121. pAlai

	n'Am n'akai uTaiyam n'ejcE! kaTun' teRal
	vEnil n'ITiya vAn uyar vazin'AL,
	vaRumai kUriya maN n'Irc ciRu kuLat
	toTukuzi marugkil tuvvAk kalagkal
5	kanRuTai maTap piTik kayan'talai maNNi,
	cERu koNTu ATiya vERupaTu vayak kaLiRu
	ceg kOl vAl iNar tayagkat tINTi,
	cori puRam urijiya n'eRi ayal marA attu
	alkuRu vari n'izal acaii, n'ammoTu
10	tAn varum enpa, taTa men tOLi
	uRukaN mazavar uruL kINTiTTa
	ARu cel mAkkaL cORu poti veN kuTai
	kanai vicaik kaTu vaLi eTuttalin, tuNai cettu
	veruL ERu payirum AgkaN,
15	karu muka mucuvin kAnattAnE.

122. kuRijci

	irum pizi makAar iv azugkal mUtUr
	vizavu inRuAyinum tujcAtu Akum;
	mallal AvaNa maRuku uTan maTiyin,
	val uraik kaTuj col annai tujcAL;
5	piNi kOL aruj ciRai annai tujcin,
	tujcAk kaNNar kAvalar kaTukuvar;
	ilagkuvEl iLaiyar tujcin, vai eyiRRu
	valam curit tOkai jALi makizum;
	ara vAy jamali makizAtu maTiyin,
10	pakal uru uRaza n'ilavuk kAnRu vicumpin
	akalvAy maNTilam n'inRu viriyummE;
	tigkaL kal cErpu kanai iruL maTiyin,
	il eli valci val vAyk kUkai
	kazutu vazagku yAmattu azitakak kuzaRum;
15	vaLaikkaN cEval vALAtu maTiyin,
	manaic ceRi kOzi mAN kural iyampum;
	ellAm maTin'takAlai, oru n'AL
	n'illA n'ejcattu avar vAralarE; atanAl,
	ari pey puTTil Arppap pari ciRan'tu,
20	Ati pOkiya pAypari n'an mA
	n'occi vElit tittan uRan'taik
	kal mutir puRagkATTu anna
	pal muTTinRAl tOzi! n'am kaLavE.

123. pAlai

	uNNAmaiyin uyagkiya marugkin
	ATAp paTivattu AnROr pOla,
	varai ceRi ciRu n'eRi n'iraipuTan cellum
	kAna yAnai kavin azi kunRam
5	iRan'tu, poruL tarutalum ARRAy; ciRan'ta
	cil aig kUn'tal n'al akam porun'ti
	oziyin, vaRumai ajcuti; azitakavu
	uTaimati vAziya, n'ejcE! n'ilavu ena
	n'ey kani n'eTu vEl eHkin imaikkum
10	mazai maruL pal tOl mA vaN cOzar
	kazai mAy kAvirik kaTal maNTu perun' tuRai,
	iRavoTu van'tu kOtaiyoTu peyarum
	perug kaTal Otam pOla,
	onRil koLLAy, cenRu taru poruTkE.

124. mullai

	'n'an kalam kaLiRRoTu n'aNNAr En'ti,
	van'tu tiRai koTuttu, vaNagkinar, vazimozin'tu
	cenRIka' enpaAyin, vEn'tanum
	n'ilam vakun'tuRAa INTiya tAnaiyoTu
5	inRE pukutal vAyvatu; n'anRE.
	mATa mAN n'akarp pATu amai cEkkait
	tuni tIr koLkai n'am kAtali inituRa,
	pAcaRai varuttam vITa, n'Iyum
	minnu n'imirn'tanna pon iyaR punai paTai,
10	koycuval, puravi, kai kavar vayagku pari,
	vaN peyaRku avizn'ta paig koTi mullai
	vI kamaz n'eTu vazi UtuvaNTu iriya,
	kAlai eyta, kaTavumati mAlai
	an'tik kOvalar am paNai imiz icai
15	aramiya viyalakattu iyampum
	n'irai n'ilai jAyil n'eTu matil UrE.

125. pAlai

	aram pOz av vaLai tOL n'ilai n'ekiza,
	n'irampA vAzkkai n'Ertal vENTi
	irag kAz anna arumpu mutir Igkai
	Ali anna vAl vI tAay,
5	vai vAl Oti maiaNal Eyppat
	tAtu uRu kuvaLaippOtu piNi aviza,
	paTAap paig kaN pA aTik kaya vAyk
	kaTAam mARiya yAnai pOla,
	peytu vaRitu Akiya pogku celaR koNmU
10	mai tOy vicumpin mAtirattu uzitara,
	pani aTUu n'inRa pAnAT kagkul
	taniyOr matukai tUkkAy, taNNena,
	muniya alaitti, muraN il kAlai;
	kaitozu marapin kaTavuL cAnRa
15	ceyvinai marugkin cenROr val varin
	viriuLaip polin'ta pariyuTai n'al mAn
	veruvaru tAnaiyoTu vENTu pulattu iRutta
	peru vaLak karikAl munnilaic cellAr,
	cUTA vAkaip paRan'talai, ATu peRa
20	onpatu kuTaiyum n'an pakal ozitta
	pITu il mannar pOla,
	OTuvai mannAl vATai! n'I emakkE.

126. marutam

	n'in vAy cettu n'I pala uLLi,
	perum pun paitalai varun'tal anRiyum,
	malaimicait toTutta malin'tu celal n'Ittam
	talai n'AL mA malar taN tuRait tayagkak
5	kaTaRkarai melikkum kAvirip pEriyARRu
	aRal vAr n'eTug kayattu aru n'ilai kalagka,
	mAl iruL n'aTun'AT pOki, tan aiyar
	kAlait tan'ta kaNaik kOTTu vALaikku,
	av vAgku un'ti, am col, pANmakaL,
10	n'eTug koTi n'uTagkum n'aRavu mali maRukil
	pazaj cen' n'ellin mukavai koLLAL,
	kazagku uRaz muttamoTu n'ankalam peRUum
	payam kezu vaippiR pal vEl evvi
	n'ayam puri n'an mozi aTakkavum aTagkAn,
15	pon iNar n'aRu malarp punnai veHki,
	titiyanoTu poruta anni pOla
	viLikuvaikollO, n'IyE kiLi enac
	ciRiya mizaRRum cev vAy, periya
	kayal ena amartta uNkaN, puyal enap
20	puRam tAzpu iruLiya piRagku kural aimpAl,
	min n'Er marugkul, kuRumakaL
	pinnilai viTAa maTam kezu n'ejcE?

127. pAlai

	ilagku vaLai n'ekizac cAay, alkalum,
	kalagkuajar uzan'tu, n'Am ivaN oziya
	valam paTu muraciR cEralAtan
	mun'n'Ir OTTik kaTampu aRuttu, imayattu
5	munnOr maruLa vaNagkuvil poRittu,
	n'al n'akar maran'tai muRRattu onnAr
	paNi tiRai tan'ta pATucAl n'ankalam
	poncey pAvai vayiramoTu Ampal
	onRu vAy n'iRaiyak kuvaii, anRu avaN
10	n'ilam tinat tuRan'ta n'itiyattu anna
	oru n'AL oru pakaR peRinum, vazin'AL
	tagkalar vAzi, tOzi! ceg kOR
	karug kAl marAttu vAal mel iNar
	curin'tu vaNar pittai poliyac cUTi,
15	kallA mazavar vil iTam tazIi,
	varun'arp pArkkum veruvaru kavalai
	mozi peyar tEettar Ayinum,
	pazi tIr kAtalar cenRa n'ATTE.

128. kuRijci

	manRu pATu avin'tu manai maTin'tanRE;
	konROranna koTumaiyOTu inRE
	yAmam koLa varin kanaii, kAmam
	kaTalinum uraii, karai poziyummE.
5	evankol vAzi, tOzi! mayagki
	innam Akavum, n'annar n'ejcam
	ennoTum n'innoTum cUzAtu, kaimmikku,
	iRumpu paTTu iruLiya iTTu aruj cilampil
	kuRuj cunaik kuvaLai vaNTu paTac cUTi,
10	kAna n'ATan varUum, yAnaik
	kayiRRup puRattanna, kalmicaic ciRu n'eRi,
	mAri vAnam talaii n'Ir vArpu,
	iTTu arug kaNNa paTukuzi iyavin,
	iruLiTai mitippuzi n'Okki, avar
15	taLar aTi tAgkiya cenRatu, inRE?

