6. marutam

	ari pey cilampin Ampal am toTalai,
	aram pOz av vaLaip polin'ta munkai,
	izai aNi paNait tOL, aiyai tan'tai,
	mazai vaLam tarUum mA vaN tittan,
5	piNTa n'ellin uRan'tai AgkaN
	kazai n'ilai peRAak kAviri n'Ittam,
	kuzai mAN oL izai n'I veyyOLoTu,
	vEza veN puNai tazIi, pUziyar
	kayam n'ATu yAnaiyin mukan amarn'tAagku,
10	En'tu ezil Akattup pUn' tAr kuzaiya,
	n'erun'al ATinai, punalE; inRu van'tu,
	'Aka vana mulai arumpiya cuNagkin,
	mAcu il kaRpin, putalvan tAy!' ena,
	mAyap poymmozi cAyinai payiRRi, em
15	mutumai eLLal; aHtu amaikum tilla!
	cuTarp pUn' tAmarai n'Ir mutir pazanattu,
	am tUmpu vaLLai Ay koTi mayakki,
	vALai mEyn'ta vaL eyiRRu n'Irn'Ay,
	muL araip pirampin mUtaril ceRiyum,
20	pal vEl matti, kazAar anna em
	iLamai cenRu tavat tollaHtE;
	inimai evan ceyvatu, poymmozi, emakkE?

62. kuRijci

	ayattu vaLar paijcAy murun'tin anna
	n'akaip polin'tu ilagkum eyiRu kezu tuvar vAy,
	Akattu arumpiya mulaiyaL, paNait tOL,
	mAt tAT kuvaLai malar piNaittanna
5	mA itaz mazaik kaN, mAayOLoTu
	pEyum aRiyA maRai amai puNarcci
	pUcal tuTiyin puNarpu pirin'tu icaippa,
	karan'ta karappoTu n'Am celaRku arumaiyin,
	kaTum punal malin'ta kAvirip pEriyARRu
10	n'eTuj cuzi n'Ittam maNNun'aL pOla,
	n'aTugku ajar tIra muyagki, n'erun'al
	Akam aTaitan'tOLE ven vER
	kaLiRu kezu tAnaip poRaiyan kolli
	oLiRu n'Ir aTukkattu viyal akam poRpak
15	kaTavuL ezutiya pAvaiyin,
	maTavatu mANTa mAayOLE.

76. marutam

	maN kanai muzavoTu makiz mikat tUgka,
	taN tuRai Uran em cEri van'tena
	in kaTug kaLLin aHtai kaLiRRoTu
	n'an kalan Iyum n'AL makiz irukkai
5	avai puku porun'ar paRaiyin, AnAtu,
	kazaRupa enpa, avan peNTir; 'an'til,
	kaccinan, kazalinan, tEm tAr mArpinan,
	vakai amaip polin'ta, vanappu amai, teriyal,
	curiyal am porun'anaik kANTirO? ena,
10	Atiman'ti pEtuRRu inaiya,
	ciRai paRain'tu uraiic cegkuNakku ozukum
	am taN kAviri pOla,
	koNTu kai valittal cUzn'ticin, yAnE.

116. marutam

	eri akain'tanna tAmarai iTai iTai
	arin'tu kAl kuvitta cen' n'el vinaijar
	kaL koNTu maRukum cAkATu aLaRRu uRin,
	Ay karumpu aTukkum pAypunal Ura!
5	periya n'AN ilaimanRa; 'pori enap
	punku aviz akantuRaip poliya, oL n'utal,
	n'aRu malarkkAN varum kuRum pal kUn'tal,
	mAzai n'Okkin, kAz iyal vana mulai,
	eHkuTai ezil n'alattu, oruttiyoTu n'erun'ai
10	vaikupunal ayarn'tanai' enpa; atuvE,
	poy puRam potin'tu, yAm karappavum, kaiyikan'tu
	alar AkinRAl tAnE; malartAr,
	mai aNi yAnai, maRap pOrc ceziyan
	poyyA vizavin kUTaR paRan'talai,
15	uTan iyain'tu ezun'ta iru peru vEn'tar
	kaTal maruL perum paTai kalagkat tAkki,
	iragkuicai muracam oziya, paran'tu avar
	OTupuRam kaNTa jAnRai,
	ATu koL viyan kaLattu Arppinum peritE.

