321

	poRip puRap pUzin pOr val cEval
	mEn' tOl kaLain'ta tIm kOL veL eL
	cuLakiTai uNagkal cevvi koNTu, uTan
	vEnil kOgkin pUm pokuTTu anna
5	kuTan'tai am ceviya kOTTu eli ATTa,
	kali Ar varakin piRagku pIL oLikkum,
	van pula vaippinatuvE cenRu
	tin pazam pacIi ..........nanO, pANa!
	vAL vaTu viLagkiya cennic
10	ceru veg kurucil Ompum UrE.

322

	uzutu Ur kALai Uz kOTu anna
	kavai muL kaLLip pori araip porun'ti,
	putu varaku arikAl karuppai pArkkum
	pun talaic ciRAar vil eTuttu Arppin,
5	perug kaN kuRu muyal karug kalan uTaiya
	manRil pAyum van pulattatuvE
	karumpin en'tiram cilaippin, ayalatu.
	iruj cuval vALai piRazum AgkaN,
	taN paNai ALum vEn'tarkkuk
10	kaN paTai IyA vElOn UrE.

323

	pulippAR paTTa AmAn kuzavikkuc
	cinam kazi mUtAk kanRu maTuttu UTTum
	kA ... ... ... ... ..... ..... ...... ...... ..... kku
	uLLiyatu curakkum OmpA Ikai,
5	veL vEl Avam Ayin, oL vAL
	kaRaiyaTi yAnaikku allatu
	uRai kazippu aRiyA, vElOn UrE.

324

	verukku viTai anna vekuL n'Okkuk kayan' talai,
	puL Un tinRa pulavu n'ARu kaya vAy,
	veL vAy vETTuvar vIz tuNai makAar
	ciRiyilai uTaiyin curaiyuTai vAl muL
5	Uka n'uN kOl ceRitta ampin,
	valAar valvil kulAvarak kOli,
	parutti vElik karuppai pArkkum
	pun pulam tazIiya am kuTic cIRUr,
	kumiz uN veLLai paku vAy peyartta
10	veN kAz tAya vaN kAl pan'tar,
	iTaiyan pottiya ciRu tI viLakkattu,
	pANaroTu irun'ta n'ANuTai n'eTun'takai
	valam paTu tAnai vEn'tarkku
	ulan'tuzi ulakkum n'ejcu aRi tuNaiyE.

325

	kaLiRu n'IRu ATiya viTu n'ila marugkin,
	vampap perum peyal varain'tu corin'tu iRan'tena,
	kuzi koL cil n'Ir kurAal uNTalin,
	cERu kiLaittiTTa kaluz kaN URal
5	muRaiyin uNNum n'iRaiyA vAzkkai,
	muLavu mAt tolaicciya muzuccol ATavar
	uTumpu izutu aRutta oTug kAzp paTalaic
	cIRil munRil kURuceytiTumAr,
	koLLi vaitta kozu n'iNa n'ARRam
10	maRukuTan kamazum matukai manRattu,
	alan'talai iratti alagkupaTu n'Izal,
	kayan' talaic ciRAar kaNai viLaiyATum
	aru miLai irukkaiyatuvE ven vEl
	vEn'tu talaivarinum tAgkum,
15	tAgkA Ikai, n'eTun'takai UrE.

326

	Ur mutu vElip pAr n'aTai verukin
	iruL pakai verIiya n'Aku iLam pETai
	uyir n'aTukkuRRup pulA viTTu araRRa,
	ciRaiyum ceRRaiyum puTaiyun'aL ezun'ta
5	paruttip peNTin ciRu tI viLakkattu,
	kavirp pU n'eRRic cEvalin taNiyum
	aru miLai irukkaiyatuvE manaiviyum,
	vETTac ciRAar cEN pulam paTarAtu,
	paTappaik koNTa kuRun' tAL uTumpin
10	vizukku n'iNam peyta tayirk kaN vitavai,
	yANar n'allavai pANaroTu, orAgku
	varu virun'tu ayarum viruppinaL; kizavanum,
	aruj camam tataiyat tAkki, peruj camattu
	aNNal yAnai aNin'ta
15	pon cey OTaip perum paricilanE.

327

	erutu kAl uRAatu, iLaijar konRa
	cil viLai varakin pullen kuppai,
	toTutta kaTavarkkuk koTutta miccil
	pacitta pANar uNTu, kaTai tappalin,
5	okkal oRkam coliya, tan Urc
	ciRu pullALar mukattu avai kURi,
	varaku kaTan irakkum n'eTun' takai
	aracu varin tAgkum vallALannE.

328

	..........Tai mutal puRavu cErn'tirun'ta
	pun pulac cIRUr, n'el viLaiyAtE;
	varakum tinaiyum uLLavai ellAm
	iraval mAkkaLukku Iyat tolain'tana;
5	................. Tu amain'tananE;
	annan Ayinum, pANa! n'anRum
	veLLattiTum pAluL uRai toTa....
	kaLavup puLi anna viLai....
	..............vATu Un kozug kuRai
10	koy kural ariciyoTu n'ey peytu aTTu,
	tuTuppoTu civaNiya kaLik koL veN cORu
	uNTu, initu irun'ta pin
	... ... ... ... .... ... tarukuvan mAtO
	tALi mutal n'ITiya ciRu n'aRu mujjai
15	muyal van'tu kaRikkum munRil,
	cIRUr mannanaip pATinai celinE.

329

	il aTu kaLLin cil kuTic cIRUrp
	puTai n'aTu kallin n'AT pali UTTi,
	n'al n'IrATTi, n'eyn' n'aRaik koLIiya,
	magkul mAp pukai maRukuTan kamazum,
5	aru munai irukkaittuAyinum, vari miTaRRu
	aravu uRai puRRattu aRRE n'ALum
	puravalar punkaN n'OkkAtu, iravalarkku
	arukAtu Iyum vaNmai,
	uraicAl, n'eTun'takai Ompum UrE.

330

	vEn'tuTait tAnai munai keTa n'eritara,
	En'tu vAL valattan oruvan Aki,
	tan iRan'tu vArAmai vilakkalin, perug kaTaRku
	Azi anaiyanmAtO enRum
5	pATic cenROrkku anRiyum, vArip
	puraviRku ARRAc cIRUrt
	tonmai cuTTiya vaNmaiyOnE.