129. pAlai

	'uLLal vENTum ozin'ta pin' ena
	n'aLLen kagkul n'aTugku tuNai Ayavar
	n'in maRan'tu uRaital yAvatu? 'pul maRain'tu
	alagkal vAn kazai utirn'el n'Okki,
5	kalai piNai viLikkum kAnattu AgkaN,
	kal cErpu irun'ta katuvAyk kurampait
	tAzimutaR kalitta kOzilaip paruttip
	poti vayiRRu iLag kAy pETai UTTi,
	pOkil piLan'tiTTa pogkal veN kAz
10	n'alkUr peNTir alkaR kUTTum
	kalagkumunaic cIRUr kai talaivaippa,
	kozuppu A tinRa kUrm paTai mazavar,
	ceruppuTai aTiyar, teN cunai maNTum
	aruj curam ariyaalla; vAr kOl
15	tirun'tu izaip paNait tOL, tEn n'ARu katuppin,
	kuvaLai uNkaN, ivaLoTu celaRku' ena
	n'ejcu vAy avizn'tanar kAtalar
	am cil Oti Ayizai! n'amakkE.

130. n'eytal

	amma vAzi, kELir! mun n'inRu
	kaNTanir Ayin, kazaRalirmannO
	n'uN tAtu potin'ta ceg kAR kozu mukai
	muNTakam kezIiya mOTTu maNal aTaikarai,
5	pEeyt talaiya piNar arait tAzai
	eyiRuTai n'eTun' tOTu kAppa, pala uTan
	vayiRuTaip pOtu vAlitin virIi,
	pulavup porutu azitta pU n'ARu parappin
	ivar tirai tan'ta Irg katir muttam
10	kavar n'aTaip puravi kAl vaTut tapukkum
	n'al tEr vazuti koRkai mun tuRai
	vaNTu vAy tiRan'ta vAgkukazi n'eytaR
	pOtu puRagkoTutta uNkaN
	mAtar vAL mukam mataiiya n'OkkE.

131. pAlai

	'vicumpu uRa n'ivan'ta mAt tAL ikaNaip
	pacug kEz mel ilai aruku n'eRittanna,
	vaNTu paTupu iruLiya, tAz irug kUn'tal
	curumpu uNa virin'ta perun' taN kOtai
5	ivaLinum ciRan'tanRu, Ital n'amakku' ena
	vILai ampin vizut toTai mazavar
	n'AL A uytta n'Ama vej curattu
	n'aTai melin'tu ozin'ta cEN paTar kanRin
	kaTaimaNi ukun'Ir tuTaitta ATavar
10	peyarum pITum ezuti, atartoRum
	pIli cUTTiya piRagkun'ilai n'aTukal
	vEl UnRu palakai vERRu munai kaTukkum
	veruvaru takun'a kAnam, 'n'ammoTu
	varuka' ennutiAyin,
15	vArEn; n'ejcam! vAykka n'in vinaiyE.

132. kuRijci

	Enalum iRagku kural iRuttana; n'Oy malin'tu,
	Aykavin tolain'ta, ivaL n'utalum; n'Okki
	Etila moziyum, iv Urum; Akalin,
	kaLiRRu mukam tiRan'ta kavuLuTaip pakazi,
5	vAl n'iNap pukavin, kAnavar tagkai
	am paNai men tOL Ay itaz mazaik kaN
	olku iyaR koTicciyai n'alkinaiAyin,
	koNTanai cenmO n'uN pUN mArpa!
	tuLitalait talaiiya cAral n'aLi cunaik
10	kUmpu mukai aviztta kuRuj ciRaip paRavai
	vEgkai viri iNar Uti, kAn'taL
	tEnuTaik kuvikulait tujci, yAnai
	irug kavuT kaTAam kanavum,
	perug kal vEli, n'um uRaivu in UrkkE.

133. pAlai

	'kunRi anna kaNNa, kurUu mayir,
	pun tAL, veLLeli mOvAy ERRai
	cem paral murampil citarn'ta pUzi,
	n'al n'AL vEgkai vI n'ankanam varippa,
5	kAr talaimaNan'ta paim putaR puRavin,
	vil eRi pajciyin veN mazai tavazum
	kollai itaiya kuRum poRai marugkil,
	kari paran'tanna kAyAj cemmaloTu
	eri paran'tanna ilamalar viraii,
10	pUg kaluz cuman'ta tIm punaR kAn yARRu
	vAn koL tUval vaLi tara uNkum;
	emmoTu varutal vallaiyO maRRu?' enak
	kon onRu vinavinarmannE tOzi!
	ital muL oppin mukai mutir veTci
15	kol punak kurun'toTu kal aRait tAam
	miLai n'ATTu attattu Irj cuvaR kalitta
	vari maraR kaRikkum maTap piNait
	tirimaruppu iralaiya kATu iRan'tOrE.

134. mullai

	vAnam vAyppak kavini, kAnam
	kamaj cUl mA mazai kAr payan'tu iRuttena,
	maNi maruL pUvai aNi malar iTaiiTai,
	cem puRa mUtAy parattalin, n'an pala
5	mullai vI kazal tAay, vallOn
	ceykai anna cen' n'ilap puRavin;
	vAap pANi vayagku toziR kalimAt
	tAat tAL iNai mella otugka,
	iTi maRan'tu, Emati valava! kuvimukai
10	vAzai vAn pU UzuRupu utirn'ta
	ozikulai anna tirimaruppu ERRoTu
	kaNaik kAl am piNaik kAmar puNar n'ilai
	kaTumAn tEr oli kETpin,
	n'aTun'AT kUTTam Akalum uNTE.

135. pAlai

	titalai mAmai taLir vanappu azugka,
	putal ivar pIrin etir malar kaTuppap
	pacalai pAyn'ta n'utalEn Aki,
	ezutu ezil mazaik kaN kaluza, n'Oy kUrn'tu,
5	Atiman'tiyin aRivu piRituAki,
	pEtuRRicinE kAtal am tOzi!
	kAykatir tirukalin kanain'tu kAl kaTuki,
	ATutaLir iruppaik kUTu kuvi vAn pU,
	kOTu kaTai kazagkin, aRaimicait tAam
10	kATu iRan'tanarE, kAtalar; aTupOr,
	vIyA vizup pukaz, viN tOy viyan kuTai,
	Ir ezu vELir iyain'tu orugku eRin'ta
	kazuvuL kAmUr pOlak
	kalagkinRumAtu, avart teLin'ta en n'ejcE.

136. marutam

	maippu aRap puzukkin n'eyk kani veN cORu
	varaiyA vaNmaiyoTu puraiyOrp pENi,
	puLLup puNarn'tu iniya Aka, teL oLi
	am kaN iru vicumpu viLagka, tigkaT
5	cakaTam maNTiya tukaL tIr kUTTattu,
	kaTi n'akar punain'tu, kaTavuT pENi,
	paTu maNa muzavoTu parUup paNai imiza,
	vatuvai maNNiya makaLir vituppuRRu,
	pUkkaNum imaiyAr n'Okkupu maRaiya,
10	men pU vAkaip pun puRak kavaTTilai,
	pazag kanRu kaRitta payampu amal aRukait
	tazagkukural vAnin talaippeyaRku InRa
	maNNu maNi anna mAitazp pAvait
	taN n'aRu mukaiyoTu veN n'Ul cUTTi,
15	tU uTaip polin'tu mEvarat tuvanRi,
	mazai paTTanna maNal mali pan'tar,
	izai aNi ciRappin peyar viyarppu ARRi,
	tamar n'amakku Itta talain'AL iravin,
	'uvar n'Igku kaRpin em uyir uTampaTuvi!
20	murugkAk kaligkam muzuvatum vaLaii,
	perum puzukkuRRa n'in piRain'utaR poRi viyar
	uRu vaLi ARRac ciRu varai tiRa' ena
	Arva n'ejcamoTu pOrvai vavvalin,
	uRai kazi vALin uruvu peyarn'tu imaippa,
25	maRai tiRan aRiyAL Aki, oyyena
	n'ANinaL iRaijciyOLE pENi,
	parUup pakai AmpaR kurUut toTai n'Ivi,
	curumpu imir Aymalar vEyn'ta
	irum pal kUn'tal iruL maRai oLittE.

