTu, paital koNTu, amaivALO?
	Or irA vaikaluL, tAmaraip poykaiyuL
15	n'Ir n'Itta malar pOla, n'I n'Ippin, vAzvALO?
	ena Agku
	poyn' n'alkal purin'tanai puRan'taral kaiviTTu,
	en' n'ALO, n'eTun' takAy! n'I celvatu,
	an' n'AL koNTu iRakkum, ivaL arum peRal uyirE

7.tOzi kURRu

	vEnil uzan'ta vaRitu uyagku Oy kaLiRu
	vAn n'Igku vaippin vazagkAt tEr n'Irkku avAam
	kAnam kaTattir, enak kETpin, yAn onRu
	ucAvukO aiya! ciRitu?
5	n'IyE, cey vinai marugkil celavu, ayarn'tu, yAza n'ina
	kai punai val vil jAN uLartIyE;
	ivaTkE, ceyvu uRu maNTilam maiyAppatu pOl,
	mai il vAL mukam pacappu UrummE
	n'IyE, vinai mAN kAzakam vIgkak kaTTi,
10	punai mAN marIiya ampu teritiyE;
	ivaTkE, cunai mAN n'Ilam kAr etirpavai pOl,
	inai n'Okku uNkaN n'Ir n'illAvE
	n'IyE, pulampu il uLLamoTu poruLvayiR celIiya,
	valam paTu tikiri vAy n'IvutiyE;
15	ivaTkE, alagku itazk kOTal vI ukupavai pOl,
	ilagku Er el vaLai iRai UrummE
	ena n'in,
	cel n'avai aravattum inaiyavaL n'I n'Ippin,
	tan n'alam kaTaikoLappaTutalin, maRRu ivaL
20	in uyir tarutalum ARRumO
	munniya tEettu muyanRu cey poruLE?

8.tOzi kURRu

	n'aTuvu ikan'tu orIi n'ayan illAn vinai vAgka,
	koTitu Ortta mannavan kOl pOla, jAyiRu
	kaTukupu katir mUTTik kAy cinam teRutalin,
	uRal URu kamaz kaTAttu olkiya ezil vEzam,
5	vaRan uzu n'Ajcil pOl, maruppu UnRi n'ilam cEra,
	viRal malai vempiya pOkku aru vej curam
	collAtu iRappat tuNin'tanirkku oru poruL
	colluvatu uTaiyEn; kENmin, maRRu aiiya!
	vIzun'arkku iRaicciyAy viral kavarpu icaikkum kOl
10	Ezum tam payan keTa, iTai n'inRa n'arampu aRUum
	yAzinum n'ilai illAp poruLaiyum n'accupavO?
	marIit tAm koNTAraik koNTakkAl pOlAtu,
	piriyugkAl piRar eLLa, pITu inRip puRam mARum
	tiruvinum n'ilai illAp poruLaiyum n'accupavO?
15	purai tavap payan n'OkkAr tam Akkam muyalvArai
	varaivu inRic ceRum pozutil, kaN OTAtu uyir vauvum
	araicinum n'ilai illAp poruLaiyum n'accupavO?
	ena Agku
	n'accal kUTAtu peruma! ic celavu
20	ozital vENTuval, cUzin, pazi inRu;
	mannavan puRan'tara varu virun'tu Ompi,
	tan n'akar vizaiyak kUTin,
	in uRal viyan mArpa! atu manum poruLE

10.tOzi kURRu

	vaRiyavan iLamai pOl, vATiya cinaiyavAy,
	ciRiyavan celvam pOl, cErn'tArkku n'izal inRi,
	yArkaNNum ikan'tu ceytu icai keTTAn iRuti pOl,
	vEroTu maram vempa, viri katir teRutalin,
5	alavuRRuk kuTi kUva, ARu inRip poruL veHki,
	kolai ajcA vinaivarAl, kOl kOTiyavan n'izal
	ulaku pOl, ulaRiya uyar mara vej curam
	iTai koNTu poruLvayin iRatti n'I enak kETpin,
	uTaipu n'ejcu uka, AgkE oLiyOTaRpALmannO
10	paTai amai cEkkaiyuL pAyalin aRiyAy n'I
	puTaipeyarvAy Ayinum, pulampu koNTu inaipavaL?
	munivu inRi muyal poruTku iRatti n'I enak kETpin,
	paniya kaN paTal ollA paTar kUrkiRpALmannO
	n'ani koNTa cAyalAL n'ayan'tu n'I n'akaiyAkat
15	tuni ceytu n'ITinum, tuRappu ajcik kaluzpavaL?
	poruL n'Okkip pirin'tu n'I pOkuti enak kETpin,
	maruL n'Okkam maTin'tu AgkE mayal kUrkiRpALmannO
	iruL n'Okkam iTaiyinRi, Irattin iyanRa n'in
	aruL n'Okkam aziyinum, avalam koNTu azipavaL?
20	ena Agku
	vinai veHki n'I celin, viTum ivaL uyir ena,
	punaiyizAy! n'in n'ilai yAn kURa, paiyena,
	n'ilavu vEl n'eTun' takai n'IL iTaic
	celavu ozin'tananAl; ceRika, n'in vaLaiyE!

12.tOzi kURRu

	iTu muL n'eTu vEli pOla, kolaivar
	koTumaram tEyttAr patukkai n'iraitta
	kaTu n'avai Ar ARRu, aRucunai muRRi,
	uTagku n'Ir vETTa uTampu uyagku yAnai
5	kaTun' tAm patipu, Agkuk kai teRappaTTu,
	veRi n'irai vERAkac cArccAral OTi,
	n'eRi mayakkuRRa n'irampA n'ITu attam
	ciRu n'ani n'I tujci ERpinum, ajcum
	n'aRun'utal n'Ittup poruLvayiR celvOy!
10	uranuTai uLLattai; cey poruL muRRiya
	vaLamaiyAn Akum poruL itu enpAy!
	iLamaiyum kAmamum n'in pANi n'illA
	iTai mulaik kOtai kuzaiya muyagkum
	muRai n'AL kazital uRAamaik kANTai
15	kaTai n'AL itu enRu aRin'tArum illai
	pORRAy peruma! n'I, kAmam pukarpaTa
	vERRumaik koNTu, poruLvayiR pOkuvAy!
	kURRamum mUppum maRan'tArOTu OrAagku
	mARRumaik koNTa vazi

13.tOzi kURRu

	ceru miku cina vEn'tan civan'tu iRutta pulam pOla,
	eri mEyn'ta kari vaRalvAy, pukavu kANAvAy,
	pori malarn'tanna poRiya maTa mAn,
	tiri maruppu ERoTu tEr aRaRku OTa,
5	maral cAya malai vempa, man'ti uyagka,
	ural pOl aTiya uTampu uyagku yAnai,
	URu n'Ir aTagkalin, uN kayam kANAtu,
	cERu cuvaittu, tam cel uyir tAgkum
	puyal tuLi mARiya, pOkku aru, vej curam
10	elvaLai! emmoTu n'I varin, yAza n'in
	mel iyal mE van'ta cIRaTi, tAmarai
	alli cEr Ay itaz arakkut tOyn'tavai pOla,
	kal uRin, av aTi kaRukkun'a allavO?
	n'alam peRum cuTarn'utAl! emmoTu n'I varin,
15	ilagku mAN avir tUvi anna men cEkkaiyuL
	tulagku mAn mEl Urtit tuyil ERpAy, maRRu ANTai
	vilagku mAn kural kETpin, veruvuvai allaiyO?
	kiLi purai kiLaviyAy! emmoTu n'I varin,
	taLi pozi taLir anna ezil mEni takai vATa,
20	muLi aril pottiya muzagku azal iTai pOzn'ta
	vaLi uRin, av ezil vATuvai allaiyO?
	ena Agku,
	anaiyavai kAtalar kURalin, vinaivayiR
	pirikuvar enap peritu aziyAti, tiripu uRIi;
25	kaTug kurai arumaiya kATu enin, allatu,
	koTugkuzAy! tuRakkun'ar allar
	n'aTugkutal kANmAr, n'akai kuRittanarE

14.tOzi kURRu

	aNai maruL in tuyil am paNait taTa men tOL,
	tuNai malar ezil n'Ilattu En'tu ezil malar uN kaN,
	maNa mauval mukai anna mA vIz vAr n'irai veN pal,
	maNam n'ARu n'aRu n'utal, mAri vIz irug kUn'tal,
5	alar mulai Akattu, akanRa alkul,
	cila n'irai vAl vaLai, ceyyAyO! ena,
	pala pala kaTTurai paNTaiyin pArATTi,
	iniya colli, innAgkup peyarppatu,
	ini aRin'tEn, atu tuni AkutalE
10	poruL allAl poruLum uNTO? ena, yAza n'in
	maruLi koL maTa n'Okkam, mayakkappaTTu ayarttAyO?
	kAtalAr evan ceypa, poruL illAtArkku? ena,
	EtilAr kURum col poruLAka matittAyO?
	cemmaiyin ikan'tu orIip poruL ceyvArkku, ap poruL
15	immaiyum maRumaiyum pakaiyAvatu aRiyAyO?
	atanAl,
	emmaiyum poruLAka matittIttai; n'ammuL n'Am
	kavavuk kai viTap peRum poruT tiRattu
	avavuk kaiviTutam; atu manum poruLE