122. kuRijci

	irum pizi makAar iv azugkal mUtUr
	vizavu inRuAyinum tujcAtu Akum;
	mallal AvaNa maRuku uTan maTiyin,
	val uraik kaTuj col annai tujcAL;
5	piNi kOL aruj ciRai annai tujcin,
	tujcAk kaNNar kAvalar kaTukuvar;
	ilagkuvEl iLaiyar tujcin, vai eyiRRu
	valam curit tOkai jALi makizum;
	ara vAy jamali makizAtu maTiyin,
10	pakal uru uRaza n'ilavuk kAnRu vicumpin
	akalvAy maNTilam n'inRu viriyummE;
	tigkaL kal cErpu kanai iruL maTiyin,
	il eli valci val vAyk kUkai
	kazutu vazagku yAmattu azitakak kuzaRum;
15	vaLaikkaN cEval vALAtu maTiyin,
	manaic ceRi kOzi mAN kural iyampum;
	ellAm maTin'takAlai, oru n'AL
	n'illA n'ejcattu avar vAralarE; atanAl,
	ari pey puTTil Arppap pari ciRan'tu,
20	Ati pOkiya pAypari n'an mA
	n'occi vElit tittan uRan'taik
	kal mutir puRagkATTu anna
	pal muTTinRAl tOzi! n'am kaLavE.

125. pAlai

	aram pOz av vaLai tOL n'ilai n'ekiza,
	n'irampA vAzkkai n'Ertal vENTi
	irag kAz anna arumpu mutir Igkai
	Ali anna vAl vI tAay,
5	vai vAl Oti maiaNal Eyppat
	tAtu uRu kuvaLaippOtu piNi aviza,
	paTAap paig kaN pA aTik kaya vAyk
	kaTAam mARiya yAnai pOla,
	peytu vaRitu Akiya pogku celaR koNmU
10	mai tOy vicumpin mAtirattu uzitara,
	pani aTUu n'inRa pAnAT kagkul
	taniyOr matukai tUkkAy, taNNena,
	muniya alaitti, muraN il kAlai;
	kaitozu marapin kaTavuL cAnRa
15	ceyvinai marugkin cenROr val varin
	viriuLaip polin'ta pariyuTai n'al mAn
	veruvaru tAnaiyoTu vENTu pulattu iRutta
	peru vaLak karikAl munnilaic cellAr,
	cUTA vAkaip paRan'talai, ATu peRa
20	onpatu kuTaiyum n'an pakal ozitta
	pITu il mannar pOla,
	OTuvai mannAl vATai! n'I emakkE.

135. pAlai

	titalai mAmai taLir vanappu azugka,
	putal ivar pIrin etir malar kaTuppap
	pacalai pAyn'ta n'utalEn Aki,
	ezutu ezil mazaik kaN kaluza, n'Oy kUrn'tu,
5	Atiman'tiyin aRivu piRituAki,
	pEtuRRicinE kAtal am tOzi!
	kAykatir tirukalin kanain'tu kAl kaTuki,
	ATutaLir iruppaik kUTu kuvi vAn pU,
	kOTu kaTai kazagkin, aRaimicait tAam
10	kATu iRan'tanarE, kAtalar; aTupOr,
	vIyA vizup pukaz, viN tOy viyan kuTai,
	Ir ezu vELir iyain'tu orugku eRin'ta
	kazuvuL kAmUr pOlak
	kalagkinRumAtu, avart teLin'ta en n'ejcE.

142. kuRijci

	ilamalar anna am cen' n'Avin
	pulam mIkkURum puraiyOr Etta,
	palar mEn' tOnRiya kavi kai vaLLal
	n'iRaiarun' tAnai velpOr mAn'taram
5	poRaiyan kaTugkOp pATic cenRa
	kuRaiyOr koLkalam pOla, n'anRum
	uva ini vAziya, n'ejcE! kAtali
	muRaiyin vazAatu ARRip peRRa
	kaRai aTi yAnai n'annan pAzi,
10	UTTu aru marapin ajcu varu pEeyk
	kUTTu etirkoNTa vAy mozi mijili
	puLLiRku Emam Akiya perum peyar
	veLLat tAnai atikaR konRu, uvan'tu
	oL vAL amalai ATiya jATpin,
15	palar aRivuRutal ajci, paippaya,
	n'Irt tiraL kaTukkum mAcu il veLLic
	cUrppuRu kOl vaLai ceRitta munkai
	kuRai aRal anna irum pal kUn'tal,
	iTan il ciRu puRattu izaiyoTu tuyalvara,
20	kaTal mIn tujcum n'aLLen yAmattu,
	uruvu kiLar Ovinaip polin'ta pAvai
	iyal kaRRanna otukkinaL van'tu,
	peyal alaik kalagkiya malaip pUg kOtai
	iyal eRi ponnin kogku cOrpu uRaippa,
25	toTikkaN vaTukkoLa muyagkinaL;
	vaTippu uRu n'arampin tIviya mozin'tE.