137. pAlai

	ARu cel vampalar cERu kiLaittu uNTa
	ciRu pal kENip piTi aTi n'acaii,
	kaLiRu toTUuk kaTakkum kAnyARRu attam
	cenRu cErpu ollAr Ayinum, n'inakkE
5	venRu eRi muracin viRaR pOrc cOzar
	in kaTug kaLLin uRan'tai AgkaN,
	varupunal n'eritarum ikukaraip pEriyARRu
	uruva veN maNal muruku n'ARu taN poziR
	pagkuni muyakkam kazin'ta vazin'AL,
10	vI ilai amanRa maram payil iRumpil
	tI il aTuppin aragkam pOla,
	perum pAzkoNTanRu, n'utalE; tOLum,
	tOLA muttin teN kaTaR porun'an
	tiN tErc ceziyan poruppiR kavAan
15	n'al ezil n'eTu vEy puraiyum
	tol kavin tolain'tana; n'OkO yAnE.
	'talaimakan piriyum' enak karuti vERupaTTa talaimakaTkut tOzi colliyatu.- uRaiyUr

138. kuRijci

	ikuLai! kETTicin, kAtal am tOzi!
	kuvaLai uNkaN teN pani malka,
	vaRitu yAn varun'tiya cellaRku annai
	piRitu onRu kaTuttanaL Aki vEmpin
5	veRi koL pAcilai n'IlamoTu cUTi,
	uTalun'ark kaTan'ta kaTal am tAnai,
	tirun'tuilai n'eTu vER tennavan potiyil,
	aruj cimai izitarum Arttu varal aruviyin
	tatumpu cIr in iyam kaRagka, kaitozutu,
10	uru kezu ciRappin muruku manait tarIi,
	kaTampum kaLiRum pATi, n'uTagkupu
	tOTum toTalaiyum kaikkoNTu, alkalum
	ATinar Atal n'anRO? n'ITu
	n'innoTu teLitta n'al malai n'ATan
15	kuRi varal arain'AT kunRattu ucci,
	n'eRi keTa vIzn'ta tun arug kUr iruL,
	tiru maNi umizn'ta n'Akam kAn'taT
	kozu maTaR putup pU Utum tumpi
	n'al n'iRam maruLum aru viTar
20	innA n'IL iTai n'inaiyum, en n'ejcE.

139. pAlai

	tujcuvatu pOla iruLi, viN paka
	imaippatu pOla minni, uRaikkoNTu
	ERuvatu pOlap pATu ciRan'tu uraii,
	n'ilam n'ejcu uTka OvAtu cilaittu Agku,
5	Ar taLi pozin'ta vAr peyaR kaTai n'AL;
	InRu n'AL ulan'ta vAlA veN mazai
	vAn tOy uyar varai ATum vaikaRai,
	putal oLi ciRan'ta kANpu in kAlai,
	taN n'aRum paTun'Ir mAn'ti, patavu arun'tu
10	veN puRakku uTaiya tirimaruppu iralai;
	vAr maNal oru ciRaip piTavu aviz kozu n'izal,
	kAmar tuNaiyoTu EmuRa vatiya;
	arakku n'iRa uruvin Iyal mUtAy
	parappiyavaipOR pAay, pala uTan
15	n'Ir vAr marugkin IraNi tikaza;
	innum vArAr Ayin n'annutal!
	yAtukol maRRuavar n'ilaiyE? kAtalar
	karuvik kAr iTi irIiya
	paruvam anRu, avar, 'varutum' enRatuvE.

140. n'eytal

	perug kaTal vETTattuc ciRukuTip paratavar
	irug kazic ceRuvin uzAatu ceyta
	veN kal uppin koLLai cARRi,
	enRUz viTara kunRam pOkum
5	kataz kOl umaNar kAtal maTamakaL
	cil kOl el vaLai teLirppa vIci,
	'n'ellin n'ErE veN kal uppu' enac
	cEri vilaimARu kURalin, manaiya
	viLi aRi jamali kuraippa, verIiya
10	matar kayal malaippin anna kaN emakku,
	itai muyal punavan pukain'izal kaTukkum
	mA mUtaLLal azun'tiya cAkATTu
	evvam tIra vAgkum tan'tai
	kai pUN pakaTTin varun'ti,
15	veyya uyirkkum n'Oy AkinRE.

141. pAlai

	amma vAzi, tOzi! kaimmikak
	kanavum kagkultORu iniya; n'anavum
	punai vinai n'al il puLLum pAgkina;
	n'ejcum n'anipukanRu uRaiyum; ejcAtu
5	ulaku tozil ulan'tu, n'Ajcil tujci,
	mazai kAln'Igkiya mAka vicumpil
	kuRu muyal maRu n'iRam kiLara, mati n'iRain'tu,
	aRumIn cErum akal iruL n'aTu n'AL;
	maRuku viLakkuRuttu, mAlai tUkki,
10	paza viRal mUtUrp palaruTan tuvanRiya
	vizavu uTan ayara, varukatil amma!
	tuvarap pularn'tu tU malar kajali,
	takaram n'ARum taN n'aRug katuppin
	putu maNa makaTUu ayiniya kaTi n'akarp
15	pal kOTTu aTuppil pAl ulai irIi,
	kUzaik kUn'taR kuRun' toTi makaLir
	peruj cey n'ellin vAgkukatir muRittu,
	pAcaval iTikkum irug kAz ulakkaik
	kaTitu iTi verIiya kamajcUl veN kuruku
20	tIm kulai vAzai Ogku maTal irAtu;
	n'eTug kAl mAattuk kuRum paRai payiRRum
	cel kuTi n'iRutta perum peyark karikAl
	vel pOrc cOzan iTaiyARRu anna
	n'al icai veRukkai tarumAr, pal poRip
25	pulik kEz uRRa pUviTaip peruj cinai
	n'aran'ta n'aRum pU n'AL malar utira,
	kalai pAyn'tu ukaLum, kal cEr vEgkai,
	tEm kamaz n'eTu varaip piRagkiya
	vEgkaTa vaippiR curan iRan'tOrE.

142. kuRijci

	ilamalar anna am cen' n'Avin
	pulam mIkkURum puraiyOr Etta,
	palar mEn' tOnRiya kavi kai vaLLal
	n'iRaiarun' tAnai velpOr mAn'taram
5	poRaiyan kaTugkOp pATic cenRa
	kuRaiyOr koLkalam pOla, n'anRum
	uva ini vAziya, n'ejcE! kAtali
	muRaiyin vazAatu ARRip peRRa
	kaRai aTi yAnai n'annan pAzi,
10	UTTu aru marapin ajcu varu pEeyk
	kUTTu etirkoNTa vAy mozi mijili
	puLLiRku Emam Akiya perum peyar
	veLLat tAnai atikaR konRu, uvan'tu
	oL vAL amalai ATiya jATpin,
15	palar aRivuRutal ajci, paippaya,
	n'Irt tiraL kaTukkum mAcu il veLLic
	cUrppuRu kOl vaLai ceRitta munkai
	kuRai aRal anna irum pal kUn'tal,
	iTan il ciRu puRattu izaiyoTu tuyalvara,
20	kaTal mIn tujcum n'aLLen yAmattu,
	uruvu kiLar Ovinaip polin'ta pAvai
	iyal kaRRanna otukkinaL van'tu,
	peyal alaik kalagkiya malaip pUg kOtai
	iyal eRi ponnin kogku cOrpu uRaippa,
25	toTikkaN vaTukkoLa muyagkinaL;
	vaTippu uRu n'arampin tIviya mozin'tE.

143. pAlai

	ceyvinaip pirital eNNi, kaimmikak
	kATu kavin oziyak kaTug katir teRutalin,
	n'ITu cinai vaRiya Aka, ollena
	vATu pal akal ilai kOTaikku oyyum
5	tEkku amal aTukkattu AgkaN mEkku ezupu,
	muLi ariR piRan'ta vaLi vaLar kUr eric
	cuTar n'imir n'eTug koTi viTar mukai muzagkum
	'vem malai aruj curam n'In'ti aiya!
	cERum' enRa ciRu coRku ivaTkE,
10	vacai il vem pOr vAnavan maRavan
	n'acaiyin vAzn'arkku n'an kalam curakkum,
	poyyA vAyvAL, punaikazal, piTTan
	mai tavaz uyar cimaik kutiraik kavAan
	akal aRai n'eTuj cunai, tuvalaiyin malarn'ta
15	taN kamaz n'Ilam pOla,
	kaN pani kaluzn'tana; n'OkO yAnE.

