2. kuRijci

	kOzilai vAzaik kOL mutir perug kulai
	UzuRu tIm kani, uNNun'art taTutta
	cAraR palavin cuLaiyoTu, Uz paTu
	pARai n'eTuj cunai, viLain'ta tERal
5	aRiyAtu uNTa kaTuvan ayalatu
	kaRi vaLar cAn'tam ERalcellAtu,
	n'aRu vI aTukkattu makizn'tu kaNpaTukkum
	kuRiyA inpam, eLitin, n'in malaip
	pal vERu vilagkum, eytum n'ATa!
10	kuRitta inpam n'inakku evan ariya?
	veRutta Eer, vEy purai paNait tOL,
	n'iRuppa n'illA n'ejcamoTu n'inmATTu,
	ivaLum, inaiyaL Ayin, tan'tai
	arug kaTik kAvalar cOr patan oRRi,
15	kagkul varutalum uriyai; paim putal
	vEgkaiyum oL iNar virin'tana;
	n'eTu veN tigkaLum UrkoNTanRE.

12. kuRijci

	yAyE, kaNNinum kaTug kAtalaLE;
	en'taiyum, n'ilan uRap poRAan; 'cIRaTi civappa,
	evan, ila! kuRumakaL! iyagkuti?' ennum;
	yAmE, pirivu inRu iyain'ta tuvarA n'aTpin,
5	iru talaip puLLin Or uyirammE;
	Enal am kAvalar AnAtu ArttoRum,
	kiLi viLi payiRRum veLil ATu peruj cinai,
	vizuk kOT palavin pazup payam koNmAr,
	kuRavar UnRiya kurampai putaiya,
10	vEgkai tAaya tEm pAy tORRam
	puli cettu, verIiya pukarmuka vEzam,
	mazai paTu cilampil kazaipaTa, peyarum
	n'al varai n'ATa! n'I varin,
	melliyal Orum tAn vAzalaLE.

38. kuRijci

	viri iNar vEgkai vaNTu paTu kaNNiyan,
	teri itazk kuvaLait tEm pAy tAran,
	am cilai iTavatu Aka, vej celal
	kaNai valam terin'tu, tuNai paTarn'tu uLLi,
5	varutal vAyvatu, vAn tOy veRpan.
	van'tanan Ayin, am taLirc ceyalait
	tAzvu il Ogku cinait toTutta vIz kayiRRu
	Ucal mARiya marugkum, pAypu uTan
	ATAmaiyin kaluzpu ila tERi,
10	n'ITu itaz talaiiya kavin peRu n'Ilam
	kaN ena malarn'ta cunaiyum, vaN paRai
	maTak kiLi eTuttalcellAt taTak kural
	kulavup poRai iRutta kOl talai iruvi
	koytu ozi punamum, n'Okki; n'eTitu n'inain'tu;
15	paitalan peyaralankollO? ai tEyku
	'aya veL aruvi cUTiya uyar varaik
	kUum kaNaHtu em Ur' ena
	Agku atai aRivuRal maRan'ticin, yAnE.

48. kuRijci

	'annAy! vAzi! vENTu, annai! n'in makaL,
	'pAlum uNNAL, pazagkaN koNTu,
	n'ani pacan'tanaL' ena vinavuti. atan tiRam
	yAnum teRRena uNarEn. mEl n'AL,
5	mali pUj cAral, en tOzimArOTu
	oli cinai vEgkai koykuvam cenRuzi,
	'puli puli!' ennum pUcal tOnRa
	oN cegkazun'Irk kaN pOl Ay itaz
	Uci pOkiya cUz cey mAlaiyan,
10	pakkam cErttiya ceccaik kaNNiyan,
	kuyam maNTu Akam cej cAn'tu n'Ivi,
	varipunai villan, orukaNai terin'tukoNTu,
	'yAtO, maRRu am mA tiRam paTar?' ena
	vinavi n'iRRan'tOnE. avaR kaNTu,
15	emmuL emmuL meym maRaipu oTugki,
	n'ANi n'inRanemAka, pENi,
	'aivakai vakutta kUn'tal Ay n'utal
	mai Ir Oti maTavIr! n'um vAyp
	poyyum uLavO?' enRanan. paiyenap
20	pari muTuku tavirtta tEran, etirmaRuttu,
	n'in makaL uNkaN pal mAN n'Okkic
	cenROnmanRa, ak kunRu kizavOnE.
	pakal mAy an'tip paTucuTar amaiyattu,
	avan maRai tEem n'Okki, 'maRRu ivan
25	makanE tOzi!' enRanaL.
	atan aLavu uNTu kOL, mativallOrkkE.

52. kuRijci

	'valan'ta vaLLi maran Ogku cAral,
	kiLarn'ta vEgkaic cEN n'eTum pogkarp
	pon n'Er putu malar vENTiya kuRamakaL
	innA icaiya pUcal payiRRalin,
5	"E kal aTukkattu iruL aLaic cilampin
	A koL vayap puli Akum aHtu" enat tam
	malai kezu cIRUr pulampa, kallenac
	cilaiyuTai iTattar pOtarum n'ATan
	n'ejcu amar viyal mArpu uTaittu ena annaikku
10	aRivippEmkol? aRiyalemkol?' ena
	irupAR paTTa cUzcci orupAl
	cErn'tanRu vAzi, tOzi! 'yAkkai
	in uyir kazivatuAyinum, n'in makaL
	Aymalar uNkaN pacalai
15	kAma n'Oy' enac ceppAtImE.