148. kuRijci

	panait tiraL anna paru Er eRuzt taTak kai,
	kolaic cinam tavirA matanuTai munpin,
	vaNTu paTu kaTAattu, uyar maruppu, yAnai
	taN kamaz cilampin maram paTat tolaicci;
5	uRu puli uraRak kutti; viRal kaTin'tu;
	ciRu tinaip perum punam vavvum n'ATa!
	kaTum parik kutirai Aay eyinan
	n'eTun' tEr jimiliyoTu porutu, kaLam paTTena,
	kANiya cellAk kUkai n'ANi,
10	kaTum pakal vazagkAtAagku, iTumpai
	peritAl amma ivaTkE; atanAl
	mAlai, varutal vENTum cOlai
	muLai mEy perug kaLiRu vazagkum
	malai mutal aTukkatta ciRu kal ARE.

152. kuRijci

	n'ejcu n'aTugku arum paTar tIra van'tu,
	kunRuzai n'aNNiya cIRUr AgkaN
	celIiya peyarvOL vaNar curi aimpAl
	n'uN kOl akavun'arp puran'ta pEr icai,
5	cinam kezu tAnai, tittan veLiyan,
	iragkun'Irp parappin kAnal am perun' tuRai,
	tanam taru n'an kalam citaiyat tAkkum
	ciRu veL iRavin kuppai anna
	uRu pakai tarUum moym mUcu piNTan
10	munai muraN uTaiyak kaTan'ta ven vEl,
	icai n'al Ikaik kaLiRu vIcu vaN makiz,
	pArattut talaivan, Ara n'annan;
	Ezil n'eTu varaip pAzic cilampil
	kaLi mayiR kalAvattanna. tOLE
15	val vil iLaiyar perumakan; n'aLLi
	cOlai aTukkattuc curumpu uNa virin'ta
	kaTavuT kAn'taLuLLum, pala uTan
	iRumpUtu kajaliya Aymalar n'ARi,
	vallinum, vallAr Ayinum, cenROrkkuc
20	cAl aviz n'eTug kuzi n'iRaiya vIcum,
	mAal yAnai Aay kAnattut
	talaiyARRu n'ilaiiya cEyuyar piRagkal
	vEy amaik kaN iTai puraii,
	cEya Ayinum, n'aTugku tuyar tarumE.

162. kuRijci

	koLak kuRaipaTAak kOTu vaLar kuTTattu
	aLappu aritu Akiya kuvai irun' tOnRala,
	kaTal kaNTanna mAka vicumpin
	azaRkoTi anna minnu vacipu n'uTagka,
5	kaTituiTi urumoTu kataz uRai citaRi,
	viLivu iTan aRiyA vAn umiz n'aTu n'AL,
	arug kaTik kAvalar ikazpatam n'Okki,
	pani mayagku acaivaLi alaippa, tan'tai
	n'eTu n'akar oru ciRai n'inRanen Aka;
10	aRal ena avirvarum kUn'tal, malar ena
	vAL mukattu alamarum mA itaz mazaik kaN,
	mukai n'iraittanna mA vIz veN pal,
	n'akai mANTu ilagkum n'alam kezu tuvar vAy,
	kOl amai vizut toTi viLagka vIci,
15	kAl uRu taLirin n'aTugki, AnAtu,
	n'Oy acA vITa muyagkinaL vAymozi
	n'al icai tarUum iravalarkku uLLiya
	n'acai pizaippu aRiyAk kazaltoTi atikan
	kOL aRavu aRiyAp payam kezu palavin
20	vEgkai cErn'ta veRpakam poliya,
	vil kezu tAnaip pacum pUN pANTiyan
	kaLiRu aNi vel koTi kaTuppa, kANvara
	oLiRuvana izitarum uyarn'tu tOnRu aruvi,
	n'Er koL n'eTu varaik kavAan
25	cUraramakaLirin peRaRku ariyOLE.

178. kuRijci

	vayirattanna vai En'tu maruppin,
	vetir vEr anna parUu mayirp panRi
	paRaik kaN anna n'iRaic cunai paruki,
	n'Ilattanna akal ilaic cEmpin
5	piNTam anna kozug kizagku mAn'ti,
	piTi maTin'tanna kal micai Uz izipu,
	yARu cErn'tanna URu n'Irp paTAarp
	paim putal n'aLi cinaik kuruku irun'tanna,
	vaN piNi avizn'ta veN kUtALattu
10	alagku kulai alari tINTi, tAtu uka,
	pon urai kaTTaLai kaTuppak kANvara,
	kiLai amal ciRu tinai viLai kural mEyn'tu,
	kaN initu paTukkum n'al malai n'ATanoTu
	uNarn'tanai puNarn'ta n'Iyum, n'in tOT
15	paNaik kavin aziyAtu tuNaip puNarn'tu, enRum,
	taval il ulakattu uRaiiyarO tOzi
	'ellaiyum iravum ennAtu, kallenak
	koNTal vAn mazai pozin'ta vaikaRait
	taN pani aRciram tamiyOrkku aritu' ena,
20	kanavinum pirivu aRiyalanE; atantalai
	mun tAn kaNTa jAnRinu m
	pin peritu aLikkum, tan paNpinAnE.