144. mullai

	''varutum'' enRa n'ALum poyttana;
	ari Er uNkaN n'Irum n'illA;
	taN kArkku InRa paig koTi mullai
	vai vAy vAl mukai avizn'ta kOtai
5	pey vanappu izan'ta katuppum uLLAr,
	aruL kaNmARalO mARuka an'til
	aRan ajcalarE! Ayizai! n'amar' enac
	ciRiya collip periya pulappinum,
	pani paTu n'aRun' tAr kuzaiya, n'ammoTu,
10	tuni tIr muyakkam peRROL pOla
	uvakkun'aL vAziya, n'ejcE! vicumpin
	ERu ezun'tu muzagkinum mARu ezun'tu cilaikkum
	kaTAa yAnai koTkum pAcaRai,
	pOr vETTu ezun'ta maLLar kaiyatai
15	kUr vAT kuvimukam citaiya n'URi,
	mAn aTi marugkil peyartta kuruti
	vAna mInin vayin vayin imaippa,
	amar Orttu, aTTa celvam
	tamar virain'tu uraippak kETkum jAnRE.

145. pAlai

	vEr muzutu ulaRi n'inRa puzaRkAl,
	tEr maNi icaiyin ciLvITu Arkkum,
	vaRRal maratta poR talai Oti
	veyiR kavin izan'ta vaippin paiyuL koLa,
5	n'uNNitin n'ivakkum veN jemai viyan kATTu
	AL il attattu, aLiyaL avanoTu
	vALvari poruta puN kUr yAnai
	pukar citai mukatta kuruti vAra,
	uyar cimai n'eTug kOTTu urum ena muzagkum
10	'aruj curam iRan'tanaL' enpa peruj cIr
	anni kuRukkaip paRan'talai, titiyan
	tol n'ilai muzu mutal tumiyap paNNiya
	n'annar mel iNarp punnai pOla,
	kaTu n'avaip paTIiyarmAtO kaLi mayil
15	kujcarak kurala kurukOTu Alum,
	tujcA muzavin, tuyttu iyal vAzkkai,
	kUzuTait tan'tai iTanuTai varaippin,
	Uz aTi otugkinum uyagkum aim pAR
	ciRu pal kUn'taR pOtu piTittu aruLAtu,
20	eRi kOl citaiya n'URavum ciRupuRam,
	'enakku urittu' ennAL, n'inRa en
	amark kaN ajjaiyai alaitta kaiyE!

146. marutam

	vali miku munpin aNNal EeRu
	pani malarp poykaip pakal cela maRuki,
	maTak kaN erumai mAN n'Aku tazIi,
	paTappai n'aNNi, pazanattu alkum
5	kali makiz Uran oli maNi n'eTun' tEr,
	oL izai makaLir cEri, pal n'AL
	iyagkal AnAtuAyin; vayagkizai
	yArkol aLiyaLtAnE em pOl
	mAyap parattan vAymozi n'ampi,
10	vaLi porat tuyalvarum taLi pozi malarin
	kaNpani Akattu uRaippa, kaN pacan'tu,
	Ayamum ayalum maruLa,
	tAy Ompu Ayn'alam vENTAtOLE?

147. pAlai

	Ogkumalaic cilampil piTavuTan malarn'ta
	vEgkai veRit tazai vERu vakuttanna
	Un poti avizAk kOTTu ukirk kuruLai
	mUnRu uTan InRa muTagkar n'izatta,
5	tuRukal viTar aLaip piNavup paci kUrn'tena,
	poRi kiLar uzuvaip pOz vAy ERRai
	aRu kOTTu uzai mAn AN kural Orkkum
	n'eRi paTu kavalai n'irampA n'ILiTai,
	veLLi vItiyaip pOla n'anRum
10	celavu ayarn'ticinAl yAnE; pala pulan'tu,
	uNNA uyakkamoTu uyir celac cAay,
	tOLum tol kavin tolaiya, n'ALum
	pirin'tOr peyarvukku iragki,
	marun'tu piRitu inmaiyin, irun'tu vinaiilanE!

148. kuRijci

	panait tiraL anna paru Er eRuzt taTak kai,
	kolaic cinam tavirA matanuTai munpin,
	vaNTu paTu kaTAattu, uyar maruppu, yAnai
	taN kamaz cilampin maram paTat tolaicci;
5	uRu puli uraRak kutti; viRal kaTin'tu;
	ciRu tinaip perum punam vavvum n'ATa!
	kaTum parik kutirai Aay eyinan
	n'eTun' tEr jimiliyoTu porutu, kaLam paTTena,
	kANiya cellAk kUkai n'ANi,
10	kaTum pakal vazagkAtAagku, iTumpai
	peritAl amma ivaTkE; atanAl
	mAlai, varutal vENTum cOlai
	muLai mEy perug kaLiRu vazagkum
	malai mutal aTukkatta ciRu kal ARE.

149. pAlai

	ciRu pun citalai cEN muyanRu eTutta
	n'eTuj cem puRRattu oTugku irai munaiyin,
	pul arai iruppait toLLai vAn pUp
	perug kai eNkin irug kiLai kavarum
5	atta n'IL iTaip pOki, n'anRum
	aritu cey vizup poruL eLitinin peRinum
	vArEn vAzi, en n'ejcE! cEralar
	cuLLiam pEriyARRu veN n'urai kalagka,
	yavanar tan'ta vinai mAN n'an kalam
10	ponnoTu van'tu kaRiyoTu peyarum
	vaLam kezu muciRi Arppu eza vaLaii,
	aruj camam kaTan'tu, paTimam vavviya
	n'eTu n'al yAnai aTupOrc ceziyan
	koTi n'uTagku maRukin kUTaR kuTAatu,
15	pal poRi majjai vel koTi uyariya,
	oTiyA vizavin, n'eTiyOn kunRattu,
	vaNTu paTa n'ITiya kuNTu cunai n'Ilattu
	etir malarp piNaiyal anna ivaL
	ari matar mazaik kaN teN pani koLavE.

150. n'eytal

	pinnuviTa n'eRitta kUn'talum, ponnena
	Akattu arumpiya cuNagkum, vampu viTak
	kaN uruttu ezutaru mulaiyum, n'Okki;
	'ellinai peritu' enap pal mAN kURi,
5	perun' tOL aTaiya muyagki, n'ITu n'inain'tu,
	arug kaTippaTuttanaL yAyE; kaTuj celal
	vAT cuRA vazagkum vaLai mEy perun' tuRai,
	kanaitta n'eytaR kaN pOl mA malar
	n'anaitta cerun'tip pOtu vAy aviza,
10	mAlai maNi itaz kUmpa, kAlaik
	kaL n'ARu kAviyoTu taNNena malarum
	kaziyum, kAnalum, kANtoRum pala pulan'tu;
	'vArArkol?' enap paruvarum
	tArAr mArpa! n'I taNan'ta jAnRE!

151. pAlai

	'tam n'ayan'tu uRaivOrt tAgki, tAm n'ayan'tu
	in amar kELiroTu EmuRak kezIi,
	n'akutal ARRAr n'alkUrn'tOr!' ena,
	miku poruL n'inaiyum n'ejcamoTu aruL piRitu
5	Apaman vAzi, tOzi! kAl viripu
	uRuvaLi eRitoRum kalagkiya poRi varik
	kalaimAn talaiyin mutalmutaR kavartta
	kOTal am kavaTTa kuRug kAl uzujcil
	tARu cinai viLain'ta n'eRRam, ATumakaL
10	arik kOR paRaiyin, aiyena olikkum
	patukkaittu Aya cetukkai n'Izal,
	kaLLi muL araip porun'ti, cellun'arkku
	uRuvatu kURum, ciRu cen' n'Avin
	maNi Orttanna teN kural
15	kaNi vAy, palliya kATu iRan'tOrE!

152. kuRijci

	n'ejcu n'aTugku arum paTar tIra van'tu,
	kunRuzai n'aNNiya cIRUr AgkaN
	celIiya peyarvOL vaNar curi aimpAl
	n'uN kOl akavun'arp puran'ta pEr icai,
5	cinam kezu tAnai, tittan veLiyan,
	iragkun'Irp parappin kAnal am perun' tuRai,
	tanam taru n'an kalam citaiyat tAkkum
	ciRu veL iRavin kuppai anna
	uRu pakai tarUum moym mUcu piNTan
10	munai muraN uTaiyak kaTan'ta ven vEl,
	icai n'al Ikaik kaLiRu vIcu vaN makiz,
	pArattut talaivan, Ara n'annan;
	Ezil n'eTu varaip pAzic cilampil
	kaLi mayiR kalAvattanna. tOLE
15	val vil iLaiyar perumakan; n'aLLi
	cOlai aTukkattuc curumpu uNa virin'ta
	kaTavuT kAn'taLuLLum, pala uTan
	iRumpUtu kajaliya Aymalar n'ARi,
	vallinum, vallAr Ayinum, cenROrkkuc
20	cAl aviz n'eTug kuzi n'iRaiya vIcum,
	mAal yAnai Aay kAnattut
	talaiyARRu n'ilaiiya cEyuyar piRagkal
	vEy amaik kaN iTai puraii,
	cEya Ayinum, n'aTugku tuyar tarumE.