85. pAlai

	'n'al n'utal pacappavum, perun' tOL n'ekizavum,
	uNNA uyakkamoTu uyir celac cAay,
	innam Akavum, igku n'at tuRan'tOr
	aRavar allar avar' enap pala pulan'tu,
5	Azal vAzi, tOzi! 'cAral,
	InRu n'AL ulan'ta mel n'aTai maTap piTi,
	kanRu, paci kaLaiiya, paig kaN yAnai
	muRRA mUgkil muLai tarupu. UTTum
	ven vEl tiraiyan vEgkaTa n'eTu varai,
10	n'al n'AL pUtta n'Aku iLa vEgkai
	n'aRu vI ATiya poRi vari majjai
	n'anaip pacug kurun'tin n'ARu cinai irun'tu,
	tuNaip payirn'tu akavum tuNaitaru taN kAr,
	varutum, yAm' enat tERRiya
15	paruvamkAN atu; pAyinRAl mazaiyE.

105. pAlai

	akal aRai malarn'ta arumpu mutir vEgkai
	oL ilait toTalai taii, mellena
	n'al varai n'ATan taRpArATTa
	yAgku vallun'aLkol tAnE tEm peytu,
5	maNi cey maNTai tIm pAl En'ti,
	InAt tAyar maTuppavum uNNAL,
	n'izaR kayattanna n'IL n'akar varaippin
	emmuTaic celvamum uLLAL, poym maruNTu,
	pan'tu puTaippanna pANip pal aTic
10	cil parik kutirai, pal vEl ezini
	keTal arun' tuppin viTutozil muTimAr,
	kanai eri n'aTan'ta kal kAy kAnattu
	vinai val ampin vizut toTai maRavar
	tEm pizi n'aRug kaL makizin, munai kaTan'tu,
15	vIgku men curaiya ERRinam tarUum
	mukai talai tiRan'ta vEniR
	pakai talaimaNan'ta pal atarc celavE?

118. kuRijci

	kaRagku veL aruvi piRagku malaik kavAan,
	tEm kamaz iNara vEgkai cUTi,
	toNTakap paRaic cIr peNTiroTu viraii,
	maRukil tUgkum ciRukuTip pAkkattu,
5	iyal muruku oppinai, vaya n'Ay piRpaTa,
	pakal varin, kavvai ajcutum; ikal koLa,
	irum piTi kanRoTu viraiiya kaya vAyp
	perug kai yAnaik kOL pizaittu, irIiya
	aTu puli vazagkum Ar iruL n'aTu n'AL
10	taniyai varutal ataninum ajcutum.
	en AkuvaLkoltAnE? pal n'AL
	puNar kuRi ceyta pularkural Enal
	kiLi kaTi pATalum ozin'tanaL;
	aLiyaLtAn, n'in aLi alatu ilaLE!

132. kuRijci

	Enalum iRagku kural iRuttana; n'Oy malin'tu,
	Aykavin tolain'ta, ivaL n'utalum; n'Okki
	Etila moziyum, iv Urum; Akalin,
	kaLiRRu mukam tiRan'ta kavuLuTaip pakazi,
5	vAl n'iNap pukavin, kAnavar tagkai
	am paNai men tOL Ay itaz mazaik kaN
	olku iyaR koTicciyai n'alkinaiAyin,
	koNTanai cenmO n'uN pUN mArpa!
	tuLitalait talaiiya cAral n'aLi cunaik
10	kUmpu mukai aviztta kuRuj ciRaip paRavai
	vEgkai viri iNar Uti, kAn'taL
	tEnuTaik kuvikulait tujci, yAnai
	irug kavuT kaTAam kanavum,
	perug kal vEli, n'um uRaivu in UrkkE.

133. pAlai

	'kunRi anna kaNNa, kurUu mayir,
	pun tAL, veLLeli mOvAy ERRai
	cem paral murampil citarn'ta pUzi,
	n'al n'AL vEgkai vI n'ankanam varippa,
5	kAr talaimaNan'ta paim putaR puRavin,
	vil eRi pajciyin veN mazai tavazum
	kollai itaiya kuRum poRai marugkil,
	kari paran'tanna kAyAj cemmaloTu
	eri paran'tanna ilamalar viraii,
10	pUg kaluz cuman'ta tIm punaR kAn yARRu
	vAn koL tUval vaLi tara uNkum;
	emmoTu varutal vallaiyO maRRu?' enak
	kon onRu vinavinarmannE tOzi!
	ital muL oppin mukai mutir veTci
15	kol punak kurun'toTu kal aRait tAam
	miLai n'ATTu attattu Irj cuvaR kalitta
	vari maraR kaRikkum maTap piNait
	tirimaruppu iralaiya kATu iRan'tOrE.

