Ampal

36. marutam
pakuvAy varAaR pal vari irum pOttuk
koTu vAy irumpin kOL irai tuRRi,
Ampal mel aTai kiziya, kuvaLaik
kUmpu viTu pal malar citaiyap pAyn'tu, ezun'tu,
5
aril paTu vaLLai Ay koTi mayakki,
tUNTil vETTuvan vAgka vArAtu,
kayiRu iTu katac cEp pOla, matam mikku,
n'AL, kayam uzakkum pUk kEz Ura!
varu punal vaiyai vAr maNal akan tuRai,
10
tiru marutu Ogkiya viri malark kAvil,
n'aRum pal kUn'taR kuRun' toTi maTan'taiyoTu
vatuvai ayarn'tanai enpa. alarE,
koy cuval puravik koTit tErc ceziyan
AlagkAnattu akan talai civappa,
15
cEral, cempiyan, cinam kezu titiyan,
pOr val yAnaip polam pUN ezini,
n'Ar ari n'aRavin erumaiyUran,
tEm kamaz akalattup pularn'ta cAn'tin
irugkO vENmAn, iyal tErp porun'an, enRu
20
ezuvar n'al valam aTagka, oru pakal
muraicoTu veNkuTai akappaTuttu, urai cela,
konRu, kaLamvETTa jAnRai,
venRi koL vIrar Arppinum peritE!

talaimakaL parattaiyiR pirin'tu van'ta talaimakanoTu pulan'tu colliyatu. - maturai n'akkIrar

96. marutam
n'aRavu uN maNTai n'uTakkalin, iRavuk kalittu,
pUTTu aRu villin kUTTumutal teRikkum
pazanap poykai aTaikaraip pirampin
ara vAy anna am muL n'eTug koTi
5
aruvi Ampal akal aTai tuTakki,
acaivaral vATai tUkkalin, Utuulai
vicai vAgku tOlin, vIgkupu jekizum
kazaniam paTappaik kAjci Ura!
'oN toTi AyattuLLum n'I n'ayan'tu
10
koNTanai' enpa 'Or kuRumakaL' atuvE
cempoR cilampin, ceRin'ta kuRagkin,
am kaluz mAmai, aHtai tan'tai,
aNNal yAnai aTu pOrc cOzar,
veNNel vaippin paruvUrp paRan'talai,
15
iru peru vEn'tarum porutu kaLattu oziya,
oLiRu vAL n'al amark kaTan'ta jAnRai,
kaLiRu kavar kampalai pOla,
alar AkinRatu, palar vAyp paTTE.

tOzi vAyil maRuttatu. marutam pATiya iLagkaTugkO

196. marutam
n'eTug koTi n'uTagkum n'aRavu mali pAkkattu,
n'AL tuRaippaTTa mOTTu iru varAal
tuTikkaN kozug kuRai n'oTuttu, uNTu ATi,
vETTam maRan'tu, tujcum kozun'arkkup pATTi
5
Ampal akal ilai, amalai vej cORu
tIm puLip pirampin tiraLkani peytu,
viTiyal vaikaRai iTUum Ura!
toTukalam; kuRuka vAral tan'tai
kaN kavin azittatan tappal, teRuvara,
10
onRumozik kOcark konRu, muraN pOkiya,
kaTun' tErt titiyan azun'tai, koTug kuzai
annimijiliyin iyalum
n'in n'alat takuviyai muyagkiya mArpE.

parattaiyiR pirin'tu van'ta talaimakaRkuc kizatti colliyatu. - paraNar

256. marutam
piNagku aril vaLLai n'ITu ilaip potumpila
maTi tuyil munaiiya vaL ukir yAmai
n'oTi viTu kallin pOki, akantuRaip
pakuvAy n'iRaiya, n'ugkin kaLLin
5
n'ukarvAr arun'tu makizpu iyagku n'aTaiyoTu
tIm perum pazanam uzakki, ayalatu
Ampal mel aTai oTugkum Ura!
poyyAl; aRiven, n'in mAyam. atuvE
kaiyakappaTTamai aRiyAy; n'erun'ai
10
mai ezil uNkaN maTan'taiyoTu vaiyai
Er taru putup punal uritinin n'ukarn'tu,
parattai Ayam karappavum, ollAtu
kavvai AkinRAl, peritE; kANtakat
tol pukaz n'iRain'ta pal pUg kazani,
15
karumpu amal paTappai, perum peyark kaLLUr,
tiru n'utaR kuRumakaL aNi n'alam vavviya
aRanilALan,'aRiyEn' enRa
tiRan il vej cUL aRi kari kaTAay,
muRi Ar perug kiLai ceRiyap paRRi,
20
n'IRu talaippeyta jAnRai,
vIRu cAl avaiyattu Arppinum peritE.

tOzi talaimakaRku vAyil maRuttatu. - maturait tamizk kUttanAr kaTuvan maLLanAr