153. pAlai

	n'OkO yAnE; n'Otakum uLLam;
	am tIm kiLavi AyamoTu kezIi,
	pan'tuvazip paTarkuvaL Ayinum, n'on'tu n'ani,
	vempumman, aLiyaLtAnE iniyE,
5	vankaNALan mArpuuRa vaLaii,
	in coR piNippa n'ampi, n'am kaN
	uRutaru vizumam uLLAL, oyyenat
	teRu katir ulaiiya vEnil veg kATTu,
	uRu vaLi oli kazaik kaN uRupu tINTalin,
10	poRi pitirpu eTutta pogku ezu kUr erip
	paitu aRu cimaiyap payam n'Igku Ar iTai
	n'al aTikku amain'taalla; mel iyal
	vallun'aLkollO tAnE elli
	Ogku varai aTukkattu uyarn'ta cenni
15	mInoTu polin'ta vAnin tOnRi,
	tEm pAyn'tu Arkkum teri iNark kOgkin
	kAl uRak kazanRa kaL kamaz putu malar
	kai viTu cuTarin tOnRum
	mai paTu mA malai vilagkiya curanE?

154. mullai

	paTu mazai pozin'ta payam miku puRavin
	n'eTu n'Ir avala pakuvAyt tErai
	ciRu pal iyattin n'eTu n'eRik kaRagka,
	kuRum putaR piTavin n'eTug kAl alari
5	cen' n'ilamarugkin n'uN ayir varippa,
	vej cina aravin pai aNan'tanna
	taN kamaz kOTal tAtu piNi aviza,
	tiri maruppu iralai teL aRal parukik
	kAmar tuNaiyoTu EmuRa vatiya,
10	kATu kavin peRRa taN patap peru vazi;
	OTupari meliyAk koycuvaR puravit
	tAL tAz tAr maNi tayagkupu iyampa
	Urmati valava! tErE cIr mikupu
	n'am vayiR purin'ta koLkai
15	am mA arivaiyait tunnukam, virain'tE.

155. pAlai

	aRankaTaip paTAa vAzkkaiyum, enRum
	piRankaTaic celAac celvamum, iraNTum
	poruLin Akum, punaiyizai!' enRu, n'am
	iruL Er aimpAl n'IviyOrE
5	n'Oy n'Am uzakkuvam Ayinum, tAm tam
	cey vinai muTikka; tOzi! palvayin
	paya n'irai cErn'ta pAz n'ATTu AgkaN
	n'eTu viLik kOvalar kUval tONTiya
	koTu vAyp pattal vArn'tu uku ciRu kuzi,
10	n'Ir kAy varuttamoTu cErviTam peRAtu
	perug kaLiRu mititta aTiyakattu, irum puli
	otugkuvana kazin'ta cetumpal Ir vazi,
	ceyir tIr n'Avin vayiriyar pinRai
	maN Ar muzavin kaNNakattu acaitta
15	viral UnRu vaTuvin tOnRum
	maral vATu marugkin malai iRan'tOrE.

156. marutam

	muracuTaic celvar puravic cUTTum
	mUTTuRu kavari tUkkiyanna,
	cezuj cey n'ellin cEyarip puniRRuk katir
	mUtA tinRal ajci, kAvalar
5	pAkal AykoTip pakanRaiyoTu parIi,
	kAjciyin akattu, karumpu arutti, yAkkum
	tIm punal Ura! tiRavatAkak
	kuvaLai uNkaN ivaLum yAnum
	kazani Ampal muzun'eRip pain' tazai,
10	kAyA jAyiRRAka, talaippeya,
	'poytal ATip polika!' ena van'tu,
	n'in n'akAp pizaitta tavaRO peruma!
	kaLLum kaNNiyum kaiyuRaiyAka
	n'ilaik kOTTu veLLai n'Alcevik kiTAay
15	n'ilaittuRaik kaTavuTku uLappaTa Occi,
	taNi marugku aRiyAL, yAy aza,
	maNi maruL mEni pon n'iRam koLalE?

157. pAlai

	ariyaR peNTir alakiR koNTa
	pakuvAyp pALaik kuvimulai curan'ta
	ari n'iRak kaluzi Ara mAn'ti,
	ceru vETTu, cilaikkum ceg kaN ATavar,
5	vil iTa vIzn'tOr patukkai, kOgkin
	elli malarn'ta paig koTi atiral
	perum pular vaikaRai arumpoTu vAgki,
	kAna yAnai kavaLam koLLum
	ajcu varu n'eRiyiTait tamiyar celmAr
10	n'ejcu uNa mozipamannE tOzi!
	munai pulam peyartta pullen manRattu,
	peyal uRa n'ekizn'tu, veyil uRac cAay,
	vinai azi pAvaiyin ulaRi,
	manai ozin'tiruttal valluvOrkkE!

158. kuRijci

	'urum uraRu karuviya peru mazai talaii,
	peyal AnRu avin'ta tUgkuiruL n'aTun'AL,
	minnu n'imirn'tanna kanagkuzai imaippa,
	pinnu viTu n'eRiyin kiLaiiya kUn'talaL,
5	varai izi mayilin olkuvanaL otugki,
	miTai Urpu iziya, kaNTanen, ivaL' ena
	alaiyal vAzi! vENTu, annai! n'am paTappaic
	cUruTaic cilampil, cuTarppU vEyn'tu
	tAm vENTu uruvin aNagkumAr varumE;
10	n'anavin vAyE pOlat tujcun'ark
	kanavu ANTu maruTTalum uNTE; ivaLtAn
	cuTar inRu tamiyaLum panikkum; veruvara
	manRa marAatta kUkai kuzaRinum,
	n'ejcu azin'tu araNam cErum; atantalaip
15	pulik kaNattanna n'Ay toTarviTTu,
	murukan anna cIRRattuk kaTun' tiRal
	en'taiyum illan Aka,
	ajcuvaL allaLO, ivaL itu ceyalE?

159. pAlai

	teN kazi viLain'ta veN kal uppin
	koLLai cARRiya koTu n'uka ozukai
	uranuTaic cuvala pakaTu pala parappi
	umaN uyirttu iRan'ta ozikal aTuppin,
5	vaTi uRu pakazik koTu vil ATavar
	aNagkuTai n'On cilai vaNagka vAgki,
	pal An n'eTu n'irai tazIi, kallena
	aru munai alaitta perum pukal valattar,
	kanai kuraR kaTun' tuTip pANi tUgki,
10	uvalaik kaNNiyar, Un puzukku ayarum
	kavalai, 'kAtalar iRan'tanar' ena, n'ani
	avalam koLLalmA, kAtal am tOzi!
	vicumpin n'al ERu cilaikkum cEN cimai
	n'aRum pUj cAraR kuRum poRaik kuNAatu
15	vil kezu taTak kai vel pOr vAnavan
	mijiRu mUcu kavuLa ciRu kaN yAnait
	toTiyuTait taTa maruppu oTiya n'URi,
	koTumuTi kAkkum kurUukaN n'eTu matil
	cEN viLagku ciRappin AmUr eytinum,
20	ANTu amain'tu uRaiyun'ar allar, n'in
	pUN tAgku Akam porun'tutal maRan'tE.

160. n'eytal

	oTugku Ir Oti n'inakkum aRRO?
	n'aTugkinRu, aLittu, en n'iRai il n'ejcam.
	aTumpu koTi citaiya vAgki, koTug kazik
	kuppai veN maNaR pakkam cErtti,
5	n'iRaic cUl yAmai maRaittu InRu, putaitta
	kOTTu vaTTu uruvin pulavu n'ARu muTTai
	pArppu iTan Akum aLavai, pakuvAyk
	kaNavan Ompum kAnal am cErppan:
	muL uRin ciRattal ajci, mella
10	vAvu uTaimaiyin vaLpin kATTi,
	Et tozil n'avinRa ezil n'aTaip puravi
	cezu n'Irt taN kazi n'In'talin, Azi
	n'utimukam kuRain'ta poti mukiz n'eytal,
	pAmpu uyar talaiyin, cAmpuvana n'ivappa,
15	ira van'tanRAl tiN tEr; karavAtu
	ollena olikkum iLaiyaroTu val vAy
	aravac cIRUr kANa,
	pakal van'tanRAl, pAypari ciRan'tE.