141. pAlai

	amma vAzi, tOzi! kaimmikak
	kanavum kagkultORu iniya; n'anavum
	punai vinai n'al il puLLum pAgkina;
	n'ejcum n'anipukanRu uRaiyum; ejcAtu
5	ulaku tozil ulan'tu, n'Ajcil tujci,
	mazai kAln'Igkiya mAka vicumpil
	kuRu muyal maRu n'iRam kiLara, mati n'iRain'tu,
	aRumIn cErum akal iruL n'aTu n'AL;
	maRuku viLakkuRuttu, mAlai tUkki,
10	paza viRal mUtUrp palaruTan tuvanRiya
	vizavu uTan ayara, varukatil amma!
	tuvarap pularn'tu tU malar kajali,
	takaram n'ARum taN n'aRug katuppin
	putu maNa makaTUu ayiniya kaTi n'akarp
15	pal kOTTu aTuppil pAl ulai irIi,
	kUzaik kUn'taR kuRun' toTi makaLir
	peruj cey n'ellin vAgkukatir muRittu,
	pAcaval iTikkum irug kAz ulakkaik
	kaTitu iTi verIiya kamajcUl veN kuruku
20	tIm kulai vAzai Ogku maTal irAtu;
	n'eTug kAl mAattuk kuRum paRai payiRRum
	cel kuTi n'iRutta perum peyark karikAl
	vel pOrc cOzan iTaiyARRu anna
	n'al icai veRukkai tarumAr, pal poRip
25	pulik kEz uRRa pUviTaip peruj cinai
	n'aran'ta n'aRum pU n'AL malar utira,
	kalai pAyn'tu ukaLum, kal cEr vEgkai,
	tEm kamaz n'eTu varaip piRagkiya
	vEgkaTa vaippiR curan iRan'tOrE.

147. pAlai

	Ogkumalaic cilampil piTavuTan malarn'ta
	vEgkai veRit tazai vERu vakuttanna
	Un poti avizAk kOTTu ukirk kuruLai
	mUnRu uTan InRa muTagkar n'izatta,
5	tuRukal viTar aLaip piNavup paci kUrn'tena,
	poRi kiLar uzuvaip pOz vAy ERRai
	aRu kOTTu uzai mAn AN kural Orkkum
	n'eRi paTu kavalai n'irampA n'ILiTai,
	veLLi vItiyaip pOla n'anRum
10	celavu ayarn'ticinAl yAnE; pala pulan'tu,
	uNNA uyakkamoTu uyir celac cAay,
	tOLum tol kavin tolaiya, n'ALum
	pirin'tOr peyarvukku iragki,
	marun'tu piRitu inmaiyin, irun'tu vinaiilanE!

162. kuRijci

	koLak kuRaipaTAak kOTu vaLar kuTTattu
	aLappu aritu Akiya kuvai irun' tOnRala,
	kaTal kaNTanna mAka vicumpin
	azaRkoTi anna minnu vacipu n'uTagka,
5	kaTituiTi urumoTu kataz uRai citaRi,
	viLivu iTan aRiyA vAn umiz n'aTu n'AL,
	arug kaTik kAvalar ikazpatam n'Okki,
	pani mayagku acaivaLi alaippa, tan'tai
	n'eTu n'akar oru ciRai n'inRanen Aka;
10	aRal ena avirvarum kUn'tal, malar ena
	vAL mukattu alamarum mA itaz mazaik kaN,
	mukai n'iraittanna mA vIz veN pal,
	n'akai mANTu ilagkum n'alam kezu tuvar vAy,
	kOl amai vizut toTi viLagka vIci,
15	kAl uRu taLirin n'aTugki, AnAtu,
	n'Oy acA vITa muyagkinaL vAymozi
	n'al icai tarUum iravalarkku uLLiya
	n'acai pizaippu aRiyAk kazaltoTi atikan
	kOL aRavu aRiyAp payam kezu palavin
20	vEgkai cErn'ta veRpakam poliya,
	vil kezu tAnaip pacum pUN pANTiyan
	kaLiRu aNi vel koTi kaTuppa, kANvara
	oLiRuvana izitarum uyarn'tu tOnRu aruvi,
	n'Er koL n'eTu varaik kavAan
25	cUraramakaLirin peRaRku ariyOLE.

174. mullai

	'iru peru vEn'tar mARu koL viyan kaLattu,
	oru paTai koNTu, varupaTai peyarkkum
	celvam uTaiyOrkku n'inRanRu viRal' ena,
	pUk kOL Eya taNNumai vilakkic
5	celvEm Atal aRiyAL, mullai
	n'Er kAl mutu koTi kuzaippa, n'Ir corin'tu,
	kAlai vAnattuk kaTug kuraR koNmU
	muzagkutoRum kaiyaRRu, oTugki, n'ap pulan'tu,
	pazagkaN koNTa pacalai mEniyaL,
10	yAgku AkuvaLkol tAnE vEgkai
	UzuRu n'aRu vI kaTuppak kEz koLa,
	Akattu arumpiya mAcu aRu cuNagkinaL,
	n'al maNal viyaliTai n'aTan'ta
	cil mel otukkin, mAayOLE?