15.tOzi kURRu

	ari mAn iTittanna, am cilai val vil
	puri n'AN, puTaiyin, puRam kANTal allAl
	iNaip paTait tAnai aracOTu uRinum
	kaNait toTai n'ANum kaTun' tuTi Arppin,
5	eruttu valiya eRuz n'Okku iralai
	maruppin tirin'tu maRin'tu vIz tATi,
	urutta kaTuj cinattu, OTA maRavar,
	poruL koNTu puN ceyin allatai, anpOTu
	aruL puRam mARiya Ar iTai attam
10	puripu n'I puRam mARi, pOkku eNNi, putitu INTip
	perukiya celvattAn peyarttaral olvatO
	ceyalai am taLir Eykkum ezil n'alam; an' n'alam
	payalaiyAl uNappaTTup paNTai n'Ir ozin'takkAl?
	poy aRRa kELviyAl, puraiyOraip paTarn'tu, n'I
15	mai aRRa paTivattAn maRuttaral olvatO
	tIm katir mati Eykkum tirumukam; am mukam,
	pAmpu cEr mati pOla, pacappu Urn'tu tolain'takkAl?
	pinniya toTar n'Ivi, piRar n'ATTup paTarn'tu, n'I
	manniya puNarcciyAn maRuttaral olvatO
20	puri aviz n'aRu n'Ilam purai uN kaN kaluzpu AnA,
	tiri umiz n'eyyE pOl, teN pani uRaikkugkAl?
	ena Agku,
	anaiyavai pORRi, n'inaiiyana n'ATik kAN;
	vaLamaiyO vaikalum ceyalAkum; maRRu ivaL
25	muLai n'irai muRuvalAr AyattuL eTuttu Ayn'ta
	iLamaiyum taruvatO, iRan'ta pinnE?

16.tOzi kURRu

	pATu inRip pacan'ta kaN paitala pani malka,
	vATupu vanappu OTi vaNagku iRai vaLai Ura,
	ATu ezil azivu ajcAtu, akanRavartiRattu, ini
	n'ATugkAl, n'inaippatu onRu uTaiyEnman? atuvumtAn
5	tol n'alam tolaipu, Igku, yAm tuyar uzappat tuRan'tu, uLLAr,
	tunni, n'am kAtalar, tuRan'tu Ekum Ar iTai,
	'kalmicai uruppu aRak kanai tuLi citaRu!' ena,
	in icai eziliyai irappavum iyaivatO?
	punaiyizAy! Igku n'Am pulampuRa, poruL veHki,
10	munai ennAr kAtalar munniya Ar iTai,
	cinai vATac ciRakkum n'in cinam taNin'tIka! ena,
	kanai katirk kanaliyaik kAmuRal iyaivatO?
	oLiyizAy! Igku n'Am tuyar kUra, poruLvayin,
	aLi orIik kAtalar akanRu Ekum Ar iTai,
15	muLi mutal mUzkiya vemmai tIrn'tu uRuka! ena,
	vaLi tarum celvanai vAzttavum iyaivatO?
	ena Agku,
	cey poruT ciRappu eNNic celvArmATTu, inaiyana
	teyvattut tiRan n'Okki, terumaral tEmozi!
20	vaRan OTin vaiyakattu vAn tarum kaRpinAL
	n'iRan OTip pacappu Urtal uNTu ena,
	aRan OTi vilagkinRu, avar ALvinait tiRattE

17.tOzi kURRu

	paTai paNNip punaiyavum, pA mANTa pala aNai
	puTai peyarn'tu oTugkavum, puRam cEra uyirppavum,
	uTaiyatai evan kol? enRu URu aLan'tavarvayin
	n'aTai cellAy, n'ani Egki n'aTugkaRkAN n'aRun'utAl!
5	tol ezil tolaipu ivaL tuyar uzappa, tuRan'tu n'I,
	val vinai vayakkutal valittiman; valippaLavai,
	n'IL katir avir mati n'iRaivu pOl n'ilaiyAtu,
	n'ALinum n'ekizpu OTum n'alan uTan n'ilaiyumO?
	ARRal n'Oy aTa, ivaL aNi vATa, akanRu n'I,
10	tORRam cAl toku poruL muyaRiman; muyalvaLavai,
	n'ARRam cAl n'aLi poykai aTai mutir mukaiyiRkuk
	kURRu Uz pOl kuRaipaTUum vAzn'ALum n'ilaiyumO?
	vakai ezil vanappu ejca, varai pOka valittu n'I,
	pakai aRu paya vinai muyaRiman; muyalvaLavai,
15	takai vaNTu putitu uNNat tAtu aviz taN pOtin
	mukai vAytta taTam pOlum iLamaiyum n'ilaiyumO?
	ena Agku,
	porun'ti yAn tAn vETTa poruLvayin n'inain'ta col,
	tirun'tiya yAkkaiyuL maruttuvan UTTiya
20	marun'tu pOl, marun'tu Aki, manan uvappa
	perum peyar mILi peyarn'tanan celavE

18.tOzi kURRu

	arum poruL vETkaiyin uLLam turappa,
	pirin'tu uRai cUzAti aiya! virumpi n'I,
	en tOL ezutiya toyyilum, yAza n'in
	main'tuTai mArpil cuNagkum, n'inaittuk kAN:
5	cenROr mukappap poruLum kiTavAtu;
	ozin'tavar ellArum uNNAtum cellAr;
	iLamaiyum kAmamum OrAgkup peRRAr
	vaLamai vizaitakkatu uNTO? uLa n'AL,
	orOo kai tammuL tazIi, orOo kai
10	onRan kURu ATai uTuppavarEAyinum,
	onRinAr vAzkkaiyE vAzkkai; arituarO,
	cenRa iLamai taraRku!

19.tOzi kURRu

	cevviya tIviya colli, avaRRoTu
	paiya muyagkiya ajjAnRu, avai ellAm
	poyyAtal yAn yAgku aRikO maRRu? aiya!
	akal n'akar koLLA alar talait tan'tu,
5	pakal muni vej curam uLLal aRin'tEn;
	makan allai manRa, ini
	cel; inic cenRu n'I ceyyum vinai muRRi,
	anpu aRa mARi, 'yAm uLLat tuRan'tavaL
	paNpum aRitirO?' enRu, varuvArai
10	en tiRam yAtum vinaval; vinavin,
	pakalin viLagku n'in cemmal citaiya,
	taval aruj cey vinai muRRAmal, ANTu Or
	avalam paTutalum uNTu

21.tOzi kURRu

	pAl maruL maruppin, ural purai pAvu aTi,
	Ir n'aRug kamaz kaTAattu, inam piri oruttal
	ARu kaTi koLLum vERu pulam paTarn'tu,
	poruLvayiR pirital vENTum ennum
5	aruL il collum, n'I collinaiyE;
	n'annar n'aRu n'utal n'ayan'tanai n'Ivi,
	n'innin piriyalan, ajcal Ompu ennum
	n'annar moziyum n'I mozin'tanaiyE:
	avaRRuL yAvO vAyina? mAal makanE!
10	kizavar innOr ennAtu, poruLtAn,
	paza vinai marugkin peyarpu peyarpu uRaiyum;
	anna poruLvayiR pirivOy n'in inRu
	imaippuvarai vAzAL maTavOL
	amaik kavin koNTa tOL iNai maRan'tE

22.tOzi kURRu

	uN kaTan vazimozin'tu irakkugkAl mukanum, tAm
	koNTatu koTukkugkAl mukanum, vERAkutal
	paNTum iv ulakattu iyaRkai; aHtu inRum
	putuvatu anRE pulanuTai mAn'tir!
5	tAy uyir peyta pAvai pOla,
	n'alan uTaiyAr mozikkaN tAvAr; tAm tam n'alam
	tAtu tEr paRavaiyin arun'tu, iRal koTukkugkAl,
	EtilAr kURuvatu evanO, n'in poruL vETkai?
	n'aRu mullai n'Er mukai oppa n'iraitta
10	ceRi muRai pArATTinAy; maRRu, em pallin
	paRi muRai pArATTinaiyO? aiya!
	n'ey iTai n'Ivi maNi oLi viTTanna
	aivakai pArATTinAy; maRRu, em kUn'tal
	ceyvinai pArATTinaiyO? aiya!
15	kuLan aNi tAmaraip pAcarumpu Eykkum
	iLa mulai pArATTinAy; maRRu, em mArpil
	taLar mulai pArATTinaiyO? aiya!
	ena Agku,
	aTar pon avir Eykkum av vari vATa,
20	cuTar kAy curam pOkum n'ummai yAm egkaN
	paTar kURa n'inRatum uNTO? toTar kUra,
	tuvvAmai van'takkaTai?

