132.tOzi kURRu

	uravu n'Irt tirai pora Ogkiya ekkarmEl,
	viravup pal uruvina vIz peTai tuNaiyAka,
	irai tErn'tu uNTu, acAviTUum puLLinam iRai koLa
	muraicu mUnRu ALpavar muraNiyOr muraN tapa,
5	n'irai kaLiRu iTai paTa, n'eRi yAtta irukkai pOl
	citaivu inRic cenRuzic ciRappu eyti, vinai vAyttu,
	tuRaiya kalam vAy cUzum tuNi kaTal taN cErppa!
	punnaiya n'aRum pozil puNarn'tanai irun'takkAl,
	'n'annutAl! ajcal Ompu' enRatan payan anRO
10	pAyina pacalaiyAl, pakal koNTa cuTar pOnRAL
	mAvina taLir pOlum mAN n'alam izan'tatai?
	pal malar n'aRum pozil pazi inRip puNarn'takkAl,
	'cinmozi! teLi' enat tERRiya ciRappu anRO
	vATupu vanappu OTi vayakku uRA maNi pOnRAL
15	n'ITu iRai n'eTu men tOL n'irai vaLai n'ekizn'tatai?
	aTumpu ivar aNi ekkar ATi n'I. 'maNan'takkAl,
	koTug kuzAy! teLi' enak koNTatan koLai anRO
	poRai ARRA n'ucuppinAl, pU vIn'ta koTi pOnRAL
	maRai piRar aRiyAmai mANA n'Oy uzan'tatai?
20	ena Agku
	vazipaTTa teyvamtAn vali enac cArn'tArkaN
	kaziyum n'Oy kaimmika aNagkuAkiyatu pOla,
	pazi paran'tu alar tURRa, en tOzi
	azi paTar alaippa, akaRalO koTitE