182. kuRijci

	pUg kaN vEgkaip pon iNar milain'tu,
	vAgku amai n'On cilai eruttattu irIi,
	tIm pazap palavin cuLai viLai tERal
	vILai ampin iLaiyaroTu mAn'ti,
5	OTTu iyal pizaiyA vaya n'Ay piRpaTa,
	vETTam pOkiya kuRavan kATTa
	kuLavit taN putal kurutiyoTu tuyal vara,
	muLavumAt tolaiccum kunRa n'ATa!
	aravu eRi urumOTu onRik kAl vIzttu
10	uravu mazai pozin'ta pAnAT kagkul,
	taniyai van'ta ARu n'inain'tu, alkalum,
	paniyoTu kaluzum ivaL kaNNE; atanAl,
	kaTum pakal varutal vENTum teyya
	atir kural mutu kalai kaRi muRi munaii,
15	uyarcimai n'eTug kOTTu ukaLa, ukka
	kamaz itaz alari tAay vElan
	veRi ayar viyan kaLam kaTukkum
	peru varai n'aNNiya cAralAnE.

188. kuRijci

	perug kaTal mukan'ta irug kiLaik koNmU!
	iruNTu uyar vicumpin valan Erpu vaLaii,
	pOrppu uRu muracin iragki, muRai purin'tu
	aRan n'eRi pizaiyAt tiRan aRi mannar
5	aruj camattu etirn'ta peruj cey ATavar
	kazittu eRi vALin, n'aLippana viLagkum
	minnuTaik karuviyai Aki, n'ALum
	konnE ceytiyO, aravam? pon ena
	malarn'ta vEgkai mali toTar aTaicci,
10	polin'ta AyamoTu kANtaka iyali,
	tazalai vAgkiyum, taTTai Oppiyum,
	azal Er ceyalai am tazai acaiiyum,
	kuRamakaL kAkkum Enal
	puRamum tarutiyO? vAziya, mazaiyE!

202. kuRijci

	vayagku veL aruviya kunRattuk kavAan,
	kayan' talai maTap piTi inan EmArppa,
	pulip pakai venRa puN kUr yAnai
	kallakac cilampil kai eTuttu uyirppin,
5	n'al iNar vEgkai n'aRu vI kollan
	kuruku Utu miti ulaip pitirvin pogki,
	ciRu pal minmini pOla, pala uTan
	maNi n'iRa irum putal tAvum n'ATa!
	yAmE anRiyum uLarkol pAnAL,
10	utti aravin pait talai tumiya,
	ura urum uraRum uTku varu n'anan'talai,
	tavirvu il uLLamoTu eHku tuNaiyAka,
	kanai iruL paran'ta kal atarc ciRu n'eRi
	tErAtu varUum n'invayin
15	Ar ajar aru paTar n'In'tuvOrE?

205. pAlai

	'uyir kalan'tu onRiya tonRu paTu n'aTpin
	ceyir tIr n'ejcamoTu ceRin'tOr pOla,
	taiyal! n'in vayin piriyalam yAm' enap
	poy val uLLamoTu purivu uNak kURi,
5	tuNivu il koLkaiyar Aki, iniyE
	n'Oy mali varuttamoTu n'utal pacappupUra,
	n'Am aza, tuRan'tanar Ayinum, tAmE
	vAymozi n'ilaiiya cEN viLagku n'al icai
	vaLam kezu kOcar viLagku paTai n'URi,
10	n'ilam koLa veHkiya polam pUN kiLLi,
	pU viri n'eTug kazi n'AppaN, perum peyark
	kAvirip paTappaip paTTinattanna
	cezu n'akar n'al virun'tu ayarmAr, EmuRa
	vizu n'iti eLitinin eytukatilla
15	mazai kAl aRcirattu mAl iruL n'Igki,
	n'ITuamai n'ivan'ta n'izal paTu cilampil,
	kaTAa yAnaik kavuL marugku uRaza
	Am Urpu izitaru kAmar cenni,
	puli uri vari ataL kaTuppa, kali ciRan'tu,
20	n'AT pU vEgkai n'aRu malar utira,
	mEkku ezu peruj cinai ERi, kaNak kalai
	kUppiTUu ukaLum kunRakac ciRu n'eRik
	kal piRagku Ar iTai vilagkiya
	col peyar tEetta curan iRan'tOrE.

218. kuRijci

	'kiLai pArATTum kaTu n'aTai vayak kaLiRu
	muLai tarupu UTTi, vENTu kuLaku arutta,
	vAL n'iRa uruvin oLiRupu minni,
	parUu uRaip pal tuLi citaRi, vAn n'avinRu,
5	peru varai n'aLir cimai atira vaTTittu,
	puyal ERu uraiiya viyal iruL n'aTu n'AL,
	viRal izaip polin'ta kANpu in cAyal,
	taTaiit tiraNTa n'in tOL cErpu allatai,
	paTAavAkum, em kaN' ena, n'Iyum,
10	'iruL mayagku yAmattu iyavuk keTa vilagki,
	vari vayagku irum puli vazagkun'arp pArkkum
	peru malai viTarakam vara aritu' ennAy,
	vara eLitAka eNNuti; atanAl,
	n'uNNitin kUTTiya paTu mAN Aram
15	taNNitu kamazum n'in mArpu, oru n'AL
	aTaiya muyagkEm Ayin, yAmum
	viRal izai n'ekizac cAaytum; atuvE
	annai aRiyinum aRika! alar vAy
	ampal mUtUr kETpinum kETka!
20	vaNTu iRai koNTa eri maruL tOnRiyoTu,
	oN pU vEgkai kamazum
	taN peruj cAral pakal van'tImE!