25.tOzi kURRu

	vayakkuRu maNTilam vaTamozip peyar peRRa
	mukattavan makkaLuL mutiyavan puNarppinAl,
	aivar enRu ulaku Ettum aracarkaL akattarA,
	kai punai arakku illaik kataz eri cUzn'tAgku,
5	kaLi tikaz kaTAatta kaTug kaLiRu akattavA,
	muLi kazai uyar malai muRRiya muzagku azal,
	oL uru arakku illai vaLimakan uTaittut tan
	uLLattuk kiLaikaLOTu uyap pOkuvAn pOla,
	ezu uRaz taTak kaiyin inam kAkkum ezil vEzam,
10	azuvam cUz, pukai azal atarpaTa mitittut tam
	kuzuvoTu puNarn'tu pOm, kunRu azal vej curam
	iRattirAl, aiya! maRRu ivaL n'ilaimai kETTImin:
	maNakkugkAl malar anna takaiyavAy, ciRitu n'Ir
	taNakkugkAl, kaluzpu AnAk kaN enavum uLa anRO
15	ciRappuc ceytu uzaiyarAp pukazpu Etti, maRRu avar
	puRakkoTaiyE pazi tURRum pulliyAr toTarpu pOl?
	Igku n'Ir aLikkugkAl iRai ciRan'tu, oru n'AL n'Ir
	n'IgkugkAl, n'ekizpu OTum vaLai enavum uLa anRO
	celvattuL cErn'tavar vaLan uNTu, maRRu avar
20	olkattu n'alkilA uNarvilAr toTarpu pOl?
	oru n'AL n'Ir aLikkugkAl oLi ciRan'tu, oru n'AL n'Ir
	pArATTAkkAl, pacakkum n'utal enavum uLa anRO
	porun'tiya kENmaiyin maRai uNarn'tu, am maRai
	pirin'takkAl piRarkku uraikkum pITilAr toTarpu pOl?
25	ena Agku,
	yAm n'iR kURuvatu evan uNTu? emminum
	n'I n'aRku aRin'tanai; n'eTun' takai! vAnam
	tuLi mARu pozutin, iv ulakam pOlum n'in
	aLi mARu pozutin, iv Ayizai kavinE

26.tOzi kURRu

	oru kuzai oruvan pOl, iNar cErn'ta marAamum,
	paruti am celvan pOl, n'anai Uztta cerun'tiyum,
	mIn ERRuk koTiyOn pOl, mijiRu Arkkum kAjciyum,
	EnOn pOl, n'iRam kiLarpu kajaliya jAzalum,
5	An ERRuk koTiyOn pOl, etiriya ilavamum, Agku,
	tItu tIr ciRappin aivarkaL n'ilai pOla,
	pOtu aviz marattoTu porukarai kavin peRa,
	n'O taka van'tanRAl, iLavEnil mE taka
	pal vari ina vaNTu putitu uNNum paruvattu,
10	tol kavin tolain'ta en taTa men tOL uLLuvAr
	olkupu n'izal cErn'tArkku ulaiyAtu kAttu Ompi,
	vel pukaz ulaku Etta, virun'tu n'ATTu uRaipavar
	ticai ticai tEn Arkkum tirumarutamuntuRai,
	vacai tIrn'ta en n'alam vATuvatu aruLuvAr
15	n'acai koNTu tam n'Izal cErn'tArait tAgki, tam
	icai paran'tu, ulaku Etta, Etil n'ATTu uRaipavar
	aRal cAay pozutOTu, em aNi n'utal vERAki,
	tiRal cAnRa peru vanappu izappatai aruLuvAr
	URu ajci n'izal cErn'tArkku ulaiyAtu kAttu Ompi,
20	ARu inRip poruL veHki, akanRa n'ATTu uRaipavar
	ena, n'I
	terumaral vAzi, tOzi! n'am kAtalar,
	poru muraN yAnaiyar pOr malain'tu ezun'tavar
	ceru mEmpaTTa venRiyar;
25	varum ena van'tanRu, avar vAymozit tUtE

27.tOzi kURRu

	Italil kuRai kATTAtu, aRan aRin'tu ozukiya
	tItilAn celvam pOl, tIm karai maram n'an'ta;
	pEtuRu maTa mozi, piNai ezil mAn n'Okkin;
	mAtarAr muRuval pOl, maNa mauval mukai Uzppa;
5	kAtalarp puNarn'tavar katuppup pOl, kazalkupu
	tAtoTum taLiroTum, taN aRal takai peRa;
	pEtaiyOn vinai vAgka, pITu ilA aracan n'ATTu,
	EtilAn paTai pOla, iRuttan'tatu, iLavEnil
	n'ilam pUtta maramicai n'imirpu Alum kuyil eLLa,
10	n'alam pUtta n'iRam cAya, n'ammaiyO maRan'taikka;
	kalam pUtta aNiyavar kArikai makiz ceyya,
	pulam pUttu, pukazpu AnAk kUTalum uLLArkol?
	kalmicai mayil Ala, kaRagki Ur alar tURRa,
	tol n'alam n'ani cAya, n'ammaiyO maRan'taikka;
15	onnAtArk kaTan'tu aTUum, uravu n'Ir mA konRa,
	ven vElAn kunRinmEl viLaiyATTum virumpArkol?
	mai ezil malar uNkaN maru UTTi makiz koLLa,
	poyyinAl purivuNTa n'ammaiyO maRan'taikka;
	taiiya makaLir tam AyamOTu amarn'tu ATum
20	vaiyai vAr uyar ekkar n'ukarcciyum uLLArkol?
	ena Agku,
	n'Oy mali n'ejcamOTu inaiyal, tOzi!
	n'Am illAp pulampAyin, n'aTukkam cey pozutAyin,
	kAmavEL vizavAyin, kalagkuvaL peritu ena,
25	EmuRu kaTun' tiN tEr kaTavi,
	n'Am amar kAtalar tuNai tan'tAr, virain'tE

28.tOzi kURRu

	pATal cAl ciRappin cinaiyavum, cunaiyavum
	n'ATinar koyal vENTA, n'ayan'tu tAm koTuppa pOl,
	tOTu aviz kamaz kaNNi taiyupu punaivArkaN
	tOTuRat tAzn'tu, tuRai tuRai kavin peRa,
5	ceyyavaL aNi akalattu AramoTu aNi koLpu,
	toyyakam tAzn'ta katuppup pOl tuvar maNal
	vaiyai vAr avir aRal, iTai pOzum pozutinAn
	virin'tu AnA malarAyin, viLittu Alum kuyilAyin,
	pirin'tu uLLAr avarAyin, pEtuRUum pozutAyin,
10	arum paTar avala n'Oy ARRuvaL ennAtu
	varun'ta, n'Oy mikumAyin vaNagkiRai! aLi ennO?
	putalavai malarAyin, pogkarina vaNTAyin,
	ayalatai alarAyin, akanRu uLLAr avarAyin,
	matalai il n'ejcoTu matanilaL ennAtu
15	n'utal Urum pacappAyin n'uNagkiRai! aLi ennO?
	tOyina aRalAyin, curumpu Arkkum cinaiyAyin,
	mAvina taLirAyin, maRan'tu uLLAr avarAyin,
	pU ezil izan'ta kaN pulampu koNTu amaiyAtu
	pAyal n'Oy mikumAyin pain'toTi! aLi ennO?'
20	ena Agku,
	AyizAy! Agkanam uraiyAti; cEyArkku
	n'Am tUtu mozin'tanam viTal vENTA; n'amminum
	tAm pirin'tu uRaital ARRalar,
	parin'tu evan ceyti varukuvar virain'tE?

