13

	'ivan yAr?' enkuvai Ayin, ivanE
	puli n'iRak kavacam pUm poRi citaiya,
	ey kaNai kizitta pakaTTu ezil mArpin,
	maRali anna kaLiRRu micaiyOnE;
5	kaLiRE, mun'n'Ir vazagku n'AvAy pOlavum,
	pal mIn n'AppaN tigkaL pOlavum,
	cuRavinattu anna vALOr moyppa,
	marIiyOr aRiyAtu, main'tu paTTanRE;
	n'Oy ilan Akip peyarkatil amma!
10	pazana majjai ukutta pIli
	kazani uzavar cUTToTu tokukkum,
	kozu mIn, viLain'ta kaLLin,
	vizu n'Ir vEli n'ATu kizavOnE.

127

	'kaLagkani anna karug kOTTuc cIRiyAzp
	pATu in panuval pANar uyttena,
	kaLiRu ilavAkiya pul arai n'eTu veLil,
	kAna majjai kaNanoTu cEppa,
5	Ikai ariya izai aNi makaLiroTu
	cAyinRu' enpa, Aay kOyil;
	cuvaikku initu Akiya kuyyuTai aTicil
	piRarkku Ivu inRit tam vayiRu arutti,
	uraicAl Ogku pukaz orIiya
10	muraicu kezu celvar n'akar pOlAtE.

128

	manRap palavin mAc cinai man'ti
	iravalar n'ARRiya vici kUTu muzavin
	pATu in teN kaN, kani cettu, aTippin,
	annac cEval mARu ezun'tu Alum,
5	kazal toTi Aay mazai tavaz potiyil
	ATumakaL kuRukin allatu,
	pITu kezu mannar kuRukalO aritE.

129

	kuRi iRaik kurampaik kuRavar mAkkaL
	vAgku amaip pazuniya tERal makizn'tu,
	vEgkai munRil kuravai ayarum,
	tIm cuLaip palavin, mA malaik kizavan
5	Aay aNTiran, aTu pOr aNNal
	iravalarkku Itta yAnaiyin, karavu inRu,
	vAnam mIn pala pUppin, AnAtu
	oru vazik karu vazi inRip
	peru veLLennin, pizaiyAtu mannE.

130

	viLagku maNik koTum pUN Aay! n'in n'ATTu
	iLam piTi oru cUl pattu InummO?
	n'innum n'inmalaiyum pATi varun'arkku,
	in mukam karavAtu, uvan'tu n'I aLitta
5	aNNal yAnai eNNin, kogkark
	kuTa kaTal OTTiya jAnRait
	talaippeyarttiTTa vElinum palavE!

131

	mazaik kaNam cEkkum mA malaik kizavan,
	vazaip pUg kaNNi vAy vAL aNTiran,
	kunRam pATinakollO
	kaLiRu mika uTaiya ik kavin peRu kATE?

132

	mun uLLuvOnaip pin uLLinEnE!
	Azka, en uLLam! pOzka, en n'AvE!
	pAz Urk kiNaRRin tUrka, en ceviyE!
	n'aran'tai n'aRum pul mEyn'ta kavari
5	kuvaLaip paij cunai paruki, ayala
	takarat taN n'izal piNaiyoTu vatiyum
	vaTa ticaiyatuvE vAn tOy imayam.
	ten ticai Aay kuTi inRAyin,
	piRazvatu mannO, im malar talai ulakE.

133

	mel iyal viRali! n'I n'al icai ceviyin
	kETpin allatu, kANpu aRiyalaiyE;
	kANTal vENTinaiAyin mANTa n'in
	virai vaLar kUn'tal varai vaLi uLara,
5	kalava majjaiyin kANvara iyali,
	mAri anna vaNmait
	tEr vEL Ayaik kANiya cenmE!

134

	'immaic ceytatu maRumaikku Am' enum
	aRa vilai vaNikan Aay allan;
	piRarum cAnROr cenRa n'eRi ena,
	Agkup paTTanRu, avan kaivaNmaiyE.