181. pAlai

	tun arug kAnamum tuNital ARRAy,
	pin n'inRu peyarac cUzn'tanaiAyin,
	en n'ilai uraimO n'ejcE! onnAr
	Ompu araN kaTan'ta vIgku perun' tAnai
5	aTu pOr mijili ceru vEl kaTaii,
	muruku uRaz munpoTu porutu kaLam civappa,
	Aay eyinan vIzn'tena, jAyiRRu
	oN katir uruppam putaiya OrAgku
	vampap puLLin kampalaip perun' tOTu
10	vicumpiTai tUra ATi, mocin'tu uTan,
	pU viri akan tuRaik kaNai vicaik kaTu n'Irk
	kAvirip pEr yARRu ayir koNTu INTi,
	ekkar iTTa kuppai veN maNal
	vaippin yANar vaLam kezu vEn'tar
15	jAlam n'ARum n'alam kezu n'al icai,
	n'An maRai mutu n'Ul mukkaT celvan,
	AlamuRRam kavin peRat taiiya
	poykai cUzn'ta pozil manai makaLir
	kaicey pAvait tuRaikkaN iRukkum
20	makara n'eRRi vAn tOy puricaic
	cikaram tOnRAc cEN uyar n'al il
	pukAar n'al n'ATTatuvE pakAar
	paNTam n'ARum vaNTu aTar aimpAl,
	paNait takait taTaiiya kANpu in men tOL,
25	aNagkucAl, arivai irun'ta
	maNam kamaz maRukin maNaR perug kunRE.

186. marutam

	vAnam vENTA vaRan il vAzkkai
	n'On jAN vinaijar kOL aRin'tu Irkkum
	mIn mutir ilajcik kalitta tAmarai
	n'Irmicai n'ivan'ta n'eTun' tAL akal ilai
5	irug kayam tuLagka, kAl uRutoRum
	perug kaLiRRuc ceviyin alaikkum UranoTu
	ezun'ta kauvaiyO peritE; n'aTpE,
	kozug kOl vEzattup puNai tuNaiyAkap
	punal ATu kENmai anaittE; avanE,
10	oN toTi makaLir paNTai yAz pATa,
	Irn' taN muzavin eRikuNil vitirppa,
	taN n'aRuj cAn'tam kamazum tOL maNan'tu,
	innum piRaL vayinAnE; manaiyOL
	emmoTu pulakkum enpa; ven vEl,
15	mAri ampin, mazaittOR pazaiyan
	kAviri vaippin pOor anna, en
	ceRivaLai uTaittalO ilenE; uritinin
	yAm tan pakaiyEm allEm; cErn'tOr
	tiru n'utal pacappa n'Igkum
20	kozun'anum cAlum, tan uTan uRai pakaiyE.

196. marutam

	n'eTug koTi n'uTagkum n'aRavu mali pAkkattu,
	n'AL tuRaippaTTa mOTTu iru varAal
	tuTikkaN kozug kuRai n'oTuttu, uNTu ATi,
	vETTam maRan'tu, tujcum kozun'arkkup pATTi
5	Ampal akal ilai, amalai vej cORu
	tIm puLip pirampin tiraLkani peytu,
	viTiyal vaikaRai iTUum Ura!
	toTukalam; kuRuka vAral tan'tai
	kaN kavin azittatan tappal, teRuvara,
10	onRumozik kOcark konRu, muraN pOkiya,
	kaTun' tErt titiyan azun'tai, koTug kuzai
	annimijiliyin iyalum
	n'in n'alat takuviyai muyagkiya mArpE.

198. kuRijci

	'kURuvamkollO? kURalamkol?' enak
	karan'ta kAmam kain'n'iRukkallAtu,
	n'ayan'tu n'Am viTTa n'al mozi n'ampi,
	arai n'AL yAmattu vizu mazai karan'tu;
5	kAr virai kamazum kUn'tal, tU vinai
	n'uN n'Ul Akam porun'tinaL, veRpin
	iLa mazai cUzn'ta maTa mayil pOla,
	vaNTu vazip paTara, taN malar vEyn'tu,
	vil vakuppuRRa n'al vAgku kuTaic cUl
10	am cilampu oTukki ajcinaL van'tu,
	tujcu Ur yAmattu muyagkinaL, peyarvOL,
	AnRa kaRpin cAnRa periyaL,
	am mA arivaiyO allaL; tenAatu
	Aay n'al n'ATTu aNagkuTaic cilampil,
15	kaviram peyariya uru kezu kavAan,
	Er malar n'iRai cunai uRaiyum
	cUrmakaLmAtO ennum en n'ejcE!