29.tOzi kURRu

	tol ezil varaittu anRi vayavu n'Oy n'alitalin,
	allAn'tAr alavuRa InRavaL kiTakkai pOl,
	pal payam utaviya pacumai tIr akal jAlam
	pulliya puniRu orIip putu n'alam Ertara;
5	vaLaiyavar vaNTal pOl, vAr maNal vaTuk koLa;
	iLaiyavar aimpAl pOl, ekkar pOzn'tu aRal vAra;
	mA InRa taLirmicai, mAyavaL titalai pOl,
	Ay itazp pal malar aiya kogku uRaittara;
	mE taka iLavEnil iRuttan'ta pozutinkaN
10	cEyArkaN cenRa en n'ejcinai cinmozi!
	n'I kURum varaittu anRi, n'iRuppenman? n'iRai n'Ivi,
	vAy viripu pani ERRa viravup pal malar tINTi,
	n'Oy cErn'ta vaikalAn, vATai van'tu alaittarUum
	pOztu uLLAr tuRan'tArkaN puri vATum koLkaiyaic
15	cUzpu AgkE cuTarizAy! karappenman? kain'Ivi
	vIz katir viTutta pU virun'tu uNNum irun' tumpi
	yAz koNTa imiz icai iyal mAlai alaittarUum
	toTi n'ilai n'ekizttArkaN tOyum en Ar uyir
	vaTu n'Igku kiLaviyAy! valippenman? valippavum,
20	n'eTu n'ilA, tiRan'tu uNNa, n'irai itaz vAy viTTa
	kaTi malar kamaz n'ARRam, kagkul van'tu, alaittarUum
	ena Agku,
	varun'tinai vatin'ta n'in vaLai n'Igka, cEy n'ATTup
	pirin'tu cey poruT piNi pin n'OkkAtu Eki, n'am
25	arun' tuyar kaLaijar van'tanar
	tirun'tu eyiRu ilagku n'in tE mozi paTarn'tE

31.tOzi kURRu

	kaTum punal kAl paTTuk kaluz tERik kavin peRa,
	n'eTug kayattu ayal ayal ayir tOnRa, am maNal
	vaTuttu Ura varippa pOl Igkai vATu utirpu uka,
	pirin'tavar n'utal pOlap pIr vIya, kAtalarp
5	puNarn'tavar mukam pOlap poykai pUp putitu Ina,
	mey kUrn'ta paniyoTu mEl n'inRa vATaiyAl,
	kaiyARu kaTaikkUTTak kalakkuRUum pozutuman
	"poyyEm" enRu, AyizAy! puNarn'tavar uraittatai
	mayagku amar mARu aTTu, maN vauvi varupavar,
10	tayagkiya kaLiRRinmEl, takai kANa viTuvatO
	payag kezu pal katir pAl pOlum pozutoTu,
	vayagku izai taNNena, van'ta iv acai vATai?
	tAL valampaTa venRu, takai n'an mA mElkoNTu,
	vAL venRu varupavar vanappu Ara viTuvatO
15	n'IL kazai n'ivan'ta pU n'iRam vATat tURRupu,
	tOL atirpu akam cEra, tuvaRRum ic cil mazai?
	pakai venRu tiRai koNTa pAy tiN tEr micaiyavar
	vakai koNTa cemmal n'Am vanappu Ara viTuvatO
	pukai enap putal cUzn'tu, pU am kaL poti ceyyA
20	mukai veN pal n'uti pora, muRRiya kaTum pani?'
	ena Agku,
	vALAti, vayagkizAy! varun'tuvaL ivaL ena,
	n'AL varai n'iRuttut tAm colliya poy anRi,
	mILi vEl tAnaiyar pukutan'tAr
25	n'IL uyar kUTal n'eTug koTi ezavE

32.tOzi kURRu

	eHku iTai toTTa, kArk kavin peRRa aimpAl pOl
	mai aRa viLagkiya, tuvar maNal atu; atu
	aitAka n'eRittanna aRal avir n'IL aimpAl
	aNi n'akai iTaiyiTTa Ikai am kaNNi pOl,
5	piNi n'ekiz alar vEgkai virin'ta pU veRi koLa
	tuNi n'IrAl, tU mati n'ALAl, aNi peRa
	InRavaL titalai pOl Ir peyyum taLiroTum,
	AnRavar aTakkam pOl alarc cellAc cinaiyoTum,
	vallavar yAz pOla vaNTu Arkkum putaloTum,
10	n'allavar n'uTakkam pOl n'ayam van'ta kompoTum,
	uNarn'tavar Ikai pOl iNar Uztta marattoTum,
	puNarn'tavar muyakkam pOl purivuRRa koTiyoTum
	n'ayan'tArkkO n'allaiman, iLavEnil! em pOla?
	pacan'tavar paital n'Oy pakai enat taNittu, n'am
15	in uyir ceyyum marun'tAki, pinniya
	kAtalar eyiRu Eykkum taN aruvi n'aRu mullaip
	pOtu Arak koLLum kamaz kuraRku ennum
	tUtu van'tanRE tOzi!
	tuyar aRu kiLaviyOTu: ayarn'tIkam virun'tE

33.tOzi kURRu

	vIRu cAl jAlattu viyal aNi kANiya
	yARu kaN vizitta pOl, kayam n'an'tik kavin peRa,
	maNi purai vayagkaluL tuppu eRin'tavai pOla,
	piNi viTu murukku itaz aNi kayattu utirn'tu uka,
5	tuNi kaya n'izal n'Okkit tutaipu uTan vaNTu Arppa,
	maNi pOla arumpu Uzttu maram ellAm malar vEya,
	kAtalarp puNarn'tavar kavavuk kai n'ekizAtu,
	tAtu aviz vEnilO van'tanRu; vArAr, n'am
	pOtu ezil uNkaN pulampa n'Ittavar!
10	eri uru uRaza ilavam malara,
	pori uru uRazap punku pU utira,
	putu malark kOgkam pon enat tAtu Uzppa,
	tamiyArp puRattu eRin'tu eLLi, muniya van'tu,
	Arppatu pOlum pozutu; en aNi n'alam
15	pOrppatu pOlum pacappu
	n'on'tu n'akuvana pOl n'an'tina, kompu; n'ain'tu uLLi
	ukuvatu pOlum, en n'ejcu; eLLi,
	tokupu uTan ATuva pOlum, mayil; kaiyil
	ukuvana pOlum, vaLai; en kaN pOl
20	ikupu aRal vArum paruvattum vArAr;
	mikuvatu pOlum, in' n'Oy
	n'arampin tIm kural n'iRukkum kuzal pOl
	iragku icai mijiRoTu tumpi tAtu Uta
	tUtu avar viTutarAr tuRappArkol? n'Otaka,
25	irug kuyil Alum arO.
	ena Agku,
	purin'tu n'I eLLum kuyilaiyum, avaraiyum, pulavAti
	n'Il itaz uNkaNAy! n'eRi kUn'tal piNi viTa,
	n'AL varai n'iRuttut tAm colliya poy anRi,
30	mAlai tAz viyan mArpar tunaitan'tAr
	kAl uRaz kaTun' tiN tEr kaTavinar virain'tE

34.tOzi kURRu

	man uyir EmuRa, malar jAlam puravu InRu,
	pal n'IrAl pAy punal paran'tu UTTi, iRan'ta pin,
	cil n'IrAl aRal vAra, akal yARu kavin peRa,
	mun onRu tamakku ARRi muyanRavar iRutikkaN
5	pin onRu peyarttu ARRum pITuTaiyALar pOl,
	pal malar cinai uka, curumpu imirn'tu vaNTu Arppa,
	in amar iLavEnil iRuttan'ta pozutinAn
	viri kAjcit tAtu ATi irug kuyil viLippavum,
	pirivu ajcAtavar tImai maRaippenman; maRaippavum,
10	kari poyttAn kIz irun'ta maram pOlak kavin vATi,
	eri potti, en n'ejcam cuTum Ayin, evan ceykO?
	poRai taLar kompinmEl citarinam iRai koLa,
	n'iRai taLarAtavar tImai maRaippenman; maRaippavum,
	muRai taLarn'ta mannavan kIzk kuTi pOlak kalagkupu,
15	poRai taLarpu pani vArum kaN Ayin, evan ceykO?
	taLai aviz pUj cinaic curumpu yAz pOla icaippavum,
	koLai taLarAtavar tImai maRaippenman; maRaippavum,
	kiLai aziya vAzpavan Akkam pOl pullenRu,
	vaLai AnA n'ekizpu OTum tOL Ayin, evan ceykO?
20	ena Agku,
	n'innuL n'Oy n'I uraittu alamaral; ellA! n'Am
	eNNiya n'ALvarai iRavAtu, kAtalar
	paNNiya mAvinar pukutan'tAr
	kaN uRu pUcal kai kaLain'tAgkE

35.tOzi kURRu

	maTiyilAn celvam pOl maran n'an'ta, ac celvam
	paTi uNpAr n'ukarcci pOl pal cinai mijiRu Arppa;
	mAyavaL mEni pOl taLir Ina, am mEnit
	tAya cuNagku pOl taLirmicait tAtu uka;
5	malar tAya pozil n'aNNi maNi n'Ira kayam n'iRpa,
	alar tAya tuRai n'aNNi ayir varittu aRal vAra;
	n'ani eLLum kuyil n'Okki inaipu uku n'ejcattAl,
	tuRan'tu uLLAr avar enat tuni koLLal ellA! n'I
	vaNNa vaNTu imirn'tu, AnA vaiyai vAr uyar ekkar,
10	taN aruvi n'aRu mullait tAtu uNNum pozutanRO
	kaN n'ilA n'Ir malkak kavavi, n'Am viTuttakkAl,
	oNNutAl! n'amakku avar "varutum" enRu uraittatai?
	malkiya turuttiyuL makiz tuNaip puNarn'tu, avar,
	villavan vizavinuL viLaiyATum pozutanRO
15	"valan Aka, vinai!" enRu vaNagki, n'Am viTuttakkAl,
	oLiyizAy! n'amakku avar "varutum" enRu uraittatai?
	n'ilan n'Avil tiritarUum n'IL mATak kUTalAr
	pulan n'Avil piRan'ta col putitu uNNum pozutu anRO
	pala n'ATu n'ejcinEm parin'tu, n'Am viTuttakkAl,
20	cuTarizAy! n'amakku avar "varutum" enRu uraittatai?
	ena Agku,
	uLLutoRu uTaiyum n'in uyavu n'Oykku uyirppAki,
	eL aRu kAtalar iyaitan'tAr puL iyal
	kAmar kaTun' tiN tErp poruppan
25	vAymai anna vaikaloTu puNarn'tE

