n'IrmuLLi

26. marutam
kUn muL muLLik kuvikulaik kazanRa,
mIn muL anna, veN kAl mA malar
poytal makaLir vizavu aNik kUTTum
av vayal n'aNNiya vaLam kEz Uranaip
5
pulattal kUTumO tOzi! alkal
perug katavu poruta yAnai maruppin
irumpu cey toTiyin Era Aki,
mAk kaN aTaiya mArpakam porun'ti
muyagkal viTAal ivai' ena mayagki,
10
'yAn Om' ennavum ollAr, tAm maRRu
ivai pArATTiya paruvamum uLavE; iniyE
putalvaR taTutta pAloTu taTaii,
titalai aNin'ta tEm koL men mulai
n'aRuj cAn'tu aNin'ta kEz kiLar akalam
15
vIgka muyagkal yAm vENTinamE;
tIm pAl paTutal tAm ajcinarE; AyiTaik
kavavuk kai n'ekizn'tamai pORRi, matavu n'aTaic
cevili kai en putalvanai n'Okki,
'n'allOrkku ottanir n'Iyir; iHtO
20
celvaRku ottanam, yAm' ena, mella en
makanvayin peyartan'tEnE; atu kaNTu,
'yAmum kAtalam, avaRku' enac cAay,
ciRu puRam kavaiyinanAka, uRu peyal
taN tuLikku ERRa pala uzu cej cey
25
maN pOl n'ekizn'tu, avaR kaluzn'tE
n'ejcu aRaipOkiya aRivinERkE?

talaimakan tOziyai vAyil vENTi, avaLAl tAn vAyil peRAtu,ARRAmaiyE vAyilAkap pukku, kUTiya talaimakan n'IkkattukkaN pukka tOzikkut talaimakaL colliyatu. - pANTiyan kAnappEreyil tan'ta ukkirapperuvazuti