161. pAlai

	vinaivayiR pirital yAvatu? 'vaNar curi
	vaTiyAp pittai, vankaN, ATavar
	aTi amai pakazi Ara vAgki;
	vampalarc cekutta ajcuvaru kavalai,
5	paTumuTai n'acaiiya vAzkkaic cej cevi
	eruvaic cEval INTukiLai payirum
	veruvaru kAnam n'In'ti, poruL purin'tu
	iRappa eNNinar' enpatu ciRappak
	kETTanaLkollO tAnE? tOL tAzpu
10	curumpu uNa olivarum irum pal kUn'tal,
	am mA mEni, Ay izai, kuRumakaL
	cuNagku cUz Akattu aNagku ena urutta
	n'al varal iLa mulai n'anaiya;
	pal itaz uNkaN paran'tana paniE.

162. kuRijci

	koLak kuRaipaTAak kOTu vaLar kuTTattu
	aLappu aritu Akiya kuvai irun' tOnRala,
	kaTal kaNTanna mAka vicumpin
	azaRkoTi anna minnu vacipu n'uTagka,
5	kaTituiTi urumoTu kataz uRai citaRi,
	viLivu iTan aRiyA vAn umiz n'aTu n'AL,
	arug kaTik kAvalar ikazpatam n'Okki,
	pani mayagku acaivaLi alaippa, tan'tai
	n'eTu n'akar oru ciRai n'inRanen Aka;
10	aRal ena avirvarum kUn'tal, malar ena
	vAL mukattu alamarum mA itaz mazaik kaN,
	mukai n'iraittanna mA vIz veN pal,
	n'akai mANTu ilagkum n'alam kezu tuvar vAy,
	kOl amai vizut toTi viLagka vIci,
15	kAl uRu taLirin n'aTugki, AnAtu,
	n'Oy acA vITa muyagkinaL vAymozi
	n'al icai tarUum iravalarkku uLLiya
	n'acai pizaippu aRiyAk kazaltoTi atikan
	kOL aRavu aRiyAp payam kezu palavin
20	vEgkai cErn'ta veRpakam poliya,
	vil kezu tAnaip pacum pUN pANTiyan
	kaLiRu aNi vel koTi kaTuppa, kANvara
	oLiRuvana izitarum uyarn'tu tOnRu aruvi,
	n'Er koL n'eTu varaik kavAan
25	cUraramakaLirin peRaRku ariyOLE.

163. pAlai

	viN atirpu talaiiya, viravu malar kuzaiya,
	taN mazai pozin'ta tAzpeyaR kaTai n'AL,
	emiyam Aka, tuni uLam kUra,
	cenROr uLLic cil vaLai n'ekiza,
5	peru n'acai uLLamoTu varun'acai n'Okki
	viLiyum evvamoTu, 'aLiyaL' ennAtu
	kaLiRu uyirttanna kaN azi tuvalai
	muLari kariyum munpanip pAnAL,
	kunRu n'ekizppu anna kuLir koL vATai!
10	enakkE van'tanai pORi! punaR kAl
	ayir iTu kuppaiyin n'ejcu n'ekizn'tu aviza,
	koTiyOr cenRa tEettu, maTiyAtu
	inaiyai Akic celmati;
	vinai vituppuRun'ar uLLalum uNTE!

164. mullai

	katir kaiyAka vAgki, jAyiRu
	paitu aRat teRutalin, payam karan'tu mARi,
	viTuvAyppaTTa viyan kaN mA n'ilam
	kATu kavin etirak kanai peyal pozitalin;
5	poRi vari ina vaNTu Arppa, pala uTan
	n'aRu vI mullaiyoTu tOnRi tOnRa.
	veRi EnRanRE vI kamaz kAnam.
	'evankol maRRu avar n'ilai?' ena mayagki,
	iku pani uRaikkum kaNNoTu inaipu, Agku
10	innAtu uRaivi tol n'alam peRUum
	itu n'aR kAlam; kaNTicin pakaivar
	matil mukam murukkiya toTi citai maruppin,
	kan'tu kAl ocikkum yAnai,
	vej cina vEn'tan vinai viTappeRinE!

165. pAlai

	kayan' talai maTap piTi payampil paTTena,
	kaLiRu viLippaTutta kampalai verIi,
	oyyena ezun'ta cev vAyk kuzavi
	tAtu eru maRukin mUtUr AgkaN,
5	erumai n'al An peRu mulai mAn'tum
	n'ATu pala iRan'ta n'annarATTikku
	Ayamum aNi izan'tu azugkinRu; tAyum
	'in tOL tArAy, iRIiyar en uyir!' ena,
	kaNNum n'utalum n'Ivi, taNNena,
10	taTavu n'ilai n'occi vari n'izal acaii,
	tAzik kuvaLai vATu malar cUTTi,
	'tarumaNaR kiTan'ta pAvai en
	arumakaLE ena muyagkinaL azumE!

166. marutam

	'n'al maram kuzIiya n'anai mutir cATi
	pal n'AL aritta kOoy uTaippin,
	mayagkumazait tuvalaiyin maRuku uTan panikkum
	pazam pal n'ellin vELUrvAyil,
5	n'aRu virai teLitta n'ARuiNar mAlai,
	poRi vari ina vaNTu Utala kaziyum
	uyar pali peRUum uru kezu teyvam,
	punai irug katuppin n'I kaTuttOLvayin
	anaiyEn Ayin, aNagkuka, en!' ena
10	manaiyOT tERRum makizn'an Ayin,
	yArkol vAzi, tOzi! n'erun'al
	tAr pUN kaLiRRin talaip puNai tazIi,
	vatuvai Ir aNip polin'tu, n'ammoTu,
	putuvatu van'ta kAvirik
15	kOTu tOy malirn'iRai, ATiyOrE?

167. pAlai

	vayagku maNi poruta vakaiamai vanappin
	pacug kAz alkul mAayOLoTu
	vinai vanappu eytiya punai pUj cEkkai,
	viN poru n'eTu n'akart tagki, inRE
5	initu uTan kazin'tanRumannE; n'ALaip
	porun'tAk kaNNEm pulampu van'tu uRutarac
	cEkkuvamkollO, n'ejcE! cAttu eRin'tu
	atar kUTTuNNum aNagkuTaip pakazik
	koTu vil ATavar paTu pakai verIi,
10	Ur ezun'tu ulaRiya pIr ezu mutu pAz,
	murugkai mEyn'ta perug kai yAnai
	verin' Ogku ciRu puRam urija, olki
	iTTikai n'eTuj cuvar viTTam vIzn'tena,
	maNip puRAt tuRan'ta maram cOr mATattu
15	ezutu aNi kaTavuL pOkalin, pullenRu
	ozukupali maRan'ta mezukAp pun tiNaip
	pAl n'Ay tuLLiya paRaikkaT ciRRil,
	kuyil kAz citaiya maNTi, ayil vAyk
	kUr mukac citalai vEyn'ta
20	pOr maTi n'al iRaip potiyilAnE?

168. kuRijci

	yAmam n'ummoTu kazippi, n'Oy mika,
	pani vAr kaNNEm vaikutum; iniyE;
	AnRal vENTum vAn tOy veRpa!
	pal An kunRil paTu n'izal cErn'ta
5	n'al An parappin kuzumUr AgkaN
	koTaik kaTan EnRa kOTA n'ejcin
	utiyan aTTil pOla oli ezun'tu,
	aruvi Arkkum peru varaic cilampin;
	InRaNi irum piTi tazIi, kaLiRu tan
10	tUgkun'aTaik kuzavi tuyil puRagkAppa,
	oTugku aLai pulampap pOki, kaTug kaN
	vAL vari vayap puli kal muzai uraRa,
	kAnavar maTin'ta kagkul;
	mAn atarc ciRu n'eRi varutal, n'IyE?