36.tOzi kURRu

	koTu miTal n'AjcilAn tAr pOl, marAttu
	n'eTumicaic cUzum mayil Alum cIra,
	vaTi n'arampu icaippa pOl vaNToTu curumpu Arppa,
	toTi makaL muraRci pOl tumpi van'tu imirtara,
5	iyan ezIiyavai pOla, ev vAyum immena,
	kayan aNi potumparuL kaTi malart tEn Uta,
	malar Ayn'tu vayin vayin viLippa pOl maran Uzppa,
	irug kuyil Ala, perun' tuRai kavin peRa,
	kuzavi vEnil vizavu etirkoLLum
10	cIrAr cevviyum, van'tanRu;
	vArAr, tOzi! n'am kAtalOrE
	pAayp pAayp pacan'tanRu, n'utal;
	cAayc cAay n'ekizn'tana, tOL
	n'ani aRal vArum pozutu ena, veyya
15	pani aRal vArum, en kaN
	malaiyiTaip pOyinar varal n'acaii, n'OyoTu
	mulaiyiTaik kanalum, en n'ejcu
	kAtalin pirin'tArkollO? vaRitu, Or
	tUtoTu maRan'tArkollO? n'Otaka,
20	kAtalar kAtalum kANpAmkollO?
	tuRan'tavar ANTu ANTu uRaikuvarkollO? yAvatu?'
	"n'IL iTaip paTutalum ollum; yAza n'in,
	vAL iTaippaTutta vayagku Ir Oti!
	n'AL aNi citaittalum uNTu" ena n'aya van'tu,
25	kELvi an'taNar kaTavum
	vELvi Aviyin uyirkkum, en n'ejcE

37.tOzi kURRu

	kaya malar uNkaNNAy! kANAy: oruvan
	vaya mAn aTit tErvAn pOla, toTai mANTa
	kaNNiyan villan, varum; ennai n'Okkupu,
	munnattin kATTutal allatu, tAn uRRa
5	n'Oy uraikkallAn peyarumman, pal n'ALum;
	pAyal peREen, paTar kUrn'tu, avanvayin
	cEyEnman yAnum tuyar uzappEn; AyiTaik
	kaN n'inRu kURutal ARRAn, avanAyin;
	peN anRu, uraittal, n'amakkAyin; innatUum
10	kANAn kazitalum uNTu' enRu, oru n'AL, en
	tOL n'ekizpu uRRa tuyarAl tuNitan'tu, Or
	n'AN inmai ceytEn: n'aRun'utAl! Enal
	inak kiLi yAm kaTin'tu Ompum punattu ayal,
	Ucal Urn'tu ATa, oru jAnRu van'tAnai,
15	aiya! ciRitu ennai Ukki enak kURa,
	taiyAl! n'anRu! enRu avan Ukka, kai n'ekizpu
	poyyAka vIzn'tEn, avan mArpin; vAyAc cettu,
	oyyena AgkE eTuttanan koNTAn; mEl
	mey aRiyAtEn pOl kiTan'tEnman; AyiTai
20	mey aRin'tu ERRu ezuvEnAyin, maRRu oyyena,
	oNkuzAy! celka enak kURi viTum paNpin
	agkaN uTaiyan avan

38.tOzi kURRu

	imaiya vil vAgkiya Irj caTai an'taNan
	umai amarn'tu uyarmalai irun'tananAka,
	ai iru talaiyin arakkar kOmAn
	toTip poli taTak kaiyin kIz pukuttu, am malai
5	eTukkalcellAtu uzappavan pOla
	uRu puli uru Eyppap pUtta vEgkaiyaik
	kaRuvu koNTu, atan mutal kuttiya mata yAnai
	n'ITu iru viTar akam cilampak kUy, tan
	kOTu puykkallAtu, uzakkum n'ATa! kEL:
10	Ar iTai ennAy n'I aravu ajcAy van'takkAl,
	n'Ir aRRa pulamE pOl pullenRAL, vaikaRai,
	kAr peRRa pulamE pOl, kavin peRum; ak kavin
	tIrAmal kAppatu Or tiRan uNTEl, uraittaikkAN
	iruL iTai ennAy n'I iravu ajcAy van'takkAl,
15	poruLillAn iLamai pOl pullenRAL, vaikaRai,
	aruL vallAn Akkam pOl aNi peRum; av aNi
	teruLAmal kAppatu Or tiRan uNTEl, uraittaikkAN
	maRam tirun'tAr ennAy n'I malaiyiTai van'takkAl,
	aRam cArAn mUppE pOl azitakkAL, vaikaRai,
20	tiRam cErn'tAn Akkam pOl tiruttakum; at tirup
	puRagkURRut tIrppatu Or poruL uNTEl, uraittaikkAN
	ena Agku,
	n'in uRu vizumam kURak kETTu,
	varumE, tOzi! n'al malai n'ATan
25	vEgkai virivu iTam n'Okki,
	vIgku iRaip paNait tOL varain'tanan koLaRkE

39.tOzi kURRu

	tOzi tAn aRattoTu n'inRamai talaivikkuk kURi, tAgkaL
	ATum kuravaiyuL koNTun'ilai pATa, avaLai vENTutal
	kAmar kaTum punal kalan'tu emmOTu ATuvAL,
	tAmaraikkaN putaittu, ajcit taLarn'tu, atanOTu ozukalAn,
	n'IL n'Aka n'aRun' taN tAr tayagkap pAyn'tu, aruLinAl,
5	pUN Akam uRat tazIip pOttan'tAn akan akalam
	varu mulai puNarn'tana enpatanAl, en tOzi
	aru mazai taral vENTin tarukiRkum perumaiyaLE
	avanumtAn, Enal itaNattu akiR pukai uNTu iyagkum
	vAn Ur matiyam varai cErin, av varai,
10	"tEnin iRAl" ena, ENi izaittirukkum
	kAn akal n'ATan makan
	ciRukuTiyIrE! ciRukuTiyIrE!
	vaLLi kIz vIzA; varaimicait tEn toTA;
	kollai kural vAgki InA malai vAzn'ar
15	alla purin'tu ozukalAn
	kAn'taL kaTi kamazum, kaN vAgku, iruj cilampin
	vAgku amai men tOT kuRavar maTa makaLir
	tAm pizaiyAr, kELvart tozutu ezalAl, tam aiyarum
	tAm pizaiyAr tAm toTutta kOl'
20	ena Agku,
	aRattoTu n'inREnaik kaNTu, tiRappaTa
	ennaiyarkku uyttu uraittAL, yAy
	avarum teri kaNai n'Okki, cilai n'Okki, kaN cEn'tu,
	oru pakal ellAm uruttu ezun'tu, ARi,
25	iruvarkaN kuRRamum illaiyAl enRu,
	teruman'tu cAyttAr talai
	teriyizAy! n'Iyum n'in kELum puNara,
	varai uRai teyvam uvappa, uvan'tu
	kuravai tazIi yAm ATa, kuravaiyuL
30	koNTun'ilai pATikkAN
	talaiviyin maRumozi
	n'allAy!
	n'al n'AL talaivarum ellai, n'amar malait
	tam n'AN tAm tAgkuvAr, en n'ORRanarkol?
	puna vEgkait tAtu uRaikkum pon aRai munRil,
35	n'anavil puNarcci n'aTakkumAm anRO?
	n'anavil puNarcci n'aTakkalum, AgkE
	kanavil puNarcci kaTitumAm anRO?
	tOzi kURRu
	viN tOy kal n'ATanum n'Iyum vatuvaiyuL
	paNTu aRiyAtIr pOl paTarkiRpIrman kolO?
40	paNTu aRiyAtIr pOl paTarn'tIr pazag kENmai
	kaNTu aRiyAtEn pOl karakkiRpenman kolO?
	mai tavaz veRpan maNa aNi kANAmal
	kaiyAl putai peRUum kaNkaLum kaNkaLO?
	talaiviyin maRumozi
	ennai man n'in kaNNAl kANpenman, yAn
	mINTum tOzi uraittal
45	n'eytal itaz uNkaN n'in kaN Aka, en kaN mana!
	ena Agku,
	n'eRi aRi ceRi kuRi puri tiripu aRiyA aRivanai mun'tuRIi,
	takai miku tokai vakai aRiyum cAnRavar inamAka,
	vEy purai men tOT pacalaiyum, ampalum,
50	mAyap puNarcciyum, ellAm uTan n'Igka,
	cEy uyar veRpanum van'tanan;
	pU ezil uN kaNum polikamA, iniyE!