208. kuRijci

	yAma iravin n'eTug kaTai n'inRu,
	tEm mutir cimaiyak kunRam pATum
	n'uN kOl akavun'ar vENTin, veN kOTTu
	aNNal yAnai Iyum vaN makiz
5	veLiyan vENmAn Aay eyinan,
	aLi iyal vAzkkaip pAzip paRan'talai,
	izai aNi yAnai iyal tEr mijiliyoTu
	n'aNpakal uRRa ceruvil puN kUrn'tu,
	oL vAL mayagku amar vIzn'tena, 'puL orugku
10	am kaN vicumpin viLagku jAyiRRu
	oN katir teRAmai, ciRakarin kOli,
	n'izal ceytu uzaRal kANEn, yAn' enap
	paTukaLam kANTalcellAn, cinam ciRan'tu,
	uru vinai n'annan, aruLAn, karappa,
15	peru vituppuRRa pal vEL makaLir
	kurUup pUm pain' tAr arukkiya pUcal,
	vacai viTak kaTakkum vayagku perun' tAnai
	akutai kiLaitan'tAgku, miku peyal
	uppuc ciRai n'illA veLLam pOla,
20	n'ANu varai n'illAk kAmam n'aNNi,
	n'alkinaL, vAziyar, van'tE Ori
	pal pazap palavin payam kezu kollik
	kAr malar kaTuppa n'ARum,
	Er n'uN, Oti mAayOLE!

212. kuRijci

	tA il n'al pon taiiya pAvai
	viN tavaz iLa veyiR koNTu n'inRanna,
	miku kavin eytiya, tokukural aimpAl,
	kiLaiaril n'ANaR kizagku maNaRku InRa
5	muLai Oranna muL eyiRRut tuvar vAy,
	n'ayavan taivarum cevvazi n'al yAz
	icai Orttanna in tIm kiLavi,
	aNagku cAl arivaiyai n'acaii, perug kaLiRRu
	inam paTi n'Irin kalagkiya pozutil,
10	peRal arug kuraiyaL ennAy, vaikalum,
	innA aruj curam n'In'ti, n'IyE
	ennai innaR paTuttanai; minnu vacipu
	uravuk kAr kaTuppa maRali main'tuRRu,
	viravu mozik kaTTUr vENTuvazik koLIi,
15	paTai n'ilA ilagkum kaTal maruL tAnai
	maTTu aviz teriyal maRap pOrk kuTTuvan
	poru muraN peRAatu vilagku cinam ciRan'tu,
	ceruc cey munpoTu mun'n'Ir muRRi,
	Ogkutiraip pauvam n'Igka OTTiya
20	n'Ir mAN eHkam n'iRattuc cenRu azun'tak
	kUr matan aziyarO n'ejcE! AnAtu
	eLiyaL allOT karuti,
	viLiyA evvam talait tan'tOyE.

222. kuRijci

	vAn uRa n'ivan'ta n'Il n'iRap peru malaik
	kAna n'ATan uRIiya n'Oykku, en
	mEni Ay n'alam tolaitalin, moziven;
	muzavu mukam pularAk kali koL AgkaN,
5	kazAarp perun' tuRai vizavin ATum,
	ITTu ezil polin'ta En'tu kuvavu moympin,
	ATTan atti n'alan n'ayan'tu uraii,
	tAz irug katuppin kAviri vavvalin,
	mAtiram tuzaii, mati maruNTu alan'ta
10	Atiman'ti kAtalaR kATTi,
	paTu kaTal pukka pATalcAl ciRappin
	maruti anna mAN pukaz peRIiyar,
	cenmO vAzi, tOzi! pal n'AL,
	uravu urum ERoTu mayagki,
15	iravup peyal pozin'ta Irn' taN ARE.

226. marutam

	uNarkuven allen; uraiyal n'in mAyam;
	n'AN ilai manRa yANar Ura!
	akaluL AgkaN, am pakai maTivai,
	kuRun' toTi, makaLir kurUup punal munaiyin,
5	pazanap paij cAy kozuti, kazanik
	karan'tai am ceRuvin veN kuruku Oppum,
	val vil eRuzt tOL, paratavar kOmAn,
	pal vEl matti, kazAar muntuRai,
	n'eTu veN marutoTu vajci cAaya,
10	viTiyal van'ta peru n'Irk kAviri,
	toTi aNi munkai n'I veyyOLoTu
	mun n'AL ATiya kavvai, in' n'AL,
	vali mikum munpin pANanoTu, mali tArt
	tittan veLiyan uRan'tai n'AL avaip
15	pATu in teN kiNaip pATu kETTu ajci,
	pOr aTu tAnaik kaTTi
	porAatu OTiya Arppinum peritE.