227. pAlai

	'n'utal pacan'tanRE; tOL cAyinavE;
	titalai alkul variyum vATina;
	en AkuvaLkol ivaL?' ena, pal mAN
	n'Ir mali kaNNoTu n'eTitu n'inain'tu oRRi,
5	inaiyal vAzi, tOzi! n'anai kavuL
	kAy cinam ciRan'ta vAy puku kaTAttoTu
	mun n'ilai poRAatu muraNi, pon iNarp
	pulik kEz vEgkaip pUj cinai pulampa,
	mutal pAyn'tiTTa muzu vali oruttal
10	cen' n'ilap paTu n'IRu ATi, ceru malain'tu,
	kaLam koL maLLarin muzagkum attam
	pala iRan'tu akanRanar Ayinum, n'ilaii,
	n'Oy ilarAka, n'am kAtalar! vAy vAL,
	tamiz akappaTutta imiz icai muracin,
15	varun'ar varaiyAp peru n'AL irukkai,
	tUgkal pATiya Ogku peru n'al icaip
	piTi miti vazutuNaip perum peyart tazumpan
	kaTi matil varaippin UNUr umpar,
	vizu n'iti tujcum vIRu peRu tiru n'akar,
20	irug kazip paTappai marugkUrp paTTinattu,
	el umiz AvaNattu anna,
	kallen kampalai ceytu akanROrE!

228. kuRijci

	piracap pal kiLai Arppa, kallena
	varai izi aruvi Aram tINTit
	taN ena n'anaikkum n'aLir malaic cilampil,
	kaN ena malarn'ta mA itazk kuvaLaik
5	kal mukai n'eTuj cunai n'ammoTu ATi,
	pakalE initu uTan kazippi, iravE
	celvar Ayinum, n'anRuman tilla
	vAnkaN virin'ta pakal maruL n'ilavin
	cUral miLaiiya cAral Ar ARRu,
10	Ogkal micaiya vEgkai oL vIp
	pulip poRi kaTuppat tOnRalin, kaya vAy
	irum piTi iriyum cOlaip
	perug kal yANart tam ciRukuTiyAnE.

232. kuRijci

	kAN ini vAzi, tOzi! pAnAL,
	mazai muzagku aravam kETTa, kazai tin,
	mAal yAnai puli cettu verIi,
	irug kal viTarakam cilampap peyarum
5	perug kal n'ATan kENmai, iniyE,
	kunRa vElic ciRukuTi AgkaN,
	manRa vEgkai maNa n'AT pUtta
	maNi Er arumpin pon vI tAay
	viyal aRai varikkum munRil, kuRavar
10	manai mutir makaLiroTu kuravai tUgkum
	Ar kali vizavuk kaLam kaTuppa, n'ALum,
	viravup pUm paliyoTu viraii, annai
	kaTiyuTai viyal n'akark kAval kaNNi,
	'muruku' ena vElaR tarUum.
15	paruvamAkap payan'tanRAl, n'amakkE.

242. kuRijci

	arumpu mutir vEgkai alagkal men cinaic
	curumpu vAy tiRan'ta pon purai n'uN tAtu
	maNi maruL kalavattu uRaippa, aNi mikku
	avir poRi majjai ATum cOlai,
5	pain' tAT cen' tinaik koTug kural viyan punam,
	cen' tAr kiLLai n'ammoTu kaTin'tOn
	paNpu tara van'tamai aRiyAL, 'n'uN kEz
	muRi purai ezil n'alattu en makaL tuyar marugku
	aRital vENTum' ena, pal pirappu irIi,
10	aRiyA vElaR tarIi, annai
	veRi ayar viyan kaLam poliya Etti,
	maRi uyir vazagkA aLavai, cenRu yAm,
	cela varat tuNin'ta, cEN viLagku, el vaLai
	n'ekizn'ta mun kai, n'Er iRaip paNait tOL,
15	n'al ezil azivin tol kavin peRIiya,
	mukizttu varal iLa mulai mUzka, pal Uz
	muyagkal iyaivatumannO tOzi!
	n'aRai kAlyAtta n'aLir mukaic cilampil
	peru malai viTarakam n'ITiya ciRiyilaic
20	cAn'ta men cinai tINTi, mElatu
	piracam tUgkum cEN cimai
	varaiyaka veRpan maNan'ta mArpE!

272. kuRijci

	irum puli tolaitta perug kai vEzattup
	pulavu n'ARu pukar n'utal kazuva, kagkul
	aruvi tan'ta aNagkuTai n'eTug kOTTu
	ajcu varu viTar mukai Ar iruL akaRRi,
5	min oLir eHkam cel n'eRi viLakka,
	taniyan van'tu, pani alai muniyAn,
	n'Ir izi marugkin Ar iTattu amanRa
	kuLaviyoTu miTain'ta kUtaLag kaNNi
	acaiyA n'ARRam acai vaLi pakara,
10	tuRu kal n'aNNiya kaRi ivar paTappaik
	kuRi iRaik kurampai n'am manaivayin pukutarum,
	meym mali uvakaiyan; an' n'ilai kaNTu,
	'muruku' ena uNarn'tu, mukaman kURi,
	uruvac cen' tinai n'IroTu tUuy,
15	n'eTu vEL paravum, annai; annO!
	en Avatu koltAnE pon ena
	malarn'ta vEgkai alagku cinai poliya
	maNi n'iRa majjai akavum
	aNi malai n'ATanoTu amain'ta n'am toTarpE?