40.tOzi kURRu

	pATuvOm enRa tOziyai n'Okkit talaivi uTampaTTuk kURutal
	akavinam pATuvAm, tOzi! amar kaN
	n'akai mozi, n'allavar n'ANum n'ilai pOl,
	takai koNTa EnaluL tAz kural urIi,
	mukai vaLar cAn'tu ural, muttu Ar maruppin
5	vakai cAl ulakkai vayin vayin Occi,
	pakai il n'Oy ceytAn paya malai Etti,
	akavinam pATuvAm, n'Am
	tOziyin maRumozi
	Ay n'utal, aNi kUn'tal, am paNait taTa men tOL,
	tEn n'ARu katuppinAy! yAnum onRu Ettuku
10	vEy n'aral viTarakam n'I onRu pATittai
	talaivi iyaRpaTap pATAmaiyin tOzi pATutal
	koTicciyar kUppi varai tozu kai pOl,
	eTutta n'aRavin kulai alagkAn'taL
	toTutta tEn cOra, tayagkum tan uRRAr
	iTukkaN tavirppAn malai
15	kallAk kaTuvan kaNam mali cuRRattu,
	mel viral man'ti kuRai kURum cemmaRRE
	tol ezil tOyn'tAr tolaiyin, avarinum
	allaRpaTuvAn malai
	talaivi iyaRpazittup pATutal
	puri viri, putai tutai, pUt tatain'ta tAz cinait
20	taLir anna ezil mEni takai vATa, n'Oy ceytAn
	aru varai aTukkam n'Am azittu onRu pATuvAm
	viN tOy varai, pan'tu eRin'ta ayA vITa,
	taN tAz aruvi, aramakaLir, ATupavE
	peNTir n'alam vauvi, taN cAral tAtu uNNum
25	vaNTin tuRappAn malai
	tOzi iyaRpaTa mozital
	oTugkA ezil vEzam vIz piTikku uRRa
	kaTujcUl vayAviRku amarn'tu, n'eTuj cinait
	tIm kaN karumpin kazai vAgkum 'uRRArin
	n'Igkalam' enpAn malai
	talaivan varaivoTu pukun'tamaiyait tOzi talaivikku aRivittal
30	ena n'Am,
	tan malai pATa, n'ayavan'tu kETTu, aruLi,
	meym mali uvakaiyan pukutan'tAn puNarn'tu ArA
	men mulai Akam kavin peRa,
	cemmalai Akiya malaikizavOnE

41.tOzi kURRu

	vaLLaip pATTup pATa, talaiviyait tOzi azaittal
	pATukam, vA vAzi, tOzi! vayak kaLiRRuk
	kOTu ulakkaiyAka, n'al cEmpin ilai cuLakA,
	ATu kazai n'ellai aRai uraluL peytu, iruvAm
	pATukam, vA vAzi tOzi! n'al tOzi! pATuRRu
5	iTi umizpu iragkiya viravu peyal n'aTu n'AL,
	koTi viTupu iruLiya minnuc cey viLakkattu,
	piTiyoTu mEyum puncey yAnai
	aTi otugku iyakkam kETTa kAnavan
	n'eTu varai Acinip paNavai ERi,
10	kaTu vicaik kavaNaiyil kal kai viTutalin,
	iRu varai vEgkai oL vI citaRi,
	Acini men pazam aLin'tavai utirA,
	tEn cey iRAal tuLaipaTap pOki,
	n'aRu vaTi mAvin pain' tuNar uzakki,
15	kulaiyuTai vAzaik kozu maTal kiziyA,
	palavin pazattuL tagkum malai kezu veRpanaip
	pATukam, vA vAzi, tOzi! n'al tOzi! pATuRRu
	talaivi
	ilagkum aruvittu; ilagkum aruvittE;
	vAnin ilagkum aruvittE tAn uRRa
20	cUL pENAn poyttAn malai
	tOzi
	poyttaRku uriyanO? poyttaRku uriyanO?
	ajcal Ompu enRAraip poyttaRku uriyanO?
	kunRu akal n'al n'ATan vAymaiyil poy tOnRin,
	tigkaLuL tIt tOnRiyaRRu
	talaivi
25	iLa mazai ATum; iLa mazai ATum;
	iLa mazai vaikalum ATum en munkai
	vaLai n'ekiza vArAtOn kunRu
	tOzi
	vArAtu amaivAnO? vArAtu amaivAnO?
	vArAtu amaikuvAn allan malain'ATan
30	IrattuL innavai tOnRin, n'izaR kayattu
	n'IruL kuvaLai ven'taRRu
	talaivi
	maNi pOlat tOnRum; maNi pOlat tOnRum;
	maNNA maNi pOlat tOnRum en mEniyait
	tunnAn tuRan'tAn malai
	tOzi
35	tuRakkuvan allan; tuRakkuvan allan;
	toTar varai veRpan tuRakkuvan allan
	toTarpuL inaiyavai tOnRin, vicumpil
	cuTaruL iruL tOnRiyaRRu
	tan'tai varaivu uTampaTTamaiyait talaivikkut tOzi aRivittal
	ena Agku
40	n'anRu AkinRAl tOzi! n'am vaLLaiyuL
	onRi n'Am pATa, maRai n'inRu kETTu aruLi,
	men tOT kizavanum van'tanan; n'un'taiyum
	manRal vEgkaik kIz irun'tu,
	maNam n'ayan'tanan, am malaikizavORkE

43.tOzi kURRu

	tOzi vaLLaip pATTup pATat talaiviyai azaittal
	vEgkai tolaitta veRi poRi vAraNattu
	En'tu maruppin, ina vaNTu imirpu Utum
	cAn'ta marattin, iyanRa ulakkaiyAl,
	aivana veN n'el aRai uraluL peytu, iruvAm,
5	aiyanai EttuvAm pOla, aNipeRRa
	mai paTu cennip paya malai n'ATanai,
	taiyalAy! pATuvAm, n'Am
	tOziyin pATal
	takaiyavar kaic ceRitta tALpOla, kAn'taL
	mukaiyinmEl tumpi irukkum pakai enin,
10	kURRam varinum tolaiyAn, tan n'aTTArkkut
	tORRalai n'ANAtOn kunRu
	talaiviyaip pATumARu tOzi vENTutal
	veruLpu uTan n'Okki, viyal aRai yUkam,
	iruL tUgku iRu varai Urpu izipu ATum
	varuTaimAn kuzaviya vaLa malai n'ATanait
15	teruLa teriyizAy! n'I onRu pATittai
	talaivi
	n'uN poRi mAn cevi pOla, vetir muLaik
	kaN poti pALai kazanRu ukum paNpiRRE
	mARu koNTu ARRAr eninum, piRar kuRRam
	kURutal tERRAtOn kunRu
	tOzi
20	puNar n'ilai vaLakin kuLaku amarn'tu uNTa
	puNar maruppu ezil koNTa varai purai celavin
	vayagku ezil yAnaip paya malai n'ATanai
	maNam n'ARu katuppinAy! maRuttu onRu pATittai
	talaivi
	kaTug kaN uzuvai aTi pOla vAzaik
25	koTug kAy kulaitoRUum tUgkum iTumpaiyAl
	inmai uraittArkku atu n'iRaikkal ARRAkkAl,
	tan mey tuRappAn malai
	tOzi
	ena Agku
	kUTi avar tiRam pATa, en tOzikku
30	vATiya men tOLum vIgkina
	ATu amai veRpan aLittakkAl pOnRE

44.tOzi kURRu

	katir viri kanai cuTark kavin koNTa n'anaj cAral
	etiretir Ogkiya mAl varai aTukkattu,
	atir icai aruvi tan am cinai micai vIza,
	mutir iNar Uz koNTa muzavuttAL erivEgkai,
5	vari n'utal ezil vEzam pU n'Ir mEl coritara,
	puri n'ekiz tAmarai malar am kaN vIRu eyti
	tiru n'ayan'tu irun'tanna tEm kamaz viRal veRpa!
	tan evvam kUrinum, n'I ceyta aruL inmai
	ennaiyum maRaittAL, en tOzi atu kETTu,
10	n'innai yAn piRar munnarp pazi kURal tAn n'ANi,
	kUrum n'Oy ciRappavum n'I, ceyta aruL inmai
	cEriyum maRaittAL, en tOzi atu kETTAgku,
	Orum n'I n'ilaiyalai enak kURal tAn n'ANi
	n'Oy aTa varun'tiyum, n'I ceyta aruL inmai
15	Ayamum maRaittAL, en tOzi atu kETTu,
	mAya n'in paNpu inmai piRar kURal tAn n'ANi,
	ena Agku
	inaiyana tImai n'inaivanaL kAttAgku,
	anai arum paNpinAn, n'in tImai kAttavaL
20	arum tuyar Ar ajar tIrkkum
	marun'tu Akic celkam, peruma! n'Am virain'tE