236. marutam

	maNi maruL malara muLLi amanRa,
	tuNi n'Ir, ilajcik koNTa peru mIn
	ari n'iRak kozug kuRai vauvinar mAn'ti,
	veNNel arin'ar peyarn'ilaip pinRai,
5	iTai n'ilam n'eritaru n'eTug katirp pal cUTTup
	pani paTu cAyp puRam parippa, kazanik
	karug kOTTu mAattu alagku cinaip putup pU
	mayagku mazait tuvalaiyin tAam Uran
	kAmam perumai aRiyEn, n'anRum
10	uyn'tanen vAzi, tOzi! alkal
	aNi kiLar cAn'tin am paTTu imaippa,
	koTug kuzai makaLirin oTugkiya irukkai
	aRiyAmaiyin azin'ta n'ejcin,
	'ERRu iyal ezil n'aTaip polin'ta moympin,
15	tOTTu iruj curiyal maNan'ta pittai,
	ATTan attiyaik kANIrO?' ena
	n'ATTin n'ATTin, Urin Urin,
	'kaTal koNTanRu' ena, 'punal oLittanRu' ena,
	kaluzn'ta kaNNaL, kAtalaR keTutta
20	Atiman'ti pOla,
	Etam colli, pEtu peritu uRalE.

246. marutam

	piNar mOTTu n'an'tin pEz vAy ERRai
	katir mUkku Aral kaLavan Aka,
	n'eTu n'Irp poykait tuNaiyoTu puNarum
	mali n'Ir akal vayal yANar Ura!
5	pOtu Ar kUn'tal n'I veyyOLoTu
	tAtu Ar kAjcit taN pozil akal yARu
	ATinai enpa, n'erun'ai; alarE
	kAy cina moympin perum peyark karikAl
	Arkali n'aRavin veNNivAyil,
10	cIr kezu mannar maRaliya jATpin
	imiz icai muracam poru kaLattu oziya,
	patinoru vELiroTu vEn'tar cAya,
	moy vali aRutta jAnRai,
	toyyA azun'tUr Arppinum peritE.

258. kuRijci

	n'annan utiyan arug kaTip pAzi,
	tol mutir vELir Ompinar vaitta
	ponninum arumai n'anku aRin'tum, annOT
	tunnalammAtO eninum, aHtu ollAy
5	taN mazai tavazum tAz n'Ir n'anan'talaik
	kaTug kARRu eTukkum n'eTum perug kunRattu
	mAya iruL aLai mAy kal pOla,
	mAykatil vAziya, n'ejcE! n'ALum,
	mel iyaR kuRumakaL n'al akam n'acaii,
10	aravu irai tErum ajcuvaru ciRu n'eRi,
	iravin eytiyum peRAay, aruL varap
	pullen kaNNai pulampu koNTu, ulakattu
	uLLOrkku ellAm peru n'akaiyAka,
	kAmam kaimmika uRutara,
15	AnA aru paTar talaittan'tOyE!

262. kuRijci

	mutai paTu pacug kATTu aril pavar mayakki,
	pakaTu pala pUNTa uzavuRu cej cey,
	iTu muRai n'irampi, Aku vinaik kalittu,
	pAcilai amanRa payaRu A pukkena,
5	vAy mozit tan'taiyaik kaN kaLain'tu, aruLAtu,
	Ur mutu kOcar n'avaitta ciRumaiyin,
	kalattum uNNAL, vAlitum uTAaL,
	cinattin koNTa paTivam mARAL,
	maRam kezu tAnaik koRRak kuRumpiyan,
10	ceru iyal n'al mAn titiyaRku uraittu, avar
	in uyir cekuppak kaNTu cinam mARiya
	annimijili pOla, meym malin'tu,
	AnA uvakaiyEm Ayinem pU malin'tu
	aruvi Arkkum ayam tikaz cilampin
15	n'uN pala tuvalai putalmicai n'anaikkum
	vaNTu paTu n'aRavin vaN makizp pEkan
	koNTal mA malai n'ARi,
	am tIm kiLavi van'tamARE.

266. marutam

	kOTuRa n'ivan'ta n'ITu irum parappin
	an'tip parAaya putup punal, n'erun'ai,
	main'tu mali kaLiRRin talaip puNai tazIi,
	n'aran'tam n'ARum kuvai irug kUn'tal
5	iLan' tuNai makaLiroTu Ir aNik kalaii,
	n'Ir peyarn'tu ATiya En'tu ezil mazaik kaN
	n'OkkutoRum n'OkkutoRum tavirvilaiyAki,
	kAmam kaimmikac ciRattalin, n'AN izan'tu,
	ATinai enpa makizn'a! atuvE
10	yAz icai maRukin n'ITUr kizavOn
	vAy vAL evvi Eval mEvAr
	n'eTu miTal cAytta pacum pUN porun'talar
	arimaNavAyil uRattUr AgkaN,
	kaLLuTaip peruj cORRu el imiz anna,
15	kavvai AkinRAl peritE; ini aHtu
	avalam anRuman, emakkE; ayala
	kazani uzavar kali ciRan'tu eTutta
	kaRagku icai verIip paRan'ta tOkai
	aNagkuTai varaippakam poliya van'tu iRukkum
20	tiru maNi viLakkin alaivAyc
	ceru miku cEeyoTu uRRa cULE!