169. pAlai

	maram talai karin'tu n'ilam payam vATa,
	alagkukatir vEyn'ta azal tikaz n'anan'talai,
	puli tolaittu uNTa perug kaLiRRu ozi Un
	kali kezu maRavar kAzk kOttu ozin'tatai,
5	jeli kOR ciRu tI mATTi, oli tiraik
	kaTal viLai amiztin kaNam cAl umaNar
	cunai koL tIm n'Irc cORRu ulaik kUTTum
	curam pala kaTan'ta n'am vayin paTarn'tu; n'ani
	pacalai pAyn'ta mEniyaL, n'eTitu n'inain'tu,
10	cel katir mazukiya pulampu koL mAlai
	mel viral cErttiya n'utalaL, malkik
	kayal umiz n'Irin kaN pani vAra,
	perun' tOL n'ekizn'ta cellaloTu
	varun'tumAl, aLiyaL, tirun'tizaitAnE!

170. n'eytal

	kAnalum kazaRAtu; kaziyum kURAtu;
	tEn imir n'aRu malarp punnaiyum moziyAtu;
	oru n'in allatu piRitu yAtum ilanE;
	irug kazi malarn'ta kaN pOl n'eytal
5	kamaz itaz n'ARRam amiztu ena n'acaii,
	taN tAtu Utiya vaNTinam kaLi ciRan'tu,
	paRaii taLarum tuRaivanai, n'IyE,
	collal vENTumAl alava! palkAl
	kaitaiam paTucinai evvamoTu acAam
10	kaTaR ciRu kAkkai kAmar peTaiyoTu
	kOTTumIn vazagkum vETTam maTi parappin
	veL iRAk kanavum n'aLLen yAmattu,
	'n'in uRu vizumam kaLain'tOL
	tan uRu vizumam n'In'tumO!' enavE.

171. pAlai

	'n'utalum n'uN pacappu ivarum; tOLum
	akal malai iRumpin Ayn'tu koNTu aRutta
	paNai ezil aziya vATum; n'ALum
	n'inaivalmAtu avar paNpu' enRu OvAtu
5	inaiyal vAzi, tOzi! puNarvar
	ilagku kOl Ay toTi n'ekiza, poruL purin'tu
	alan'talai jemaiyattu atar aTain'tirun'ta
	mAl varaic cIRUr maruL pal mAkkaL
	kOL val ERRai Ocai OrmAr,
10	tiruttik koNTa ampinar, n'On cilai
	eruttattu irIi, iTam toRum paTartalin,
	kIzppaTu tAram uNNA, mER cinaip
	pazam pOR cERRa tIm puzal uNIiya,
	karug kOTTu iruppai Urum
15	perug kai eNkin curan iRan'tOrE!

172. kuRijci

	vAraNam uraRum n'Ir tikaz cilampil
	piracamoTu viraiiya vayagku veL aruvi
	in icai imiz iyam kaTuppa, immenak
	kal mukai viTar akam cilampa, vIzum
5	kAmpu talaimaNan'ta Ogku malaic cAral;
	irumpu vaTittanna karug kaik kAnavan
	viri malar marAam porun'ti, kOl terin'tu,
	vari n'utal yAnai aru n'iRattu azutti,
	ikal aTu munpin veN kOTu koNTu, tan
10	pul vEy kurampai pulara UnRi,
	munRil n'ITiya muzavu uRaz palavil,
	pizi makiz uvakaiyan, kiLaiyoTu kali ciRan'tu,
	cAn'ta jekiziyin Un puzukku ayarum
	kunRa n'ATa! n'I anpilai Akutal
15	aRiyEn yAn; aHtu aRin'tanen Ayin
	aNi izai, uNkaN, Ay itazk kuRumakaL
	maNi Er mAN n'alam citaiya,
	pon n'Er pacalai pAvinRumannE!

173. pAlai

	'aRam talaippiriyAtu ozukalum, ciRan'ta
	kELir kETu pala UnRalum, n'ALum
	varun'tA uLLamoTu irun'tOrkku il' enac
	ceyvinai purin'ta n'ejcinar, 'n'aRu n'utal
5	mai Ir Oti! arum paTar uzattal
	cil n'AL tAgkalvENTum' enRu, n'in
	n'al mAN el vaLai tiruttinar Ayin,
	varuvar vAzi, tOzi! pala puri
	vAr kayiRRu ozukai n'On cuvaR koLIi,
10	pakaTu tuRai ERRattu umaN viLi verIi,
	uzaimAn am piNai inan irin'tu OTa,
	kATu kavin aziya uraii, kOTai
	n'inRu tina viLin'ta, am paNai, n'eTu vEyk
	kaN viTat teRikkum maNNA muttam
15	kazagku uRaz tOnRala, pazag kuzit tAam
	in kaLi n'aRavin iyal tEr n'annan
	viN poru n'eTu varaik kavAan
	pon paTu marugkin malai iRan'tOrE.

174. mullai

	'iru peru vEn'tar mARu koL viyan kaLattu,
	oru paTai koNTu, varupaTai peyarkkum
	celvam uTaiyOrkku n'inRanRu viRal' ena,
	pUk kOL Eya taNNumai vilakkic
5	celvEm Atal aRiyAL, mullai
	n'Er kAl mutu koTi kuzaippa, n'Ir corin'tu,
	kAlai vAnattuk kaTug kuraR koNmU
	muzagkutoRum kaiyaRRu, oTugki, n'ap pulan'tu,
	pazagkaN koNTa pacalai mEniyaL,
10	yAgku AkuvaLkol tAnE vEgkai
	UzuRu n'aRu vI kaTuppak kEz koLa,
	Akattu arumpiya mAcu aRu cuNagkinaL,
	n'al maNal viyaliTai n'aTan'ta
	cil mel otukkin, mAayOLE?

175. pAlai

	vIgku viLimpu urIiya vicai amai n'On cilai
	vAgku toTai pizaiyA vankaN ATavar
	viTutoRum viLikkum vev vAy vALi
	ARu cel vampalar uyir celap peyarppin,
5	pARu kiLai payirn'tu paTumuTai kavarum
	vej curam iRan'ta kAtalar n'ejcu uNa
	ariya vajcinam colliyum, pal mAN
	teri vaLai munkai paRRiyum, 'vinaimuTittu
	varutum' enRanar anRE tOzi!
10	kAl iyal n'eTun' tErk kai vaN ceziyan
	AlagkAnattu amar kaTan'tu uyartta
	vElinum pal Uz minni, muracu ena
	mA iru vicumpil kaTi iTi payiRRi,
	n'Er katir n'iraitta n'Emiam celvan
15	pOr aTagku akalam porun'tiya tArpOl,
	tiruvil tEettuk kulaii, uru kezu
	maN payam pUppap pAay,
	taN peyal ezili tAzn'ta pOztE?

176. marutam

	kaTal kaNTanna kaN akan parappin
	n'ilam paka vIzn'ta vEr mutir kizagkin
	kazai kaNTanna tUmpuTait tiraL kAl,
	kaLiRRuc cevi anna pAcaTai marugkil,
5	kazu n'ivan'tanna kozu mukai iTai iTai
	muRuval mukattin pal malar tayagka,
	pUtta tAmaraip puL imiz pazanattu,
	vEppu n'anai anna n'eTug kaN n'IrjeNTu
	irai tEr veN kuruku ajci, ayalatu
10	olitta pakanRai iruj cERRu aLLal,
	titalaiyin varippa OTi, virain'tu tan
	n'Ir mali maN aLaic ceRiyum Ura!
	manai n'aku vayalai maran ivar kozug koTi
	ari malar AmpaloTu Artazai taii,
15	vizavu ATu makaLiroTu tazUu aNip polin'tu,
	malar Er uNkaN mAN izai munkaik
	kuRun' toTi tuTakkiya n'eTun' toTar viTuttatu
	uTanRanaL pOlum, n'in kAtali? em pOl
	pul uLaik kuTumip putalvaR payan'tu,
20	n'elluTai n'eTu n'akar n'in inRu uRaiya,
	enna kaTattaLO, maRRE? tan mukattu
	ezutu ezil citaiya azutanaL Egki,
	aTittena urutta tittip pal Uz
	n'oTittenac civan'ta mel viral tirukupu,
25	kUrn'unai mazukiya eyiRRaL
	Ur muzutum n'uvalum n'iR kANiya cenmE.