45.tOzi kURRu

	viTiyal veg katir kAyum vEy amal akal aRai,
	kaTi cunai kaviniya kAn'taL am kulaiyinai,
	arum maNi avir utti aravu n'Ir uNal cettu,
	perum malai miLirppanna kARRuTaik kanai peyal
5	urumuk kaNNuRutalin, uyar kural oli OTi,
	n'aRu vIya n'anaj cAral cilampalin, katumena,
	ciRukuTi tuyil ezUum cEN uyar viRal veRpa!
	kAl pora n'uTagkala kaRagku icai aruvi n'in
	mAl varai mali cunai malar Eykkum enpatO
10	pul ArAp puNarcciyAl pulampiya en tOzi
	pal itaz malar uNkaN pacappa, n'I citaittatai?
	pukar mukak kaLiRoTu puli porutu uzakkum n'in
	akal malai aTukkatta amai Eykkum enpatO
	kaTai enak kaluzum n'Oy kaimmika, en tOzi
15	taTaiyina tiraNTa tOL takai vATa, citaittatai?
	cuTar uRa uRa n'INTa curumpu imir aTukkatta
	viTar varai eri vEgkai iNar Eykkum enpatO?
	yAmattum tuyilalaL alamarum en tOzi
	kAmaru n'al ezil kavin vATa, citaittatai?
20	ena Agku,
	tan tImai pala kURik kazaRalin, en tOzi
	maRaiyil tAn maruvuRa maNan'ta n'aTpu arukalAn,
	piRai purai n'utal! avarp pENi n'am
	uRai varain'tanar, avar uvakkum n'ALE

46.tOzi kURRu

	vIyakam pulampa, vETTam pOkiya
	mAal am ciRai maNi n'iRat tumpi,
	vAy izi kaTAtta vAl maruppu oruttalOTu
	Ay poRi uzuvai tAkkiya pozutin,
5	vEgkai am cinai ena viRaR puli muRRiyum,
	pUm poRi yAnaip pukar mukam kuRukiyum,
	vali miku vekuLiyAn vAL uRRa mannarai
	n'ayan n'ATi n'aTpu Akkum vinaivar pOl, maRitarum
	ayam izi aruviya aNi malai n'al n'ATa!
10	ERu iragku iruL iTai iravinil patam peRAan,
	mARinen enak kURi manam koLLum, tAn enpa
	kUTutal vETkaiyAn, kuRi pArttu, kural n'occip
	pATu Orkkum ceviyOTu paitalEn yAn Aka
	aruj celavu Ar iTai aruLi, van'tu aLi peRAan,
15	varun'tinen enap pala vAyviTUum, tAn enpa
	n'ilai uyar kaTavuTkuk kaTam pUNTu, tanmATTup
	pala cUzum manattOTu paitalEn yAn Aka
	kanai peyal n'aTu n'AL yAn kaN mARa, kuRi peRAan,
	punaiyizAy! en pazi n'inakku uraikkum, tAn enpa
20	tuLi n'acai vETkaiyAn micai pATum puLLin, tan
	aLi n'acaii ArvuRRa anpinEn yAn Aka
	ena Agku,
	kalan'ta n'Oy kaimmika, kaN paTA envayin
	pulan'tAyum n'I Ayin, poyyAnE velkuvai
25	ilagku tAz aruviyOTu aNi koNTa n'in malaic
	cilampu pOl, kURuva kURum,
	ilagku Er el vaLai, ivaLuTai n'OyE

47.tOzi kURRu

	onRu, irappAn pOl eLivan'tum collum; ulakam
	purappAn pOlvatu Or matukaiyum uTaiyan;
	vallArai vazipaTTu onRu aRin'tAn pOl,
	n'allArkaN tOnRum aTakkamum uTaiyan;
5	illOr punkaN Ikaiyin taNikka
	vallAn pOlvatu Or vanmaiyum uTaiyan;
	annAn oruvan tan ANtakai viTTu, ennaic
	collum col, kETTI cuTarizAy! pal mANum:
	n'in inRi amaiyalEn yAn ennum avan Ayin,
10	annAn col n'ampuNTal yArkkum igku arituAyin,
	en uRRa piRarkkum Agku uLakollO? n'aRun'utAl!
	aRiyAy n'I; varun'tuval yAn ennum avan Ayin,
	tamiyarE tuNikiRRal peNTirkkum arituAyin,
	aLiyarO, em pOla Igku ivan valaippaTTAr?
15	vAzalEn, yAn ennum n'I n'Ippin avan Ayin,
	Ezaiyar enap palar kURum col pazi Ayin,
	cUzug kAl, n'inaippatu onRu aRikalEn, varun'tuval;
	cUzugkAl, n'aRun'utAl! n'ammuLE cUzkuvam
	avanai,
20	n'AN aTa, peyarttal n'amakkum Agku ollAtu;
	"pENinar" enappaTutal peNmaiyum anRu; avan
	vauvinan muyagkum mAttiram vA enak
	kURuven pOlak kATTi,
	maRRu avan mEevazi mEvAy, n'ejcE!

48.tOzi kURRu

	Am izi aNi malai alar vEgkait takai pOla,
	tE mUcu, n'anai kavuL, ticai kAval koLaRku otta,
	vAy n'illA vali munpin, vaNTu Utu pukar mukap
	paTu mazai aTukkatta, mA vicumpu Ogkiya,
5	kaTi marat turuttiya, kamaz kaTAm tikaztarum
	perug kaLiRRinattoTu, vIgku eruttu eRuz munpin
	irum puli mayakkuRRa ikal malai n'al n'ATa!
	vIzpeyaR kagkulin viLi Ortta oTukkattAl,
	vAzum n'AL ciRan'tavaL varun'tu tOL tavaRu uNTO
10	tAz ceRi kaTug kAppin tAy munnar, n'in cAral
	Uz uRu kOTal pOl, el vaLai ukupavAl?
	inaiiruL itu ena Egki, n'in varal n'acaii,
	n'inai tuyar uzappavaL pATu il kaN pazi uNTO
	inaiyaL enRu eTuttu araRRum ayal munnar, n'in cunaik
15	kanai peyal n'Ilam pOl, kaN pani kaluzpavAl?
	pal n'ALum paTar, aTa pacalaiyAl uNappaTTAL,
	pon urai maNi anna, mAmaikkaN pazi uNTO
	in n'uraic cetumpu araRRum cevviyuL, n'in cOlai
	min uku taLir anna, melivu van'tu uraippatAl?
20	ena Agku
	pin Ital vENTum, n'I pirin'tOL n'aTpu ena n'Ivip
	pUg kaN paTutalum ajcuval; tAgkiya
	arun' tuyar avalam tUkkin,
	marugku aRivArA malaiyinum peritE

49.tOzi kURRu

	koTuvari tAkki venRa varuttamoTu
	n'eTu varai marugkin tujcum yAnai,
	n'anavil tAn ceytatu manattatu Akalin,
	kanavil kaNTu, katumena verIi,
5	putuvatAka malarn'ta vEgkaiyai
	atu ena uNarn'tu, atan aNi n'alam murukki,
	pENA munpin tan cinam taNin'tu, am maram
	kANum pozutin n'Okkal cellAtu,
	n'ANi iRaijcum n'al malai n'al n'ATa!
10	pOtu ezil malar uNkaN ivaLmATTu n'I inna
	kAtalai enpatO initu maRRu innAtE,
	min Orum kaN Aka, iTi ennAy, peyal ennAy,
	innatu Or Ar iTai, Igku n'I varuvatai
	inpuRa aLittanai ivaLmATTu n'I inna
15	anpinai enpatO initu maRRu innAtE,
	maNam kamaz mArpinai, majcu ivar aTukkam pOzn'tu,
	aNagkuTai Ar iTai, Igku n'I varuvatai
	iruL uRaz irug kUn'tal ivaLmATTu n'I inna
	aruLinai enpatO initu maRRu innAtE,
20	oLiRu vEl valan En'ti, oruvan yAn ennAtu,
	kaLiRu iyagku Ar iTai, Igku n'I varuvatai
	atanAl
	iravin vAral, aiya! viravu vI
	akal aRai varikkum cAral,
25	pakalum peRuvai, ivaL taTa men tOLE