135

	koTuvari vazagkum kOTu uyar n'eTu varai,
	aru viTarc ciRu n'eRi ERalin, varun'ti,
	taTavaral koNTa takai mel otukkin,
	vaLaik kai viRali en pinnaL Aka,
5	pon vArn'tanna puri aTagku n'arampin
	vari n'avil panuval pulam peyarn'tu icaippa,
	paTumalai n'inRa payam kezu cIRiyAz
	olkal uLLamoTu oru puTait tazIi,
	pukazcAl ciRappin n'in n'al icai uLLi,
10	van'tanen en'tai! yAnE: enRum,
	manRu paTu paricilark kANin, kanRoTu
	kaRai aTi yAnai iriyal pOkkum
	malai kezu n'ATan! mA vEL Aay!
	kaLiRum anRE; mAvum anRE;
15	oLiRu paTaip puraviya tErum anRE;
	pANar, pATun'ar, paricilar, Agku avar,
	tamatu enat toTukkuvarAyin, 'ematu' enap
	paRRal tERRAp payag kezu tAyamoTu,
	anna Aka, n'in Uzi; n'innaik
20	kANTal vENTiya aLavai vENTAr
	uRu muraN kaTan'ta ARRal
	potu mIkkURRattu n'ATu kizavOyE!

241

	'tiN tEr iravalarkku, Itta, taN tAr,
	aNTiran varUum' enna, oN toTi
	vaccirat taTak kai n'eTiyOn kOyiluL,
	pOrppuRu muracam kaRagka,
5	Arppu ezun'tanRAl, vicumpinAnE.

374

	kAnal mEyn'tu viyan pulattu alkum
	pulvAy iralai n'eRRi anna,
	polam ilagku cenniya pARu mayir aviyat
	taN pani uRaikkum pularA jAgkar,
5	manRap palavin mAl varai porun'ti, en
	teN kaN mAk kiNai teLirppa oRRi,
	irug kalai Orppa icaii, kANvara,
	karug kOl kuRijci aTukkam pATa,
	pulip pal tAlip pun talaic ciRAar
10	mAn kaN makaLir, kAn tEr akanRu uvA
	cilaippAR paTTa muLavumAn kozug kuRai,
	viTar mukai aTukkattuc cinai mutir cAn'tam,
	pukar muka vEzattu maruppoTu, mUnRum,
	irug kEz vayap puli vari ataL kuvaii,
15	virun'tu iRai n'alkum n'ATan, em kOn,
	kazal toTi Aay aNTiran pOla,
	vaNmaiyum uTaiyaiyO? jAyiRu!
	kon viLagkutiyAl vicumpinAnE!

375

	alagku katir cuman'ta kalagkaR cUzi,
	n'ilaitaLarvu tolain'ta olku n'ilaip pal kAR
	potiyil oru ciRai paLLi Aka,
	muzAaraip pOn'tai ara vAy mA maTal
5	n'Arum pOzum kiNaiyoTu curukki,
	Erin vAzn'ar kuTimuRai pukAa,
	'Uz iran'tu uNNum uyaval vAzvaip
	puravu etirn'tu koLLum cAnROr yAr?' enap
	piracam tUgkum aRAa yANar,
10	varai aNi paTappai, n'al n'ATTup porun'a!
	poyyA Ikaik kazal toTi Aay!
	yAvarum inmaiyin kiNaippa, tAvatu,
	peru mazai kaTal paran'tAagku, yAnum
	oru n'in uLLi van'tanen; atanAl
15	pulavar pukkil Aki, n'ilavarai
	n'ilIiyar attai, n'IyE! onRE
	n'in inRu vaRuvitu Akiya ulakattu,
	n'ilavanmArO, puravalar! tunni,
	periya Otinum ciRiya uNarAp
20	pITu inRu perukiya tiruvin,
	pATu il, mannaraip pATanmAr, emarE!