276. marutam

	n'IL irum poykai irai vETTu ezun'ta
	vALai veN pOttu uNIiya, n'Arai tan
	aTi aRivuRutal ajci, paipayak
	kaTi ilam pukUum kaLvan pOla,
5	cAay otugkum tuRai kEz UranoTu
	Avatu Aka! ini n'AN uNTO?
	varukatil amma, em cEri cEra!
	ari vEy uNkaN avan peNTir kANa,
	tArum tAnaiyum paRRi, Ariyar
10	piTi payinRu tarUum perug kaLiRu pOla,
	tOL kan'tAkak kUn'talin piNittu, avan
	mArpu kaTi koLLEn Ayin, ArvuRRu
	iran'tOrkku IyAtu ITTiyOn poruLpOl,
	paran'tu veLippaTAtu Aki,
15	varun'tukatilla, yAy Ompiya n'alanE!

322. kuRijci

	vayagku veyil jemiyap pAay, minnu vacipu,
	mayagku tuLi pozin'ta pAnAT kagkul;
	ArAk kAmam aTUu n'inRu alaippa,
	iRu varai vIzn'arin n'aTugki, teRuvara,
5	pAmpu eRi kOlin tamiyai vaiki,
	5
	tEmputikollO? n'ejcE! urum icaik
	kaLiRu kaNkUTiya vAL mayagku jATpin,
	oLiRu vER tAnaik kaTun' tErt titiyan
10	varu punal izitaru maram payil iRumpil,
	piRai uRaz maruppin, kaTug kaN, panRik
	kuRai Ar koTuvari kuzumum cAral,
	aRai uRu tIm tEn kuRavar aRuppa
	muyalun'ar muRRA ERRu aru n'eTuj cimai,
15	pukal arum, potiyil pOlap
	peRal arugkuraiyaL, em aNagkiyOLE!

326. marutam

	Ural av vAy urutta titti,
	pEr amar mazaik kaN, perun' tOL, ciRu n'utal,
	n'allaL amma, kuRumakaL celvar
	kaTun' tEr kuzitta jeLLal AgkaN,
5	n'eTug koTi n'uTagkum maTTa vAyil,
	irug katirk kazanip perug kavin anna
	n'alam pArATTi, n'aTai ezil polin'tu,
	vizavil celIiyar vENTum ven vEl
	izai aNi yAnaic cOzar maRavan
10	kazai aLan'tu aRiyAk kAvirip paTappai,
	punal mali putavin, pOor kizavOn,
	pazaiyan Okkiya vEl pOl,
	pizaiyala kaN, avaL n'OkkiyOr tiRattE!

356.marutam

	mEl tuRaik koLIiya kazAlin kIzt tuRai
	uku vAr arun'ta, paku vAy yAmai
	kampuL iyavan Aka, vici piNit
	teN kaN kiNaiyin piRazum Uran
5	iTai n'eTun' teruvil katumenak kaNTu, en
	poR toTi munkai paRRinanAka,
	'annAy!' enRanen; avan kai viTTananE,
	tol n'acai cAlAmai, n'annan paRampil
	ciRukArOTan payinoTu cErttiya
10	kaR pOl n'AvinEnAki, maRRu atu
	ceppalen mannAl, yAykkE; n'al tErk
	kaTum pakaTTu yAnaic cOzar marukan
	n'eTug katir n'ellin vallam kizavOn
	n'allaTi uLLAnAkavum, ollAr
15	katavam muyaRalum muyalpa; atAanRu,
	oli pal kUn'tal n'amvayin aruLAtu,
	konRanan Ayinum kolai pazutu anRE
	aruvi Ampal kalitta muntuRai
	n'annan Aay pirampu anna
20	min Ir Oti! ennai, n'in kuRippE?