50.tOzi kURRu

	vAgkukOl n'elloTu vAgki, varuvaikal,
	mUgkil micain'ta muzan'tAL irum piTi,
	tUgku ilai vAzai n'aLi pukku, jAgkar
	varuTai maTa maRi Urvu iTait tujcum
5	iruL tUgku cOlai, ilagku n'Ir, veRpa!
	aravin poRiyum aNagkum puNarn'ta
	uravu vilmEl acaitta kaiyai, OrAgku
	n'iraivaLai munkai en tOziyai n'Okki,
	paTi kiLi pAyum pacug kural Enal
10	kaTital maRappittAy Ayin, ini n'I
	n'eTitu uLLal Omputal vENTum; ivaLE
	pal kOT palavin payirppu uRu tIm kani
	alku aRaik koNTu UN amalaic ciRukuTi
	n'alkUrn'tAr celva makaL
15	n'IyE, vaLiyin ikal mikum tErum, kaLiRum
	taLiyin ciRan'tanai van'ta pulavarkku
	aLiyoTu kaitUvalai
	atanAl,
	kaTu mA kaTavuRUum kOl pOl, enaittum
20	koTumai ilaiyAvatu aRin'tum, aTuppal
	vazai vaLar cAral varuTai n'an mAn
	kuzavi vaLarppavar pOla, pArATTi,
	uzaiyin piriyin, piriyum,
	izai aNi alkul en tOziyatu kavinE

52.tOzi kURRu

	muRam cevi maRaip pAypu muraN ceyta puli ceRRu,
	maRam talaikkoNTa n'URRuvar talaivanaik
	kuRagku aRuttiTuvAn pOl, kUr n'uti maTuttu, atan
	n'iRam cATi muraN tIrn'ta n'IL maruppu ezil yAnai,
5	mallarai maRam cAytta mAl pOl, tan kiLai n'AppaN,
	kal uyar n'anaj cAral, kalan'tu iyalum n'ATa! kEL:
	tAmaraik kaNNiyai, taN n'aRuj cAn'tinai,
	n'Er itazk kOtaiyAL ceykuRi n'I varin,
	maNam kamaz n'ARRatta malai n'inRu pali peRUum
10	aNagku ena ajcuvar, ciRukuTiyOrE
	Irn' taN ATaiyai, elli mAlaiyai,
	cOrn'tu vIz katuppinAL ceykuRi n'I varin,
	oLi tikaz jekiziyar, kavaNaiyar, villar,
	'kaLiRu' ena Arppavar, Enal kAvalarE
15	Ara mArpinai, aNNalai, aLiyai,
	aitu akal alkulAL ceykuRi n'I varin,
	'kaRi vaLar cilampil vazagkal AnAp
	puli' enRu Orkkum, ik kali kEz UrE
	ena Agku
20	vilagku OrAr, mey Orppin, ivaL vAzAL; ivaL anRi,
	pulam pukaz oruva! yAnum vAzEn;
	atanAl, poti aviz vaikaRai van'tu, n'I kuRai kURi,
	vatuvai ayartal vENTuval, Agku,
	putuvai pOlum n'in varavum, ivaL
25	vatuvai n'AN oTukkamum, kANkuval, yAnE

53.tOzi kURRu

	vaRan uRal aRiyAta vazai amai n'aRuj cAral
	viRal malai viyal aRai, vIz piTi uzaiyatA,
	maRam miku vEzam, tan mARukoL main'tinAn,
	pukar n'utal puN ceyta puy kOTu pOla,
5	uyar mukai n'aRug kAn'taL n'ALtORum putitu Ina,
	ayam n'an'ti aNipeRa, aruvi Arttu izitarum
	paya mazai talaiiya pATu cAl viRal veRpa!
	maRaiyinin maNan'tu, AgkE maruvu aRat tuRan'tapin,
	iRai vaLai n'ekizpu OTa, ERpavum ollumman
10	ayal alar tURRalin, Ay n'alan izan'ta, kaN;
	kayal umiz n'Ir pOla, kaN pani kaluzAkkAl?
	iniya ceytu akanRu, n'I innAtAt tuRattalin,
	pani ivaL paTar ena paravAmai ollumman
	Ur alar tURRalin, oLi OTi, n'aRu n'utal
15	pIr alar aNi koNTu, piRai vanappu izavAkkAl?
	ajcal enRu akanRu, n'I aruLAtu tuRattalin,
	n'ejcu azi tuyar aTa, n'iRuppavum iyaiyumman
	n'anavinAl n'alam vATa, n'alitan'ta n'aTugku ajar
	kanavinAl azivuRRu, kagkulum araRRAkkAl?
20	ena Agku,
	viLiyA n'Oy uzan'tu AnA en tOzi, n'in malai
	muLivuRa varun'tiya muLai mutir ciRu tinai
	taLi peRat takaipeRRAgku, n'in
	aLi peRa n'an'tum, ivaL Ay n'utaR kavinE

60.tOzi kURRu

	tOzi
	cuNagku aNi vana mulai, cuTar koNTa n'aRu n'utal,
	maNam kamaz n'aRug kOtai mAri vIz irug kUn'tal,
	n'uNagku ezil, oN titti, n'uzai n'oci maTa marugkul,
	vaNagku iRai vari munkai, vari Arn'ta alkulAy!
5	kaN Arn'ta n'alattArai, katumena, kaNTavarkku
	uL n'inRa n'Oy mika, uyir ejcu tuyar ceytal
	peN anRu, punaiyizAy! enak kURi tozUum; tozutE,
	kaNNum n'IrAka n'aTugkinan, in n'akAy!
	en ceytAn kollO iHtu ottan tankaN
10	porukaLiRu anna takai cAmpi uL uL
	urukuvAn pOlum, uTain'tu?
	talaivi
	teruvinkaN kAraNam inRik kalagkuvArk kaNTu, n'I,
	vAraNavAcip patam peyarttal, Etila
	n'I n'inmEl koLvatu; evan?
	tOzi
15	alarmulai Ay izai n'allAy! katumena,
	pEr amar uNkaN n'in tOzi uRIiya
	Ar ajar evvam uyir vAgkum;
	maRRu in' n'Oy tIrum marun'tu aruLAy, oNtoTI!
	n'in mukam kANum marun'tinEn ennumAl;
20	n'in mukam tAn peRin allatu, konnE
	marun'tu piRitu yAtum illEl, tirun'tizAy!
	en ceyvAmkol, ini n'Am?
	talaivi
	pon ceyvAm
	ARu vilagkit teruvinkaN n'inRu oruvan
25	kURum col vAy enak koNTu, atan paNpu uNarAm,
	tERal, eLitu enpAm n'Am
	tOzi
	oruvan cAm ARu eLitu enpAm, maRRu
	talaivi
	ciRitu, AgkE mANA Ur ampal alarin alarka ena,
	n'ANum n'iRaiyum n'ayappu il piRappu ili
	tOzi
30	pUN Akam n'Okki imaiyAn, n'ayan'tu, n'am
	kENmai viruppuRRavanai, etir n'inRu,
	n'AN aTap peyartta n'ayavaravu inRE

61.tOzi kURRu

	talaivan varukai kaNTu, tOzi talaiviyai n'Okkik kURutal
	ellA! iHtu ottan en peRAn? kETTaik kAN:
	celvam kaTaikoLa, cAay, cAnRavar
	allal kaLai takka kELiruzaic cenRu,
	collutal uRRu, uraikallAtavar pOla
5	pal Uz peyarn'tu ennai n'Okkum; maRRu yAn n'Okkin,
	mella iRaijcum talai
	talaivan etir cenRu, avanai n'Okkit tOzi vinAvutal
	ellA! n'I munnattAn onRu kuRittAypOl kATTinai;
	n'innin viTAa n'izal pOl tiritaruvAy!
	en, n'I peRAtatu? Itu en?
	talaivan
10	collin, maRAtIvAL mannO, ivaL?
	ceRAatu Ital, iran'tArkku onRu, ARRAtu vAztalin,
	cAtalum kUTumAm maRRu
	tOzi
	ivaL tan'tai kAtalin yArkkum koTukkum, vizup poruL; yAtu, n'I vENTiyatu?
	talaivan
	pEtAy! poruL vENTum punkaNmai INTu illai; yAza
15	maruLi maTa n'Okkin n'in tOzi ennai
	aruLIyal vENTuval, yAn
	annaiyO? ena, aRiyAtAL pOnRu, talaivanukkut tOzi kURi, avan n'Igkiya pinnar, talaiviyoTu ucAvutal
	"annaiyO?" maNTu amar aTTa kaLiRu annAntannai oru peNTir aruLak kiTan'tatu evankolO?'
	tOzi talaiviyai n'Okkik kuRai n'ayappittal
	oNtoTI! n'AN ilan manRa ivan
	Ayin, Ee!
20	pallAr n'akku eLLappaTu maTalmA ERi,
	mallal Ur AgkaN paTumE, n'aRum n'utal
	n'alkAL kaNmARiviTin enac celvAnAm
	eLLi n'akinum varUum; iTaiiTaik
	kaLvar pOl n'Okkinum n'Okkum; kuRittatu
25	koLLAtu pOkAk kuNan uTaiyan, en'tai tan
	uLLam kuRaipaTAvARu