282. kuRijci

	peru malaic cilampin vETTam pOkiya,
	ceRi maTai ampin, val vil, kAnavan
	porutu tolai yAnai veN kOTu koNTu,
	n'Ir tikaz cilampin n'an pon akazvOn,
5	kaN porutu imaikkum tiN maNi kiLarppa,
	vain' n'uti vAla maruppu oTiya ukka
	teN n'Ir Ali kaTukkum muttamoTu,
	mUvERu tAramum orugkuTan koNTu,
	cAn'tam poRaimaram Aka, n'aRai n'Ar
10	vEgkaik kaNNiyan izitarum n'ATaRku
	in tIm palavin Er kezu celvattu
	en'taiyum etirn'tanan, koTaiyE; alar vAy
	ampal Urum avanoTu moziyum;
	cAy iRait tiraNTa tOL pArATTi,
15	yAyum, 'avanE' ennum; yAmum,
	'vallE varuka, varain'ta n'AL!' ena,
	n'al iRai mel viral kUppi,
	il uRai kaTavuTku Akkutum, paliyE!

288. kuRijci

	cenmati; ciRakka, n'in uLLam! n'in malai
	Aram n'Iviya am pakaTTu mArpinai,
	cAral vEgkaip paTu cinaip putup pU
	muruku muraN koLLum uruvak kaNNiyai,
5	eri tin kollai iRaijciya Enal,
	evvam kUriya, vaikalum varuvOy!
	kani mutir aTukkattu em tanimai kANTalin,
	eNmai ceytanai Akuvai n'aNNik
	koTiyOr kuRukum n'eTi irug kunRattu,
10	iTTu ARu iragkum viTTu oLir aruvi
	aru varai izitarum veru varu paTAark
	kayan' talai man'ti uyagku paci kaLaiiyar,
	pArppin tan'tai pazac cuLai toTinum,
	n'ani n'Oy Eykkum pani kUr aTukkattu,
15	makaLir mAgkATTu aRRE tukaL aRak
	kon'toTu utirtta katuppin,
	am tIm kiLavit tan'tai kAppE.

292.kuRijci

	kURAy, ceyvatu tOzi! vERu uNarn'tu,
	annaiyum poruL ukuttu alamarum; men muRic
	ciRu kuLaku arun'tu, tAy mulai peRAa,
	maRi kolaip paTuttal vENTi, veRi puri
5	Etil vElan kOtai tuyalvarat
	tUgkum Ayin, atUum n'ANuval;
	ilagku vaLai n'ekizn'ta cellal; pulam paTarn'tu,
	iravin mEyal marUum yAnaik
	kAl val iyakkam oRRi, n'aTu n'AL,
10	varaiyiTaik kazutin van kaik kAnavan
	kaTu vicaik kavaNin eRin'ta ciRu kal
	uTu uRu kaNaiyin pOki, cAral
	vEgkai viri iNar citaRi, tEn citaiyUu,
	palavin pazattuL tagkum
15	malai kezu n'ATan maNavAkkAlE!

298. kuRijci

	payam kezu tiruvin pal katir jAyiRu
	vayagku tozil tarIiyar, valan Erpu viLagki,
	malku kaTal tOnRiyAgku, malku paTa,
	maNi maruL mAlai, malarn'ta vEgkai
5	oN taLir avir varum oli kezu peruj cinait
	taN tuLi acaivaLi taivarum n'ATa!
	konRu cinam taNiyAtu, venRu muraN cAmpAtu,
	irum piTit tozutiyin inam talaimayagkAtu,
	perum peyaR kaTAam cerukki, vaLa malai
10	irug kaLiRu iyalvarum perug kATTu iyavin,
	Ar iruL tumiya veL vEl En'ti,
	tAz pUg kOtai Utu vaNTu irIi,
	men piNi avizn'ta arai n'AL iravu, ivaN
	n'I van'tataninum, initu AkinRE
15	tUval kaLLin tunai tEr, en'tai
	kaTiyuTai viyal n'akar OmpinaL uRaiyum
	yAy aRivuRutal ajci, pAnAL,
	kAval n'ejcamoTu kAmam ceppEn,
	yAn n'in koTumai kURa, n'inaipu Agku,
20	inaiyal vAzi, tOzi! n'at tuRan'tavar
	n'ITalar Aki varuvar, vallena;
	kagkul uyavut tuNai Akiya
	tujcAtu uRaivi ivaL uvan'tatuvE!

302. kuRijci

	cilampil pOkiya cem muka vAzai
	alagkal am tOTu, acaivaLi uRutoRum,
	paLLi yAnaip parUup puRam taivarum
	n'al varai n'ATanoTu aruvi ATiyum,
5	pal itaz n'Ilam paTu cunaik kuRRum,
	n'aRu vI vEgkai ina vaNTu Arkkum
	veRi kamaz cOlai n'ayan'tu viLaiyATalum
	ariya pOlum kAtal am tOzi!
	irug kal aTukkattu ennaiyar uzuta
10	karumpu enak kaviniya perug kural Enal,
	kiLi paTa viLain'tamai aRin'tum,' celka' ena,
	n'am avaN viTun'aL pOlAL, kaimmikac
	cil cuNagku aNin'ta, ceRin'tu vIgku, iLa mulai,
	mel iyal olivarum katuppoTu,
15	pal kAl n'Okkum aRan il yAyE.