367. pAlai

	ilagku cuTar maNTilam pulam talaippeyarn'tu,
	pal katir mazukiya kal cEr amaiyattu,
	alan'talai mUtERu AN kural viLippa,
	manai vaLar n'occi mA cErpu vatiya,
5	munai uzai irun'ta am kuTic cIRUr,
	karug kAl vEgkaic cej cuval varakin
	miku patam n'iRain'ta toku kUTTu oru ciRai,
	kuvi aTi verukin paig kaN ERRai
	Un n'acaip piNavin uyagku paci kaLaiiyar,
10	taLir purai koTiRRin, ceRi mayir eruttin,
	katirtta cennik kavirp pU anna
	n'eRRic cEval aRRam pArkkum
	pullen mAlaiyum, initu manRamma
	n'al aka vana mulai aTaiyap pullutoRum
15	uyir kuzaippanna cAyal,
	ceyir tIr, in tuNaip puNarn'ticinOrkkE.

372. kuRijci

	arun' teRal marapin kaTavuL kAppa,
	perun' tEn tUgkum n'ATu kAN n'anan'talai,
	aNagkuTai varaippin, pAzi AgkaN,
	vEL mutu mAkkaL viyal n'akark karan'ta
5	arug kala veRukkaiyin ariyOL paNpu n'inain'tu,
	varun'tinammAtO eninum, aHtu ollAy,
	irum paNait toTutta palar ATu Ucal,
	Urn'tu izi kayiRRin, cela vara varun'ti,
	n'eTu n'eRik kutiraik kUr vEl ajci
10	kaTu munai alaitta koTu vil ATavar
	ATu koL pUcalin pATu ciRan'tu eRiyum,
	perun' tuTi vaLpin vIgkupu n'ekizA,
	mEy maNi izan'ta pAmpin, n'I n'ani
	tEmpinai vAzi, en n'ejcE! vEn'tar
15	kON taNi eyilin kAppuc ciRan'tu,
	INTu arugkuraiyaL, n'am aNagkiyOLE.

376. marutam

	cellal, makizn'a! n'iR cey kaTan uTaiyenman
	kallA yAnai kaTi punal kaRRena,
	mali punal poruta marutu Ogku paTappai,
	oli katirk kazani, kazAar muntuRai,
5	kali koL cuRRamoTu karikAl kANa,
	taN patam koNTu, tavirn'ta in icai
	oN poRip punai kazal cEvaTip puraLa,
	karug kaccu yAtta kANpin av vayiRRu,
	irum polam pANTil, maNiyoTu teLirppa,
10	punal n'ayan'tu ATum atti aNi n'ayan'tu,
	kAviri koNTu oLittAgkum annO!
	n'umvayin pulattal cellEm; emvayin
	pacan'tanRu, kANTicin n'utalE; acumpin
	am tUmpu vaLLai azaR koTi mayakki,
15	vaN tOTTu n'ellin vAgku pIL viriya,
	tuyt talai muTagku iRAt teRikkum, poRpuTaik
	kuragkuuLaip puravik kuTTuvan
	maran'tai anna, en n'alam tan'tu cenmE!

386. marutam

	poykai n'Irn'Ayp pulavu n'ARu irum pOttu
	vALai n'AL irai tErum Ura!
	n'ANinen, peruma! yAnE pANan
	mal aTu mArpin vali uRa varun'ti,
5	etirtalaik koNTa Ariyap porun'an
	n'iRait tiraL muzavut tOL kaiyakattu ozin'ta
	tiRan vERu kiTakkai n'Okki, n'al pOrk
	kaNaiyan n'ANiyAgku maRaiyinaL
	mella van'tu, n'alla kURi,
10	'mai Ir Oti maTavOy! yAnum n'in
	cEriyEnE; ayal ilATTiyEn;
	n'ugkai Akuven n'inakku' ena, tan kait
	toTu maNi mel viral taNNenat taivara,
	n'utalum kUn'talum n'Ivi,
15	pakal van'tu peyarn'ta vANutaR kaNTE.

396. marutam

	toTuttEn, makizn'a! cellal koTit tErp
	polam pUN n'annan punanATu kaTin'tena,
	yAz icai maRukin pAzi AgkaN,
	'ajcal' enRa Aay eyinan
5	ikal aTu kaRpin mijiliyoTu tAkki,
	tan uyir koTuttanan, colliyatu amaiyAtu;
	teRal arug kaTavuL munnart tERRi,
	mel iRai munkai paRRiya col iRan'tu,
	Arva n'ejcam talaittalai ciRappa, n'in
10	mArpu tarukallAy; piRan AyinaiyE;
	ini yAn viTukkuven allen; man'ti,
	pani vAr kaNNaL, pala pulan'tu uRaiya,
	aTun' tiRal atti ATu aNi n'acaii,
	n'eTu n'Irk kAviri koNTu oLittAgku, n'in
15	manaiyOL vavvalum ajcuval; cinaii,
	Ariyar alaRat tAkki, pEr icait
	tonRu mutir vaTavarai vaNagku vil poRittu,
	vej cina vEn'taraip piNittOn
	vajci anna, en n'alam tan'tu cenmE!