177. pAlai

	'tol n'alam citaiyac cAay, alkalum,
	innum vArAr; ini evan ceyku?' enap
	perum pulampuRutal Ompumati ciRu kaN
	irum piTit taTak kai mAna, n'ey arun'tu
5	orugku piNittu iyanRa n'eRi koL aimpAl
	tEm kamaz veRi malar peymmAr, kANpin
	kazai amal cilampin vazai talai vATak
	katir katam kaRRa E kal n'eRiyiTai,
	paig koTip pAkaR ceg kani n'acaii,
10	kAna majjaik kamajcUl mAp peTai
	ayir yARRu aTaikarai vayirin n'aralum
	kATu iRan'tu akanROr n'ITinar Ayinum,
	vallE varuvarpOlum veN vEl
	ilai n'iRam peyara Occi, mARROr
15	malai maruL yAnai maNTuamar ozitta
	kazaR kAl paNNan kAviri vaTavayin
	n'izaR kayam tazIiya n'eTug kAl mAvin
	taLir Er Akam takai peRa mukain'ta
	aNagkuTai vana mulait tAaya n'in
20	cuNagkiTai varitta toyyilai n'inain'tE.

178. kuRijci

	vayirattanna vai En'tu maruppin,
	vetir vEr anna parUu mayirp panRi
	paRaik kaN anna n'iRaic cunai paruki,
	n'Ilattanna akal ilaic cEmpin
5	piNTam anna kozug kizagku mAn'ti,
	piTi maTin'tanna kal micai Uz izipu,
	yARu cErn'tanna URu n'Irp paTAarp
	paim putal n'aLi cinaik kuruku irun'tanna,
	vaN piNi avizn'ta veN kUtALattu
10	alagku kulai alari tINTi, tAtu uka,
	pon urai kaTTaLai kaTuppak kANvara,
	kiLai amal ciRu tinai viLai kural mEyn'tu,
	kaN initu paTukkum n'al malai n'ATanoTu
	uNarn'tanai puNarn'ta n'Iyum, n'in tOT
15	paNaik kavin aziyAtu tuNaip puNarn'tu, enRum,
	taval il ulakattu uRaiiyarO tOzi
	'ellaiyum iravum ennAtu, kallenak
	koNTal vAn mazai pozin'ta vaikaRait
	taN pani aRciram tamiyOrkku aritu' ena,
20	kanavinum pirivu aRiyalanE; atantalai
	mun tAn kaNTa jAnRinu m
	pin peritu aLikkum, tan paNpinAnE.

179. pAlai

	viN tOy cimaiya viRal varaik kavAan,
	veNtEr OTum kaTam kAy marugkil,
	tunai eri paran'ta tun arum viyan kATTu,
	ciRu kaN yAnai n'eTug kai n'ITTi
5	vAn vAy tiRan'tum vaN punal peRAatu,
	kAn pulan'tu kaziyum kaN akan parappin
	viTu vAyc ceg kaNaik koTu vil ATavar
	n'al n'ilai poRitta kal n'ilai atara,
	arampu koL pUcal kaLaiyun'ark kANAc
10	curam cela virumpinir Ayin in n'akai,
	murun'tu enat tiraNTa muL eyiRRut tuvar vAy,
	kuvaLai n'AL malar puraiyum uNkaN, im
	mati Er vAL n'utal pulampa,
	pati peyarn'tu uRaital ollumO, n'umakkE?

180. n'eytal

	n'akai n'ani uTaittAl tOzi! takai mika,
	kOtai AyamoTu kuvavu maNal ERi,
	vI tatai kAnal vaNTal ayara,
	kataz parit tiN tEr kaTaii van'tu,
5	taN kayattu amanRa oN pUg kuvaLai
	arumpu alaittu iyaRRiya curumpu Ar kaNNi
	pinnup puRam tAzak konnE cUTTi,
	n'al varal iLa mulai n'Okki, n'eTitu n'inain'tu,
	n'illAtu peyarn'tanan, oruvan; ataRkE
10	pulavu n'ARu irug kazi tuzaii, pala uTan
	puL iRai koNTa muLLuTai n'eTun' tOTTut
	tAzai maNan'tu jAzaloTu kezIi,
	paTappai n'inRa muTat tAT punnaip
	pon n'Er n'uN tAtu n'Okki,
15	ennum n'Okkum, iv azugkal UrE.

181. pAlai

	tun arug kAnamum tuNital ARRAy,
	pin n'inRu peyarac cUzn'tanaiAyin,
	en n'ilai uraimO n'ejcE! onnAr
	Ompu araN kaTan'ta vIgku perun' tAnai
5	aTu pOr mijili ceru vEl kaTaii,
	muruku uRaz munpoTu porutu kaLam civappa,
	Aay eyinan vIzn'tena, jAyiRRu
	oN katir uruppam putaiya OrAgku
	vampap puLLin kampalaip perun' tOTu
10	vicumpiTai tUra ATi, mocin'tu uTan,
	pU viri akan tuRaik kaNai vicaik kaTu n'Irk
	kAvirip pEr yARRu ayir koNTu INTi,
	ekkar iTTa kuppai veN maNal
	vaippin yANar vaLam kezu vEn'tar
15	jAlam n'ARum n'alam kezu n'al icai,
	n'An maRai mutu n'Ul mukkaT celvan,
	AlamuRRam kavin peRat taiiya
	poykai cUzn'ta pozil manai makaLir
	kaicey pAvait tuRaikkaN iRukkum
20	makara n'eRRi vAn tOy puricaic
	cikaram tOnRAc cEN uyar n'al il
	pukAar n'al n'ATTatuvE pakAar
	paNTam n'ARum vaNTu aTar aimpAl,
	paNait takait taTaiiya kANpu in men tOL,
25	aNagkucAl, arivai irun'ta
	maNam kamaz maRukin maNaR perug kunRE.

182. kuRijci

	pUg kaN vEgkaip pon iNar milain'tu,
	vAgku amai n'On cilai eruttattu irIi,
	tIm pazap palavin cuLai viLai tERal
	vILai ampin iLaiyaroTu mAn'ti,
5	OTTu iyal pizaiyA vaya n'Ay piRpaTa,
	vETTam pOkiya kuRavan kATTa
	kuLavit taN putal kurutiyoTu tuyal vara,
	muLavumAt tolaiccum kunRa n'ATa!
	aravu eRi urumOTu onRik kAl vIzttu
10	uravu mazai pozin'ta pAnAT kagkul,
	taniyai van'ta ARu n'inain'tu, alkalum,
	paniyoTu kaluzum ivaL kaNNE; atanAl,
	kaTum pakal varutal vENTum teyya
	atir kural mutu kalai kaRi muRi munaii,
15	uyarcimai n'eTug kOTTu ukaLa, ukka
	kamaz itaz alari tAay vElan
	veRi ayar viyan kaLam kaTukkum
	peru varai n'aNNiya cAralAnE.

183. pAlai

	'kuvaLai uNkaN kaluzavum, tirun'tizait
	titalai alkul av vari vATavum,
	attam Ar azuvam n'at tuRan'tu aruLAr
	cenRu cEN iTaiyar Ayinum, n'anRum
5	n'ITalar' enRi tOzi! pATu AnRu
	panit tuRaip perug kaTal iRan'tu, n'Ir paruki,
	kuvavut tirai arun'tu koLLaiya kuTakku Erpu,
	vayavup piTi inattin vayinvayin tOnRi,
	irug kiLaik koNmU orugkuTan tuvanRi,
10	kAlai van'tanRAl kArE mAlaik
	kuLir koL piTavin kUr mukai alari
	vaNTu vAy tiRakkum taNTA n'ARRam
	kUtir aRcirattu Utai tURRa,
	pani alaik kalagkiya n'ejcamoTu
15	varun'tuvam allamO, pirin'ticinOr tiRattE?

184. mullai

	kaTavuT kaRpoTu kuTikku viLakku Akiya
	putalvaR payan'ta pukaz miku ciRappin
	n'annarATTikku anRiyum, enakkum
	initu AkinRAl; ciRakka, n'in AyuL!
5	arun' tozil muTitta cemmal uLLamoTu
	curumpu imir malara kAnam piRpaTa,
	veN piTavu avizn'ta vI kamaz puRavil
	kuNTaik kOTTa kuRu muL kaLLip
	pun talai putaitta kozug koTi mullai
10	Ar kazal putup pU uyirppin n'Ikki,
	teL aRal parukiya tirimaruppu eziR kalai
	puLLi am piNaiyoTu vatiyum AgkaN,
	kOTuTaik kaiyar, tuLar eRi vinaijar,
	ariyal Arkaiyar, viLaimakiz tUgka,
15	celkatir mazukiya uruva jAyiRRuc
	cekkar vAnam cenRa pozutil,
	kaR pAl aruviyin olikkum n'al tErt
	tAr maNi pala uTan iyampa
	cIr miku kurucil! n'I van'tu n'inRatuvE.