319. pAlai

	maNi vAyk kAkkai mA n'iRap perug kiLai
	piNi vIz Alattu alagku cinai ERi,
	koTu vil eyinar kuRumpiRku Ukkum
	kaTu vinai maRavar villiTat tolain'tOr
5	paTu piNam kavarum pAz paTu n'anan'talai,
	aNagku ena urutta n'Okkin, aiyena
	n'uNagkiya n'ucuppin, n'uN kEz mAmai,
	pon vI vEgkaip putu malar puraiya
	n'al n'iRattu ezun'ta, cuNagku aNi vana mulai,
10	curumpu Ar kUn'tal, perun' tOL, ivaLvayin
	pirin'tanir akaRal cUzin, arum poruL
	eytukamAtO n'umakkE; koy tazait
	taLir Er anna, tAgku aru matukaiyaL,
	melliyaL, iLaiyaL, n'ani pEr anpinaL,
15	'celvEm' ennum n'um etir,
	'ozivEm' ennum oNmaiyO ilaLE!

345. pAlai

	'vicumpu taLi pozin'tu, vemmai n'Igki,
	taN patam paTutal celka!' enap pal mAN
	n'Am cela vizain'tanamAka, 'Ogku pukazk
	kAn amar celvi aruLalin, veN kAl,
5	pal paTaip puravi eytiya tol icai
	n'uNagku n'uN panuvaR pulavan pATiya
	ina mazai tavazum EziR kunRattu,
	karug kAl vEgkaic cem pUm piNaiyal
	aitu En'tu alkul yAm aNin'tu uvakkum
10	cil n'AL kazika!' enRu mun n'AL
	n'ammoTu poyttanar Ayinum, tammoTu
	tirun'tu vEl iLaiyar curumpu uNa malaimAr,
	mA muRi InRu marak kompu akaippa,
	uRai kazin'tu ulan'ta pinRai, poRaiya
15	ciRu veL aruvit tuvalaiyin malarn'ta
	karug kAl n'uNavin peruj cinai vAn pUc
	cem maNaR ciRu n'eRi kammena varippa,
	kATu kavin peRuka tOzi! ATu vaLikku
	olku n'ilai iRRi oru tani n'eTu vIz
20	kal kaN cIkkum attam,
	alku veyil n'Izal acain'tanar celavE!

349. pAlai

	aram pOz av vaLai ceRin'ta munkai
	varain'tu tAm piNitta tol kavin tolaiya,
	evan Ayn'tanarkol tOzi! jemann
	teri kOl anna ceyir tIr cem mozi,
5	ulain'ta okkal, pATun'ar celinE,
	uran mali uLLamoTu munai pAzAka,
	arug kuRumpu eRin'ta perug kala veRukkai
	cUzAtu curakkum n'annan n'al n'ATTu,
	eziR kunRattuk kavAan, kEz koLa,
10	tirun'tu arai n'ivan'ta karug kAl vEgkai
	eri maruL kavaLam mAn'ti, kaLiRu tan
	vari n'utal vaitta vali tEmpu taTak kai
	kal Ur pAmpin tOnRum
	col peyar tEetta curan iRan'tOrE?

365. pAlai

	akal vAy vAnam mAl iruL parappa,
	pakal ARRuppaTutta paiyen tORRamoTu
	cinaval pOkiya punkaN mAlai,
	atta n'aTukal AL ena utaitta
5	kAna yAnaik katuvAy vaL ukir,
	irum panai itakkaiyin, oTiyum AgkaN,
	kaTugkaN ATavar E muyal kiTakkai,
	varun'ar inmaiyin kaLaiyun'ark kANA
	enRUz vej curam tan'ta n'IyE
10	tuyar ceytu ARRAyAki, peyarpu, Agku
	uLLinai vAziya, n'ejcE! ven vEl
	mA vaN kazuvuL kAmUr AgkaN,
	pUtam tan'ta pori arai vEgkait
	taN kamaz putu malar n'ARum
15	am cil Oti Ay maTat takaiyE.

367. pAlai

	ilagku cuTar maNTilam pulam talaippeyarn'tu,
	pal katir mazukiya kal cEr amaiyattu,
	alan'talai mUtERu AN kural viLippa,
	manai vaLar n'occi mA cErpu vatiya,
5	munai uzai irun'ta am kuTic cIRUr,
	karug kAl vEgkaic cej cuval varakin
	miku patam n'iRain'ta toku kUTTu oru ciRai,
	kuvi aTi verukin paig kaN ERRai
	Un n'acaip piNavin uyagku paci kaLaiiyar,
10	taLir purai koTiRRin, ceRi mayir eruttin,
	katirtta cennik kavirp pU anna
	n'eRRic cEval aRRam pArkkum
	pullen mAlaiyum, initu manRamma
	n'al aka vana mulai aTaiyap pullutoRum
15	uyir kuzaippanna cAyal,
	ceyir tIr, in tuNaip puNarn'ticinOrkkE.

368. kuRijci

	toTutOR kAnavan cUTuRu viyan punam,
	kari puRam kazIiya perum pATTu Irattu,
	tOTu vaLar pain' tinai n'ITu kural kAkkum
	oN toTi makaLirkku UcalAka
5	ATu cinai ozitta kOTu iNar kajaliya
	kuRumpoRai ayalatu n'eTun' tAL vEgkai,
	maTa mayiR kuTumiyin, tOnRum n'ATan
	uyar varai marugkin kAn'taL am cOlaik
	kuragku aRivArA maram payil iRumpil,
10	kaTi cunait teLin'ta maNi maruL tIm n'Ir
	piTi puNar kaLiRRin emmoTu ATi,
	pal n'AL umparp peyarn'tu, cil n'AL
	kaziyAmaiyE vazivazip peruki,
	am paNai viLain'ta tEk kaT tERal
15	vaNTu paTu kaNNiyar makizum cIRUr,
	evankol vAzi, tOzi! kogkar
	maNi arai yAttu maRukin ATum
	uLLi vizavin anna,
	alar AkinRu, atu palar vAyp paTTE?

378. kuRijci

	'n'itiyam tujcum n'ivan'tu Ogku varaippin,
	vatuvai makaLir kUn'tal kamaz koLa,
	vagkUz ATTiya am kuzai vEgkai
	n'an pon anna n'aRun' tAtu utira,
5	kAmar pIli Ay mayil tOkai
	vERu vERu inatta varai vAz varuTaik
	kOTu muRRu iLan' takarp pATu viRan'tu, ayala
	ATu kaLa vayirin iniya Ali,
	pacum puRa men cIr ociya, vicumpu ukan'tu,
10	irug kaN ATu amait tayagka irukkum
	perug kal n'ATan pirin'ta pulampum,
	uTanRa annai amarA n'Okkamum,
	vaTan'tai tUkkum varu pani aRcirac
	cuTar kezu maNTilam azugka, jAyiRu
15	kuTa kaTal cErum paTar kUr mAlaiyum,
	anaittum, aTUu n'inRu n'aliya, ujaRRi,
	yAgganam vAzti?' enRi tOzi!
	n'IgkA vajcinam ceytu; n'at tuRan'tOr
	uLLAr Ayinum, uLenE avar n'ATTu
20	aL ilaip palavin kani kavar kaiya
	kallA man'ti kaTuvanOTu ukaLum
	kaTun' tiRal aNagkin n'eTum perug kunRattu,
	pATu in aruvi cUTi,
	vAn tOy cimaiyam tOnRalAnE.

388. kuRijci

	amma vAzi, tOzi n'am malai
	amai aRuttu iyaRRiya vev vAyt taTTaiyin,
	n'aRu virai Aram aRa eRin'tu uzuta
	uLaik kural ciRu tinai kavartalin, kiLai amal
5	peru varai aTukkattuk kurIi Oppi,
	Ogku iruj cilampin oL iNar n'aRu vI
	vEgkai am kavaTTiTai n'ivan'ta itaNattu,
	pon maruL n'aRun' tAtu Utum tumpi
	in icai OrA irun'tanamAka,
10	'mai Ir Oti maTa n'allIrE!
	n'ovvu iyaR pakazi pAyn'tena, puN kUrn'tu,
	evvamoTu van'ta uyar maruppu oruttal n'um
	punattuzip pOkal uRumO maRRu?' ena,
	cinavuk koL jamali ceyirttup puTai ATa,
15	collik kazin'ta val viR kALai
	cAn'tu Ar akalamum takaiyum mika n'ayan'tu,
	Igku n'Am uzakkum evvam uNarAL,
	n'annar n'ejcamoTu mayagki, 'veRi' ena,
	annai tan'ta mutu vAy vElan,
20	'em iRai aNagkalin van'tanRu, in' n'Oy;
	taNi marun'tu aRival' ennum Ayin,
	vinavin evanO maRRE 'kanal cina
	maiyal vEza mey uLampOka,
	UTTiyanna Un puraL ampoTu
25	kATTu mAn aTi vazi oRRi,
	vETTam cellumO, n'um iRai?' enavE?

398. kuRijci

	'izai n'ilai n'ekizn'ta evvam kUra,
	paTar mali varuttamoTu pala pulan'tu acaii,
	men tOL n'ekizac cAay, konRai
	UzuRu malarin pAz paTa muRRiya
5	pacalai mEni n'Okki, n'utal pacan'tu,
	innEm Akiya em ivaN aruLAn,
	n'ummOn ceyta koTumaikku, immenRu,
	alamaral mazaik kaN teN pani malka,
	n'anRu puRamARi akaRal, yAza n'in
10	kunRu kezu n'ATaRku en enappaTumO?
	karai poru n'Ittam! urai' enak kazaRi,
	n'innoTu pulattal ajci, avar malaip
	pal malar pOrttu, n'ANu mika oTugki,
	maRain'tanai kaziyum n'iR tan'tu celutti,
15	n'ayan aRat tuRattal valliyOrE,
	n'otumalALar; atu kaNNOTAtu,
	azal cinai vEgkai n'izal tavirn'tu acaii,
	mAri puRan'tara n'an'ti, Ariyar
	pon paTu n'eTu varai puraiyum en'tai
20	pal pUg kAnattu alki, inRu, ivaN
	cErn'tanai celinE citaikuvatu uNTO?
	kuya vari irum pOttup poruta puN kUrn'tu,
	uyagku piTi tazIiya matan azi yAnai
	vAgku amaik kazaiyin n'aralum, avar
25	Ogku malai n'ATTin varUuvOyE!